Luke 11

Sesu aloonze bayikitsi baandi nakasaambulu

1Wisi wumoosi, Sesu asaambilenge ve ma mbure. Ve mane yandi, muyikitsi wandi wumoosi atombe yandi re: «Fumu, loonze yetu nakasaambulu, nave loonze Sa bayikitsi baandi.» 2Sesu aloonze yawu re: «Veke saambila yenu, yambilanu re:

Tate,

batu bootsu bayabi re yire Nzambi yi reel;

Bufumu bwagu burugi.

3Veege yetu wisi wotsu kure yingyenze.

4Siingile yetu kokolu mu mabi metu,

nave yetu dikasiingili kokolu gu bootsu babakavagili yetu mabi.

Yiyasiingise yetu mu dimaangu.»

Wukavondi akadili

5Sesu abekoonde yambile yawu re: «Noonge nuyelige: wumoosi ve ganegarenu ane mbaatsi, areyende dagise yandi gu mbugandi ne murime dibati muyambile yandi re: “Mbaatsyami, soombise me mape mareru. 6Mbaatsyami yimoosi yigoneyende gu munyalu amatsaange gu mbugami te masaandi ne kure yi wuveege yandi.” 7Ne vane mbaatsyagu areyagule yu gugare ndagu re: “Siise me ne swii! Gyabutsu gitsemane wubandugu ne musapi, mane baane bami dikeke gu taangi, masakerungule beraambuge muveege yu mape.” 8Mayambile yenu, nisi ga asaraambugu mu bumbaatsi, aguraambugu muveege yandi byootsu binandi ne nzale, mumbare mbaatsyandi ane muginyinyi wuvonde guga tsonyi. 9Re dibaandu, mayambile yenu: vondanu ne yenu diguveegu; benanu ne yenu digudagise; dukisanu ne yenu digutsibululu gyabutsu. 10Wotsu wukavondi akaveegu, wotsu wukabeni akadagisi ne bakatsibulili gyabutsu gu wotsu wukadukisi. 11Tayi nde nyi ve ganegarenu wurungule wuveege mwaanandi nyoge, ga avonde yandi yibere?#11.11 Gu mbuge Basifu basakeyi banyoge. 12Vore aguveege yandi ngiinge ga avonde diki? 13Reembuse yenu batu bababi diyatsi wuveege baane benu bivaave bibinyi. Te keke ne Tayi yi gu yulu, aguveege Dinyunyi Disuungeme gu yawu babakavondi yandi!»

Sesu agonepunze manyunyi mamabi

14Wisi wumoosi, Sesu abeeluse dibagele dibile yibubu. Apunze dinyunyi didibi dibile naandi. Dinyunyi dyene divate mu yandi ne ayambile. Ne vane piti yibile vane yigibeme mbili. 15Te batu bamosi bayambile re: «Sesu agonepunze manyunyi mamabi nde mu ngudi yi Belesebul, yivuunde gi manyunyi mamabi.» 16Bamosi baroonde wumaange Sesu ne batombe yandi muloonze yawu yiliimbe gi yimwiile muyabe re asindugu ne Nzambi. 17Te Sesu ayabenge mataase mawu. Kere vane ayambile yawu re: «Batu ba tseengi moosi ga balwane yawu ne yawu, tseengi yikapanzigi, bandagu tsikabundugi, tsine mu yulu tsimosi. 18Munoongu wumoosi Sate ga abelwane ne batu baandi, tseengyandi yigugwaare nde tsenyi? Mumbare yenu digoneyambile re, magonepunze manyunyi mamabi mu ngudi yi Belesebul. 19Te ga mapunze yawu ke mu ngudi yi Belesebul, ake wukaveegi batu benu ngudi yi wupunze yawu nde nyi? Re dibaandu batu benu yawu bene baguloonze re, mbele yinde nenu! 20Nungyenze magonepunze manyunyi mamabi nde ne ngudi yi Nzambi, re divindugulu muloonze re Bufumu bu Nzambi butseruge kwanga ne gu yenu.

21Ga dibagele dine myaangu ne bilwani agonekyele ndagwandi, gusaandi mutu wukerungule nyingene mu wuyibe manive mandi. 22Te ga dibagele divyogilile yandi myaangu aruge ne anedile mulwaani, aguduumbe yandi bilwani byandi bibetsya yandi ne gitu ne wugabe byootsu bitseboonge yandi.

23Wotsu wugabile nami ake mukolitsi wami, ne wotsu wugayamune me mugukige, mupanzitsi.

Bugabugulu bu dinyunyi didibi

24Ga dinyunyi didibi dimavate mu mutu, dikayendi nugabugu gu bitsige bi yumugu mubene yitsige gi wulooge. Agasadagise, akayambili re: “Makegabuge gu ndagwami yitsevate me.” 25Aregabugu, aredagisi yo yigoombulu, yikuunzu bweedi. 26Kere vane areyende mu wuboonge manyunyi tsaambu mamosi mavyogilile yandi wubive, bareruge yawu bootsu mutsagele gu ndagwene. Re disine maguge ma mutu wene mayi marage wuvyogilile ve dibaandu.»

Manyi mangyenze

27Ve mane Sesu wuyambile nane, mugyetu wumoosi gugare piti abwamugu re: «Myule gu mugyetu wubure yu ne wunwiise yu.» 28Te Sesu ayagule re: «Myule nde gu babakayulu maambu ma Nzambi ne wugobise mo!»

Sesu agoneyagule batu babagonevonde yimwiile

29Ve gukegenenge piti nutseenge Sesu, abaande yambile yawu re: «Batu ba nemunyi bayi bababi, bagonetombe yiliimbe gi yimwiile, te gusaandi yiliimbe nisi gimoosi gikeloonzu yawu, veengu ne gi Sonas. 30Sonas abile yiliimbe gi bisi Ninive ne Mwaane mutu agubile ne yandi yiliimbe gi batu ba nemunyi. 31Mu wisi wu mutsuundu, fumu yi mugyetu yi tseengi yi baande aguteleme ve wusu batu ba nemunyi muveege yawu mbele, mumbare atsiitse gu miseengi mivale muyulu maambu ma Salumu mabase buyedi, te gugu guyi mutu wuvyogilile Salumu! 32Mu wisi wu mutsuundu, bisi Ninive baguteleme ve wusu batu ba nemunyi muveege yawu mbele, mumbare bakalule buyedi ve yulu yawu maambu ma Nzambi maloonze Sonas, te vave guyi mutu wuvyogilile Sonas!

Yiveele gi nyuru

33Mutu asakabaangi page muswege yo vo musunze yo gutsi muluumbu, te akasunzi yo nde ve yikobugulu gyandi, mure babakenyingenenge bakelabenge yiveele. 34Miisu magu re page yi nyurwagu, ga miisu magu mayi polu, nyurwagu yotsu yiyi gugare yiveele te miisu magu ga mayi mabive, nyurwagu yiyi gutsi diviseme. 35Kagu yirambile mure yiveele gigonetaase yu re yine gyo gikerebile diviseme. 36Ga nyurwagu yotsu yiyi gu yiveele, guga yileme nisi gimoosi gu diviseme, nyuru yotsu yigubile gu yiveele munoongu wumoosi naka tsoombusu yu ne yiveele gi page.»

Sesu agyele bafwarisi ne basupulitsi ba migage

37Ve mane Sesu wuyambile, mufwarisi wumoosi atsitse yandi mu yeyi yilaambu gu ndagwandi. Sesu anyingene gu ndagu mufwarisi ne atsagele ve take. 38Mufwarisi agibeme ve labe yandi re Sesu asaguunge makake ne ginene yi.#11.38 Bafwarisi babile ne yifu gi wugunge myogu ne gineneyi, na tabulu dyo gu mugage wu dibundu dyawu. 39Kere Fumu ayambile yandi re: «Yenu bafwarisi dikaguungi ibuungu ne yipele ke gu nzime, te gu bagare benu yenu dibase ne mataase mayibe, ne buvembe. 40Yenu disegoneyulu yivaave! Nzambi re wukuunze kane, ne yandi re wubekuunze Gugare. 41Kagu dyaambu dingyenze diwuvage nde wuveege masaandi bi gugare bipele byenu, kere vane byootsu mu yenu bikebile bireele.

42Mulogu gu yenu bafwarisi! Yenu dikaveegi Nzambi gimoosi mu digumi mu bivaave ga na malusi, ga difire, ne bimosi bi mu banuungi benu bikaveegi mugaangu mu dinuunge. Te yenu disakavagi maambu masuungeme ne disakaroondi Nzambi. Mane mbe re makavagi yenu gugalibene maambu mane mootsu.

43Mulogu gu yenu bafwarisi! Yenu dikaroondi bitsige bimawusu mulabunu gu bandagu tsi masaambulu ne yenu gaandi dikaroondi keke wuyubulu ne digobe mu timekane. 44Mulogu gu yenu! Diyi ga bangile tsigalabunu tsigonetsaru ne batu gugayabe.#11.44 Gu mbuge Basifu, ga mutu abembulunu ne fuumbi, vo arevyoge ve mbare ngile, akabili keke nzoruru.»

45Musupulitsi wu migage wumoosi ayambile Sesu re: «Muloonzi, muyambile nane, yigoneseenge nde ne yetu gaandi!» 46Sesu ayagule re: «Mulogu ne gu yenu gaandi basupulitsi ba migage! Yenu dikapapisi batu mifune mi tsire ne disegonepupe nisi pesu mu yamune yawu wupape myo. 47Mulogu gu yenu! Yenu dikaruungi bangile tsitsinyi tsi babigitsi, nane babigitsi baboku re ne bakaage benu. 48Yenu digonesilile re bakaage benu bavagenge ke maambu mamanyi, mumbare babokenge babigitsi, ne yenu digoneruunge bangile bawu! 49Re dibaandu Nzambi mu buyedi bwandi, ayambile re: “Magusindigile yawu babigitsi ne bakime; baguboke bane ve ganegarawu ne baguritsige bamosi maguge.” 50Re mu dyo batu ba nemunyi bagukilusu mu mafwiitse mootsu mabokwa babigitsi, baande ve dibaandu di buloongu, 51yawu bagukilusu baande mu difu di Abel, kwanga ne mu di Sakari wuboku ve pwase yisunzulu gi malagu ne Ndagu Nzambi. Nungyenze mayambile yenu, batu ba nemunyi bagukilusu mu mafwiitse ma batu bene bootsu.

52Mulogu gu yenu, miloonzi mi migage. Yenu diboonge musapi wukatsibulu gyabutsu gi wuyabe Nzambi: yenu bene disegonenyingene, ne yenu diseroonde re bamosi banyingeni.»

53Ve vate Sesu gu ndagwene, bateenditsi ba migage ne bafwarisi bagaangu ne kabu yi mbili ne baduma yandi banzidu mu mbili minoongu mi maambu. 54Bavere yandi gu peengi muroonde wutsukige yandi mu pasi dibigu diketube yandi.

Currently Selected:

Luke 11: SNQ

Highlight

Copy