JOHAN 4

Jesuh hoi Samari Nongpui

1Farasinawk mah Jesuh loa Johan pongdoeh hnukbang ka pop ah a lak moa baptisma doeh ka pop ah a paek tito a thaih o. 2(Tangtang ah loa Jesuh angmah to mita doeh baptisma paek ai; a hnukbangnawk khueh mah ni a paek o). 3Totiah a thuih o ih to Jesuh mah a thaih na-ah Judah prae hoitoah tacawt moa Galili ah amlaem let. 4Amlaem lamah Samari prae thung hoitoah a caeh.

5Samari prae ah Saikhar na pae o ih vang maeto a phak. Ato vang loa Jakob mah a capa Joseph hanah a paek ih lawk hoitoah anghla parai ai.#Gen 33:19; Jos 24:32 6Toah to Jakob ih tuitangqom to a oh. Jesuh loa kholong caeh lam takat na-ah angpho pae parai moa tuitangqom taengah to anghnut sut. Atue loa athun thuemtham tue ah a oh.

7Samari nongpui longto tui ka doh han to angzoh moa Jesuh mah anih khaeah, “Tui naek han na paek ah,” tiah a hnik. 8(A hnukbangnawk loa caknaek qanh hanah vang thungah a caeh o).

9 # Ezr 4:1-5; Neh 4:1-2 Nongpui mah, “Nang loa Judah kami moa kai loa Samari kami ni; tipongmaw kai khaeah tui nang hnik halat loa?” tiah pathim pae. (Judah kaminawk loa Samari kaminawk mah patoh ih boengloengnawk hoi sabaenawk to patoh koeh o ai).#4:9 Judah kaminawk loa Samari kaminawk mah patoh ih boengloengnawk hoi sabaenawk to patoh koeh o ai tihae Judah kami hoi Samari kaminawk loa angbet angphahaih ih tidoeh om ai tiah doeh oh thaih.

10Jesuh mah, “Sithaw mah hmuen paek ih hae timaw tihoi tui ka hnihkung hae amimaw tito na panoek nahaeloa angmah khaeah to na hnik lat moa hinghaih tui to na paek han e ah,” tiah a naa.

11Nongpui mah, “Angraeng, tui buekhaih ih doeh na tawn ai, tuitangqom doeh a thuk parai. Naa ih maw ato hinghaih tui to loa na hak tih? 12Ahi tuitangqom hae kaicae saeza Jakob mah paek ih ni; angmah hoi a caanawk mah doeh, angmah ih boiinawk mah doeh, ahi tuitangqom ih tui ni loa a naek o boiboih. Jakob pongdoeh kalen kue ah maw na dawn?” tiah a naa.

13Jesuh mah, “Ahi tui ka nae boih loa tui anghae o let tih, 14to-e ami doeh kaimah paek ih tui ka nae loa tui anghae let mak ai. Ka paek hanih tui loa angmah thungah tuipuek ah coeng ueloa ato mah hinghaih tui hoi dungzan hinghaih to paek tih,” tiah a naa pae.

15Nongpui mah, “Angraeng, ato tui to na paek ah! Totibaloa natuek doeh tui kanghae let mak ai ueloa hiah doeh tui dok hanah kangzoh let han aloe mak ai boah,” tiah a naa.

16Jesuh mah, “Na sava kawk ah loa angzo let ah,” tiah a naa.

17Anih mah, “Sava ka tawn ai,” tiah a pathim.

Jesuh mah, “Sava ka tawn ai tiah na thuih to a tueng. 18Sava long pangato na tawnh boah moa vaihi na oh haih ih nongpa hae na sava tangtang ai ni. Loktang lok nang thuih,” tiah a naa.

19Nongpui mah, “Angraeng, nang hae tahma ni tito kang panoek. 20Kaicae Samari kami saezanawk mah hi maenui ah hae Sithaw a bok o, to-e nangcae Judah kaminawk mah loa Sithaw loa Jerusalem ah bok han a oh,” tiah na thuih o.

21Jesuh mah anih khaeah, “Nongpui, kang thuih ih hae na taang ah, minawk mah Pa to ahi mae ah doeh, Jerusalem ah doeh, a bok o haih ai ih atue to na pha tih. 22Nangcae Samari kaminawk loa na bok o ih to na panoek o tangtang ai; to-e kaicae Judah kaminawk loa ka bok o ih to ka panoek o, kawmawtiah pahlonghaih loa Judah kaminawk khae hoitoah angzoh. 23To-e atue loa ang phak boah moa hiah hae a oh boah. Sithaw loa loktang ah a oh batiah angmah ka bok kaminawk mah Pa to Sithaw Pakhra ih hmuensak thaihaih hoiah loktang ta-ah bok o tih; loktang bokhaih hae Sithaw koehhaih ih ni. 24Sithaw loa Pakhra ah oh moa loktang ah oh batiah ka bok kaminawk mah doeh anih ih Pakhra hmuensak thaihaih ih khueh hoiah loktang ta-ah bok han oh,” tiah a naa.

25Nongpui mah anih khaeah, “Messiah angzo tih tito ka panoek; anih angzoh na-ah cungriboih to na thui tih,” tiah a naa.

26Jesuh mah, “Anih to kai hae boah ni, nang hoiah lok ka pae hae,” tiah a naa.

27Tona thuem ta-ah Jesuh ih hnukbangnawk ang phak o let moa nongpui hoiah lok ka pae to a hnuk o na-ah a dawnrai o phi. To-e mita mah doeh nongpui khaeah, “Timaw na koeh?” tiah dueng o ai moa Jesuh khaeah to doeh, “Tipongmaw nongpui hoiah lok na paeh hoi?” tiah dueng pae o ai toengh.

28Topacoengah nongpui loa angmah ih tui laom to a caehtak, vang thungah a caeh moa kaminawk khaeah, 29“Kaimah ka sak kok ih hmuen boih ka thui king kami hae angzo oloa khen oah. Anih hae Messiah ah om thaih tih maw?” tiah a naa. 30Topongah vang hoitoah tacawt o moa Jesuh khaeah a caeh o.

31Tona hlanah hnukbangnawk mah Jesuh khaeah, “Patukkung, maemaeto caa rae ah,” tiah pacae pae o.

32To-e Jesuh mah, “Tidoeh na panoek o ai ih buh cak hanah ka tawnh,” tiah a naa.

33Topongah hnukbangnawk loa, “Longlongto mah buh a paek pae kalang maw vai?” tiah longto hoi longto angduengh o.

34Jesuh mah anihcae khaeah, “Kai ih buh loa kai patoehkung ih koehhaih sak han hoi toksak hanah ang pacae ih sak boih hae ni. 35Patahhaih iah ‘Khra palito pacoengah loa cang aah tue ah om tih,’ tiah na thuih o. To-e loktang ta-ah kang thuih o: Lawk thung ho hoihdak ta-ah dan o noek e! Cang loa vaihi a hminh boih boah moa aah han a khawt boah. 36Cang aatkung loa a toktho to paek ah oh boah moa dungzan hinghaih hanah cang to a aah; topongah cang tuhkung hoi ka aatkung loa anghoe hoi nawn tih. 37‘Longto mah a tuk moa longto mah a aah,’ tiah thuih ih lok hae ahmaan tangtang. 38Nangcae mah na tok o ai ih lawk thungah cang aah hanah kang patoeh o; toah to mi kalahnawk mah a tok o moa anihcae ih tokhaih ranghoiah nangcae mah kamrai to na hnuk o,” tiah a naa.

39Nongpui mah, “Kaimah hmuen ka sak tangcae ih boiboih to ang thuih king,” tiah a thuih pongah ato vang thungih kaom Samari kami paroeai mah Jesuh to a taang o. 40Topongah anih khaeah Samari kaminawk to angzoh o moa, ‘Kaicae khaeah om rae ah,’ tiah a pacae pae o moa toah to ni hnetto a oh.

41Anih mah tamthang lok to a thaih o pongtoah kami paroeai aep mah a taang o moa, 42anihcae mah nongpui khaeah, “Vaihi loa nangmah na thuih pongah na ai moa kaimahcae khaekhaeh mah a lokthuih ih to ka thaih o pongah ka taang o, moa anih loa long Pahlongkung tangtang ni tito doeh ka panoek o,” tiah a naa o.

Angraeng Longto Ih Capa A Hoihsak

43Toah to ni hnetto amdam pacoengah Jesuh loa tacawt moa Galili prae ah to a caeh. 44Kawmawtiah angmah khaekhaeh mah, “Tahma hae angmah prae thungah loa khangzahaih ih om ai,” tiah a naa.#Mat 13:57; Mrk 6:4; Luk 4:24 45Galili ah a phak na-ah toah kaom kaminawk mah anih to a dawt o, kawmawtiah Jerusalem vang ah Takantak Poi ah a caeh o moa poi oh thungah anih mah a sak ih hmuen boiboih to a hnuk o boah pongah ni.#Jhn 2:23

46Topacoengah tui to misurtui ah coenghsak ih Galili prae ah to a caeh let. Toah to acozah angraeng longto a oh moa Kapernaum vang ah ka om a capa to ngan a nat pae.#Jhn 2:1-11 47Jesuh to Judea prae hoitoah Galili prae ah angzoh tito a thaih na-ah anih khaeah a caeh moa, Kapernaum vang ah caeh moa a capa duek han ka om sut to ngantuisak hanah a pacae. 48Jesuh mah anih khaeah, “Nangcae loa dawnraihaih hoi amathaih ihnawk to na hnuh o ai nahaeloa mita mah doeh na taang o mak ai,” tiah a naa.

49Acozah angraeng mah, “Angraeng, ka capa dueh ai nahlanah angzo ngaepacae rae ah,” tiah a pacae.

50Jesuh mah anih khaeah, “Caeh halat ah, na capa loa hing tih hmang,” tiah a naa.

Ato kami mah Jesuh ih lok to a taang moa amlaem. 51Lamboengh ah angmah ih tamtoehnawk mah a dawt o moa, “Na capa loa a hingh boah,” tiah a naa pae o.

52Anih mah, “Kawtih tue ah maw ka capa to a hoih khang kue loa?” tiah a duengh na-ah anihcae mah, “Zangduem thun nitue maeto na-ah a ngannat mah a prawt,” tiah a thuih pae o. 53Ato tue loa Jesuh mah, ‘Na capa loa hing tih,’ tiah a naa pae ih atue ni, tito ampa mah a dawn let. Topongah angmah hoi imthungtako boih mah a taang o.

54Ahi hae Judea prae hoitoah Galili prae ah angzoh pacoengah Jesuh mah avaih pahnithaih dawnraihaih hmuen a sak ih ni.

Currently Selected:

JOHAN 4: AKNT2023

Highlight

Copy