Jovano 11
11
O Lazar merel
1Varesavo manuš po alav Lazar sas nasvalo. Vo sas andar e Vitanija, andar o gav kaj trajilas e Marija thaj laći phen e Marta. 2E Marija sas okoja manušnji savi čhorela mirisno ulje pe Gospodešće pungre thaj khosela len, pire balenca. O Lazar savo sas nasvalo sas lako phral. 3Gajda e pheja, e Marija thaj e Marta, poručisardine e Isusešće: “Gospode, nasvalo si okova saves tu volis.”
4Kana o Isus godova ašundas, phendas: “Akava nasvalipe či avela po meripe, već pe slava e Devlešće, te kroz late proslavilpe o Čhavo e Devlesko.” 5O Isus volilas e Marta, laće pheja thaj lenđe phrale e Lazare. 6Ali kana o Isus ašundas kaj si o Lazar nasvalo, ačhilo okote kaj sas još duj đes. 7Askal phendas pire učenikonenđe: “Hajde džas palem ande Judeja!”
8A e učenikurja phendine lešće: “Sikavneja, či nakhlo but sar e židovske vođe kamenas okote te mudaren tut e barenca, a tu palem kames te džas inća?”
9A o Isus phendas: “Naj li o đes lungo dešuduj saturja? Ko phirel e đeseja, godova či spotaknilpe te perel, kaj si les o svetlo akale themesko. 10Ali, ko phirel e raćava, godova spotaknilpe thaj perel, kaj naj les svetlo te osvetlil lešće o drom.” 11Phendas godova thaj lijas te mothol lenđe majdur: “Amaro drugari o Lazar sovljardilo, ali me džava te džungavav les.”
12E učenikurja phendine pe godova: “Gospode, ako sovel, značil kaj sastola.” 13Ali o Isus gndilas pe lesko smrto, a e učenikurja haćardine kaj o Lazar čače sovel.
14Askal o Isus jasno mothodas lenđe: “O Lazar mulo. 15Thaj zbog tumende si manđe drago kaj naj semas okote kaj akana paćana. Ali hajde akana džas leste!”
16Pe godova o Toma, saves akharenas Blizanco, phendas aver učenikonenđe: “Hajde vi amen te meras lesa!”
17Kana o Isus avilo ande Vitanija, phendine lešće kaj o Lazar pašljol već štar đes mulo ando limori. 18A e Vitanija sas dur katar o Jerusalim varekaj majcara katar trin kilometra, 19a e but Židovurja aviline okotar ke Marta thaj ke Marija te utešin len zbog lengo phral. 20Kana e Marta ašundas kaj o Isus avel, đeli angle leste, a e Marija ačhili ćhere. 21E Marta phendas e Isusešće: “Gospode, te avilanas akate, mungro phral či mulosas. 22Ali me akana džanav kaj o Del dela tut sa so manđes lestar.”
23A o Isus phendas laće: “Ćiro phral uštela andar e mule.”
24A e Marta phendas lešće: “Džanav kaj uštela andar e mule ando Poslednjo đes kana vi aver uštena.”
25O Isus phendas laće: “Me sem o vaskrsenje thaj o trajo. Ko paćal ande mande, ako vi merela, trajila. 26Thaj kogod trajil thaj paćal ande mande, nikada či merela. Paćas li ande gadava, Marta?”
27Voj phendas: “Ej Gospode, paćav kaj san tu o Hristo, e Devlesko Čhavo savo trubuja te avel pe phuv.” 28Kana phendas godova, đeli thaj akharda pire pheja e Marija pe rig thaj phendas laće: “O Sikavno si akate thaj akharel tut.” 29Kana e Marija godova ašundas, brzo uštili thaj teljardas leste.
30A o Isus još či dija ando gav, već ačhilo po than kaj malada les e Marta. 31A e Židovurja save sas e Marijasa ando ćher thaj tešinas lat, kana dikhline e Marija kaj ando siđaripe uštili thaj inkljisti te varekaj džal, teljardine pale late, kaj gndinas kaj džal po limori te okote rovel. 32Kana e Marija avili dži ko than kaj sas o Isus thaj kana dikhla les, peli pe koča angle leste thaj phendas: “Gospode, te tu avilanas akate, mungro phral či mulosas!”
33Kana o Isus dikhla e Marija thaj e Židoven save avile lasa, sar roven, uznemirisajlo thaj sas lešće pharo ando ilo. 34Askal phučla len: “Kaj čhutine e Lazare?”
Phendine lešće: “Gospode, av thaj dik.” 35E Isusešće askal teljardine e jasva. 36A e Židovurja phendine: “Dićhen, kozom volilas les!” 37A varesave maškar lende phendine: “Zar vo, savo e kore manušešće boldas o vido, našti ćerda te o Lazar na merel?”
O Isus vazdel e Lazare andar e mule
38Askal o Isus palem but uznemirisajlo thaj đelo pe Lazaresko limori savo sas ćerdo ande pećina, a po ulaz sas čhutino o baro bar. 39O Isus phendas: “Len majdur o bar!” A e Lazarešći phen e Marta phendas: “Gospode, moraš kaj već zurale khandel, kaj već si štar đes ando limori!”
40O Isus phendas laće: “Či li phendem tuće kaj dićheja e slava e Devlešći ako paćas?” 41Askal spidine o bar majdur, a o Isus vazda pire jakha ando nebo thaj phendas: “Dade, najs tuće kaj ašundan man ande molitva. 42Džanav kaj uvek ašunes man kana moliv man tuće, ali akava phendem zbog o them savo ačhel akate, te šaj paćan kaj tu bičhaldan man.” 43Kana o Isus godova phendas, zurale čhuta muj: “Lazare, inklji avri!” 44O mulo Lazar inkljisto. Lešće pungre thaj lešće vas sas motime ande zavoje, a lesko muj sas učhardo e laneno čaršapeja. O Isus phendas lenđe: “Putren godova lestar thaj mućen les te džal!”
Zavera protiv o Isus
(Mt 26,1–5; Mk 14,1–2; Lk 22,1–2)
45Kana e but Židovurja save avile ke Marija, dikhline so o Isus ćerda teljardine te paćan ande leste. 46Ali varesave katar godola manuša đele ke fariseja thaj mothodine lenđe so o Isus ćerda. 47Askal e šorvale rašaja thaj e fariseja ćidine e manušen andar o Baro veće thaj phendine: “So te ćeras? Akava manuš ćerel but čudesne znakurja. 48Te muklam les te nastavil agajda, savora ačhena te paćan ande leste. Askal avena e Rimljanurja thaj uniština vi amaro Hramo thaj vi amaro them.”
49A jek lendar, o Kajafa, savo sas godova brš baro rašaj, phendas lenđe: “Khanči tumen či džanen! 50Zar či haćaren kaj si majlačhe te jek manuš merel palo them, nego te sa amaro them avel mudardo?”
51O Kajafa či phendas godova korkoro pestar, nego sar vo sas godova brš baro rašaj, gajda prorokuisarda kaj o Isus merela palo sasto židovsko them. 52Thaj na samo palo židovsko them, nego vi pale godova te ćidel e Devlešće rspime čhavren te aven sago jek.
53Godova đes e židovske vođe odlučisardine te mudaren e Isuse. 54Andar godova o Isus majbut či sikadolas maškar e židovske vođe, nego đelotar okotar ando krajo paše ke pustinja, ando gav savo akhardolas Efrem. Okote ačhilo e učenikonenca.
55A sas paše o židovsko prazniko Pasha thaj e but Židovurja andar pire krajurja aviline ando Jerusalim, te obredno šilaven pe majsigo nego so avel o prazniko Pasha. 56Askal rodenas e Isuse thaj dok ačhenas ando Hramo phučenas jek avres: “So gndin? Dali avela pe Pasha?” 57A e šorvale rašaja thaj e fariseja već dine naredba te svako ko džanel kaj si o Isus, te godova javin, te šaj astaren les.
Currently Selected:
Jovano 11: RČB
Highlight
Share
Copy
Want to have your highlights saved across all your devices? Sign up or sign in
