Markɩ 6

Jeju ha Najarɛtɩ ka dʋɔdara na‐n pɩɛnɩ haaraˈ

(Mat 13:53–58; Lu 4:16–30)

1Sɩ Jeju kɔɔ ther le a jal ɔɔ dʋɔ, dɩ ɔɔ kpãkpãadara kɔɔ thɔgʋʋrɛ. 2Dɩ ɔbɔɔkɛ hɩɩr wire kɔɔ danɩ, a kɔɔ mar da‐n dɩɩr wɩ thɩ̃ɛ Juifisɔɔ Thãgba fʋɔr cɔra; dɩ nʋɔ kpaa tibil jɔɔkɛ kɔɔ nɩɛnɛnɩ dɩ wa‐n so: Ka a yɩ ga thɩ̃ casɔɔkɛ? Anyee kpɛsɛ ca ha gɩrɛ a hananɩ? Dɩ mɔ̃ a fʋ sɩ da‐n cʋʋ nɔ kpaa thɩ̃ ca gɩrɛ? 3Ga do thɩ̃ khaadaar gɩ, kɛ dʋɔnnɩ Marɩɩ bikuunaa? Ga do Jakɩ, na Jojɩ, na Juudi, na Sɩmɔ̃ɔ õkuun a doaa? Dɩ ɔɔ õkhɛrsɔ na ha kha kɛ na sɛrɛaa? Dɩ mɛ̃ wɩ‐n beesuu. 4Sɩ Jeju so warɛ: Wɩ‐n cʋrɛ Thãgbaa bobon paar fɛʋ, sɩ ɔɔ dʋɔ na ɔɔ too thɩ̃thɩɩn na ɔɔ cɔ, wa‐n cʋaˈ.#Jã 4:44 5Dɩ Jeju na‐n puno dɩ cʋʋ le nɔ kpaa thɩ̃ bɩɛl, saagado ɩkhaa khodaarsɔ gbe a‐n dɛɛnɔ nyɛ̃ɛ dɩ wɩ kpɛaa ga. 6Nʋɔ kɔɔ kpagʋʋrɛ gɩdonɩ wa‐n pɩɛ haaraˈ.

Kpãkpãadara yʋɔr yenyɔɔkɛ Jeju thɔnɩ yenyɔ yenyɔ

(Mat 10:5–15; Lu 9:1–6)

Sɩ Jeju kɔɔ kpaarɛ le dɩ khuirəsɔ da‐n dɩɩr tɩbɩla thɩ̃ɛ. 7Sɩ agɩpɩ, dɩ we yʋɔr yenyɔ, a ma da‐n thɔ̃ wɩ yenyɔ yenyɔ, a ha wɩ punone kɔ̃tɛɛbi hɔ̃hɔlala. 8Sɩ a so warɛ, wa‐n gba thɩ̃ɛ fʋrɔ jalna kpaar paar saagado gbʋʋl dɩbara gaaga; ayɩ, wa‐n fʋrɔ buruəˈ, wa‐n fʋrɔ kpakpaar lokaaraˈ, wa‐n fʋrɔ war pɔtɩmana ga,#Lu 10:4–11 9sɩ wɩ tɔ nɛfaa sɩ wa‐n to kẽkena yenyɔaˈ.

10Sɩ dɩ so war: Ɔbɔɔkɛ nɩ lonɩ cɔ bɩɛlla, nɩ tɔɔ le gɩ dana wireekɛ na thenɩ pa dɔɔle. 11Sɩ ado paar hale kãkɛ tɩbɩla na tee nɩnaˈ, wa‐n pɛ nɩ dakha nũəˈ, nɩ thɛ pa dɔɔle sa kpɛɛnɛ thɩlãkobeekɛ ma nɩnɩ nɛɛ a faa war, gɩ nɩna wɩ thɩmɩɩr.#Th t t 13:51 12Dɩ kpãkpãadara jaal dɩ wa‐n so war wa‐n deba haar, 13dɩ wɩ‐n weenanɛ dakha kɔ̃tɛɛbiisɔ jɔɔ dɩ wa‐n faa, sɩ dɩ wɩ pɛr khodara jɔɔ niin dɩ wa‐n kpɛɛ.#Ja 5:14

Jã Batɩsɩtɩɩ khi

(Mat 14:1–12; Lu 9:7–9)

14Dɩ Ɛrɔɔdɩ fãgadaar nɩɛrɛ gɩdonɩ Jejuu i kpaarɛ paar fɛʋ, dɩ wɩ so ayɩ: Jã Batɩsɩtɩ gɩ, ɔr ɩrɛ khirera, gɛr gɩ dɩ puno da‐n cʋʋ nɔ kpaa thɩ̃ɛɛle.#Mat 16:14; Mar 8:28; Lu 9:19 15Ɩkhasɔ n yɩ wo: Elɩ gɩ; wɛ n yɩ: Thãgbaa bobon gɩ mɔ̃kɛ mamadara kɔɔ hanɩ. 16Sɩ ɔbɔɔkɛ Ɛrɔɔdɩ nɩɛnɩ a sor: Jã Batɩsɩtɩɩkɛ mɩ kɔɔ kʋnɩ a kur yʋʋ gɩ, ɔr ɩrɛ khirera.

17Gɩdonɩ Ɛrɔɔdɩɩ thɛthɛ yɩ wɩ fɔ Jã a le tɔ khaɩra. A cʋʋrɛ thale gɩ da Ɛrɔdɩadɩraakɛ dʋɔnnɩ ɔɔ õkuun Filipii khɛr a taanɩ a he;#Lu 3:19–20 18dɩ Jã sʋʋraa ga teena a taa ɔɔ õkuuni khɛr a heaˈ. 19Gɛr hɩna dɩ Ɛrɔdɩadɩ pɛ Jã bɩnɔ da‐n ƴaal a kʋʋ, sɩɩ do aa‐n maraˈ. 20Gɩdonɩ maar n fʋrɛ Ɛrɔɔdɩ Jana, gɩdonɩ a jɩrɛ dɩɩ do tɩɩ sarʋ gɩ na tɩɩ phuu, dɩ gɛr gɩ dɩ Ɛrɔɔdɩ na‐n ƴaal Jã n yɛ puurəˈ; dɩ ɔbɔɔkɛ a‐n nɩɛnɩ Jãa thɩmɩɩ kpɩɛrɛ nyanyaanɛ, sɩrakɛ gɩ‐n daaraarɛ da‐n pɩɛ nũu.

21Sɩ ga kpaanɛ waa dɩɩ do wireekɛ wa jɩnanɩ Ɛrɔɔdɩɩ kɔ̃ wi daan; dɩ Ɛrɔɔdɩ cʋʋ dɩkɔ jɔɔ, a wena ɔɔ khukhusɔ na sɔrasɛɛ sɛfʋsɔ na kɔ̃tɩnasɔɔkɛ hanɩ Galile. 22Dɩ le Ɛrɔdɩadɩɩ bikhɛr lõ ka wɩ hanɩ da‐n sa bɩna, dɩ gɩ kɔɔ dar Ɛrɔɔdɩra na wɩrɛɛkɛ kɔɔ hanaanɩ kha; dɩ mɛ̃ a so khebirrə: Bɩɛlnɛ mar gɩrɛ fɩ‐n ƴaalnɩ dɩ ma ha fɛr; 23dɩ thakɛ a ʋlfɛnaa ayɩ: Ma ha fɛr thɩ̃ dookɛ fa bɩɛl marnɩ, adorakɛ ɩ̃ fãga dɩ kho bɩɛl gɩ. 24Dɩ mɛ̃ khebir the a bule ɔɔ nɩ ayɩ: Ɩ̃ bɩɛlnɛ anye? Dɩ ɔɔ nɩ tu: Bɩɛlnɛ a ha fɩ Jã Batɩsɩtɩɩ yʋ. 25Dɩ mɛ̃ khebir phana a kɛr bir fãgadaarɩ pa a sʋʋraa ayɩ: Mɩ‐n ƴaalɛ kɔrɔ fɩ pɛ mɩ Jã Batɩsɩtɩɩ yʋ kpɛ̃kpɛrɛ̃ biro. 26Dɩ haar n helle Ɛrɔɔdɩ, sɩ aa‐n ƴaal a tʋ̃ɔaˈ, gɩdonɩ a kɔɔ ʋlfɛnaanɛ dɩ wɩrɛɛkɛ a kɔɔ hananɩ kha nɩɛ. 27Dɩ mɛ̃ a thɔ̃ dapaara ɔɔ gardɩ bɩɛl ayɩ, a jala a kuro Jã Batɩsɩtɩɩ yʋ a pɔna. 28Dɩ gardɩ kuun jal khaɩra, a kur Jã Batɩsɩtɩɩ yʋ, a pɛr kpɛ̃kpɛrɛ̃ biro, a pɔna ha khebir, dɩ khebir gba jalna ha ɔɔ nɩ. 29Dɩ ɔbɔɔkɛ Jãa kpãkpãadara nɩɛnɩ, wɩ pɔr gba khire a dʋ.

Kɩɛr Jeju ha tɩbɩla gbɩlanɩ yemɔɩ dɩkɔ

(Mat 14:13–21; Lu 9:10–17; Jã 6:1–14)

30Dɩ thɔ̃thɔna gbɛbɩ kha na Jeju a mɩɛɛ gɩrɛ fɛʋʋkɛ wɩ kɔɔ cʋʋnɩ, na gɩrɛ fɛʋʋkɛ wɩ kɔɔ dɩɩrnɩ tɩbɩla. 31Dɩ so war: Nɩ dɔ sɩ jal dɩkhãa pa bəənnə nɩ hɩɩr gbe, gɩdonɩ tɩbɩlaakɛ n pɔnɩ Jejura sɩ wa‐n kɔ̃ kɔɔ jɔrɛ dɩɩ pho ka, dɩ a do thɔ̃thɔna na ba yɩrɛ yɩɛrakɛ na kho dɩkoraˈ. 32Dɩ mɛ̃ wɩ kɔɔ lõ gborõo a jal paarɩkɛ tibil na hanaˈ. 33Dɩ tibil jɔ yɩ wɛr mɔ̃ wɩ‐n jalnɩ a jɩ wɩ, dɩ mɛ̃ wɩ the dɩɩsɔra fɛʋ a pɛr nɛpɛla a ka kɔɔ dã paarɩle ɓo. 34Dɩ ɔbɔɔkɛ Jeju na thenɩ gboroona, a yɩrɛ tɩbɩlaale tə̃tə̃tə̃ dɩ wa‐n kʋʋ bʋɔ, gɩdonɩ wɩ hʋrɛ banasɔɔkɛ na hananɩ khekhaˈ, dɩ mɛ̃ a kɔɔ ma da‐n dɩɩr wɩ thɩ̃ɛ jɔɔ.#Ther 27:17; 1 Fãg 22:17; 2 Kur 18:16; Eje 34:5; Mat 9:36 35Dɩ gɩdonɩ bɔɔ ˈlire kar, ɔɔ kpãkpãadara pʋɔraarɛ a sʋʋraa: Dɩɩ n tɩnɛ sɩɩ do bəənnə sɩ ha; 36bɩlanɛ tɩbɩlaakɛ wɩ jal kõgososɔra na dɩ biisɔraakɛ wɔrɔnɛnɩ, wɩ the dɩkɔ. 37Sɩ Jeju tu: Nɛrɛɛ thɛthɛ n hana wɩ dɩkɔ wɩ kho. Sɩ dɩ wɩ bulee: Fɩ‐n ƴaalɛ sɩ gba wire taanyɔ thɔ̃ lɩmɩnɛɛ war a thɛna buru a ɛna ha wɩ wɩ kho ya? 38Dɩ Jeju bule wi: Buru yemɔ̃ nɩ hana, nɩ jala hɩnɛ. Dɩ ɔbɔɔkɛ wɩ jɩnɩ tue wɩ sʋʋraarɛ: Buru yemɔɩ sɩ hana na thʋma yenyɔ.

39Agɩpɩ Jeju so war, wɩ cʋɛ tɩbɩlaalera fɛʋ wɩ der dɩɩdɩɩ ka hʋɔn hanɩ vʋɔlvʋɔl. 40Dɩ mɛ̃ wɩ der tamaa tamaa, kpalanyɔ yʋɔr yʋɔr. 41Agɩpɩ Jeju gba buru yemɔɩɩle na thʋma yenyɔɔle, a gba yɩɛ yũ a fʋɔr Thãgba, sa kuur buru a ha kpãkpãadara wɩ gba tɩnɛnɛ tɩbɩlala, a tɩnɛna wɩ dakha fɛʋ thʋma yenyɔɔle. 42Wɛr fɛʋ bɩɛlbɩɛl kɔɔ khor a hi phi. 43Dɩ wɩ kɔɔ gbaar buru na thʋmaakɛ wɩ tɩnɛnɩ sa sɩ dɩɩ hi kpona yʋɔr yenyɔ. 44Sɩ wɩrɛɛkɛ kɔɔ khɔnɩ dɩkorɩle kona daan gbɩlanɩ yemɔɩ.

Kɩɛr Jeju ɩɩr nyʋɔnna yũ

(Mat 14:22–33; Jã 6:15–21)

45Sɩ agɩpɩ, dapaara Jeju yɩ, ɩnɩ kpãkpãadara na lʋʋn gboroona wɩ kʋʋl nɩ yɩɛ wɩ iir iiro Bɛcaɩda dɩ khʋra, bɔɔkɛ ɩna‐n bɩlanɩ tɩbɩla. 46Ɔbɔɔkɛ a kɔɔ fʋɔr wɩnɩ pɩ sa yɩ wɩ jala bɔɔ, a jaal a jʋʋn gɔ̃gʋɔna a bɩɛl Thãgba. 47Dɩ ɔbɔɔkɛ dɩɩ birəni, gborõo kɔɔ har mɩɩr nɔ thɩ̃thɩɩn, sɩ dɩ Jeju ha dɩbara thɩɩra. 48Dɩ a yɩrɛ mɔ̃kɛ phɛllɛ n nɩnɩ kpãkpãadara gɩdonɩ jɩɛ wɩ telẽ, sɩ ɔbɔɔkɛ dɩɩ n lɔrnɩ wɩllɛ, a ɩɩrɛ mɩɩr nɔ nyʋɔnna yũ da‐n pɔ war ɩnɩ‐n ka wɩra. 49Sɩ ɔbɔɔkɛ wɩ yɩɩnɩ da‐n ɩɩr nyʋɔnna yũ, wɩ ka jɩna khĩdidaar gɩ, a ma dɩ wa‐n hulẽ; 50gɩdonɩ wɛr fɛʋ yɩɩrɛ dɩ maar fʋlɛ wɩ dɩɩ ka. Sɩ dapaara Jeju mɩɩna wɛr ayɩ: Nɩ pɩɛr ˈlar, mɛr Jeju gɩ, na‐n do maar n fʋ naˈ. 51Sɩ agɩpɩ dɩ lõ war le gboroona, dɩ jɩɛ kur, dɩ nʋɔ kɔɔ kpaa kpãkpãadara dɩɩ pho ka, 52gɩdonɩ wa kɔɔ jɩ mɔ̃ buru thɩmɩɩrɩle donɩ nɔ kpaa thɩ̃ɛ kɩrʋaˈ, dəbire gɩ ho war dɩ wa pər garaˈ.

Jenejarɛtɩ khʋra Jeju kpɛɛ khodara

(Mat 14:34–36)

53Ɔbɔɔkɛ wɩ kɔɔ iirni iiro pɩ a dã Jenejarɛtɩ khʋra, le wɩ kɔɔ li gborõo. 54Dɩ dabɔɔkɛ wɩ kɔɔ thenɩ gboroona na pɩ, dapaara tɩbɩla jɩrɛ Jeju. 55Dɩ mɛ̃ wɩ ca jal paar fɛʋ a gba khodara jɔna, dɩ wa‐n pɔnanaa paar wo paar fɛʋʋkɛ wɩ nɩɛnɩ a har. 56Dɩ paar fɛʋʋkɛ Jeju n jalnɩ, a dɩ biisɔra gɩ, ado dɩɩsɔra gɩ, a kõgoso gɩrakɛ, tɩbɩla n gbaar awɩ khodaarsɔ dɩ wɩ pɛ ƴatɔɔ, dɩ wa‐n phʋʋrʋʋ a dɔ ɩna‐n thaaraa ɔɔ kẽkẽ nɔra dɩbararakɛ, dɩ wɩrɛ fɛʋʋkɛ n kɔɔ thaaraanɩ n kpɛɛrɛ awɩ kho.

Currently Selected:

Markɩ 6: LOBIRI

Highlight

Copy