Ruk 23
23
Pairat Iesu Gumbe Singui Ane
1Meve iyayapan undag wan yoig Pairat gumbe Iesu aug amiya. 2Mu Iesu gumbe amatog kukaeba diyag veme, “Nu yautu apan mame iyayapan numa kuiyowa watpipam munivi. Me Siisa gumbe takesi den tepe me iyayapan dirumivi, sira ne kin Keriso waivi.”
3Pairat singui ane, “Ge Ju igiyawa kin mumawa?”
Iesu garawa wane, “Ge natawa vege, ne meme di.”
4Pairat me tobiyag pirisi koukawa ge iyayapan gumbo dirum wane, “Ne yauna, apan mame danave kukaeba da onan.”
5Megara mu gae yusipamit diyag waya, “Apan mame toyau meuma at Judia undag iyayapan danowa undag aune. Gariri apa amatog on mame uwane.”
Erod Me Iesu Gumbe Singui Ane
6Pairat mame anonewa singui ane, “Apan mame Gariri apan?” 7#Ruk 3:1Me yaug anone me Erod yusiwa ankwatave wakenewa. Sira tate me baraune Erod oya aine. Kuiyawa kum me kumiwa apa Erod Jerusarem apa wakene.
8Erod Iesu yaunewa degadega kokavit ane. Kuiyawa me gaiyawa anone, kum yobutatae me imive me yautan anoivi, sira me irayauyau meuma yautan anoivi. 9Meoya me gumbe singui obiren ane, megara Iesu garawa den wane. 10Pirisi koukawa ge Gwangwan toewanewan igiyawa mu yokek gae kukaeba me gumbe yusipamit diyag veme. 11Meve Erod ge mut igiyawa meumawa me iviwa aug yan barauya iyagau waniya. Meve wape oraimina en waniya barauya Pairat oya taig aine. 12Oiyat me, Erod ge Pairat yaire aya. Namu mu anavi eme.
13Pairat me pirisi koukawa, namuyoiyoi igiyawa ge iyayapan auwane mu onamiya. 14Mu dirumne, “Ye apan mame nenan aug onekke sira aib wayana. Apan mame namuyoiyoi gwambe aivi. Ne gare ye namuyap epinawa yobana, megara me kukaeba meuma kuiyawa da den yaug anona. 15Erod me meib. Me sira me baraune nunan onne. Yauya, me kukaeba da den ane bo atan oya. 16Meoya ne murap gumbe tog meve kwetna aipe.”#(23:16) Namu tenewa da V17 apa mamaib waivi. “Buyunai kumiwa apa, Pairat me apan desirom nog apa arob baraune dauwag aine.”
18Iyayapan undagit nouwa desiromit kwaruwaya, “Apan mame toengura, ge Barabas aropa dauwag nunan ompe.” 19(Barabas me nog aig wakene, kuiyawa at kokawa danave me mut amatone sira iyayapan gudne oya.)
20Pairat imive Iesu yankwepe aipe, meoya mu gumbo sira wane. 21Megara mu kwaruwaya, “Me korosi gumbe toya! Korosi gumbe toya!”
22Sira me mu gumbo koni duwamdesiyawa wane, “Megara me kukaeba divi da ane? Ne kukaeba meuma bo totanwa me ne da den yauna. Meoya ne aug murap gumbe totna meve kwetna aipe.”
23Megara mu kwat wansin ande veme. Mu imuwo me yoma korosi gumbe tope botope. Mu kwat mumawa natawa matadne. 24Meoya Pairat iyayapan noiwa aune sira yoig wane mu imuwo gumbe ape. 25Sira Pairat Barabas kwene aine, mu imuwo gumbe. Apan me mut amatone sira iyayapan gudne oya nog aigne wakene. Pairat Iesu mu nanuwo baraune sira mu Iesu gumbe anoano muma gumbe aya.
Iesu Korosi Gumbe Toya
26Mu me auwag amomewa, Sairin apan iviwa Saimon me at meuma apa oniviwa mu auya. Mu yoma korosi oieve baraug diyag waya. Me aug Iesu amave yoine.
27Iyayapan obiren Iesu amave amiya, sira vesin obiren gaibu danadawai auwag it menan wag amome. 28Megara Iesu munan tobiyag wane, “Jerusarem gwaitawaiwa, it nenan den waya, go yembo yenan ge ud yeuma oya iruwaya. 29#Ruk 21:23Kuiyawa, yauya, kum me onivi iyayapan aib wapewa, ‘Agara vesin, danowo ud onanwa, sira ud am den munemewa, mu gumbo waribiya wakeigimpe!’ 30#Ose 10:8; Rev 6:16Kum me kumiwa, iyayapan tui gumbe amatog wape,
‘Egunup aiga,’ sira tui kusikaren gumbe wape, ‘Um nuna.’
31Mu yoma kaninga gumbe dividivi mame apewa, yoma toyainewa gumbe aninin ape?”
32Kukaeba igiyawa duwam gaibu me gaibu bo atan oya tam amiya.
33Mu amog at iviwa Kuiyamarednawa vemewa uwaya. Meve Iesu yoma korosi gumbe toya sira apan kukaeba duwam gaibu guriya. Dawa naniyutanwa dawa naniketaiwa apa. 34#Sam 22:18; Ais 53:12Iesu wane, “Maman, kukaeba muma anog yankwema. Mu den yawag anoya mu divi eme.” Mu kae kusida aya wape meuma keptetan oya.
35 # Sam 22:7-8 Iyayapan yokeg yangureme. Namuyoiyoi igiyawa iyagau me gumbe waya, “Me iyayapan upeba waita munne. Apan mame God wagomiyanewa Keriso ipewa, me membovit warinampe.”
36 # Sam 69:21 Mut igiyawa uwake iyagau me gumbe aya, sira omoke wain sisipama waniya. 37Mu waya, “Ge Ju igiyawa kin mumawa ipewa, ge gembovit inaigita.”
38Me egave gae mame teya: MAME JU IGIYAWA KIN MUMAWA.
39Apan kukaeba desirom yoma korosi gumbe toyawa Iesu gumbe iyagau wane, “Ge Keriso ipewa, ge gembovit ge nu gaibu warinam nuna.”
40Go apan kukaeba dawa garawa wane aib diengudne. “Ge God aeba den ege? Ge ibnawa gina desirom auege. 41Nu ibnawa nuniyawa me bainda. Kuiyawa garawa me atuwa nu aviete. Go apan mame kukaeba da den ane.”
42Meve kukaeba abnawa da dig wane, “Iesu, toimu geuma danave unig Ayapan awa kumiwa apa, nenan imug anoa.”
43Iesu menan aib garawa wane, “Ne ge natawa dirugeni. Gare ge ne gaibu paradais danave waketa.”
Iesu Boane
44Kum kuiyunup mina aune. Sisip at undag umne aine augoi adne kum koniwa duwamdesi aune. 45#Ibr 6:19-20; 10:19-20Kum tobiroriyane sisip uwag onne. Temporu danave wape gwarapama, me yapave viyodne aigne duwam ane. 46Iesu au kokavit wane, “Maman, ge nanigap ne guwanwa barautna.” Meib wag gaup meuma oieba pukuwane.
47Senturion yaune divi matadne. God watdegawan wane, “Natawa di, Apan mame oraivit di abnawa.” 48Iyayapan undag yanguratan oya onam agoniyayawa, mu undag yauya divi matadne. Mu danadawai gaibu togewo toya sira taig amiya. 49Megara Iesu yaug anoyawa igiyawa ge vesin mu at Gariri apa amave onamiyawa, at painau yoike dividivi undag mame yangureme.
Iesu Dagup Danave Barauya
50Gare apan iviwa Josep wakene, me Daiboru Painauvitwa igiyawa intum anewa, me apan oraiwa sira ano kukaeba den anoiviwa. 51Apan mame kansoru igiyawa nouwa ge mu atan ayawa gumbe den kiniyane. Me at Arimataya abnawa, at me Ju igiyawa gwetoimu mumawa. Me God toimuwawa yautan amaraivi. 52Apan mame Pairat gumbe aine, sira imive Iesu kwapiwa autan oya wane. 53Meve me aug aigne. Me wape gumbe panke sira aug aig dagup me buinunu kwapiya apa baraune. Me apa iragi numan da den barauya. 54Kum me Tamibarip Kumiwa, sira Sabat Kumiwa koni uwatan aivi.
55Vesin gaibu me amowo onamiya. Mu at Gariri apa Iesu amave onamiyawa. Mu dagup yauya, me kwapiwa aninin barauyawa yauya. 56#Eks 20:10; Deu 5:14Meve mu sira taig amiya, gegura ge oira tayapama tamibarip aya. Megara mu Sabat Kumiwa oya gwangwan gumbe nonowa emiya.
Currently Selected:
Ruk 23: mti
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
