uYohane uYohane 14

uYohane 14

1Intliziyo yenu mayingakhathazeki; kholwani kuThixo, nikholwe nakum. 2Endlwini kaBawo zininzi iindawo zokuhlala; ukuba bekungenjalo, ngendanixelelayo. Ndiyemka, ndiya kunilungisela indawo; 3Ukuba ke ndimkile ndaya kunilungisela indawo, ndiya kubuya ndize, ndinamkelele kum; ukuze apho ndikhona mna, nibe khona nani. 4Apho ke ndiya khona mna niyakwazi, nendlela niyayazi. 5Athi uTomas kuye, Nkosi, asazi apho uya khona; singathini na ke ukuyazi indlela? 6Uthi uYesu kuye, Ndim indlela, ndim inyaniso, ndim ubomi; akukho namnye uzayo kuBawo, engezi ngam. 7Ukuba benindazile mna, ninge nimazile noBawo; ngoku ke niyamazi, nimbonile nokumbona. 8Athi uFilipu kuye, Nkosi, sibonise uYihlo, kosanelisa. 9Athi uYesu kuye, Ndinaxesha lingakanana ndinani nje, akukandazi na, Filipu? Lowo undibonileyo mna umbonile uBawo; utsho ngani na ke wena ukuthi, Sibonise uYihlo? 10Akukholwa na ukuba mna ndikuye uBawo, abe ke uBawo ekum? Amazwi endiwathethayo mna kuni, andiwathethi ngokuphuma kum; uBawo ke ohleli kum, nguye oyenzayo imisebenzi le. 11Kholwani ndim, ukuba mna ndikuye uBawo, nokuba uBawo ukum; okanye nikholwe ndim ngenxa yayo imisebenzi leyo. 12Inene, inene, ndithi kuni, Lowo ukholwayo kum, imisebenzi endiyenzayo mna, uya kuyenza naye yena; nemikhulu kunale uya kuyenza; ngokuba mna ndisiya kuBawo. 13Nento enithe nayicela egameni lam, ndoyenza yona, ukuze uYise azukiswe ngoNyana. 14Ukuba nithe nacela into ngegama lam, ndoyenza mna. 15Ukuba niyandithanda, yigcineni imithetho yam. 16Mna ndiya kucela kuBawo, aze aninike omnye uMthetheleli, ukuze ahlale nani ngonaphakade. 17uMoya wenyaniso; lowo ihlabathi lingenako ukumamkela, ngokuba lingamboni, lingamazi nokumazi, ngokuba uhleli nani, kanjalo uya kuba kuni. 18Andiyi kunishiya niziinkedama; ndiyeza kuni. 19Liselilifutshane ixesha, ukuze ihlabathi lingabi sandibona; ke nina niyandibona; ngokuba ndisidla ubomi mna, nani niya kudla ubomi. 20Ngaloo mini niya kwazi nina ukuba ndikuye uBawo, nani nikum, nam ndikuni. 21Lowo unayo imithetho yam ayigcine, nguye ondithandayo; lowo ke undithandayo, uya kuthandwa nguBawo; nam ndiya kumthanda, ndizibonakalalise kuye. 22Athi kuye uYuda (ingenguye uSikariyoti), Nkosi, kutheni na, le nto uza kuzibonakalalisa kuthi, ungazibonakalalisi kulo ihlabathi? 23Waphendula uYesu wathi kuye, Ukuba umntu uyandithanda, woligcina ilizwi lam; wothi uBawo amthande, size kuye, sihlale naye. 24Lowo ungandithandiyo akawagcini amazwi am; ilizwi enilivayo asililo elam, lelikaBawo owandithumayo. 25Ezi zinto ndizithethile kuni ndisahleli nani. 26Ke uMthetheleli, uMoya oyiNgcwele, aya kumthuma uBawo egameni lam, yena uya kunifundisa zonke izinto, anikhumbuze zonke izinto endizithethileyo kuni. 27Ndishiya uxolo kuni; ndininika uxolo lwam; andininiki njengokunika kwehlabathi. Mayingakhathazeki intliziyo yenu, mayingabi nabugwala. 28Nivile ukuba ndithe mna kuni, Ndiyemka, ndibuye ndize kuni. Ukuba benindithanda, ngenavuyayo kuba ndathi, Ndiya kuBawo; ngokuba uBawo mkhulu kunam. 29Ngoku ke ndinixelele kungekehli, ukuze, xa kuthe kwehla, nikholwe. 30Andisayi kuba sathetha zinto zininzi nani; kuba esiza umphathi weli hlabathi, engenanto nam. 31Ke, ukuze liqonde ihlabathi ukuba ndiyamthanda uBawo; kwaye njengoko uBawo endiwisele umthetho, ndenjenjalo. Vukani, simke apha.

Currently Selected:

uYohane uYohane 14: CXB24

Highlight

Copy