Jovan 2
2
O Isus ćerela o pani ani mol
1Ko trito dive inele bijav ano gav Kana ani regija Galileja. Adari inele e Isusesiri daj, 2a ko bijav inele vičime hem o Isus hem lesere učenici.
3Kad na ačhili više mol ko bijav, e Isusese phenđa lesiri daj: “Nane len više mol.”
4O Isus phenđa laće: “So isi man adaleja, đuvlije? Mlo vreme pana na alo.”
5Lesiri daj phenđa e slugenđe: “Ćeren sa so vaćeri tumenđe!”
6Adari inele šov bare bokalija oto bar, a ko đijekh bokali resela ine taro oftovardeš đi ko šelubiš litarja. O Jevreja koristinena len ine zako pumaro adeti e thojbnasoro.
7O Isus phenđa e slugenđe: “Pheren panjeja o bokalija”, hem on pherde len đi o muj.
8Kad ćerde adava, phenđa lenđe: “Akana dolen hari hem legaren e manušese kovai odgovorno zaki gozba.” I on ćerde ađahar.
9Adava manuš probinđa o pani savo ulo mol, i adalese so na džanđa kotari adaja mol – iako džande o sluge kola dolinde pani – vičinđa e mladoženja 10hem phenđa lese: “Đijekh manuš prvo ikali i šuži mol, a kad o gostija mačona, ikali i mol savi nane edobor šuži. A tu garavđan i najšuži mol sa đi akana.”
11Ađahar o Isus plo prvo čudesno znako ćerđa ani Kana e Galilejakiri, hem mothovđa pli slava, i lesere učenici verujinde ano leste.
12Palo bijav o Isus, pe dajaja, ple phraljencar hem ple učenikonencar, huljilo ani diz Kafarnaum. Adari ačhile nekobor dive.
O Isus na mukela te biknel pe ano Hram
13Avela ine paše e jevrejengoro prazniko Pasha, i o Isus dželo ko Jerusalim. 14Ano boro e Hramesoro o Isus arakhlja manušen sar biknena guruven, bakren hem goluben. Arakhlja hem okolen so menjinena o love sar bešena adari. 15I ćerđa bič oto dorikha hem sarijen kola biknena, sa e bakrencar hem e guruvencar, ikalđa taro Hram. Rasfrdinđa o love okolengere so menjinena len ine, hem preirinđa lengere astalja. 16Okolenđe kola biknena goluben phenđa: “Legaren adava akatar! Ma ćeren pijaca mle Dadesere čherestar!”
17Lesere učenici setinde pe soi pisime ko Sveto lil:
“O mangipe zako to čher ka thabljol ana mande sar jag.”
18Tegani e jevrejengere vođe pučle e Isuse: “Save čudesnone znakoja ka dokažine amenđe da isi tut pravo te ćere sa akava?”
19O Isus phenđa lenđe: “Peraven akava Hram hem me palem ka vazdav le zako trin dive.”
20A on phende: “Sarandu šov berš valjanđa te ćerel pe akava Hram, a tu ka vazde le zako trin dive?”
21Ali o Hram savestar o Isus vaćerđa inele lesoro telo. 22Kad uštino taro mule, lesere učenici setinde pe so phenđa adava, i poverujinde ano Sveta lila hem ano lafija save o Isus vaćerđa.
23A sa đikote inele ano Jerusalim zako prazniko Pasha, but džene dikhle o čudesna znakija save ćerela ine hem poverujinde ano leste. 24Ali korkoro o Isus na verujinđa lenđe, adalese so džanđa sarijen. 25Niko na valjanđa te vaćeri lese savoi o manuš, adalese so ov korkoro džanđa soi ano manuš.
Currently Selected:
Jovan 2: RAB
Highlight
Share
Copy
Want to have your highlights saved across all your devices? Sign up or sign in
