uYohane uYohane 17

uYohane 17

1Ezi zinto wazithetha uYesu, wawaphakamisa amehlo akhe wakhangela ezulwini, wathi, Bawo, lifikile ilixa; mzukise uNyana wakho, ukuze noNyana wakho akuzukise; 2njengokuba wamnika igunya kubantu bonke, ukuze bonke omnike bona, abanike ubomi obungunaphakade. 3Bubo ke obu ubomi obungunaphakade, ukuba mabakwazi, wena ukuphela koThixo oyinyaniso, naye uYesu Kristu omthumileyo. 4Mna ndikuzukisile emhlabeni, ndiwufezile umsebenzi obundinikile ukuba ndiwenze. 5Ndizukise ke ngoku, wena Bawo, kuwe ngokwakho, ngozuko ebendinalo kuwe, lingekabikho ihlabathi. 6Ndilibonakalisile igama lakho kubo abantu obundinike bona, bephuma ehlabathini; babengabakho, wabanika mna; Ilizwi lakho baligcinile. 7Ngoku baqondile, ukuba zonke izinto ondinike zona ziphuma kuwe. 8Ngokuba amazwi ondinike wona, ndiwanike bona; bona bawathabatha, baqonda ngokwenyaniso ukuba ndaphuma kuwe; bakholwa ukuba wena wandithuma. 9Ndithandazela bona; andiceleli lona ihlabathi, ndicelela abo undinike bona; ngokuba bengabakho. 10Ke zonke ezam zezakho, zibe ezakho zezam; Ndizukisiwe ke kubo. 11Andisekhona ehlabathini, ke bona basesehlabathini; mna ndiza kuwe. Bawo Ongcwele, bagcine ngegama lakho abo undinike bona, ukuze babe banye, njengokuba sibanye. 12Oko bendinabo ehlabathini mna, bendibalondolozele egameni lakho; owandinika bona ndibagcinile; akukho namnye kubo utshabaleleyo, ingenguye lowo wentshabalalo, ukuze isibhalo sizaliseke. 13Ngoku ke ndiza kuwe; nezi zinto ndizithetha ehlabathini, ukuze babe nalo uvuyo lwam luzalisekile kubo. 14Mna ndibanike ilizwi lakho; laza ihlabathi labathiya, ngokuba bengengabo abehlabathi, njengokuba nam ndingenguye owehlabathi. 15Andiceli ukuba ubasuse ehlabathini; ndicela ukuba ubagcine kuyo inkohlakalo. 16Abangabo abehlabathi, njengokuba nam ndingenguye owehlabathi. 17Bangcwalise ngayo inyaniso yakho; ilizwi lakho liyinyaniso. 18Njengokuba wandithuma ehlabathini, nam ndibathume bona ehlabathini. 19Ngenxa yabo ke ndiyazingcwalisa mna, ukuze nabo babe ngabangcwalisiweyo yinyaniso. 20Andiceleli ke aba bodwa, ndicelela nabo baya kukholwa kum ngelizwi labo; 21ukuze bonke babe banye; njengokuba wena, Bawo, ukum, mna ndikuwe, ukuze nabo babe banye kuthi; ukuze ihlabathi likholwe ukuba wena wandithuma. 22Uzuko owandinika lona, ndilunike bona; ukuze babe banye, njengokuba thina sibanye; 23mna ndikubo, wena ukum, ukuze babe ngabazalisekileyo ntweni-nye; ukuze liqonde ihlabathi ukuba wena undithumile, wabathanda, njengokuba wandithandayo nam. 24Bawo, ndithanda ukuba nabo abo undinike bona, babe nam, apho ndikhona mna; ukuze balubone uzuko lwam owandinika lona; ngokuba wandithanda kwaphambi kokusekwa kwehlabathi. 25Bawo olilungisa, ihlabathi lona alikwazanga, ke mna ndikwazile; naba bathe bazi ukuba wena wandithuma; 26ndabazisa negama lakho, ndandiya kubazisa; ukuze uthando ondithande ngalo lube kubo, nam ndibe kubo.

Currently Selected:

uYohane uYohane 17: CXB24

Highlight

Copy