Matiə 7
7
Na‐n fi do kɩɩldara ga
(Lu 6:37–38, 41–42)
1Na‐n fi do kɩɩldara ga, dɩ mɛ̃ Thãgba na do nar Kɩɩldaaraˈ. Mɔ̃ nɩ fi nɩ do kɩɩldara, mɛ̃ Thãgba na do nar Kɩɩldaar. 2Gɩdonɩ mɩɛda ca ʋrɛ nɩ‐n kɔɔ mɩɛnanɩ thɩ̃ɛ, ɔr wa mɩɛna na ha nɩ. #Mar 4:24 3Mɔ̃gɩdo dɩ fɩ ka gar yire hɔ̃ phɩɩnaakɛ hanɩ afɩ omii yiro, sɩ fa‐n ka dɩ fɩ hɩɩn kparrɛɛkɛ hanɩ afɩ yiroə? 4Wo mɔ̃ fa fʋ sɩ na so afɩ omina nayɩ: Jɩlɛ ɩ̃ ti hɔ̃ phɩ̃ɩkɛ ha fɩnɩ yiro, sɩɩ dorakɛ kparrɛ hale afɩ yiro? 5Fɛr bɩnɛ yenyɔdaar, te kparrɛɛkɛ hanɩ afɩ yiro ɓo, le fa jɩɩ yɩ hɔ̃ phɩ̃ɩkɛ hanɩ afɩ omii yiro dɩphã a na ti.
6Na‐n gba Thãgbaa thɩ̃ a na ha bena ga, anaa wa kɛrna fɛr a na cɛcɛbɛ fɩ. Na‐n gba dakha anɩ dɛ thɩ̃ a na dʋna sɩthɔra ga, anaa wa bɩɩrnanɛ thɩɩ.
Thãgba bɩɛlɛ
(Lu 11:9–13)
7Na‐n bɩɛlnɛ na ˈlɛr, na‐n ƴaalɛ na yɩɛrɛ, na‐n bɛ loo wa khɛr nɛr. 8Gɩdonɩ tibil wo tibilikɛ n bɩɛlnɛnɩ a‐n ˈlɛr, dɩ ʋrɛɛkɛ n ƴaalɛnɩ a‐n yɩɛrɛ, dɩ ʋrɛɛkɛ n bɛnɩ loo wa khɛrʋʋrɛ. 9Ʋmɔ̃ɔ tibil anɩ thɩ̃thɩɩn ɔɔ bi na bɩɛllɔ buru dɩ na haa bokaar? 10A thʋm a bɩɛl a haa sii? 11Ado nɛrɛɛkɛ dʋɔnnɩ tɩɩ puusɔ jɩ thɩ̃ bʋɔ a na ha anɩ bisɔ, mɔ̃ ga thʋ̃ na da anɩ Thɩraakɛ hanɩle ƴũ na pɔna, a na gba thɩ̃ bʋɔ na ha wɩrɛɛkɛ n bɩɛlnɛnaa?
Gɩrɛ fa cʋʋnɩ tɩbɩlala
12Thɩ̃ɛ wo thɩ̃ɛɛkɛ nɩ‐n ƴaalnɩ tɩbɩla na‐n cʋɛ nar, nɛrɛ dakha na‐n cʋɛ ga thɩ̃ ca wɛrra, gɩdonɩ gɛr dɔ gɩrɛ Mʋɩjɩɩ jɔfʋ na Thãgbaa bobonaa so sonɩ.#Lu 6:31
Lõfonʋɔ yenyɔ na hʋɛ yenyɔ
(Lu 13:24)
13Na‐n lona na lõfonʋɔɔkɛ ˈluruneni fɩɩʋ, gɩdonɩ lõfonɔ pɩɛ hə̃ə na hʋ pɩɛ hə̃ə dʋɔn gɩrɛ n jalananɩ bu paar, dɩ wɩrɛ harɔnɩ wɩ jɔrɛ ka. 14Sɩ wɩrɛɛkɛ yɛnɩ lõfonʋɔɔkɛ ˈluruneni ka, na hʋɛɛkɛ hanɩ ɓɩnɩnɩnɩ kɛ n jalanɩ yire khorra, wa kpɛraˈ.
Thɩrʋ na ɔɔ bi
(Lu 6:43–44)
15Na‐n jɩɛ dʋ bʋrɛ sõso bobonasɔra, wɩ‐n debire a ho banaasɔ a na pɔ anɩ pa, sɩ awɩ bɩnɔ kpe wɛ, kɛ n phʋnɛnɩ. 16Sɩ awɩ biikɛ wɩ‐n senɩ na jɩna wɩ. Fa khʋnɛ ɓãɓar be ʋsɩɛra ya? Dɩ fa yɛɛrɛ bara dakha pabɩrʋra ya? 17Thale gɩ, thɩrʋ wo thɩrʋʋkɛ dɔnɩ thɩr bʋɔ, bi bɔɩra a‐n se, dɩ thɩr puu na‐n se bi puu oti. 18Thɩr bʋɔ na puno na se bi puəˈ, dɩ thɩr puu na puno na se bi bʋɔ dakha ga. 19Dɩ thɩrʋ wo thɩrʋʋkɛ na‐n sɛnɩ bi bʋɔaˈ, wa kurre na dʋna dɔɔra.#Mat 3:10; Lu 3:9 20Dɩ gɛr gɩ awɩ birəəkɛ wɩ‐n senɩ na jɩ wɩ.#Mat 12:33
Sobɔ kpãkpãadara
(Lu 13:25–27)
21Ga do wɩrɛ fɛʋʋkɛ n wɛ mɩnɩ Kɔ̃tɩn, Kɔ̃tɩn, na lona yũ fãgadaarɩ dɩra ga, sɩ ʋrɛ dɩbara n cʋɛnɩ ɩ̃ Thɩɩkɛ hanɩle ƴũu tuur. 22Tibil jɔjʋɔ na so marɛ dawiile nayɩ: Kɔ̃tɩn, Kɔ̃tɩn, ga do afɩ i sɩ kɔɔ gba dɩ sa‐n tinə Thãgba tukɩrʋaa? Ga do afɩ i sɩ kɔɔ gba a weena kɔ̃tɛɛbiisɔaa? Ga do afɩ i sɩ kɔɔ gba a cʋʋna nɔ kpaa thɩ̃ jɔjʋɔaa? 23Liir ma so war casɩ nayɩ: Ma kɔɔ jɩ nɩnakɛ kpɩɩaˈ, nɩ hala sa sɛ mɩ nɛrkɛ dɔnɩ sopugo cʋʋdara.#Khɩ 6:8
Cɔ thɛ yenyɔ
(Lu 6:47–49)
24Mɛ̃ gɩ tibil wo tibilikɛ nɩɛnɛnɩ ɩ̃ thɩmɩɩsɔɔkɛ a yɩr da‐n cʋʋ, a na hʋrɛ kũu kpɛsɛɛkɛ thɛnɩ ɔɔ cɔ boka nã thɛrɛɛra. 25Dɩ thãgba nyʋɔn n daan, dɩ nyʋɔn be poo a gbʋma, dɩ jɩɛ ɩɩrɛ dɩ ga‐n be cʋɔrɩle, sɩ ga jəˈ, gɩdonɩ boka nã thɛrɛɛra wɩ thɩɩ. 26Sɩ tibil wo tibilikɛ nɩɛnɛnɩ ɩ̃ thɩmɩɩsɔɔkɛ sɩ aa‐n cʋaˈ, a na hʋrɛ kũu də̃bəəluukɛ thɛnɩ ɔɔ cɔ gbalãkothɩnna. 27Dɩ thãgba nyʋɔn n daan, dɩ nyʋɔn be poo a gbʋma, dɩ jɩɛ ɩɩrɛ dɩ ga‐n be cʋɔrɩle dɩɩ do gɩ təəre ji, dɩ ɔɔ jirə puurore ka.
28Dɩ ɔbɔɔkɛ Jeju kɔɔ mɩɩnɩ thɩmɩaakɛ dɩɩ pɩ, nʋɔ kɔɔ kpaarɛ tibil jɔɔle ɔɔ dɩɩrra.#Mar 1:22; Lu 4:32 29Gɩdonɩ a dɩɩr wɛr mɔ̃ a hananɩ hʋɛ, ga ho mɔ̃ jɔfʋ dɩɩrdarasɔ n dɩɩr wɩnaˈ.
Currently Selected:
Matiə 7: LOBIRI
Highlight
Share
Copy
Want to have your highlights saved across all your devices? Sign up or sign in
Bible Society of Burkino Faso 1985.
