Matiə 9

1Dɩ Jeju kɔɔ lʋʋn gboroona a iir lanyʋɔn, sa gba kɔ̃ ɔɔ dʋɔ. 2Dɩ hɩnɛ, wɩ kɔɔ gbaar gbãgbarʋʋkɛ n phɩnanɩ phɩ̃ paar a pɔnanaa. Dɩ mɔ̃ Jeju yɩnɩ awɩ ha pɛ, a sor gbãgbarʋra: Pɩɛr ˈlar ɩ̃ bɩsã, afɩ sopugo hɛl farɛ. 3Dɩ wɩ̃ jɔfʋ dɩɩrdarasɔ n sor na awɩ bɩ̃ ayɩ: Thãgbaa i kuunikɛ n kʋɛ. 4Dɩ mɔ̃ Jeju jɩnɩ awɩ kpɩɛr, a bule wer ayɩ: Mɔ̃gɩdo dɩ nɩ hana kpɩɛr puu thakɛ anɩ bɩnɔ? 5Gɩmɔ̃ yɔɔnɛ sorra: Afɩ sopugo hɛl farɛ gɩ yaa, agɩbo ɩrɛ a jala gɩ? 6Sɩ mɔ̃ na fʋnɩ sɩ na jɩ, dɩ mɛr tibili Bikuun hananɛ hʋɛ thɩɩra dɩ ɩ̃ faana sopugo, sa bir so gbãgbarʋra: Ɩrɛ, gba afɩ phɩ̃ pa na kɔna. 7Dɩ a ɩɩrɛ da‐n kɔ̃ ɔɔ cɔ. 8Mɔ̃ tibil jɔɔle yɩnɩ gele, maar fʋlɛ wɛr dɩ wa‐n dʋbɩ Thãgbaakɛ hananɩ tɩbɩla ga puno caale.

Kɩɛr Jeju we Matiə

(Mar 2:13–17; Lu 5:27–32)

9Dɩ Jeju tɔr na jal gbe, a yɩ kũu bɩɛlɩkɛ wɩ‐n wenɩ Matiə dɩ too war gba paar da‐n tee war, dɩ sʋʋraa: Na kpa mar. Dɩ Matiə ɩɩr da‐n kpaaraa.

10Dɩ Jeju kɔɔ har dɩko kho paar cʋɔrɔ, dɩ war gbadara jɔɔ na sopugodara kɔɔ toonanɛ kha Jeju na ɔɔ kpãkpãadarasɔ.#Lu 15:1–2 11Mɔ̃ jɔfʋ dɩɩrdara yɩnɩ thɩ̃ɛ thale, wɩ sor ɔɔ kpãkpãadarara: Mɔ̃gɩdo dɩ anɩ dɩɩrdaar na‐n kho dɩkɔ na war gbadara na sopugodarasɔ? 12Dɩ mɔ̃ Jeju nɩɛnɩ gele, a so warɛ: Ga do tɩɩ khena n kɔɔ yaalɛ dɔtɔrɔaˈ, sɩ wɩrɛ gɩ‐n khonɩ gɩ. 13Nɩ jala na dɩrɛ a jɛ thɩmɩɩrɩkɛɛ kɩr, kɛ sɔnɩ Thãgbaa sɛbɛra ayɩwɔɔ: “Bɔ donanɛ mɛr Thãgba n ƴaal, ga do bonɩ jir ga.” Gɩdonɩ ga do fɩl sardara mɩ ɩ̃ ɩ̃ ƴaalaˈ, sɩ sopugodara wɛ.#Mat 12:7; Oje 6:6

Nɔ li thɩmɩɩr na sokpaakɛ Jeju sonɩ

(Mar 2:18–22; Lu 5:33–39)

14Le Jã Batɩsɩtɩɩ kpãkpãadarasɔ pɔ Jejura a bulee: Mɔ̃gɩdo dɩ se wer na jɔfʋ bʋ dʋdarasɔ na‐n li nʋɔ, sɩ afɩ kpãkpãadarasɔ wer na‐n li nʋɔaˈ. 15Dɩ Jeju birse wi: Nɩ‐n kpɩɛrɛ dɩ wɩrɛɛkɛ wɩ wenɩ herra na punone wa‐n bɩ bɔɔkɛ wɩ hanɩ kha na khɛr he ya? Sɩ wiresɔ na hale wa hɛl warnɩ khɛr he. Le wa li nʋɔ dɩphã. 16Tibil na gba kẽkẽ phaa na kur na bɛbɩna kẽkẽ tɩ̃aˈ, gɩdonɩ daphaale na‐n haalɛ datɩ̃ɩ, gɩ do gɩ ka ɓəəre dɩphã waa a ka puuro ka. 17Wa‐n gba dakha thʋʋrɩkɛ dɔnɩ daphaa a pɛ bʋla tɩɩna ga. A wɩ cʋʋ mɛ̃, bʋlaa na wɩɛlɛ dɩ thʋʋr na deer, gɩ do bʋlaale kʋɛrɛ mɛ̃. Sɩ wɩ‐n pɛr thʋ phaa bʋla phaara oti dɩɩ gbɛbɩ too.

Jaɩrʋsɩɩ bikhɛrɩda na khɛrɩkɛ tɔmɩn kɔɔ theronɩ yɛna yʋɔr yenyɔ

(Mar 5:21–43; Lu 8:40–56)

18Ɔbɔɔkɛ Jeju kɔɔ hanɩ da‐n mɩɩ wɩ ga thɩmɩɩsɔɔkɛ, kɔ̃tɩ̃ bɩɛl pɔr dã a gburõkuraa ƴɛ thɩ̃thɩɩn sa so: Ɩ̃ bikhɛr khire ga pʋɔr paˈ, sɩ ɩna a dɛɛnaa nyɛ̃ɛ a na bire na hana yire. 19Dɩ Jeju ɩɩrɛ da‐n kpaaraa nakha ɔɔ kpãkpãadara.

20Dɩ hɩnɛ khɛ bɩɛl gɩ, a kɔɔ hale a hana tɩ̃ɩ a cʋʋna yɛna yʋɔr yenyɔ, dɩ a tɔr pɔ Jejura khiro a thaaraa kẽkẽ nʋɔra. 21Gɩdonɩ a kɔɔ sor le na ɔɔ bɩ̃ ayɩ: A mɩ punonakɛ a thar ɔɔ kẽkẽ haraakɛrakɛ sɩ ma kpɛɛrɛ. 22Dɩ mɔ̃ Jeju kɩɩlnɩ a yɩɩ a sʋʋraarɛ: Pɩɛr ˈlar ɩ̃ bikhɛr, afɩ ha pɛ kpɛɛnɛ fɩ; dɩ dapaara khɛrɩlee kho kpɛɛ.

23Dɩ ɔbɔɔkɛ Jeju danɩ kɔ̃tɩnɩ cɔ, a yɩrɛ bel ʋ̃dara na tɩbɩla jɔɔ dɩ wa‐n khɔ̃, dɩ a so warɛ: 24Nɩ tɔ birə gɩdonɩ khebirrə na khəˈ, sɩ a‐n daarɛ; sɩ wɩ‐n maanʋʋnɛ. 25Ɔbɔɔkɛ a tini tibil jɔɔle dɩ wɩ thɩɩr, a lʋʋn a fʋ khebirrə nyɔ̃ɔ dɩ pal ɩɩr. 26Dɩ ga tutugo kɔɔ kpaarɛ paar fɛʋ ga bənəəle.

Kɩɛr Jeju khɛr yara yenyɔ yinə

27Mɔ̃kɛ Jeju thenɩ le da‐n jal, yara yenyɔ n kpaaraarɛ dɩ wa‐n hulẽ ayɩ: Jɛ sɩ bʋɔrarakɛ ya, Davɩdɩɩ Bikuun. 28Dɩ mɔ̃ a lonɩ cʋɔrɔ na pɩ, yaraale pɔr wɔrɔ̃ɔ dɩ bule wi: Nɩ pɛrɛ haar ma punone gelela a na cʋʋ ya? Dɩ wɩ birsee: Ɔɔ, Kɔ̃tɩn. 29Dɩ le a tha war yinəna sa so: Mɔ̃ anɩ ha pɛ hanɩ, ɔmɛna ga ha. 30Dɩ awɩ yi khɛrrɛ. Sɩ Jeju jɩɛ kpãkpãa war thakɛ dɩɩ khɩɩr ka ayɩ: Nɩ jɩɛ dʋ bʋrɛ, na‐n do tibil n jɩ thɩ̃ɛɛkaˈ; 31sɩ mɔ̃ wa thenɩ, dapaara wɩ mar ɔɔda a be dɩ wa‐n wɩɛl ga bənəəle koo.

Jeju weere nɔ ma kɔ̃tɛɛbuukɛ hanɩ kuunna

32Mɔ̃kɛ wa thenɩ le, wɩ kpar kuunikɛ hananɩ kɔ̃tɛɛbu nɔ madaar a pɔnanaa. 33Dɩ a weeraarɛ kɔ̃tɛɛbuule sɩ dɩ nɔ madaarɩle na‐n mɩɩ thɩmɩa dɩphã. Dɩ nʋɔ kɔɔ kpaarɛ tibil jɔɔle dɩ wa‐n so: Sa kɔɔ yɩ thɩ̃ɛ thakɛ Ɩjɩrayɛl dɩɩra kpɩɩrakaˈ. 34Sɩ jɔfʋ bʋ dʋdarasɔ wer na‐n so ayɩ: Kɔ̃tɛɛbiisɔɔ kɔ̃tɩ̃ n hanaa fãga dɩ weena kɔ̃tɛɛbii.#Mat 10:25; 12:24; Mar 3:22; Lu 11:15

Bʋɔ fʋrɛ Jeju tibil jɔraakɛ na hananɩ khekhaˈ

35Dɩ Jeju n kɔɔ kpaarɛ dɩ kɔ̃tɩnasɔra fɛʋ na dɩ biisɔra, da‐n dɩɩr tɩbɩla thɩ̃ɛ Juifisɔɔ Thãgba fʋɔr cɔnanɔ, da‐n mɩɩna tutugo bʋɔɔkɛ dɔnɩ ƴũ fãgadaar doda, da‐n kpɛɛna khoosɔ dɩɩdɩɩ fɛʋ na tãdarasɔ dɩɩdɩɩ fɛʋ.#Mat 4:23; Mar 1:39; Lu 4:44 36Sɩ mɔ̃ a yɩnɩ tibil jɔɔle, bʋɔ fʋʋrɛ gɩdonɩ wɩ thʋnɛ vɔɔ dɩɩ ka war, dɩ wa‐n puno bã a ho banaakɛ na hananɩ khekhaˈ.#Ther 27:17; 1 Fãg 22:17; 2 Kur 18:16; Eje 34:5; Mar 6:34 37Dɩ le a so ɔɔ kpãkpãadarara ayɩ: Jɔ jɔrɛ, sɩ jʋ kha na kpɛraˈ.#Lu 10:2 38Gɛr gɩ na‐n bɩɛlnɛ ʋrɛ dɔnɩ Kɔ̃tɩn jʋ kharra a thɔna thɔ̃dara wa‐n kha jɔ.

Currently Selected:

Matiə 9: LOBIRI

Highlight

Copy