Markɩ 3

Kuunikɛ nyɔ̃ɔ khini

(Mat 12:9–14; Lu 6:6–11)

1Agɩpɩ Jeju bir lõ Juifisɔɔ Thãgba fʋɔr cɔra wo; dɩ le a yɩ kuunikɛ nyɔ̃ɔ khini. 2Dɩ wɩrɛ hanɩle jʋʋr Jeju dɩ wa‐n hɩɩn ado a na kpɛɛrɛ kuunile hɩɩr wire, gɩdonɩ wɩ‐n ƴaalɛ wɩ pɛr Jejura sor. 3Dɩ Jeju so kuunnaale nyɔ̃ɔ khini ayɩ: Ɩrɛ jɩlɛ thɩ̃thɩɩn. 4Sa bir bule wi: Hɩɩr wire teana bɔ cʋʋrɛ yaa puu cʋʋrɛ, agɩbo fɩ taa tibil yaa, fɩ kʋ tibil? Sɩ wɩ pɩrrɛ pɔbɩ. 5Dɩ haar n heluule gɩdonɩ awɩda khɩɩrɛ, dɩ hɩɩn wɩ na nĩkhii da‐n finə sa bir so kuunna: ˈLaanɛ afɩ nyɔ̃; dɩ ˈlaa dɩɩ do gɩ kpɛɛrɛ. 6Dɩ jɔfʋ bʋ dʋdara the, a gbɛbɩ kha dapaara na Ɛrɔɔdɩɩ too dɩ wa‐n gʋʋr mɔ̃ wa fʋnɩ sɩ wɩ kʋ Jeju.

Tɩɩ jɔɔkɛ pɔnɩ Jejura

7Sɩ Jeju na ɔɔ kpãkpãadara gbaar jal mɩɩr nɔɔra, dɩ tibil jɔ tə̃tə̃tə̃ kɔɔ kpaaraarɛ. Ɩkhasɔ ther Galile, na Jude, 8na Jerujalɛm, na Idume dɩɩra, na Jʋrdɛ̃ mɩɩr iiro, na Tɩɩr na Sɩdɔ̃ dɩ khʋra. Tibil jɔɔle pɔr Jejura thale gɩdonɩ thɩ̃ɛɛkɛ a‐n cʋʋnɩ wɩ nɩɛ. 9Gɛr gɩ dɩ Jeju so ɔɔ kpãkpãadarara wɩ gbɛbɩrɛ nar too paar gboroona a thɩnɛ, dɩ mɛ̃ tɩbɩla na yɩ nɩ gbʋɔr paaraˈ.#Mar 4:1; Lu 5:1–3 10Gɩdonɩ a‐n kpɛɛrɛ khodara jɔɔ, gɛr gɩ dɩ wɩrɛ gɩ‐n khonɩ n hiirəə ɩna‐n thaaraa.

11Dɩ bɔɔ wo bɔɔkɛ kɔ̃tɛɛbi hɔ̃hɔla n yɩɩnɩ, wɩ‐n jire thʋnɔ ɔɔ yɛ thɩ̃thɩɩn dɩ wa‐n be hulẽbe dɩɩ khɩɩr ka, dɩ wɩ yɩ: Fɛr dʋɔn Thãgbaa Bikuun. 12Sɩ Jeju n kpãkpãa warɛ dɩɩ khɩɩr ka dɩ wa‐n so ntɛ ɩnɩ donaˈ.

Kpãkpãadara yʋɔr yenyɔɔkɛ Jeju phiirni

(Mat 10:1–4; Lu 6:12–16)

13Agɩpɩ Jeju jʋʋn gɔ̃gʋɔna, sa we tɩbɩlaakɛ a‐n ƴaalnɩ dɩ wɩ pʋɔraa. 14Dɩ a phiire yʋɔr yenyɔ wa‐n ha kha na ɔr a thɔ̃ wɩ wɩ jal wa‐n mɩɩ Thãgbaa thɩmɩɩ; 15a ha wɛr dakha punone dɩ wa weena kɔ̃tɛɛbiisɔ. 16Yʋɔr yenyɔɔkɛ ha wɩrɛ a phiirni: Sɩmɔ̃ ɔr a dʋ ire Pɩɛr, 17Jakɩ na ɔɔ õkuun Jã, Jebedee bikona wɛ; wɛr Jeju ha ire Boanɛrjɛsɩ, kɩrʋ dʋɔn wɩrɛ n phaanɛnɩ oroˈoro thãgba phɛɛ khaa; 18Ãdire, Filipi, Bartelemɩ, Matiə, Tomasɩ, Jakɩ Alfee bikuun, Tade, Sɩmɔ̃ɔkɛ dʋɔnnɩ gbɛ̃gbɛrɛ̃ tibil, 19na Judasɩɩkɛ thɛnɩ Karɩyɔtɩ dɩɩra, kɛ dɔnɩ ʋrɛ lirenanɩ Jeju.

Jejuu too n ƴaalɛ wɩ kpaa

20Agɩpɩ Jeju kɛr bir kɔ̃ cʋɔrɔ, dɩ tɩbɩla bir wo a gbɛbɩ kha le, dɩ ga do Jeju na ɔɔ kpãkpãadara na ba yɩrɛ ƴɩɛrakɛ na kho dɩkoraˈ. 21Dɩ ɔbɔɔkɛ ɔɔ too nɩɛnɩ wɩ kɔɔ pɔr wɩ kpaa, gɩdonɩ a thɩɛna gaa wɩ yɩ: Yʋʋ buure.

Jeju birse sorraakɛ wɩ‐n pɩɛraanɩ

(Mat 12:22–32; Lu 11:14–23; 12:10)

22Dɩ jɔfʋ dɩɩrdarasɔɔkɛ thɛnɩ Jerujalɛm a pɔ so ayɩ: Bɛljɛbulikɛ dʋɔnnɩ Satã lʋʋnaanɛ, wo: Ɔrkɛra dɔnɩ yʋʋ kɔ̃tɛɛbiirə n hanaa fãga dɩ weena kɔ̃tɛɛbii.#Mat 9:34; 10:25 23Dɩ Jeju we wɩ a so war sokpaakɛ thakɛ ayɩ: Mɔ̃ Satã na puno na wee dɩbara? 24A fãgadaarɩ dɩ bɩɛl tɩnɛ a na ke kha, fãgadaarɩ dɩ dɔɔle na jɩɩlaˈ. 25A cɔ bɩɛl gɩɩkɛ tɩnɛnɛnɩ a na ke kha, cɔ dɔɔle na jɩɩlaˈ. 26A Satã na kɛ̃kɛrɛ̃ na ɔɔbara dɩ tɩnɛ paar har ɔɔ fãga dɩra, ɔɔ puno na jal bã sɩ ga pɩrɛ. 27Tibil na puno na lõ na fãga kũu khɩɩ cɔ na taaraa thɩ̃ɛ, saagado ɔr a kɔɔ li ɓoaa ga, a a punoo ɓo dɩphã gɛr a na taaraa thɩ̃ɛ fɛʋ cʋɔrɔ. 28Sobɔr mɩ so nar gel: Thãgba na faarɛ tɩbɩlaa sopugosɔ fɛʋ na ɔɔ i kʋɛɛkɛ wɩ‐n kʋɛnɩ. 29Sɩ tibilikɛ na kʋɛanɩ Thu Phuu i, Thãgba na faa ga sopugo caale yuurakaˈ, sɩ sor na heenuune khorr.#Lu 12:10 30Jeju mɩɩrɛ thakɛ gɩdonɩ wɩ yɩ: Kɔ̃tɛɛbu hɔ̃hɔl lʋʋnaanɛ.

Jejuu õkũu bɩnɔsɔ pɔr na ɔɔ nɩ

(Mat 12:46–50; Lu 8:19–21)

31Le Jejuu nɩ na ɔɔ õkũu bɩnɔsɔ dã, a jɩɩl phiilo sa thɔ̃ wɩɩ. 32Sɩ tibil jɔ kɔɔ toore a diirəə dɩ wɩ sʋʋraa: Pɛ nũu, afɩ nɩ na afɩ õkona har phiilo dɩ wa‐n bule fi. 33Dɩ tu wi: Amɛ n dʋɔn ɩ̃ nɩ, na ɩ̃ õkona? 34Sɩ a mar a hɩɩn wɩrɛ tɔɔnɩ a diirəə da‐n finə sa so: Wɩrɛɛkɛ dʋɔn ĩ nɩ na ɩ̃ õkona; 35gɩdonɩ tibilikɛ n cʋɛnɩ gɩrɛ Thãgba n ƴaalnɩ, wa tibilile dʋɔn ĩ õkuun, na ĩ õkhɛr, na ɩ̃ nɩ.

Currently Selected:

Markɩ 3: LOBIRI

Highlight

Copy