Evvan 8

Pieʹllkueiʹmmrieʹǩǩest poppõttum neezzan

1Isõs mõõni Vuõjjmuõrrteärmma.

2Da ääiʹjeld tueʹlää son pueʹđi eʹpet ceerkva da puk narod pueʹđi suu årra, da son iišti da mättʼti siʹjjid.

3Tâʹl lääʹjjuʹčteeʹl da farisõõzz puʹhtte suu årra pieʹllkueiʹmmrieʹǩǩest ǩidd valddum neezzan da piʹjje suu joouk kõʹsǩǩe 4da cieʹlǩǩe Isõʹsse: «Uʹčteeʹl, tän neezzan poppõʹtte tâʹl, ko son leäi âiʹdde tuejjeʹmmen pieʹllkueiʹmmrieʹǩǩ. 5Moʹssai lääʹǩǩ mieʹrrad, što täiʹd âlgg ǩieʹđjted. Mâiʹd ton ceälkak tääzz?»

6Sij tattu ǩeeuʹseed suu, što vuäitče suu viârtõõllâd. Tâʹl Isõs kåʹmrdi vuâlas da ǩeeʹrjti suõrmines jânnma. 7Leša sij âinn kõʹčče suʹst. Isõs pâjjni juõʹlji ool da cieʹlǩi: «Ǩii teeʹst lij rieʹǩǩtem, tõt čââckas suu ool vuõssmõs ǩieʹđj.» 8Son kåʹmrdi eʹpet vuâlas da ǩeeʹrjti jânnma. 9Ko sij tän kuʹlle da sij kââmm tuõđšti siʹjjid vieʹrren, mõʹnne sij meädda õõuti õõuti, puärrsummsest ääʹljeeʹl mââimõõzz räjja. Isõs paaʹʒʒi õhttu neezznin, kååʹtt čueǯǯai suu ooudâst.

10Ko Isõs vuõiǥõõʹsti jiijjâs ij-ǥa vuäinnam jeärrsid ko neezzan, cieʹlǩi Isõs suʹnne: «Neezzan, koʹst liâ puk tuu viârteei? Ij-ǥo ni ǩii leäkku tuu suudâm?» 11«Ij ni ǩii, Šurr», neezzan vaʹsttii. De Isõs cieʹlǩi suʹnne: «Jiõm ni mon tuu suud. Mõõn, leša jeäʹl täʹst õõudâs rieʹǩǩ tuejjad.»

Isõs lij maaiʹlm čuõvv

12Isõs eʹpet säärnai siʹjjid: «Mon leäm maaiʹlm čuõvv. Kååʹtt muu mieʹldd jåått, ij taarbâž seuʹnnjeen jååʹtted, a son vuäǯǯ jieʹllem čuõv.» 13De farisõõzz cieʹlǩǩe suʹnne: «Ton tuõđštak jiõčč jiijjad; ij nåkam tuõđštõs leäkku tuõtt.» 14Isõs cieʹlǩi siʹjjid: «Håʹt mon tuõđštam jijstan, tuõđštõssam lij tuõtt, tâʹl mon teâđam, koʹst mon leäm puättam da koozz mõõnam, leša tij jeäʹped tõn tieʹđ. 15Tij suudveʹted mâʹte oummu. Mon jiõm suud ni ǩeän. 16Håʹt-i suudčem, muu suudâm leʹčči vuõiggâd, ko mon jiõm leäkku õhttu, pâi leäm suin, kååʹtt lij muu vuõlttääm. 17Lij-i tij lääʹjjest še ǩeeʹrjtum, što kueiʹt oummu tuõđštõs lij tuõtt. 18Mon tuõđštam jijstan, da muʹst tuõđašt Eʹčč še, kååʹtt lij muu vuõlttääm.»

19Sij kõʹčče suʹst: «Koʹst tuu eʹčč lij?» Isõs vaʹsttii: «Tij jeäʹped toobd muu, jeäʹped ni muu Eeʹjj. Jõs tij toobdčid muu, toobdčid še muu Eččan.»

20Tän Isõs säärnai ko mättʼti ceerkvest sǩiâŋkkčuuʹǩǩ luʹnn. Ij ni ǩii välddam suu ǩidd, ko suu äiʹǧǧ iʹlleäm veâl puättam.

«Jeäʹped vueiʹt pueʹtted tåk, koozz mon mõõnam»

21Eʹpet Isõs cieʹlǩi siʹjjid: «Mon mõõnam meädda, da tij ooccveʹted muu, leša jääʹmmveʹted rieʹǩǩeed diõtt. Tij jeäʹped vueiʹt pueʹtted tåk, koozz mon mõõnam.» 22De juudlažneeʹǩǩ kõõjjee: «Ij tâma son juuʹrd jiijjâs kåʹdded, ko son nuʹt ceälkk: ’Koozz mon mõõnam, tåk tij jeäʹped vueiʹt pueʹtted’?» 23Isõs cieʹlǩi siʹjjid: «Tij leäʹped vuâlggam vueʹllen da mon pâʹjjen. Tij kuullveʹted tän maaiʹlme, mon jiõm. 24Cieʹlǩǩem tâma mon, što tij jääʹmmveʹted rieʹǩǩest. Tij tuõđi jääʹmmveʹted, ko jeäʹped ååsk, što mon leäm tuõđi tõt, mii mon leäm.»

25Sij cieʹlǩǩe suʹnne: «Ǩii ton leäk?» Isõs cieʹlǩi: «Mâʹst šât mon mainstem tiʹjjid? 26Muʹst leʹčči jiânnai teeʹst mainstemnalla da vuäitčem suudâd tiʹjjid; leša son, kååʹtt lij muu vuõlttääm, lij tuõtt, da mon teâđtam maaiʹlme tõn, mâiʹd leäm kuullâm suʹst.»

27Leša sij jiâ fiʹttjam, što Isõs mainsti siʹjjid Eeʹjjest. 28Isõs cieʹlǩi siʹjjid: «Ko ââʹleʹped Oummu Pääʹrn, mättjeʹped tieʹtted, što mon leäm tõt, ǩii mon leäm. Mon jiõm tuejjad ni mâiʹd jiõččan täättast, a säärnam, mâiʹd Eččam lij muʹnne mättʼtam. 29Son, ǩii lij muu vuõlttääm, lij muiʹn; son iʹlla kuâđđam muu õhttu, ko mon pâi tuejjääm tõn, mii lij suʹnne miõl mieʹldd.»

«Tuõđšvuõtt rääjj tiʹjjid luõvâs»

30Määŋgas oskku Isõʹsse, ko sij kuʹlle suu mainstem nääiʹt. 31Isõs cieʹlǩi tõiʹd juudlažniiʹǩǩid, kook oskku suu: «Ko põõššveʹted muu sääʹnest, leäʹped tuõđi muu mättʼtõspäärna. 32Tâʹl tij mättjeʹped tobddâd tuõđšvuõđ, tuõđšvuõtt rääjj tiʹjjid luõvâs.»

33Sij vaʹsttee suʹnne: «Mij leäʹp Aabrahaam rooddâst jeäʹp-ǥa leäkku ni kuäʹss leämmaž ni ǩeän vääʹld vueʹlnn. Mõõzz šât ton ceälkak: ’Tij piâssveʹted luõvâs’?» 34Isõs cieʹlǩi siʹjjid: «Tuõđi, tuõđi mon ceälkam tiʹjjid: Jueʹǩǩkaž, ǩii tuejjad rieʹǩǩ, lij rieʹǩǩ vääʹld vueʹlnn. 35Leša päkldõs ij põõžž põõrtâst âʹǩǩpââjas; Päʹrnn pââšš. 36Jõs Päʹrnn luâštt tiʹjjid luõvâs, tâʹl tij leäʹped tuõđi luõvâs. 37Kâʹl mon teâđam, što tij leäʹped Aabrahaam päärna da juʹrddveʹted muu kåʹdded, ko jeäʹped seän, mâiʹd mon säärnam. 38Mon mainstam tiʹjjid, mâiʹd leäm vuäinnam Eččan åʹrnn. Tij še tuejjeʹped tõn, mâiʹd tij leäʹped kuullâm eʹjsteed.»

«Tij leäʹped eeʹjjest piârgglõõǥǥâst»

39Sij vaʹsttee suʹnne: «Aabraham lij mij eʹččem.» Isõs cieʹlǩi siʹjjid: «Jõs tij leʹččid Aabrahaam päärna, tâʹl tij tuejjeʹčid nuʹt, mäʹhtt son lij tuejjääm. 40Leša ååʹn tij tättveʹted kåʹdded muu, åumma, kååʹtt lij särnnam tiʹjjid tuõđšvuõđ, mõõn son lij kuullâm Vuâsppååʹdest. Aabraham ij tuejjääm nuʹt. 41Tij tuejjeʹped eeʹjjed tuâjaid.» Sij cieʹlǩǩe suʹnne: «Mij jeäʹp leäkku vieʹncteʹmes päärna; meeʹst lij õhtt Eʹčč, Vuâsppåʹd.» 42Isõs vaʹsttii: «Jõs Vuâsppåʹd leʹčči tij Eʹččed, tij räʹǩsteʹččid muu, tõn diõtt ko mon leäm puättam Vuâsppååʹd åʹrnn. Jiõm mon leäkku puättam jiõččan täättast, leša son lij muu vuõlttääm. 43Mõõn diõtt tij jeäʹped fiʹtte muu mainnâz? Tõn diõtt ko tij jeäʹped seän kulddled, mâiʹd mon ceälkam. 44Tij leäʹped eeʹjjest piârgglõõǥǥâst, da eeʹjjed haalid tij haaʹleʹped kulddled. Son lij leämmaž koʹddi juʹn aalǥâst. Son iʹlla tuõđšvuõđ peäʹlnn, ko tuõđšvuõtt lij suʹst kuʹǩǩen. Ko son ǩeâlstââll, son maainast jiijjâs aaʹššid: son lij ǩeâlstõõlli da ǩeeʹlesvuõđ eʹčč. 45Leša muu tij jeäʹped ååsk tõn diõtt, ko mon mainstam tuõđšvuõđ. 46Ǩii teeʹst vuäitt čuäʹjted, što leäm tuejjääm rieʹǩǩ? Jõs mon säärnam tuõđ, mõõzz jeäʹped ååsk muu? 47Vuâsppååʹdest šõddâm kooll, mâiʹd Vuâsppåʹd ceälkk. Tõn diõtt tij jeäʹped kuul, ko jeäʹped leäkku Vuâsppååʹdest.»

48De juudlažneeʹǩǩ cieʹlǩǩe suʹnne: «Ton leäk samarianeǩ da ǩeähnas jiõgg vääʹld vueʹlnn, lij-a tõt tuõtt?» 49Isõs vaʹsttii: «Ij muʹst leäkku ǩeähnas jiõgg. Mon ciʹsttjam Eččan, leša tij pâi straammveʹted muu. 50Leša mon jiõm ooʒʒ jiõččân ciist. Lij pâi õhtt, ǩeäzz kooll cistt da suudâmväʹldd. 51Tuõđi, tuõđi mon ceälkam tiʹjjid: kååʹtt åskk muu saaʹnään, son ij jääʹm ni kuäʹss.»

52Juudlažneeʹǩǩ cieʹlǩǩe suʹnne: «Ååʹn mij fiʹttjep, što ton leäk ǩeähnas jiõgg vääʹld vueʹlnn. Aabraham lij jäämmam, da profeeʹtt liâ jäämmam, da ton ceälkak: ’Kååʹtt åskk muu saaʹnään, son ij jääʹm ni kuäʹss’. 53Leäk-a ton šoorab ko eʹččem Aabraham, kååʹtt lij jäämmam? Da profeeʹtt še liâ jäämmam. Ǩeäʹđen ton jiijjad joordak?» 54Isõs vaʹsttii: «Jõs mon vääldčem jiõčč ciist jiõccsan, tâʹl muu cistt iʹlla ni mii. Muu Eʹčč lij tõt, kååʹtt oudd muʹnne ciist, son, ǩeäʹst tij ceäʹlǩǩveʹted: ’Son lij mij Vuâsppååʹdem’, 55jeäʹped-ǥa toobd suu; leša mon toobdam suu. Da jõs mon ceälkčem, što jiõm toobd suu, leʹččem mon seämmanallšem ǩeeʹles, mâʹte tij leäʹped; leša mon toobdam suu da ååskam suu sääʹn.

56Tij eʹččed Aabraham rämmšõõđi tõʹst, ko son šõõddi vueiʹnned muu peeiʹv, da son vuõiʹni tõn da rämmši.» 57De juudlažneeʹǩǩ cieʹlǩǩe suʹnne: «Jiõk leäkku veâl ni vittloekksaž da leäk mâka vuäinnam Aabrahaam!» 58Isõs cieʹlǩi siʹjjid: «Tuõđi, tuõđi mon ceälkam tiʹjjid: ouʹddelgo Aabraham šõõddi, mon leäm leämmaž.»

59Juudlažneeʹǩǩ noʹrre tâʹl ǩieʹđjid da juʹrdde čâʹcǩǩed suu, leša Isõs peittlõõđi da vuõʹlji ceerkvest meädda.

Currently Selected:

Evvan 8: SKOLT

Highlight

Copy