Jovan 4
4
O Isus hem i Samarijanka
1Kad o Isus dodžanđa so o fariseja šunde so ov ćerela hem krstini više učenikonen nego o Jovan, 2– iako korkoro o Isus na krstinđa, nego lesere učenici – 3dželo tari regija Judeja hem irinđa pe ani regija Galileja.
4Morandilo te nakhel maškari regija Samarija. 5Alo đi e samarijakoro gav savo vičini pe Sihar, paše uzalo imanje savo o Jakov dinđa ple čhavese e Josifese. 6Adari inele e Jakovesoro bunari, i o Isus, umorno oto but phiriba, beštino uzalo leste. Inele paše đi ko dešu duj o sati diveste.
7I kad jekh Samarijanka ali te dolel pani, o Isus phenđa laće: “De man te pijav.” 8(Tegani o Isus inele korkoro, adalese so lesere učenici džele ko gav te činen hajbnase.)
9A i Samarijanka phenđa lese: “Sar adava tu kova injan Jevrejco rodeja mandar e Samarijankatar te dav tut pani?” (Adalese so o Jevreja na mešinde pe e Samarijanconencar).
10O Isus phenđa laće: “Te džane ine savo daro e Devle isi tuće hem kova injum me so rodava tutar te de man te pijav, ka rode mandar ine hem me ka dav tut o dživdo pani.”
11I đuvli phenđa lese: “Gospodarona, nane tut ni soja te dole pani, a o bunari but hor. Kotar će onda adava dživdo pani? 12Tu li mislineja da injan po baro amare pradadestar e Jakovestar, kova dinđa amen akava bunari hem savestar pilja ov hem lesere čhave hem lesiri stoka?”
13O Isus phenđa laće: “Đijekh kova pijela akava pani, palem ka ovel žedno, 14a kova pijela o pani savo me ka dav le, nikad više naka ovel žedno. O pani savo ka dav le ka ovel ano leste izvor e panjesoro savo dela večno dživdipe.”
15Tegani i đuvli phenđa lese: “Gospodarona, molinava tut, de man adava pani te na ovav više žedno hem te na avav više akate te dolav pani!”
16O Isus phenđa laće: “Dža vičin te rome hem ava palem akari.”
17I đuvli phenđa lese: “Nane man rom.”
Tegani o Isus phenđa laće: “Šukar phenđan so nane tut rom, 18adalese so ine tut pandž roma, a akava kasar akana injan nane to rom. Čače šukar phenđan.”
19A i đuvli phenđa lese: “Gospodarona, dikhava da injan proroko. 20Amare pradada slavinde e Devle ki akaja gora, a tumen o Jevreja phenena da e Devle valjani te slavini pe ano Jerusalim.”
21A o Isus phenđa laće: “Đuvlije, verujin maje, avela o vreme kad naka slavinen e Dade samo akate ili ano Jerusalim. 22Tumen o Samarijanci na džanen kas slavinena, a amen o Jevreja džanaja kas slavinaja, adalese so o spasenje avela prekalo Jevreja. 23Ali avela o vreme – hem već alo – kad o čačikane slavljenici ka slavinen e Dade ano duho hem ano čačipe. Esavke slavljenikonen o Dad rodela. 24O Develi duho, hem okola kola slavinena le, valjani te slavinen le ano duho hem ano čačipe.”
25A i đuvli phenđa lese: “Džanav da o Mesija (vičime Hrist) ka avel. Kad ka avel ov, sa ka objasnini amenđe.”
26Tegani o Isus phenđa laće: “Me injum adava, kova vaćerava tuja.”
27I ko adava momenti ale lesere učenici hem inele začudime so o Isus vaćeri e đuvljaja. Ali nijekh na pučlja le: “So mangeja olatar?” ili: “Sose vaćereja olaja?”
28Tegani i đuvli ačhavđa plo bokali uzalo bunari, i dželi ko gav hem phenđa e manušenđe: 29“Aven te dikhen e manuše kova phenđa maje sa so ćerđum. Te nane ov o Hrist?”
30I o manuša iklile taro gav hem lelje te džan nakoro Isus.
31Sar ovela ine adava, o učenici molinena ine e Isuse vaćerindoj: “Rabi, ha maro!”
32A ov phenđa lenđe: “Man isi te hav hajba zako savo tumen na džanen.”
33Tegani o učenici phende jekh averese: “Te na anđa lese neko nešto te hal?”
34O Isus phenđa lenđe: “O hajbai mlo te ćerav i volja Okolesiri kova bičhalđa man hem te ćerav đi o kraj i buti savi dinđa man. 35Na li tumen phenena: ‘Pana štar masek đi o čediba i žetva?’ Ače, vaćerava tumenđe: phraven tumare jaćha hem dikhen o njive – spremnai zako čediba. 36Okova kova čedela već primini i plata hem čedela o bijandipe zako večno dživdipe, te šaj hem o sejači te radujini pe zajedno okoleja kova čedela. 37Ađahar pherđola okova vaćeriba: ‘Jekh sejini, a o dujto čedela.’ 38Me bičhalđum tumen te čeden adari kaj na ćerđen buti. Avera ćerde phari buti, a tumen čedinđen o plodija save iklile oti lengiri buti.”
39But Samarijanci taro adava gav poverujinde ano Isus zbog o lafija e đuvljakere koja svedočinđa: “Ov phenđa maje sa so ćerđum!”
40A kad o Samarijanci ale koro Isus, zamolinde le te ačhol koro lende, hem ov ačhilo adari duj dive. 41Hem pana but manuša poverujinde ano leste zbog lesere lafija.
42Tegani o manuša taro gav phende e đuvljaće: “Akana više na verujinaja zbog adava so tu vaćerđan, nego so korkore šunđam, hem džanaja soi ov čače o Spasitelji e svetosoro.”
O Isus sasljari e službenikosere čhave
43Palo adala duj dive, o Isus dželo adathar ki Galileja. 44(Korkoro o Isus tvrdinđa da o proroko nane cenime ano plo than kaj barilo.) 45Kad reslo ki Galileja, o Galilejci priminde le šukar, samo adalese so dikhle o čudesija save ćerđa ano Jerusalim zako prazniko Pasha, adalese so hem on inele adari.
46I ađahar o Isus palem alo ani Kana e Galilejakiri, kaj ćerđa ine o pani ani mol. A inele jekh službeniko e carosoro kasoro čhavo pašljola ine namborme ani diz Kafarnaum. 47Kad šunđa so o Isus alo tari Judeja ki Galileja, alo koro leste hem zamolinđa le te avel ano Kafarnaum hem te sasljari lesere čhave kovai anglo meriba.
48Tegani o Isus phenđa lese: “Tumen đikote na dikhena znakija hem čudesija, na verujinena.”
49O službeniko phenđa lese: “Gospodarona, molinava tut, ava sar pana na mulo mlo čhavo!”
50O Isus phenđa lese: “Dža, to čhavo ka živini.”
O manuš poverujinđa ano adava so o Isus phenđa lese hem dželo.
51A odrumal resle le lesere sluge hem phende lese dai lesoro čhavo dživdo. 52Ov pučlja len kad lesere čhavese lelja te ovel po šukar, a on phende lese: “I jag muklja le erati ko jekh o sati diveste.”
53Tegani e čhavesoro dad setinđa pe so baš ko adava sati o Isus phenđa lese: “To čhavo ka živini.”
I ov hem sa lesere čherutne poverujinde ano Isus.
54Adava inele dujto čudesno znako savo o Isus ćerđa ani Galileja. Ćerđa le kad alo tari Judeja.
Currently Selected:
Jovan 4: RAB
Highlight
Share
Copy
Want to have your highlights saved across all your devices? Sign up or sign in
