Jovan 10
10
O Isusi o šukar pastiri
1“Čače, čače vaćerava tumenđe, ko na đerdini ko udar kotei ogradime e bakrenđe, nego preskočindoj đerdini, ovi čor hem razbojniko. 2A ko đerdini ko udar, ovi e bakrengoro pastiri. 3Olese o stražari phravela o udar, a o bakre šunena lesoro glaso. Ov ple bakren vičini palo anav hem ikali len avri. 4Kad ikali sa ple bakren, džala anglo lende, a o bakre džana palo leste, adalese so pendžarena lesoro glaso. 5Naka džan palo abanđija, nego ka našen olestar, adalese so na pendžarena o glaso e abanđijasoro.”
6O Isus vaćerđa lenđe adaja priča, ali on na halile so manglja te phenel lenđe adaleja.
7Adalese o Isus palem vaćerđa lenđe: “Čače, čače, vaćerava tumenđe, me injum o udar e bakrenđe. 8Sare kola ale angleder mande, oni čora hem razbojnici, ali o bakre na šunde len. 9Me injum o udar. Ko đerdini prekala mande, ka ovel spasime. Ka đerdini hem ka ikljol hem ka arakhi hajbnase. 10O čor avela samo te čorel, te mudari hem te uništini. Me aljum e manušen te ovel dživdipe, hem adava dživdipe ano izobilje.
11Me injum o šukar pastiri. O šukar pastiri dela plo dživdipe zako bakre. 12A o manuš kovai platime te pazini e bakren – adalese so nane pastiri hem o bakre nane olesere – kad dikhela e ruve sar avela, ačhaj e bakren hem našela. A o ruv napadini e bakren hem ćerela len te našen ko sa o strane. 13Adalese soi samo platime manuš, olese na ačhilo đi o bakre.
14Me injum o šukar pastiri. Me pendžarava mle bakren hem mle bakre pendžarena man, 15ađahar sar so o Dad pendžari man hem sar so me pendžarava e Dade. Me dava mlo dživdipe zako bakre. 16Isi man hem avera bakre, kola nane taro akava stado; hem olen valjani te anav. Hem on ka šunen mlo glaso, i ka ovel jekh stado jekhe pastireja. 17Adalese mlo Dad mangela man, so dava mlo dživdipe – te šaj palem te lav le. 18Niko na lela le mandar, nego me korkoro mandar dava le. Isi man vlast te dav le hem isi man vlast palem te lav le. Adaja naredba priminđum mle Dadestar.”
19Zbog akala lafija maškaro Jevreja palem uli podela. 20But Jevreja phende: “Ovi opsednutime demoneja hem dilindilo. Sose šunena le?”
21A avera phende: “Adava nane o lafija e manušesere kovai opsednutime demoneja. Šaj li o demoni te phravel e kororengere jaćha?”
O Isus vaćeri dai ov e Devlesoro Čhavo
22Tegani ano Jerusalim slavinđa pe o prazniko Hanuka, o posvetiba e Hramesoro. Inele jevend.
23O Isus nakhela ine maškari phravdi terasa e Solomonesiri ano Hram. 24A e jevrejengere vođe okružinde le hem phende lese: “Đikote ka garave amendar ko tu injan? Te injan o Hrist, phen amenđe phravdeste!”
25A o Isus phenđa lenđe: “Već phenđum tumenđe angleder, ali tumen na verujinena. O ćeriba save ćerava ano anav mle Dadesoro – on svedočinena mandar. 26Ali tumen na verujinena, adalese so na injen mle bakre. 27Mle bakre šunena mlo glaso hem me pendžarava len, hem on džana pala mande. 28Me dava len večno dživdipe hem on nikad naka meren. Niko naka čorel len mle vastendar. 29Mlo Dad, kova dinđa man len, po baroi sarijendar, hem niko našti te čorel len mle Dadesere vastendar. 30Me hem o Dad jekh injam.”
31Tegani e jevrejengere vođe palem mangle te mudaren le hem lelje bara sar te frden upro leste, 32a o Isus phenđa lenđe: “Mothovđum tumenđe but šukar ćeriba e Dadestar. Zako save olendar mangena te mudaren man barencar?”
33A o Jevreja phende lese: “Na mangaja te mudara tut barencar zako šukar ćeriba, nego so hulineja upro Devel. Tu injan samo manuš, a pheneja da injan Devel!”
34O Isus phenđa lenđe: “Nane li pisime tumenđe ano zakoni: ‘Me phenđum: tumen injen develja’? 35Te o Devel e manušen kolenđe alo o lafi e Devlesoro vičinđa develja – a o Sveto lil našti te promenini pe – 36sar onda šaj okolese kole o Dad posvetinđa hem bičhalđa ko sveto te phenen: ‘Hulineja’, adalese so phenđum da injum o Čhavo e Devlesoro? 37Te na ćerava o ćeriba mle Dadesere, ma verujinen maje. 38Ali te ćerava len, sa hem te na verujinen maje, verujinen olenđe, te džanen dai o Dad ana mande hem me ano Dad.”
39Tegani on palem mangle te dolen le, ali ov našlo lenđe taro vasta.
40O Isus palem nakhlo ki aver strana oti len Jordan, ko than kaj o Jovan angleder krstini ine, hem ačhilo adari.
41A but manuša ale koro leste hem vaćerena ine: “O Jovan na ćerđa nijekh čudesno znako, ali čače inele sa so phenđa akale manušestar.”
42Hem but džene adari poverujinde ano Isus.
Currently Selected:
Jovan 10: RAB
Highlight
Share
Copy
Want to have your highlights saved across all your devices? Sign up or sign in
