LUKA 24

Jesuh Angthawklethaih

(Mat 28:1-10; Mrk 16:1-8; Jhn 20:1-10)

1Yahni khawnbang khawnthaw huek ah nongpuinawk loa aroep coek ih hmuihoihnawk to a sinh o moa taprong ah to a caeh o. 2Taprong khaw khah ih hlung tampaepui kam-ong to a hnuk o; 3topongah anihcae loa akun o; to-e Angraeng Jesuh ih qok to hnuh o ai. 4Hi kawng pongah a dawnrai o moa angdoet o sut na-ah nawnetta ah nongpa longhnetto kahni kanglung kang khuk to anihcae taengah angdoet pae. 5Nongpuinawk loa zithaih hoiah a koi o moa long ah to tabok o; tona-ah anih hnit mah, “Tipongmaw kadueh kaminawk salak thungah kahing kami to na pakrong o? 6Anih loa hiah om ai boah, angthawk zawh boah. Galili ah a oh nathuemah nangcae khaeah a thuih ih to pahnet o hmah:#Mat 16:21; 17:22-23; 20:18-19; Mrk 8:31; 9:31; 10:33-34; Luk 9:22; 18:31-33 7‘Kami Capa loa kami kazaenawk ban thungah paek o ueloa kraws ah takhing o tih, moa ni thumto pacoengah angthawklet tih,’ a tih to loa,” tiah a naa pae hoi.

8Tona-ah nongpuinawk loa a lokthuih ih to a dawn o hlet let moa, 9taprong hoitoah amlaem o na-ah hi hmuen kawng boiboih to hnukbang hahlaito hoi mi kalahnawk khaeah to a thuih pae o. 10Nongpuinawk to loa Meri Magdalin, Joanna hoi Jaem amno Meri cae ni; anihcae hoi anihcae hoiah ka caeh nawn nongpui kalahnawk mah doeh hi kawng to kawkpatoehnawk khaeah a thuih pae o. 11To-e kawkpatoehnawk loa nongpuinawk mah thuih ih to lokpui lokca ah dawn pae o ai moa tang pae o ai. 12To-e Piter loa angthawk moa taprong bangah to a cawnh; tongkhum tathuk moa qok abamhaih ih kahni khueh to a hnuk, kalah tidoeh hnuh ai. Topacoengah totiah hmuen ka om to a dawnrai phi hoiah im ah amlaem.

Emmaus Vang Bangah Caehhaih

(Mrk 16:12-13)

13Tona ni toengah Jesuh ih hnukbang longhnetto loa Jerusalem hoitoah meng sarihto roekrak kahla Emmaus naa pae ih vang ah a caeh hoi moa, 14hmuen kaom tangcaenawk kawng boih to longto hoi longto a thuih hoi. 15Totiah a thuih hoi moa aram hoi li nathuemah Jesuh angmah to a hnaih thuih moa a caeh haih hoi nawn. 16Angmah to a hnuk hoi e mat hoi ai. 17Jesuh mah anih hnit khaeah, “Na caeh hoi na-ah lam ah longto hoi longto ti loknawk maw na thuih hoi tuek,” tiah a duengh pae.

Anih hnit loa mikhmai kasae rom hoiah angdoet hoi sut. 18Kleopas naa pae ih longto mah, “Jerusalem vang ah ka paqai kaminawk thungah nang khueh hae maw zangduem pangah toah hmuen kaom to panoek aiah ka om?” tiah a naa.

19Anih mah, “Ti hmuen to maw?” tiah a duengh.

Anih hnit mah, “Nazareth Jesuh nuiah hmuen ka thoknawk to,” tiah pathim pae hoi. Hi kami loa Sithaw hoi kaminawk boih mikhnuk ah tahma longto ah a oh moa a thuih hoi a sak ih boih pongah hmuensak thaihaih ih ka tawn ni, tiah a dawn o. 20Aicae ih qaihma kacoetanawk hoi ukkungnawk hum hanah a tahlang o moa kraws pongah takhing o. 21Anih loa Israel kaminawk ka loihsakkung ah om tih tito ah aicae mah oephaih to tawnh o boah. Tokhueh aiah totiah hmuen kaom to vaihi hae ni thumto a oh boah. 22Kaicae thungih nongpui thoemto mah kaicae hae dawn ang raisak o; anihcae loa khawnthaw ah taprong ah to a caeh o, 23to-e a qok to hnuh o ai. Amlaem o moa, “Anih loa a hing let boah tiah ka thuii vanmi hnit ih hnuksakhaih to ka hnuk o tiah ang thuih o, tiah a naa. 24Kaicae thungih thoemto to taprong ah a caeh o moa nongpuinawk mah a thuih o ih batiah toengah a hnuk o toengh; to-e angmah to loa hnuh o ai toengtoeng,” tiah a thuih pae hoi.

25Tona-ah Jesuh mah anih hnit khaeah, “Namthu hoi phi hae loa! Tahmanawk mah thuih ih boiboih to taang hanah na rai hoi phi to loa! 26Messiah hanah hinawk boiboih to patang khang pacoengah a lensawkhaih thungah akun hanah aloe na ai maw?” a naa. 27Moa Jesuh mah Cabu Kacai thungah Mosi cabunawk hoikamtong tahmanawk ih tarik ih karoekto angmah ih kawng tarik ih boiboih to anih hnit khaeah a thuihpacaih pae.

28A caeh hoi hanih vang to phak tom na-ah Jesuh loa kahla ah ka caeh hanih batiah a oh; 29to-e patawn hoi cawt moa, “Kai hnit khaeah toem halat ah; niduem zawh boah moa kho doeh ving tom boah,” tiah a naa pae hoi. Topongah anih hnit khaeah toemh hanah a caeh. 30Anih hnit hoiah buh cak hanah anghnut, takaw to a lak moa kawn lok a thuih pacoengah takaw to a aeh moa a pazet pae hoi. 31Tona-ah anih hnit ih mik to kacaipin ah amtueng moa Jesuh to a mat hoi, to-e anih hnit mikhnuk ah anghmat ving let. 32Anih hnit loa longto hoi longto, “Loklam ah lok a thuih moa Cabu Kacainawk to a thuihpacaih na-ah aihnit ih a thungah hmai ka kang batiah a oh na ai maw to a?” tiah a tih hoi.

33Anih hnit loa angthawk hoi phrat moa Jerusalem ah amlaem hoi let; hnukbang hahlaito hoi kalahnawk kangqum o cu to a hnuk hoi moa, 34“Angraeng loa angthawklet tangtang boah. Simon khaeah amtueng boah,” tiah a thuih o ih lok to a thaih hoi.

35Anih hnit mah doeh loklam ah hmuen ka om hoi takaw a aeh na-ah Angraeng ni, tiah a mat hoi ih kawng to a thuih pae hoi toengh.

A Hnukbangnawk Khaeah Amtuenghaih

(Mat 28:16-20; Mrk 16:14-18; Jhn 20:19-23; Tok 1:6-8)

36Ato to a thuih pae hoi li na-ah nawnetta ah anihcae salak thungah Angraeng angmah to angdoet moa anihcae khaeah, “Nangcae khaeah monghaih oh na soe,” tiah a naa.

37Anihcae loa paroeai a zit o, kamlaa ka hnuk o tiah a dawn o. 38To-e anih mah, “Tipongmaw na mawnh o? Tipongmaw nangcae palung thungah oepvawthaih ih to a oh? 39Ka ban hoi ka khok hae na khen oah, Kaimah hae boah ni. Kai hae na pathoep oah, na panoek o tih; kawmawtiah kamlaa loa takngan hoi ahuh to om ai, kai loa ka tawnh tito na hnuk o,” tiah a naa.

40Totiah a thuih moa a ban hoi a khok to a patuek pae o. 41Taang o thaih ai toengtoeng, palung anghoehaih hoiah a koi o moa dawn doeh a rai o; topongah anihcae khaeah, “Hiah timaw maemaeto cak hanah na tawnh o maw?” tiah a naa. 42Tangaa thongh ih katae bum maeto a paek pae o, 43a lak moa anihcae hma-ah to a cak pae.

44Topacoengah anihcae khaeah, “Nangcae khaeah ka oh nathuemah kang thuih o ihnawk to loa hi hmuennawk hae ni: Mosi Tawklok cabu thung hoi tahmanawk mah tarik ih cabu thung hoi Sam cabu thungah kai ih kawng tarik ih boiboih to acung king han a oh,” tiah a naa.

45Moa Cabu Kacai mah a thuih ih to panoek thaih hanah anihcae ih palungthin mik to a aangsak. 46Anihcae khaeah, “Tarik ih loa hi ni: Messiah loa patang khang ueloa ni thumto pacoengah duekhaih thung hoitoah angthawklet tih, 47moa anih hmin hoiah zae dawn pakhuemhaih hoi zae tahmenhaih tamthang lok to Jerusalem hoitoah amtong moa caeng kaminawk boiboih khaeah thuih ah om tih. 48Nangcae loa hi hmuen ka omnawk panoekkung saksi ah na oh o. 49Kaimah khaekhaeh mah Pa mah lok amaih ih to nangcae nuiah kang patoeh han. To-e ranuibang hoitoah hmuensak thaihaih ih to nangcae nuiah phak airoek loa vangpui thungah na zing oah,” tiah a naa.#Tok 1:4

Jesuh Van Ah Dawhhaih

(Mrk 16:19-20; Tok 1:9-11)

50Topacoengah vangpui thung hoitoah Bethani vang karoekto a caeh haih. Toah to a ban to pazang moa anihcae to mangtuihoihhaih a paek.#Tok 1:9-11 51Mangtuihoihhaih a paek li na-ah anihcae khae hoitoah amhoe tak ving moa van ah to lak tahang ah oh. 52Anih to a bok o, palung anghoehaih hoiah Jerusalem ah amlaem o let moa, 53anihcae loa atue boiboih to Tempal thungah Sithaw khaeah kawn lok thuih hanah a patoh o.

Currently Selected:

LUKA 24: AKNT2023

Highlight

Copy