Zouao 4
4
Zeso Carireauarri torroppemanirrari
Mateo 4.12; Maraco 1.14; Roca 4.14
1Nazapa Zesoza madirra touapirraricca uima torrarizarraro. Nazapa zodeodeni mota marinarra onini parizeoza rrehe quenarrarideniza uima bacco tarraro: —Zesoza toquerrenarrarideni touapiui. Zouao Batistaza arramani. Zesona madirra denima passo dopaniza niqui niqui ihizanabaqqui narrari −nanarizemana naui uima mittemanarrari. 2(Naraha Zeso pouapa madirra passo dopaniza niqui niqui ihizanabaqqui narraraui. Poua uatimadedenina madirra passo dopaniza niqui niqui ihizanabaqqui narrari.) 3Nazapa Zesoza: —Marinarra parizeoza rrehe quenarrarideni titauimari mittemanaui −quenazapa zama arobeni Zodeaza rroppemarrari, zama arobeni Carireauarri toccanipomauiuarrine.
Samariauarricca amonerre Zeso tezerre bacco tocanirerraro
4Zodeaza rrauirranirraro rrauipe zama arobeni Samariauarri tossoniqquimani Carirea bacco tanirraro. 5Narraro rraui rrauirranizape Samariacca oza panani oninipe Sicaza iarrirarronarraro. Narraro ozape maittaccazama Zacacca zamabote uarrira tarraro. Zaca poua zamaribotepe poua bedi Zozeza da inaporraro nade. 6Nanizana —Zacacca passorrinebote −quequenanarrari ui tozarraro. Narraro passouarrine ui tozaniza bacco inaporraro. Marri orrari uariri nabote naza Zeso rrao torrarronaza, passouarrine ui tozani uinoriniza uittarirraride.
7-8Nauiza Zeso uittariraha ia poua uatimadedenipe oza pananiuarri rrauirrarraro, itapari mittade. Naraha naui passouarrine uinoriniza Zeso uittariza Samariacca madirra amonerre passotoui ccarronarraro nade. Nazapa Zeso poniza uati tarrari: —Ouaza ticca passo ze onana −naui nade.
9Zeso atti nama nazapa poniza rriza tarrarossa narraro. Arra, zodeodenipa samaritanodeni zepedenitarrizapa: —Zede oppina tani −quequenanade. Nezape amonerre Zesoza uati tarraro: —Nerrecotoui tiape zodeodeni tirreraha ouazara passo mitta tarraro? Ouape Samariacca madirra orrani −nani nade. 10Naraha manaco Zeso poniza uati tarrari: —Rridacca Deocca danirri nauato tinezape arra tiaza passo mitta tozarrariza manacora ouaza passo mitta tizanitouiraha ssamo tinarraro. Naraha rridacca ouaza nauato tineza ouaza uati tinezape passo camittehecca tiaza da onanitouiraha −naui nade Zeso.
11Naraha manaco amonerre poni attinipe: —Nerrecozara passo uana tizananiuarrine? Ui tozanicca passope uarri tani. Nerrecouarricca passo camittehecca ouaza da ticananiuarrine? −nani nade. 12—Arrirraro passouarrine ui tozanipe maittaccazama Zaca iaza ineborraro. Arrirraro passope Zaca ze ze naporrari. Poua bedideni naco arrirraro passoza ze ze quenaporrari. Poccadeni bani bedi ette torraui naco arrirraro passoza ze ze quenaporrari. Naraha tiana deni tirrarrarorane, Zacana arramanirana? −nani nade. 13Naraha manaco Zeso poniza uati tarrari: —Arrirraro passope ze ineraha ibacco rrocopoma tani −naui nade. 14—Naza arri oua passo da ocanarraro ze quenauipa baccodeni rrocomanapoma-rrarauitoui. Arri occa danirri passona madirra bodideniza rriquerreranitoui. Camittehe rriquerreranicca torraniuarrine −naui nade Zeso.
15Naraha amonerre attinipe: —Rrari arri ouaza uati tinarraro passo ouaza da ticanarri, obacco rrocopoma-rreraniuarrine. Nani arrirraro passotoui ohoccarrona nerreraniuarrine −nani nade. 16Naraha Zeso poniza uati tapomarrari: —Ticcaniza ticca maqquiza uati tinaniza arrauarri ccarronana −naui nade Zeso. 17Naraha poni attinipe: —Maqquiderre ocappirani −nani nade. 18Naraha Zeso poniza uati tapomarrari: —Rrehe “Maqquiderre ocappirani” tezape parrissa. Naraha ticca maqquipa 5 quenaui. Rridapanacca naco ticca maqqui rraraui. Tetti nema nezape parrissa −naui nade Zeso. 19Nanerre amonerre attinipe: —Tiape Deo Atti cacomerabote tirrani −nani nade. 20—Icca abidenipa arrirraro ssonozana Deoza uauatizemanapo narrari. Naza zodeo tiadeni tettidenipe: “Zerozarezana Deoza tetetizemana nani bica tani” tiquenarraro −nani nade.
21Naraha manaco Zeso amonerreza uati tarrari: —Amonerre, ouatti timittarri. Niza uimape cacarriqquimeranitoui. Arri ssonouarri Deoza tetetizemana narrarope nebonitoui. Arra Zerozareuarri Deoza uauatizemana nauiuarri naqui nebonitoui −naui nade. 22—Samaritano tiadenipe Deoza tetetizemana naraha, narraro uimape ssamoqquiri tiquenani. Naraha zodeodeni iana parrissa Deoza ehetize narraro. Ia zodeodeniza tossiuauehe ccarronaporrarona madirra bazimaza torraribaqquirraro. 23Rridapanape uima zati bacco tani. Madirra parrissa Abiza uatizemanaha madimanarraridenipa pouadeni bodicca parrissehema Deo Pouaza rrehe quenazapa uatizemanauitoui. Abipa madirra nama quenarraridenizapa nacassa taui. 24Deopa assire rraraui, Deopa corimeparra. Nazama madirra Deo Pouaza uatizemanarraripa pouadeni corimema uatizemanauina bica tani. Maizemana-rraraza uatizemanauina bica tani onarraro −naui nade Zeso.
25Naraha amonerre attinipe: —Rrehe, ouape nauato onani: Mesia poua oni ouahapa Cristo quenarrari. “Narrari ccarronauitoui” quenauipa ohomitta nade. Niza poua bacco nazapa pocca marinarra bazima iaza auato inananitoui −nani nade. 26Nazapa Zeso poniza uati tade: —Ouape Mesia tiaza uati uati onarraro −naui nade.
27Naraha poua uatimadedeni iape Zeso poua uittariuiza bacco inaninerre Zesopa amonerreza uati uati taui qqui inezape uarro icanirede. Ibodiza: —Nerrecotouira poniza uati uati tarrari? −inade. Zeso pouaza naqui: —Nerreco uimara poni tazarrani uauatiti tinarraronerre? −inanitouiraha uati inerrerade. 28Nezape amonerre ponicca zipa inebo, oza pananiuarri toccanide. Oza panani bacco tanizape madirra bazimaza uati tanirraro: 29—Rrari, arra maqquiderre nauatobote occa uima bazima ouaza uati uati tarrari qqui tiquenarro. Pouapa arra toui imadirraro ia Idinide Cristo-Mesia uitiderra −nani nade. 30Nazapa narraro oza pananicca madirra mota rrauinineza Zesouarri rrauirronarrari.
31(Amonerre oza pananiuarri uati uati terre neraha) ia Zesoza: —Ia Maride, tirriparri −inade. 32Naraha Zesopa: —Rrirripa ouaha ocarrini −nade iaza. 33Nezape iara uimahaha icaneza: —Madirra ouaha pouaza rrirripa zorro inarronarrari uitide? −inade. 34Nazapa Zeso iaza uati uati tarrari: —Ouape Deo oua cazosserrari. Poua nacassa tauicca ozepe irrirraro. Narrarope pina occa rrirripassa narrari. Deo Poua zepe ihirri nauicca narraro onarricaniuarrine, onarraro. Narrarope occa rrirripa −nade Zeso. 35—Naraha tettidenipe arrima tiquenani: “Abazico 4 canazana uizarracca ppa taui bono rradaui bite naui bica taui” tiqueneraha ouattipe: Arrana qqui tiquenanarra! Arra uizarracca ppa tauipa rradabote torraui. Bite naui bica taui −nade. —Madirra Deo Atti mittemanauiuarrinepa narroremanaui. Pina uizarracca ppa taui rradarrarissa quenaui. 36Madirra uizarracca ppa taui bono bitede zepedeni ihirrimana narraripa uima bicani cacarrimana narrari. Pouadenirrinena madirra camittehe rriquerreranicca cacarrimana narrari. Nazapa uizarra ppadedeni, bono bitededeni tezerrepa uatizemana taui. 37Nazama arrirraro uimape parrissa: Uizarra ppadedenipa ouaha, uizarracca zamatapa bono rradaza bitededenipa ouaha quenarrari. 38Nazama ouape uizarracca bono rradaui bitede tiadeni zosse onabaqquina. Arra ticcadeni ppanirri rraraui. Narrarizapa madirra ouahadenina zepedeni irrimanaporrari. Naraha tizepedeni irrimanarrarocca bazimape tassaqquirraro. Arra zepedeni irrimanaporraricca naqui tiadeniza uima bicani torrani −nade Zeso iaza.
39Nezape amonerre Samariacca oza panani Sicauarri Zesocca uima uati uati teza madirra mota uapi taha Zesoza parrissa quenarrari. Arri amonerre poni attinipe: —Arra otauimari bazima nauato tarrari, ouaza uati uati tapa −narraro mittemanazapa parrissa quenarrari. 40Nazapa Samariacca madirradeni iauarri bacco narronemanazapa Zesoza uati toquenade: —Iaza timadiccarri −quenade. Nezape naniza icca uada pamaccaniuarrine imadiccade. 41Zeso nauiza ibozapa madirra denima Zeso atti mittemanazapa pouaza parrissa quenade. 42Nazapa amonerreza uati toquenade: —Taidepe tettizaha “Zesopa Cristo-Mesia” inaporraro. Naraha rridapanape Zeso pocca marinarra imittezape pouaza parrissa inarraro. Tettizaha imittani orrari-rrerani. Rridapanape pocca marinarra imittezape nauatoqquiri inani: “Pouapa zama bazimacca madirra Tonassiuauade” inarraro −quenade.
43Nezape zama arobeni Samariaza icca uada pama nezape Zeso pouaza rrauirranide zama arobeni Carireauarri. 44Nauizana Zeso Deo Atti cacomeraqquiri narrarideni tauimarideni uati tarraride: —Poccadeni madirrapa pouadeniza: “Deni tirrani” quena-rraraha nama narronemanarrari −narraride Zeso. 45Nazapa Carireauarri bacco nanizapa icatizemaneri nade. Arra oza panani Zerozareuarri madimanapozapa errete Pascoaza poua canauatori canaui qqui toquenaporra narrari.
Canauarri toccaniza tamine birri accodecca erredeni inanomirrari
46Carireacca oza panani Canauarri erreteza Zeso pouarrine passoraha uva pperrene ihinana naniuarri rrauirranipomarraro. Naraha tamine birri accode bedipa oza onihi Capenaouarri coma tarrari. 47Naraha tamine birri accodepa: —Zeso zama arobeni Zodeauarri ccaniza Carireaza bacco naniui −quenaui uima mittazapa Canauarri ccarronarrari Zesoza. Bacco narronazapa Zesoza uati tade: —Occa ozauarri ouaza ticcaccarri, occa erredeni zoqquebote naui tinanomiuiuarrine −nade. 48Naraha Zeso attipa: —Tiadenipe ocanauatori canani qqui tiquenerrerezape ouaza parrissa tiquenerrerani. Qqui qqui tiquenapo-rrerarrarocca auato onana-rrereza naqui ouaza rrehe tiquenerrerani −nade. 49Naraha tamine birri accodepa: —Oua Zozossede, occa erredeni zoqque-rrarazama ticcaccarri −nade.
50Nazapa Zeso pouaza uati tade: —Ticcanirri, ticca erredenipa zoqque-rraraui, tonomiui −nade. Nazapa Zeso poua attiza parrissa nazapa toccanide. 51Nazapa toccanirrari, uada ssiuarra pocca oza bacco tanibote naraha pocca zozossedeni bacco irrizabaqquirrari. Nazapa uati toquenarrari: —Ticca erredenipa tonomiderra! Madiui −quenaui nade. 52—Marri nerrecoza occa erredenipa tonomirraritta? −naui nade. —Maittazama marri orrariuariri naza uapi ppocone totapparrariderra −quenaui nade. 53Nazapa imehi bodi uatorrari: —Maittazama marri orrariuariri naza Zeso uati tarraride: “Ticca erredenipa tonomiui” narraride −naui nade. Nazapa tamine birri accode pocca ozacca bazima naco Zesoza parrissa quenarrari nade.
54Arrirraro uimape Zeso Zodeauarri ccaniza Carireaza bacco nanizapa naui Carireaza canauatori canapomarrari.
Currently Selected:
Zouao 4: KBNT
Highlight
Share
Copy
Want to have your highlights saved across all your devices? Sign up or sign in
2020 Impresso na Graafica da Biblia
