Jovan 18
18
O Isus ovela izdajime hem dolime
1Kad završinđa i molitva, o Isus dželo ple učenikonencar ki aver strana oto potok Kedron. Adari inele jekh vrt ko savo ov hem lesere učenici đerdinde. 2A o izdajniko o Juda džanđa zako adava than adalese so o Isus but puti arakhi pe ine adari ple učenikonencar. 3I o Juda alo adari hem anđa peja četa e rimesere vojnikonendar hem e hramesere stražaren, kolen bičhalde o šerutne sveštenici hem o fariseja. Pumencar legarde baklje, svetiljke hem oružje.
4A o Isus, adalese so džanđa sa so ka ovel oleja, iklilo hem pučlja len: “Kas rodena?”
5On phende lese: “E Isuse taro Nazaret!”
A ov phenđa lenđe: “Me injum.”
Olencar terdino hem o Juda, lesoro izdajniko. 6A kad phenđa lenđe: “Me injum”, cidinde pe napalal hem pele ki phuv.
7Tegani o Isus palem pučlja len: “Kas rodena?”
A on phende lese: “E Isuse taro Nazaret.”
8O Isus phenđa lenđe: “Phenđum tumenđe: Me injum. I, adalese so man rodena, muken akalen te džan.” 9Adava phenđa sar te pherđol okova so angleder phenđa: “Na našalđum nijekhe okolendar kolen dinđan man.”
10A e Simone Petre inele mači, i ikalđa le, khuvđa e prvosveštenikosere sluga hem čhinđa lesoro desno kan. E slugasoro anav inele Malho.
11O Isus phenđa e Petrese: “Irin o mači ano korice! Sar te na pijav oti čaša e patnjaja savi dinđa man mlo Dad?”
E Isuse anena anglo prvosvešteniko
12Tegani i četa, olakoro naredniko hem e hramesere stražarija dolinde e Isuse hem phandle le. 13Najangle legarde le koro Ana e Kajafasoro sastro. O Kajafa inele prvosvešteniko adava berš. 14A o Kajafa inele adava kova savetujinđa e jevrejengere vođen dai po šukar jekh manuš te merel zako sa o narodo.
O Petar prvo puti odreknini pe e Isusestar
15Palo Isus pođinde o Simon Petar hem pana jekh učeniko. Adale učeniko o prvosvešteniko džanđa, i ov e Isuseja đerdinđa ko boro e prvosveštenikosoro, 16a o Petar ačhilo avri angli kapija. Tegani iklilo okova dujto učeniko, kole o prvosvešteniko džanđa, vaćerđa e sluškinjaja koja pazini ine anglo udar, i anđa e Petre andre.
17Tegani adaja sluškinja pučlja e Petre: “Na li hem tu injan jekh akale manušesere učenikonendar?”
O Petar phenđa: “Na injum.”
18A o sluge hem o stražarija tharde jag hem terdine adari te tačon, adalese so inele šil, i ađahar hem o Petar terdino olencar hem tačola ine.
O prvosvešteniko o Ana ispitujini e Isuse
19A zako adava vreme o prvosvešteniko ispitujini ine e Isuse lesere učenikonendar hem lesere sikavibnastar.
20O Isus phenđa lese: “Me javno vaćerđum e manušenđe. Uvek sikavđum ani sinagoga hem ano Hram, kaj sa o Jevreja čedena pe, hem ništa na vaćerđum ano garavdipe. 21Sose man pučeja? Puč okolen kola šunde so vaćerđum lenđe. On džanen so vaćerđum.”
22Kad phenđa adava, khuvđa le šamarka jekh sluga kova adari terdino hem phenđa: “Ađahar li vaćeri pe e prvosveštenikoja?”
23O Isus phenđa lese: “Te phenđum nešto pogrešno, dokažin dai adava pogrešno. Ali te phenđum nešto šukar, sose khuveja man?”
24Tegani o Ana, phandle, bičhalđa le koro prvosvešteniko Kajafa.
O Petar dujto hem trito puti odreknini pe e Isusestar
25Sar o Simon Petar terđola hem tačola ine, pučle le: “Te na injan hem tu jekh olesere učenikonendar?”
A ov hovavđa: “Na injum.”
26Jekh sluga e prvosveštenikosoro – o rođako okolesoro kasoro kan o Petar čhinđa – phenđa: “Na li dikhljum tut oleja ano vrt?”
27A o Petar palem hovavđa hem odmah o bašno đilabđa.
O Isus anglo e rimesoro upravniko o Pilat
28Rano sabajle e Isuse legarde taro e Kajafasoro čher ki palata e Pilatesiri. E jevrejengere vođe na đerdinde ki palata, sar te na oven nečista palo pumaro adeti, adalese so mangle te han i pashalno večera.
29Adalese o Pilat iklilo anglo lende hem pučlja len: “Zako so optužinena akale manuše?”
30A on phende lese: “Te na ovel ine krivo akava manuš, amen naka preda le ine tute.”
31Tegani o Pilat phenđa lenđe: “Len le tumen, i sudinen lese palo tumaro zakoni.”
A o Jevreja phende lese: “Amen na tromaja nikas te mudara.” 32Akava ulo sar te pherđol okova so o Isus phenđa e meribnastar saveja valjanđa te merel.
33O Pilat tegani palem đerdinđa ki palata, vičinđa e Isuse, hem pučlja le: “Tu li injan o caro e Jevrejengoro?”
34A o Isus phenđa: “Vaćereja li adava korkoro tutar, ili avera vaćerde će mandar?”
35O Pilat phenđa: “Me li injum Jevrejco? To narodo hem o šerutne sveštenici predinde tut mande. So ćerđan?”
36O Isus phenđa lese: “Mlo carstvo nane akale svetostar. Te ovel ine mlo carstvo akale svetostar, mle sluge ka maren pe ine te na ovav predime e jevrejengere vođenđe. Ali mlo carstvo nane akatar.”
37Tegani o Pilat phenđa: “Znači, tu injan caro!”
A o Isus phenđa: “Ađahari sar so pheneja: Injum caro. Me akalese bijandiljum hem akalese aljum ko sveto: te svedočinav zako čačipe. Đijekh kovai oto čačipe, šunela mlo glaso.”
38A o Pilat pučlja le: “Soi o čačipe?”
Kad adava phenđa, o Pilat palem iklilo anglo e jevrejengere vođe, i phenđa lenđe: “Na arakhava nisavi krivica upro leste.
39Ali tumen isi jekh adeti zaki Pasha te mukav tumenđe jekhe phandle. Mangena li te mukav tumenđe e jevrejengere caro?”
40A on vičinde: “Na ole, nego e Varava!”
A o Varava inele razbojniko.
Currently Selected:
Jovan 18: RAB
Highlight
Share
Copy
Want to have your highlights saved across all your devices? Sign up or sign in
