Luke 2
2
Diburu di Sesu
1Mu dikyesi dyene, Sesare Oguste yivunde arume batu botsu ba mu yirini gi buloongu bu kumenge yandi mu yende tendusu banduge. 2Wutendusu wu munongu wene bile re wu marege. Dikyesi dyene Kirinus akumenge gu musengi wu Sudé. 3Mutu mutu ayende mutendusu gu dimbu dyandi. 4Susefu ne yandi aburugu gu Nasarete gu musengi wu Galilé mu yende gu Beteleme musengi wu Sudé, 5mu yende tendusu ne Mari mugyetu wu yandi abande mu yonge. Mari abile ne dimi. 6Ve bile yawu gwune, wisi wubure wupule. 7Re abure mwane wu tsemi wu dibagele, ne apite yandi ne birini bi batsande ne alatse yandi gu yitsige gikayisu bibodu mumbare gu ndagu benyi gusebile yitsige.
Kime moosi yi Nzambi yisundigile bakyelitsi ba mandombe
8Gu tselwene gubile bakyelitsi ba mandombe gu kumu bamogenge ne wukyele mandombe ne dibati. 9Kime Fumu Nzambi yisundigile yawu, ne bundumbe bu Nzambi bukande yawu. Bagangu ne wome wu mbili. 10Te kime Fumu Nzambi ayambile yawu re: «Yenu diyalabe wome, mamitse gu yambile yenu tsangu yiyinyi yikebile yinyunge giginene gu batu botsu. 11Bamaburile yenu muyobulitsi nemunyi gu dimbu di David, yandi re Fumu, Wusoolu ne Nzambi. 12Labanu yilimbe gikeyabe yenu yandi: Digudagise mwane wulatsu va yitsige gikayisu bibodu wupitu ne birini bi batsande.» 13Vane ne vane mbili bakime bamosi ba Nzambi baputegene ne yine kime, bagitse Nzambi re: 14«Myule gu Nzambi Pungu, ne polu mu tsyeyiyi gu batu babakarondu nandi.»
Bakyelitsi ba mandombe bayende gu Beteleme
15Ve yagene bakime ba Nzambi nawu mu gabuge gu yulu, bakyelitsi ba mandombe, bayambilenge yawu ne yawu re: «Kagu wokanu gu Beteleme diyelabe ditsevyoge gwune, di Nzambi atseyabise manenu.» 16Kerevane, bayende bambangu gwune, badagise Mari ne Susefu ne mwane wu mukyeki wulatsu va yitsige gi kayisu bibodu. 17Ve labe yawu yandi, banyigule batu botsu motsu mayambulu yawu ne kime mu mwane wene. 18Botsu babayulu na yambilenge bakyelitsi ba mandombe, bagibeme. 19Te gu Mari, akyelenge, ne arangiminenge mambu mene motsu ke gu murime wandi. 20Kere bakyelitsi ba mandombe bagabugu ne yinyunge giginene, bagitsenge Nzambi mbili mumbare balabe motsu munongu wumoosi nave yambile kime Nzambi.
Sesu ayakusu gu ndagu Nzambi
21Ve pule wisi wu pombu mugyere mwane, baluge yandi nduge re Sesu, nduge yilonzu ngwandi ne kime Nzambi mbe asamebage dimi. 22Ve pule wisi wu Mari ne Susefu mu tsukise manyuru narumu dyo mu mugage wu Muyise, bayende ne mwane gu Serusaleme muyakise yandi mu makake ma Fumu. 23Na rumu dyo mu mugage wu Fumu re: «Mwane wotsu wu tsemi wu dibagele wugu yakusungu Fumu.» 24Ne bagu vegenge dilagu di mabembi mabeyi, vo dibane babeyi ba makunde, Susefu ne Mari bavage gandi re nane.
Simeo agitse Nzambi mu Sesu
25Dikyesi dyena, gu Serusaleme, gubile dibagele ndugandi Simeo. Abile wusungeme, ne agobisenge Nzambi, avingilenge wuyobulu wu Israel, ne Dinyunyi di Sungeme dibile nandi. 26Simeo alubusu ne Dinyunyi di Sungeme re: «Asakenene fu gugalabe Kristi wusoolu ne Fumu Nzambi.» 27Dinyunyi diyenze yandi gu ndagu Nzambi, ve tayi ne nguyi Sesu baruge nandi muvage munongu wumoosi nave rume mugage wu Fumu mu mwane wene. 28Simeo ayake Sesu mu makake mandi, ne agabuse dinyi gu Nzambi re: 29«Fumu, ne mapape mame, sasisi musalitsi wagu ayendingi ne polu, nave mane yambile yibene. 30Mumbare misu mami matsemane labe muyobulitsi wene, 31wutsesindige yu va ganegare baane bagu. 32Mwane wene wugubile yivele mu tsombuse batsengi tsyotsu, ne agubile mundumbe gu Israel yitsuku gyagu.»
Mabigu mabige Simeo
33Tayi ne nguyi Sesu bagibeme mu mambu motsu mayambile Simeo mu mwane. 34Simeo avege yawu myule ne ayambile ne ngwandi Mari re: «Mwane wuwu wuruge mulagise, ne mutelige mbili batu gu Israel, ne mubile yilimbe gi Nzambi gikevongulu ne mbili batu. 35Ne yu Mari, yigulabe maguge mavyogilile munongu wumoosi ga mutu wumatubu diyenge mure matase masweme ma mbili mirime, makeyabunu.»
Mabigu ma Ane mubigitsi
36Gubile ne mugyetu wu mubigitsi, dine dyandi Ane. Tayandi bile Fanwele gu yibandu gi Aser. Abile amenune mbili, te ve bunumbe bwandi atsagele ne mulumyandi ke bilime tsambu. 37Asale mukwili ngwu ne ve dugise yandi magumi pombu ne bilime bibine. Makyesi motsu, abilenge gu ndagu Nzambi; ne nyangu ne dibati, agitsenge Nzambi, nusambile, numina kugi. 38Ve yambilenge Simeo ne bakinde ba Sesu, Ane anyingene, adagise yawu, agitse Nzambi, ne ayambilenge musamu wu Sesu gu botsu babavingilenge wu yobulu wu Serusaleme.
Bagabuge ne Sesu gu Nasarete
39Ve mane bakinde ba Sesu motsu marumu yawu mu mugage wu Fumu, bagabugu gu Nasarete divule dyawu gu musengi wu Galilé. 40Gu mwane, abangugunge ne mu bungudu, ne mu buyedi, ne myule mi Nzambi mibile nandi.
Sesu ne bivunde bi migage gu ndagu Nzambi
41Batu botsu babile ne yifu giwuvyosenge diyayi di wuyobulu gu Serusaleme bilime byotsu. 42Ve bile Sesu ne digumi ne bilime bibeyi, yawu bayende nandi na vagungu ne kale mu diyayi dyene. 43Ve vu batsufu ba diyayi, Susefu ne Mari bagabugu, te baseyabe re Sesu mwane atsesale gu Serusaleme. 44Yawu batase re Sesu ayi mu yilonge ne bambatsi. Bavyose muse wu fwimbe mu nzile, ne babande wubene yandi. 45Ve selabe yawu yandi, bagabugu ngwu ne gu Serusaleme mubene yandi. 46Kere mu wisi wu mureru, badagise yandi gu dikange di ndagu Nzambi, matsagele ve ganegare bivunde bi migage, nu yululu yawu, nu dume yawu banzidu. 47Botsu babeyulungu na yambilenge yandi bagibeme mu munongu buyedi buyagulenge yandi ba nzidu. 48Ve bakinde badagise yandi, bagibeme, ngwandi amusembe re: «Mwane, mugi yitsevagile yetu dyotsu dine? Mane tayagu dibetsi ne kyere mumbare digonebene yu.» 49Ayagule yawu re: «Yenu digonebene me nde mugi? Yenu diseyabe re magubilenge nde gu ndagu Tata?» 50Te yawu basenyigugulu mabigu mayagulu yawu nandi. 51Kerevane, bagulumuge ne Sesu mu yende gu Nasarete. Agobisenge yawu. Mambu mene motsu mavyoge, ngwandi akyelenge mo ke gugare murime wandi. 52Sesu, abangugunge ne mu buyedi, ne mu manyuru. Bitsagilitsi byandi bibile bibinyi va misu ma Nzambi, ne va misu ma batu.
Currently Selected:
Luke 2: SNQ
Highlight
Share
Copy
Want to have your highlights saved across all your devices? Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES