John 13

De hhui a Iesu vae o ana dangada agoago

1Gai i mua de hai Taonga Hagasili, gai Iesu gu iloo bolo gu dae dono masavaa e hano gee ai i henua i lalo ga ahe gi daho Tamana. Ia ne aloha i ono dangada i henua i lalo nei, gai ia ne aloha donu i gilaadeu ga dae ai gi de hagaodi.

2Gai de masavaa huu o de gaimee i de ahiahi, gai de ia hagabaubau laa gu lava i de gaavange gi lodo o Judas Iscariot, tama daane a Simon, de lodo e gaavange Iesu. 3Gai Iesu e iloo bolo Tamana gu gaavange gi de ia ssauaa e huahua ai mee alodahi, gai ia ne humai i daho de Maadua gai e ahe ange naa gi daho de Maadua. 4Deelaa ai, ia ne hidi age i de mommee gaimee, ga hagaui dono malo laa daha ma de kave dahi malo hagammasa ga nnoa ai lo tono ungaalodo. 5Gai ia ga llingi ange vai gi lo te gumedi, ga daamada de hakaugau vae o ana dangada agoago, ma de hagammasa olaadeu vae i de malo hagammasa e nnoa ange laa gi dono ungaalodo.

6Gai ga dae mai huu ia gi Simon Peter, gai Peter ga ssili ange gi de ia, “Tagi Maolunga, koe ga hakaugau naa hogi luoogu vae?”

7Iesu ne hai ange gi de ia, “Koe tigi donu ange gi de hegau aagu ga hai nei iainei, gai muli mai naa huu gai koe gu donu ange aagena.”

8Gai Peter ga hai ange gi de ia, “Koe e dee dai hakaugau donu luoogu vae.”

Iesu ne hai ange gi de ia, “Noo au e dee hakaugau goe, gai koe e dee dau donu madali au.”

9Simon Peter ne hai ange gi de ia, “Tagi Maolunga, e dee go luoogu vae donu huu aau e hakaugau, gai go luoogu lima hogi ma dogu biho!”

10Iesu ne hai ange gi de ia, “Dangada gu lava laa i de gaugau, go olaadeu vae donu huu e hai gi gilimalali; olaadeu angaanga alodahi gu gilimalali donu. Goodou gu gilimalali, aagai e dee go goodou alodahi.” 11Go hiidinga Iesu gu iloo donu be goai gu dai gaavange laa ia, deelaa aana ne hagadaba ai laa, “E dee go goodou alodahi gu gilimalali.”

12Gai ga lava huu i dana hakaugau olaadeu vae, gai ia ga ahe ange ga gahu i ono malo ga noho i dono duulanga. Gai ia ga hai ange gi gilaadeu, “Goodou gu tonu ange naa gi de hegau aagu ne hai adu nei gi goodou?#Luke 22.27 13Goodou e hagahi mai Tangada Agoago ma Tagi Maolunga gi de au, gai e heohi donu oodou muna, go au donu. 14Noo au, doodou Dagi Maolunga ma doodou Dangada Agoago, gu hhui oodou vae, gai goodou hagadau huuia hogi oodou vae. 15Au gu gaavadu gi goodou dahi hagaago danuaa, gi maua ai e goodou i de hai gi bei dagu hai gu hai hegau adu ai gi goodou. 16Ni muna abodonu, ni muna abodonu aagu e hai adu nei gi goodou, tangada hai hegau e dee maolunga ange i dono dangada aamua, gai tangada ne hai gi hano e dee maolunga ange i tangada ne haia ia gi hano.#Mat 10.24; Luke 6.40; John 15.20 17Noo goodou gu iloo mee nei, gai goodou e manuuia noo goodou e hai hegau ai.

De tala a Iesu dono gaavange

18“Au e dee basa i goodou alodahi; au e iloo goodou aagu gu lava i de hili. Gai de mee nei e hagassula muna a de Beebaa Dabu gu tala laa, ‘Tangada ne gaimee madali au gu hai baasi mai gi de au.’ #Psa 41.9

19Au e tala adu gi goodou mee nei iainei i mua de hai, gi hagadonusia ai e goodou bolo go au donu go ia, i de masavaa e hai ai mee nei. 20Ni muna abodonu, ni muna abodonu aagu e hai adu nei gi goodou, be goai e abodonu ange gi tangada aagu e hai gi humai e abodonu mai donu gi de au; gai be goai e abodonu mai gi de au e abodonu ange donu gi de ia ne haia ngau gi humai.” #Mat 10.40; Mark 9.37; Luke 9.48; 10.16

Taonga hagasili madali denga dangada agoago

(Mat 26.20-25; Mark 14.17-21; Luke 22.21-23)

21Gai ga lava huu i dana tala muna nei, gai ia gu daemaha ono lodo ga hagadaba, “Ni muna abodonu, ni muna abodonu aagu e hai adu nei gi goodou, dahi goodou e gaavange naa donu au.”

22Gai ana dangada agoago ga hagadau kalo ange, gilaadeu gu dee iloo be goai oona e basa ai laa. 23Gai tangada agoago o Iesu e aloha ai laa e hakaogao i gaogao o Iesu. 24Gai Simon Peter ne aloalohagi ange tangada agoago laa ia gi siilia ange gi Iesu be goai oona e basa ai laa.

25Gai tangada agoago e hannagi ange laa gi Iesu ne ssili ange gi de ia, “Tagi Maolunga, goai oou e basa ai naa?”

26Iesu ne hai ange, “Go tangada aagu e gaavange aagena tibaa pelaoaa aagu ga hagasulu ange nei gi lo te gumedi.” Gai ia ga hagasulu tibaa pelaoaa laa ga gaavange gi Judas, tama daane a Simon Iscariot. 27Gai dua de gai a Judas tibaa pelaoaa laa, gai Satan gu ulu i ono lodo.

Gai Iesu ga hai ange gi de ia, “Hagamoolau haia de hegau aau gu noho naa e hai.” 28Gai teai donu se gilaadeu e noho laa ma e gaimee ne iloo, be gu aha Iesu gu basa ange ai bee laa gi de ia. 29Hanu gilaadeu e maanadu bolo, go hiidinga go Judas e doange ina delaadeu mee hhao sseene, gai Iesu ne hai ange ia gi hano gi hagao ina hanu mee e hai ai taonga; aabe ia gi hano gi gaavange hanu mee gi de gau hagaau aloha. 30Deelaa ai, dua huu dana gai tibaa pelaoaa laa, gai ia ga hagamoolau ga sao ga hano; gai gu boo de mee.

De hainga hoou

31Gai ga hano gee huu Judas, gai Iesu ga hagadaba, “Gu dae mai de masavaa e hagamahamaha ai Tama a Tangada, gai de Maadua ga hagamahamaha naa i ono daha. 32Noo de Maadua e hagamahamaha i ono daha, gai de Maadua e hagamahamaha naa hogi Tama, gai e hagamahamaha naa donu ia i de masavaa moolau.

33Agu gauligi, gu bodobodo donu dogu masavaa e noho ai i oodou daha. Gai goodou e ssala naa donu au, gai e bei dagu hai gu tala ange ai laa gi de gau Ssuu, gai au e tala adu hogi gi goodou iainei: ‘Goodou e dee maua i de loomai gi dogu mommee ga hano nei aagena.’ #John 7.34

34Au e gaavadu gi goodou dahi hainga hoou: goodou hagadau aaloha. Goodou hagadau aaloha bei dogu hai ne aloha adu ai gi goodou.#John 15.12, 17; 1 Jn 3.23; 2 Jn 5 35Deenei de hai a dangada alodahi e iloo ai bolo goodou ni dangada agoago niiagu, noo goodou e hagadau aaloha.”

De tala a Iesu de hagadee iloo a Peter ia

(Mat 26.31-35; Mark 14.27-31; Luke 22.31-34)

36Simon Peter ne ssili ange gi de ia, “Tagi Maolunga, go hee oou ga hano naa aagena?”

Iesu ne hai ange, “Iainei gai koe tigi maua i de daudali mai i de au gi de mommee oogu ga hano nei aagena, aagai koe e daudali mai naa i muli mai.”

37Peter ne ssili ange gi de ia, “Tagi Maolunga, gu aha gu dee maua ai e au i de daudali adu i de goe iainei? Au gu baba ange donu e gaavange dogu mouli i oo hiidinga.”

38Iesu ne hai ange gi de ia, “E aha, koe gu baba ange naa donu e magau i ogu hiidinga? Ni muna abodonu, ni muna abodonu aagu e hai adu nei gi de goe, i mua de goo o de gaagoo daane, gai koe e hagadee iloo naa donu au i e dolu hanonga!

Currently Selected:

John 13: DBD

Highlight

Copy