Mateo 8

Uapi rrazimaroui Zeso inanomirrari

Maraco 1.40-45; Roca 5.12-16

1Zeso ssonouarri madirra mari icanabaqquia rricaza qquezippanizapa madirra uapi taha Zeso natti rrauizippanirrari. 2Bazima rrauizippaninarra madirra zamacoma onini leprarrine uapi rrazimaroui Zesouarri bacco narronarrari. Poua bodipa: —Zesopa deni torraui, ouape arrimani orrani −naza Zeso baccouarri poua pitoza uitta naza uati tarrari: —Oua Zozossede, ouape bica onerrereraha tia touini tanipe oua tinanabicaniuarrine nauato tinani −naui nade Zesoza.

3Nazapa Zeso poua zepeza bara inaza: —Rrehe, touini onani. Tibicarri, onarraro −naui nade Zeso. Nanarra amazati poua uapicca tomossissi nazapa tobicarrari. 4Nazapa pouaza Zeso attipa: —Arri tibicanicca uima madirradeniza uati tariza terrerana −narrari. —Naraha Deoza dada toqquimauarrina ticcarri, onarraro. Naniza tiqquezimazape dada toqquimade orrariazara tepi tobicani tia noue tinarri. Nezape ticca zamacoma Deoza oppina tanicca tomossizape ticca danirri Deoza torraniuarrine ouaha ouaha naha pina eueue, ppiriri, oqui, narrari da da tizimana. Pina Moizecca marinarraza iboraqquiri inarrarossa tinanarri, onarraro. Nezape bazimaza ticca uima toppinerani auato tezape: “Parrissa tibicarraro” quenauiuarrine, onarraro −naui nade Zeso.

Rromanodenicca isso teppeppe zossedecca zozosse Zeso inanomirrari

Roca 7.1-10

5Naui zotode Zesopa oza panani Capenaouarri bacco tanizapa rromanodenicca isso teppeppe zossede Zesoza ccarronarrari. Arra ccarronarraripa pocca zozosse tabaqqui 100 quenarrari. Poua bodipa: —Zeso oua acco canauiuarrine −naza Zesoza uati tarrari. 6—Oua Zozossede, occa zozossepa occa ozauarri coma taha porirrari. Comene dacoraza siri torramaroza poriparra −narrari.

7Nazapa Zeso: —Rrehe, onanomiuiuarrine nani occana −narrari. 8Naraha isso teppeppe zossede attipa: —Rrehe oua Zozossede, tiape nauatorride tirrirani neraha ouape arrimani, ssamo onani. Occa ozauarri ticcaniuarrine nacassera tinanitide, onarraro. Neraha arriza uati tinezape nani occa ozauarriccaraha, occa zozosse tettiza tinanomiuiuarrine tiparrireni nauato onani −narrari nade. 9—Arri oua naqui occa taminecca zossenirriza omadirraro. Manaco isso teppeppedenipa occa zossenirriza madimanarrari. Pouadenitoui uaua onezape rrauirrona taui. Zosse zosse oneza naco ouattiza rraui torra taui. Occa zozosseza naqui: “Tizepe irrirri” oneza naqui pina arri ozosserrarossa inana tani. Nema nezape arriza uati tineza occa zozosse tonomiuiuarrine tiparrireni, onarraro −naui nade isso teppeppedeni zossede atti.

10Narraro uima Zeso mittazapa uatizeza poua bodi: —A, pouapa nauato taua −narrari. Nazapa poua nattiuarri rrauimissarrarideniza uati tarrari: —Ouape parrissehera tiadeniza uati onana: Arrarrari bodi namanahapa parrissa nauissa tarrari! Tiadeni Izarraeo potemauideni bazimape tettideni ohomitta neraha arrarrarissa narrari tiadenizapa noueraui. Parrissa tiquenanissa tani ohomitta nerrerani −naui nade Zeso. 11—Neraha ouattipe tiadeniza: Rrehe, zama nemaneheza madirizemanarrarideni motapa Izarraeodeni querrena-rrararaha ouaza parrissa quenarraridenipa niza Deocca errete rripaqquie imeni torrezape nauizapa bazima rripaqquimanauiuarrine rrauirronauitoui. Ticcadeni idideni Abarahao, Izaqui, Zaca narrarideni tezerre pouadeni naco nani memeuarri Deo pocca cacaueheuarri pouadeni naco rripaqquimanauitoui, onarraro. 12Deopa pocca cacauehe memeuarricca Abarahao potemaui Izarraeodeniza torraniuarrine inanarroraporaha ouaza parrissa quena-rrarazapa Deo amossiniuarri ua ininebaqquiuitoui. Ziziniza toquerrenaza ocasserani auemana-zanapozapa panodeni tozaui naza orri orri quenauitoui, onarraro −naui nade Zeso.

13Nazama rromanodenicca isso teppeppe zossedeza Zesopa: —Rrehe, peperriua! Tiape tibodi parrissa tanissa tezape ticca ozauarri ticcanina. Nani bacco tinanizape tibodi touini tanicca tiaza onanani qqui tinanitoui −naui nade Zeso. Nanarra uati uati toquenaraha isso teppeppe zossede pocca ozauarri pocca zozosse amazati tonomirrari quenade.

Zesopa Pedoro massodini inanomirraro

Maraco 1.29-31; Roca 4.38-39

14Zeso Pedorocca ozauarri toqquezimazapa Pedoro massodini pori canani Zeso qqui tarrari. Coma tarraro, uapini ppocorarraro. 15Nazapa Zeso poni zapaniza bara nazapa uapini tonauiui narraro. Nezape totemeza Zeso pocca mamari tabaqquima inarripabaqquirrari.

Zesopa comaqquiri narrarideni inanomiriza-baqquirrari

Maraco 1.32-34; Roca 4.40-41

16Rrehe, zomeme nezape madirra bodideniza Tocorime-Taminecca zozosse tocorime carrimanarrarideni Zesouarri eccarronabaqquirrari. Narraridenipa uapi taraha Zeso poua attizara tocorime zosse ininebaqquizapa rrauininerrari nade. Comaqquiri narrarideni naco bazima inanomirizarrari nade. 17Arri Zesorrine nema narrarope pina taide Deo Atti cacomerabote Izaia itezerremacca uima ecomeraporrarossa inanarraro. Narraroa arri: —Pouana icomene onihi onihi narizarraro idirizarraro. Icca zamacoma naqui idirizeza pouaza torrezape inarricanitoui −napoui nade Izaia.

Madirra Zeso uatimade toquerrenauiuarrineraha

Roca 9.57-62

18Nazapa Zeso madirra pouaza queriqquirronaui touapiui naui qqui tazapa poua uatimadedeniza: —Rrina, coriza rrippeuarri rrauirrana −naui nade.

19Nazapa rraui torrabote naraha zodeodenicca marinarra maride Zesouarri ccarronazapa: —Nirra oua Maride −narrari. —Arri ticcarizezama oua naqui tiaza occana, onarraro −naui nade. 20Naraha Zesopa pouaza uati tarrari: —Ouaza ticcarizaniuarrine tiparrire-rreranitide. Arrana zouazouapa odinedeni carririzemanaui. Ppiriri naco tazarideni carririzemanaui. Arri oua Madirra Bedipe oza ocappirani. Ouadaniuarrinecca uauada ocappirani −nade.

21Nazapa Zesocca mamari orrariapa Zesoza uati tarrari: —Oua Zozossede, occa abi uatiaui ppa ozauiuarrine taide occa ozauarri occanipoccana. Niza zotodena tiaza occarizaniuarrine rrehe taqui? −naui nade. 22Naraha Zeso pouaza uati tarrari: —Poni! Rridapana ouaza ticcarri −narrari. —Arra madirrapa Deocca camittehe cappiremanarrarideni carri taui. Pouadenina madirra zoqqueza ppa izemanauiuarrine parriremanaui −naui nade Zeso pocca mamariza.

Zesopa rrorrode inatappa rribabani inatappa nanicca uima

Maraco 4.35-41; Roca 8.22-25

23Nazapa Zeso darroniza toqquezaza pocca mamari tabaqqui naco pouaza rraui torrezaza pouaza rraui torrarrari. 24Nazapa ori toquenaraha amazati rrorrode dacorehema ccarrona, passo dacorehema ccarrona nezape coriza rriba rriba narrarorrine darroniza passo ssoniza ssoniza narraro. Naraha Zesopa uadarra zanaporrari. 25Nazapa Zeso uadauiuarri rraui torreppiza Zeso cobo cobo iquenaza: —Ia Zozossede, nocco tirrarri! Ia acco ticanabaqquirri! Rre icanabote nani! −quenaui nade.

26Nazapa Zeso pouadeniza uati tarrari: —Nerrecotoui ticappinemanarraro? Tiadenipe ouaza: “Rrehe, Zesopa ia touacaua-baqquiuiuarrine parrireui” tiquenerrerarrarorane? −naui nade. Nazapa totemaza rrorrodeza, passoza uati tarrari: —Peperri tarri! −naui nade. Nezape rrorrode, passo rriba rriba narraro naqui zamarrima narraro. Zamarrima nezape passo pozippanissa tarraro. 27Nazapa pocca mamari tabaqqui bazima: —A nerreco madirra? Arrina, rrorrode passo rribabani tazarrani poua attiza ibora taua −quenaui nade.

Cadarauarricca madirra bodideniza Tocorime-Taminecca zozosse tabaqqui tocorimedeni madizemanarrari

Maraco 5.1-20; Roca 8.26-39

28Nazapa coriza rrippeuarri bacco tarrari Zeso. Narraro zama arobeni oninipe Cadara. Nauiuarri madirra pamahapa tonoccobiriuarri mamadimana narrari. Narrarideni madirra bodidenizapa Tocorime-Taminecca zozosse tabaqqui tocorimedeni madizemanarrarirrine uadidi tarrari. Nazapa naui Cadarauarricca madirra bazimapa tocorime carrimanarrarideni noppine cacappinemana naza tonoccobiriuarricca rraui rrarraui torra narrararrari. Naraha Zeso toqquemorazapa pouadeni pamaha tonoccobiriuarri uedarronarrari, Zesoza bacco quenarrari. 29Nazapa Zeso qqui toquenazapa rrazirema uati uati toquenarrari: —Deo Bedi nerrecotouira ticcarronarraro? Ia narrizode ticcarronarraroqui? Deo ia tonarrizo-baqquiuiuarrinecca uada bacco terreraqqueraha −quenaui nade.

30Naraha naui uarrira taniza poroco uapi taha rriparizemanarrari. 31Nazapa Zesoza tocorime attidenia: —Rraho! Ia zosse tininebaqquizape poroco bodidenizara ia zosse tizimabaqquirri −quenaui nade Zesoza.

32Nazapa Zeso: —Rrehe, porocoza tiquerrenana! −naui nade. Nazapa madirra bodidenicca tocorime rrauininezapa porocozana rraui torrezimarizarrari. Nanarra poroco bazimapa coriza inidi sseberaniuarri domo toqquezippaza rreuarrarrari. Catorrezipparrari. Rre tocanirezapa corizaza cacotezanarrari.

33Nazapa poroco cacauadedeni qqui toquenaza oza pananiuarri domo toccanirrari. Bacco tanimanazapa uima bazima uati narizemanarrari: —Tonoccobiriuarri madimanarrarideni bodidenicca tocorimedeni Zesorrine rrauinineparra! –narizemanaui nade. 34Nazapa nani oza pananicca madirra bazima Zeso qquide rrauirronarrari. Bacco narronemanazapa poccadeni zamaza Zeso toccaniuiuarrine zossede damamera tarrari: —Ticcanirri, arri icca zamazape timadi terrerarri! −quenaui nade.

Currently Selected:

Mateo 8: KBNT

Highlight

Copy