uMarko uMarko 5

uMarko 5

1Baza bawelela ngaphesheya kolwandle, kummandla wamaGadara. 2Akuba ephumile emkhombeni, wahlangatyezwa kwaoko ngumntu onomoya ongcolileyo, ephuma emangcwabeni, 3owayenekhaya lakhe emangcwabeni; kwaye kungekho bani unako ukumbopha nangemixokelelwane; 4Ngokuba wayebotshwa futhi ngamakhamandela nemixokelelwane, asuke amatyathanga asuke asuke akhe, awakroboze namakhamandela; 5Ube ehlala ubusuku nemini esezintabeni nasemangcwabeni ekhala, ezicenta ngamatye. 6Uthe ke akumbona uYesu esekude, wabaleka, waqubuda kuye. 7Wadanduluka ngezwi elikhulu, wathi, Yintoni na enam nawe, Yesu, Nyana kaThixo Osenyangweni? Ndikufungisa uThixo, ukuba ungandithuthumbisi. 8Kuba ebethe kuye, Phuma emntwini apho, moyandini ungcolileyo. 9Yambuza ke esithi, Ungubani na igama lakho? Waphendula ke yena esithi, NdinguMkhosi igama lam; kuba sibaninzi. 10Waye ke embongoza kakhulu ukuba angabandululi bemke kwelo zwe. 11Bekukho ke apho ngasezintabeni ugxuba olukhulu lweehagu lusidla. 12Zambongoza zonke iindimoni, zisithi, Sithumele ezihagwini, ukuze singene kuzo. 13Wazivumela kwaoko uYesu. Baphuma ke oomoya abangcolileyo, baya kungena ezihagwini; lwaza ugxuba olo lwaphaphatheka, lwehla eweni, lwela elwandle; 14Bathe ke abo babezalusa iihagu basaba, babika ekhaya nasemaphandleni. Baphuma ke abantu, baya kuyibona loo nto ihlileyo. 15Bafike kuYesu, bambone obephethwe ziidemon, lowo ke wayenomkhosi, ehleli, ambathisiwe, enengqondo ephilileyo; baza boyika. 16Baza abo babeyibonile le nto babacokisela, ukuba kuthekeni na kobephethwe ziidemon; kwanokweehagu. 17Baqala ukumbongoza ukuba emke emideni yabo. 18Akuba engene emkhombeni, lowo ubephethwe ziidemon wambongoza ukuba abe naye. 19Kodwa uYesu akamvumelanga. Usuke wathi kuye, Hamba, uye endlwini yakho kwabakowenu, ubabikele oko zingako ukuba zinkulu izinto ekwenzele zona iNkosi, yaba nenceba kuwe. 20Wemka, waqala ukuzivakalisa eDekapoli oko zingako ukuba zinkulu izinto uYesu abemenzele zona; bamangaliswa bonke. 21Kwathi, akubon’ ukuba uYesu uwelile ngomkhombe, wabuya weza kwelinye icala, kwahlanganisana kuye isihlwele esikhulu; waye engaselwandle apho. 22Kwabonakala kusiza omnye wakubaphathi bendlu yesikhungu, ogama linguYayiro; Uthe ke akumbona, wawa ezinyaweni zakhe. 23Wambongoza kakhulu, esithi, Intombi yam igulela ukufa; khawuze ubeke izandla phezu kwayo, ukuze iphile; yophila ke. 24Wahamba naye uYesu; yaye indimbane enkulu imlandela, imxinile. 25Kwaye kukho ntokazi ithile, eyayinethombo legazi iminyaka elishumi elinamibini. 26Wayeve ubunzima obuninzi kumagqirha amaninzi, edleke konke abenako, engancedi lutho, esuke wahambela phambili ebubini: 27yathi yakuva ngaye uYesu, yeza phakathi kwesihlwele ngasemva, yayichukumisa ingubo yakhe; 28kuba ibisithi, Ukuba ndithe ndachukumisa neengubo zakhe ezi, ndosindiswa. 29Watsha kwaoko umthombo wegazi layo; yeva emzimbeni wayo ukuba iphilisiwe kweso sibetho. 30uYesu, ethe kwaoko wawazi ngaphakathi kwakhe amandla aphume kuye, wajika esendimbaneni, wathi, Ngubani na ochukumise iingubo zam? 31Bathi kuye abafundi bakhe, Ubona nje ukuba isihlwele sikuxinile, utsho na ukuthi, Ngubani na lo undichukumisileyo? 32Wasingasinga, ukuba ambone lowo uyenzileyo le nto. 33Ithe ke intokazi leyo, isoyika, ingcangcazela, ikwazi oko kwenzekileyo kuyo, yeza yawa phantsi phambi kwakhe, yamxelela inyaniso yonke. 34Wathi ke kuyo, Ntombi yam, ukholo lwakho lukusindisile; hamba ngoxolo, phila kwisibetho sakho. 35Kwathi, esathetha, kwafika amadoda evela kwamphathi wendlu yesikhungu, athi, Ifile intombi yakho; usamkhathazelani na uMfundisi? 36Kwangoko uYesu, elivile elo zwi lithethwayo, wathi kumphathi wendlu yesikhungu, Musa ukoyika, kholwa kuphela. 37Akavumela mntu ukuba alandelane naye, kwakuphela nguPetros noYakobi noYohane, umzalwana kaYakobi. 38Afike endlwini yomphathi wendlu yesikhungu, abone isiphithiphithi, abalilayo nabenza isijwili esikhulu. 39Akungena athi kubo, Yini na ukuba niphithizele, nilile? Intombazana ayifile, ilele. 40Basuka bamwa ngentsini. Athi akuba ebakhuphele phandle bonke, amthabathe uyise womntwana nonina, nabo babenaye, angene apho wayelele khona umntwana lowo. 41Wayibamba ngesandla intombazana leyo, wathi kuyo, Talita, kumi; oko kukuthi ngentetho evakalayo, Ntombazana, ndithi kuwe, Vuka. 42Yavuka kwaoko intombazana leyo, yahambahamba; kuba ibiminyaka ilishumi elinamibini izelwe. Bathi nqa ngokuthi nqa okukhulu. 43Wabayala kakhulu ukuba kungaziwa mntu oku; wathi mayiyinikwe idle.

Currently Selected:

uMarko uMarko 5: CXB24

Highlight

Copy