uLuka uLuka 23

uLuka 23

1Yesuka yonke inkitha yabo, yamrholela kuPilato. 2Aza aqala ukummangalela, esithi, Simfumene lo elahlekisa uhlanga, engavumi ukuba kunikelwe irhafu kuKesare, esithi, unguye uKristu uKumkani. 3Wambuza ke uPilato, esithi, Wena unguye na uKumkani wamaYuda? Waphendula ke wathi kuye, Nawe utsho. 4Uthe ke uPilato kubabingeleli abakhulu nakwizihlwele, Andifumani tyala kulo mntu. 5Kwaba kukhona ke bajokisayo, besithi, Uxhokonxa abantu, efundisa kulo lonke elakwaYuda, eqalele kwelaseGalili, wada wezisa apha. 6Ke kaloku uPilato, akuva elaseGalili, wabuza ukuba umntu lo ngowaseGalili na. 7Kwathi, akuqonda ukuba ungowolawulo lukaHerode, wamthumela kuHerode, owayeseseYerusalem naye ngelo xesha. 8Ke kaloku uHerode, akumbona uYesu, wavuya kunene; kuba bekumzuzu ethanda ukumbona, ngenxa yokuba ebeve kuthethwa izinto ezininzi ngaye; wayethembe ukubona umqondiso usenziwa nguye. 9Wayembuza ke amazwi amaninzi; kodwa akamphendulanga nento. 10Bema ke ababingeleli abakhulu nababhali, bammangalela kabukhali. 11uHerode ke, kwanempi yakhe, wamenza into engento, wadlala ngaye, wamthi wambu ngengubo eqaqambileyo, wamthumela kuPilato. 12Kwangaloo mini baba zizihlobo ke uPilato noHerode; kuba ngenxa engaphambili babenobutshaba phakathi kwabo. 13Uthe ke uPilato, ebabizele ndawonye ababingeleli abakhulu, nabaphathi, nabantu, 14wathi kubo, Nizise kum lo mntu, ngathi ngophambukisa abantu; niyabona ke, ndimncinile mna phambi kwenu, andafumana tyala kulo mntu, kwezo zinto nimmangalele ngazo; 15KwanoHerode, kuba ndanithumela kuye. Niyabona, akenziwanga nto ifanelwe kukufa. 16Ndothi ke ngoko, ndakumbetha, ndimkhulule. 17Kuba umelwe kukuthi abakhululele abe mnye ngomthendeleko. 18Bankqangaza bonke kwaoko, besithi, Msuse lo, usikhulule uBharabhas, 19owathi ngenxa yesaqunge esithile esabakho phakathi komzi, nangenxa yokubulala, waphoswa entolongweni. 20Waphinda ngoko uPilato wathetha kubo, efuna ukumkhulula uYesu. 21Basuka ke bona bankqangaza, besithi, Mbethelele emnqamlezweni! 22Uthe ke yena okwesithathu kubo, Kuba enze bubi buni na lo? Andifumananga tyala lakufa kuye; ndothi ngoko, ndakumbetha, ndimkhulule. 23Bamxina ke bona ngezandi ezikhulu zamazwi, becela ukuba abethelelwe emnqamlezweni; Ayeyisa amazwi abo nezababingeleli abakhulu. 24Waza uPilato wagweba ngelithi, makwenziwe ngokwesicelo sabo. 25Wabakhululela ke owayethe ngenxa yesaqunge nokubulala waphoswa entolongweni, lowo babecela yena; wamnikela uYesu ekuthandeni kwabo. 26Kuthe ke xa bamrholayo, babamba Simon uthile, waseKirene, obevela emaphandleni; bawubeka phezu kwakhe umnqamlezo, ukuba awuthwale emva koYesu. 27Wayelandelwa ke yinkitha eninzi yabantu, neyabafazi ababemmbambazelela, bemlilela. 28Wabaguqukela ke uYesu, wathi, Zintombi zaseYerusalem, musani ukundililela mna; kanye zilileleni nina, nabantwana benu; 29Kuba niyabona, iyeza imihla ekuya kuthiwa ngayo, Banoyolo abaziidlolo, nezizalo ezingazalanga, namabele anganyisanga. 30Oko baya kuqala bathi ezintabeni, Siweleni; nakwiinduli, Sigubungeleni. 31Ukuba benza ezi zinto komanzi umthi, kuya kuba njani na kowomileyo? 32Ke kaloku baberhola nabanye abangabambi, bebabini, bengabenzi bobubi, beya kubulawa kunye naye. 33Bakufika kwindawo leyo kuthiwa luKakayi, bambethelela emnqamlezweni khona apho uYesu, kwanabenzi bobubi abo, omnye ngasekunene, nomnye ngasekhohlo. 34Wathi ke uYesu, Bawo, baxolele; kuba abayazi into abayenzayo. Babelana ngeengubo zakhe, benza amaqashiso. 35Baye bemi abantu bebonela. Babemsinekela ke nabaphathi bamaYuda kunye nabo, besithi, Wabasindisa abanye; makazisindise, ukuba unguye uKristu, umnyulwa kaThixo. 36Eza ke kuye amasoldati edlala ngaye, emnika iviniga, 37besithi, Ukuba wena unguye uKumkani wamaYuda, zisindise. 38Kwaye ke kubhalwe nombhalo phezu kwakhe, ngamagama esiGrike, nawesiRoma, nawesiHebhere, kwathiwa, lo nguKumkani wamaYuda. 39Ke kaloku, omnye wabenzi bobubi ababexhonyiwe wayemnyelisa, esithi, Ukuba wena unguye uKristu, zisindise, nathi usisindise. 40Waphendula ke omnye wamkhalimela, esithi, Akumoyiki na wena uThixo, ukwakoku kugwetywa nje? 41Thina ke okunene sigwetywe ngobulungisa; kuba thina samkela umvuzo wemisebenzi yethu; kodwa yena lo akenzanga nto ingendawo. 42Wathi kuYesu, Uze undikhumbule, Nkosi, xa uthe weza usebukumkanini bakho. 43uYesu wathi kuye, Inene, ndithi kuwe, Namhlanje uya kuba nam eParadisi. 44Ke kaloku, kwakumalunga nelixa lesithandathu, kwaza kwakho ubumnyama phezu kwawo umhlaba uphela, kwada kwalilixa lesithoba. 45Laba mnyama ilanga, lasuka ikhuselo lengcwele lakrazuka kubini. 46Wadanduluka ngezwi elikhulu uYesu, wathi, Bawo, ndiyawunikela ezandleni zakho umoya wam. Akuba etshilo, waphuma umphefumlo. 47Ke kaloku umthetheli-khulu, akukubona okuhlileyo, wazukisa uThixo, esithi, Inene, lo mntu ubelilungisa. 48Zathi zonke izihlwele ezabe zibuthelene kuloo mbonelo, zakukubona okuhlileyo, zabuya zibetha izifuba zazo. 49Baye ke bonke abazana naye bemi kude, kwanabafazi ababelandelene naye, bevela kwelaseGalili, bezikhangela ezi zinto. 50Kwabonakala kukho indoda egama linguYosefu, iphakathi; waye eyindoda elungileyo, elilungisa; 51Yena waye engavumelananga necebo labo, nesenzo sabo; wayengowaseArimati, umzi wamaYuda, owayebulindile naye ubukumkani bukaThixo; 52eyathi yona yeza kuPilato, yawucela umzimba kaYesu. 53Yawuthula, yawusongela kwilinen entle; yawubeka engcwabeni elixholwe etyeni, ekungazanga kulale bani kulo. 54Ke kaloku loo mhla wawungowokulungiselela, nesabatha ibisondele. 55Kwathi nabafazi ababehamba naye, bevela kwelaseGalili, balikhangela ingcwaba, nokubekwa komzimba wakhe. 56Babuya ke, balungisa ubulawu namafutha aqholiweyo. Baphumla ngomhla wesabatha ngokomthetho.

Currently Selected:

uLuka uLuka 23: CXB24

Highlight

Copy