iZenzo iZenzo 27

iZenzo 27

1Ke kaloku, kwakugqitywa kwelokuba sisuke ngomkhombe siye kwelaseItali, bamnikela uPawulos kwanabanye ababanjwa abathile kumthetheli-khulu, ogama linguYuliyo, webutho loMhlekazi. 2Sangena enqanaweni yaseAdramitatiyo, iza kunduluka isiya kwimida yelaseAsiya, sanduluka, wayekunye nathi uAristarko, umMakedoni waseTesalonika. 3Ngemini elandelayo sagaleleka eSidon; waza uYuliyo wamphatha uPawulos ngobubele, wamvumela ukuba aye ezihlotyeni zakhe, ongiwe. 4Sanduluka apho, sahamba ngomkhombe, sabetha ezantsi kweSipro, ngenxa yokuba imimoya ibivela ngaphambili. 5Sathi sakuwela ulwandle lwaseKiliki nasePamfili, safika eMira yelaseLikiya. 6Apho umthetheli-khulu wafumana umkhombe wakwa-Alesandire, usiya kwelaseItali, wasibeka khona. 7Ke kaloku iintsuku zanela sihamba kancinane, kwaba ngenkankulu ukuba sifike ngaseKinido. Uthe wakuba umoya ungasivumeli ukuba sihambe, sabetha ezantsi kweKrete ngaseSalimone. 8Sahamba ngenkankulu, safika kwindawo ebizwa ngokuba ngamaChweba aMahle; kufuphi nawo umzi waseLaseya. 9Ke kaloku, kwakubon’ ukuba ixesha laligqithile, nakubon’ ukuba kuseyingozi ukuhamba ngomkhombe, ekubeni kaloku ukuzila kwase kusele kudlule, wabayala uPawulos, 10wathi kubo, Madoda, ndiyabona ukuba olu hambo luza kuba nenkxwaleko nokonakala okukhulu, kungekwamthwalo namkhombe wodwa, kukokobomi bethu nabo. 11Kodwa umthetheli-khulu wayethambele okomqhubi nokomninimkhombe ukuthetha, kunokukaPawulos. 12Ke kaloku, ichweba lingakulungele nje ukuba kudluliswe busika kulo, abona baninzi kubo baceba ukuba kundulukwe khona, ukuba mhlawumbi bangaba bafike eFenike, badlulise ubusika khona apho. Eli lizibuko laseKrete, elibheke emzantsi-ntshona, nakumntla-ntshona. 13Kuthe ke, wakubetha impepho umoya wasezantsi, beba bakuzuzile ababekungxamele, banduluka, badlula kufuphi neKrete. 14Kuthe kungekabi ntsuku zininzi, kwabakho umoya ovuthuzayo, ogama liyiYurokelo. 15Kuthe ke kwakubon’ ukuba uthiwe hlasi umkhombe, awaba nako ukumelana nomoya, sasesiwuyeka; saqhutywa. 16Sathi sakubaleka ke, sibetha ngaphantsi kwesiqithana esithile, ekuthiwa yiKlawuda, kwaba ngenkankulu ukuba sibe nako ukuwubamba umkhonjana; 17abathe bakuwufunqula, basebenza ngezinto zokunceda, bewubhinqisa umkhombe; kananjalo bathi, besoyika ukuba bangeyela entlabathini, bazifinyeza iiseyile, baqhutywa benjalo. 18Sakuba ke sivuthuza ngamandla, ngengomso bawenza khaphukhaphu umkhombe; 19Ngosuku lwesithathu, sazilahla ngezandla zethu iimpahla zomkhombe. 20Kuthe ke, kwakubon’ ukuba akubonakali langa nankwenkwezi iintsuku ezininzi, kucinezele neliqhwa elingelincinane, laphela kwathi tu lonke ithemba lokuba singasindiswa. 21Emva kokuzila ukudla ixesha elide, wesuka wema uPawulos phakathi kwabo, wathi, Hina madoda, ninge naniphulaphule kum, ananduluka eKrete, nizuzane nale nkxwaleko noku konakala. 22Nangoku ndiyaniluleka ukuba nibe nomxhelo owonwabileyo; kuba kuni aba, akukho uya kulahlekelwa bubomi bakhe, yoba ngumkhombe wodwa. 23Kuba ngobu busuku bekumi ngakum isithunywa sikaThixo, endingowakhe, endimkhonzayo, 24sisithi, Musa ukoyika, Pawulos; umelwe kukuma phambi koKesare; uyabona, uThixo ukubabale ngabo bonke abasemkhombeni nawe. 25Kungoko ndithi, Yibani nomxhelo owonwabileyo, madoda; kuba ndiyakholwa nguThixo, ukuba kuya kuba njalo ngolo hlobo athethe ngalo kum. 26Kodwa simelwe kukuphoswa siqithini sithile. 27Ke kaloku, kwakufika ubusuku beshumi elinesine, sakubon’ ukuba siqhutywaqhutywaqhutywa ngumoya eAdriya, mayela phakathi kobusuku, oomatrose bazindla ukuba kukho mhlaba uthile basondelayo kuwo. 28Baza bakuba beyiphosile ilothe, bafumana ukuba ziifatom ezimashumi mabini; bethe tyi ke kancinane, baphinda bayiphosa ilothe, bafumana ukuba ziifatom ezilishumi elinantlanu. 29Bandula ke, besoyika ukuba hleze siwele ematyeni, baphosa iiankile ezine ngasemva, banqwenela ukuba kuse. 30Ke kaloku, bakubon’ ukuba bayabaleka oomatiloshe emkhombeni, bawuhlisa umkhombe elwandle, babonakala beza kuphosa iiankile enqanaweni. 31Wathi uPawulos kumthetheli-khulu nakumajoni, Ukuba aba abathanga bahlale emkhombeni, aninakusindiswa. 32Andula amasoldati azinqamla iintsontelo zomkhonjana, awuyeka wawa, wemka. 33Kwakuba kusile, uPawulos wabacenga bonke ukuba batye, esithi, Namhlanje ngumhla weshumi elinesine nilindile, nilindile, ningadli nto; 34ke ngoko ndiyanibongoza ukuba nidle ukudla; kuba oko kuyelelene nokusindiswa kwenu; kuba akuyi kuwa nalunwele lwentloko kabani kuni. 35Akuba etshilo, wathabatha isonka, wabulela kuThixo phambi kwabo bonke, waqhekeza, waqala wadla. 36Bonke ke baba nomxhelo owonwabileyo, bathabatha ukudla nabo. 37Saye sonke emkhombeni siyimiphefumlo engamakhulu amabini anamashumi asixhenxe anesithandathu. 38Bakuba ke behluthi, bawenza khaphukhaphu umkhombe, beyiphosa elwandle ingqolowa. 39Kwakuba sekusile, abawazanga loo mhlaba, kodwa babona ichwetyana elithile linonxweme, babhunga ukuwutyhalela kulo umkhombe, ukuba bangaba nako. 40Baza, bezinqumla zonke iiankile, baziyekela elwandle, bezikhulule kunye nezibophelelo zemithi yokujika; 41Bakuba ke begaxeleke endaweni enolwandle ngeenxa zombini, wangqubeka khona umkhombe; umphambili wabambelela ngokuqinileyo, wahlala engenakushukunyiswa; 42Ke kaloku icebo lamasoldati lalisithi mababulawe amabanjwa, ukuze kungabikho bani udadayo, basabe. 43Kodwa umthetheli-khulu, enga angamsindisa uPawulos, wawalela kwinjongo yawo; Wathi abo banako ukudada, mabaziphose kuqala elwandle, bafike emhlabeni; 44Abaseleyo ke, inxenye ikhwele eziplangeni, inxenye iphezu kwamaqhekeza omkhombe. Kwaye kwenzeka ukuba basinda bonke bekhuselekile emhlabeni.

Currently Selected:

iZenzo iZenzo 27: CXB24

Highlight

Copy