Jovano 10
10
O lačho pastiri thaj lešće bakhre
1O Isus majdur motholas: “Čačes, čačes phenav tumenđe: Ko či del ke bakhre kroz o vudar, nego čordane preko zido, čor si thaj razbojniko. 2A ko del kroz o vudar, pastiri si e bakhrengo. 3O stražari, savo ačhel po vudar, putrel lešće, a e bakhre ašunen lesko glaso. Vo pire bakhren akharel po alav thaj inkalel len avri. 4Kana inkalel pire bakhren, džal angle lende, a e bakhre džan pale leste, kaj pindžaren lesko glaso. 5E bakhre nikada či džana pale okova saves či pindžaren, nego našen lestar, kaj či pindžaren lesko glaso.”
6O Isus phendas lenđe akaja paramiči, ali von či haćardine so kamlas te phenel lenđe. 7Zato o Isus još phenelas lenđe: “Čačes, čačes phenav tumenđe: me sem o vudar e bakhrenđe. 8Savora save aviline majsigo mandar čora si thaj razbojnikurja. Ali e bakhre či čhutine kan lende. 9Me sem o vudar. Ko del prekal mande spasila pes. Dela andre thaj inkljela avri thaj araćhela zeleno čar pe savi čarjola. 10O čor avel samo te čorel, del čhurjasa thaj mudarel. Me avilem te dav len trajo thaj godova trajo te avel len ando izobilje.
11Me sam o lačho pastiri, a o lačho pastiri del piro trajo pale pire bakhre. 12O najamniko naj pastiri; e bakhre naj lešće. Zato kana dićhel e ruve kaj avel, mućel e bakhren thaj našel. A o ruv askal napadnil len thaj e bakhre raspršin pes. 13Kaj, vo si samo najamniko thaj les naj briga pale bakhre.
14Me sem o lačho pastiri. Pindžarav mungre bakhren thaj von pindžaren man. 15Isto gajda, mungro Dad pindžarel man thaj me pindžarav mungre Dade. Me mungro trajo dav pale bakhre. 16Si man vi aver bakhre, save naj andar akava stado. Moraš vi len te anav thaj vi von ašunena mungro glaso thaj avena jek stado jećhe pastiresa. 17Zato o Dad volil man, kaj mungro trajo dav te palem lav les palpale. 18Khonik či lel mungro trajo mandar, nego me korkoro mandar dav les. Si man pravo te dav mungro trajo, thaj si man pravo palem vi te lav les. Gajda zapovedisardas manđe o Dad.”
19Kana phendas godova, e Židovurja palem podelisajle ande pire gndimate. 20But lendar phenenas: “Ande leste si o bilačho duho thaj buncil. Sostar čhon kan leste?” 21A aver phenenas: “Pa či ćerel svato sago kaj si o bilačho duho ande leste. Zar o bilačho duho šaj boldasas e kore manušešće o vido?”
O Isus phenel kaj si e Devlesko Čhavo
22Ando Jerusalim askal slavilas pe o Prazniko kana posvetilas pe o Hramo thaj sas o ivend. 23O Isus phirelas kroz o Hramo, pe Solomonešći terasa. 24A e židovske vođe okružisardine les thaj phučline les: “Dži kaj inćareja amen ando bi džanglipe? Ako san tu o Hristo, askal phen amenđe godova!”
25O Isus phendas lenđe: “Već phendem tumenđe ali tumen či paćan manđe. E dela save ćerav ando alav mungre Dadesko von svedočin pale mande. 26Ali tumen či paćan kaj naj sen katar mungre bakhre. 27Mungre bakhre ašunen mungro glaso, me pindžarav len thaj von džan pale mande. 28Me dav len večno trajo thaj von či propadnina nikada, niti vareko otmila len andar mungre vas. 29Mungro Dad, savo dija len manđe, majbaro si savorendar, thaj khonik našti otmil len andar e Dadešće vas. 30Me thaj o Dad sam jek.”
31Askal e Židovurja palem line e bara te čhuden pe ande leste te mudaren les. 32A o Isus phendas lenđe: “Sikadem tumenđe but lačhe dela save aven katar o Dad. Pale save katar godola lačhe dela kamen te čhuden tumen e barenca ande mande?” 33E židovske vođe phendine lešće: “Či kamas te čhudas men e barenca ande tute pale lačhe dela, nego kaj hulis po Del. Obično san manuš, a ćeres tut kaj san o Del.” 34O Isus phendas lenđe: “Či li ande tumaro zakon ramol kaj o Del phendas: ‘Tumen sen devla!’ 35Ako akhardas ‘devlenca’ okolen savenđe si e Devlesko alav uputime – a o Sveto lil našti menjilpe – 36sar šaj askal pale okova saves o Dad posvetisardas thaj bičhaldas po them te phenen: ‘Hulis po Del’ zato kaj phendem kaj sem Čhavo e Devlesko? 37Ako či ćerav e dela mungre Dadešće, na paćan manđe. 38Ali ako čačes ćerav len, paćan barem ande godola dela kana već či paćan manđe, gajda konačno džanena kaj si o Dad ande mande thaj me ande leste.” 39Askal von palem kamline te astaren les, ali vo izmaknisajlo andar lenđe vas.
40O Isus askal palem bolda pe pe aver rig ke reka jordanošći, po than kaj o Jovano varekana bolelas, thaj okote ačhilo. 41A o but o them avilo leste thaj phendine: “O Jovano či ćerda ni jek čudesno znako, ali sa so phendas pale akava manuš, si čače.” 42Thaj okote but džene paćajine ande leste.
Currently Selected:
Jovano 10: RČB
Highlight
Share
Copy
Want to have your highlights saved across all your devices? Sign up or sign in
