Delja 2

O aviba e Svetone Duhosoro

1Kad alo o prazniko o Pentekost, o pindato dive palo prazniko Pasha, sare inele zajedno ko jekh than. 2Otojekhvar taro nebo šundilo nesavo zvuk, sar kad phudela i zorali barval, hem pherđa sa o čher ano savo on inele. 3I dikhle nešto sar jagale čhibja, save delinde pe hem huljile upro đijekh olendar. 4Hem sare pherdile e Svetone Duhoja hem lelje te vaćeren avere čhibjencar sar so dela len ine o Duho te vaćeren.

5A ko adava vreme ano Jerusalim inele o pobožna Jevreja kola ale taro đijekh narodo ki phuv. 6Kad šunde adava zvuk, o narodo čedinđa pe hem inele zbunime, adalese so đijekh olendar šunđa e učenikonen sar vaćerena olesere čhibjaja.

7Divinde pe hem čudinde pe, vaćerindoj: “Dikh, nane li sa akala kola vaćerena Galilejci? 8Sar onda đijekh amendar šunela len pese ki čhib savi vaćeri pe adari kotar injam? 9Maškar amende isi Parćanja, Međanja hem Elamcija, manuša tari Mesopotamija, Judeja, Kapadokija, Ponta, Tikori Azija, 10Frigija, Pamfilija, Egipat hem taro thana e Libijakere uzali Kirina, hem okola kola ale taro Rim, 11(zajedno o Jevreja hem okola kola obratinde pe ki vera e jevrejengiri), o Krićanja hem o Arapija. Sare amen šunaja len sar ko amare čhibja vaćerena oto e Devlesere bare delja!”

12I sare zadivime hem zbunime, pučena ine jekh avere: “So akava značini?”

13A avera marde muj, vaćerindoj: “But pile gudli mol!”

E Petresoro propovediba

14Tegani o Petar, e dešujekhe apostolencar, terdino anglo lende, hem glasno phenđa lenđe: “Phraljalen Jevrejalen, hem sare tumen kola bešena ko Jerusalim, šunen mle lafija! Te džanen akava: 15Akala manuša nane mate, sar so tumen mislinena, adalese soi pana enja o sati sabajle. 16Nego, akavai adava sostar vaćerđa o proroko o Joil:

17‘Ko poslednja dive – phenela o Devel –

ka čhorav mle Duho upro sa o manuša,

hem tumare čhave hem čhaja ka prorokujinen,

hem tumare terne čhaven ka ovel vizije,

hem tumare purane ka dikhen sune.

18A hem upro mle sluge hem sluškinje

adala dive ka čhorav mle Duho,

hem on ka prorokujinen.

19Ka mothovav čudesija upre ko nebo

hem znakija tele ki phuv

– rat, jag hem oblaci oto dim.

20O kham ka ćerel pe ani tomina,

a o masek ano rat

angleder nego so avela o baro hem o slavno Dive e Gospodesoro.

21Hem đijekh kova ka vičini o anav e Gospodesoro,

ka ovel spasime.’

22Izraelconalen, šunen akala lafija: o Isus taro Nazaret inele manuš kole o Devel potvrdinđa angla tumende prekalo zorale delja, čudesija hem znakija save ćerđa prekalo leste, kad inele maškar tumende. Adava hem korkore tumen džanen. 23Ali o Devel džanđa so ka ovel, hem olesoro angleder ćerdo plan pherdilo kad o Isus inele predime tumenđe. Tumen, prekalo vasta e biedevlesere manušengere, kovinđen le ko krsto hem mudarđen le. 24Ali, o Devel vazdinđa le taro mule, hem oslobodinđa le taro e meribnasere muke, adalese so našti ine o meriba te ićeri le ani pli vlast. 25A o caro o David lestar vaćeri:

‘Uvek dikhljum e Gospode angla mande.

Ovi maje oti desno strana, i adalese naka ovav peravdo.

26Adalesei mlo vilo bahtalo hem mli čhib slavini e Devle oti radost,

đi hem mlo telo ka živini ani nada,

27adalese so naka ačhave mli duša ano than e mulengoro,

ni naka muke te Svecosoro telo te čirnjol.

28Mothovđan maje e dživdipnasere droma,

ka phere man bahtalipnaja ani ti prisutnost.’

29Phraljalen, sigurno injum ko akava so phenava tumenđe zako amaro pradad o David: ov mulo hem inele parume, a lesoroi grobo maškara amende sa đi akava dive. 30Ali, adalese so ov inele proroko hem džanđa da o Devel obećinđa lese ađahar so halja lese sovli da jekhe lesere potomkonendar ka čhivel lese ko than sar caro.

31Ov angleder dikhlja adava so valjani te ovel, i vaćerđa e Hristesere uštibnastar taro mule:

‘Na inele ačhavdo ano than e mulengoro,

ni lesoro telo na čirnilo.’

32O Devel akale Isuse vazdinđa taro mule, a sare amen injam svedoci adalestar. 33Adalese so o Devel vazdinđa le ko počasno than, tari pli desno strana, e Dadestar priminđa e obećime Svetone Duho hem dinđa akava so akana tumen dikhena hem šunena.

34Adalese so, o David na legardilo ko nebo, a palem, phenđa:

‘O Gospod phenđa mle Gospodese:

Beš oti mli desno strana

35đikote na pašljarava te neprijateljen talo te pre.’

36Adalese sa e izraelesoro narodo šukar te džanel da akale Isuse, kole tumen čhivđen ko krsto, o Devel ćerđa te ovel hem Gospod hem Hrist.”

37Kad adava šunde, but dukhandilo len ano vilo, hem pučle e Petre hem avere apostolen: “So valjani te ćera, phraljalen?”

38A o Petar phenđa lenđe: “Pokajinen tumen hem đijekh tumendar te krstini pe ano anav e Isuse Hristesoro zako oprostiba tumare grehengoro, hem ka priminen e Svetone Duho sar daro. 39Adalese so, adavai obećanje tumenđe hem tumare čhavenđe hem sarijenđe kola živinena dur akatar, kolen amaro Gospod o Devel vičini kora peste.”

40Hem pana bute avere lafencar svedočini lenđe ine hem upozorini len: “Spasinen tumen tari kazna savi avela upri akaja rumimi generacija.”

41Tegani krstinde pe okola kola prihvatinde lesere lafija. Ađahar adava dive đi sar trin hiljade manuša pridružinde pe e učenikonenđe.

O dživdipe e anglune vernikonengoro

42On posvetinena pe ine ko sikaviba e apostolengoro, ko zajedništvo, ko phagiba o maro hem ko molitve. 43A i dar prelelja đijekhe manuše, adalese so but znakija hem čudesija inele ćerde prekalo apostolja. 44A sa o vernici inele zajedno hem sa ine lenđe zajedničko. 45Biknena ine pumare phuvja hem okova so inolen hem delinena ine o pare đijekhese edobor kobor valjanđa lese. 46Đijekh dive bizo ačhojba hem sar jekh čedena pe ine ano Hram. Ko pumare čhera phagena ine o maro hem hana zajedno bahtale hem čačikane vileja. 47Hvalinena ine e Devle hem sa o manuša mangena len ine. A o Gospod đijekh dive barjari ine o broj e spasimendar.

Currently Selected:

Delja 2: RAB

Highlight

Copy