Matiə 3

Jã Batɩsɩtɩɩ Thãgba thɩmɩɩ mɩɩ

(Mar 1:1–8; Lu 3:1–18; Jã 1:19–28)

1Ga bɔɔlera Jã Batɩsɩtɩ ɩɩr da‐n mɩɩ Thãgbaa thɩmɩɩ Jude bəənnə da‐n so ayɩ: 2Nɩ deba haar, gɩdonɩ bɔɔ daan dɩ yũ Fãgadaar na‐n gba fãga.#Mat 4:17; Mar 1:15 3Jana dɔ ʋrɛ Ejaɩ Thãgbaa bobon kɔɔ sonɩ ayɩ:

“Tibil wire gɩ dɩ ga‐n hulẽ bəənnə ayɩ:

Na‐n gbɛbɩrɛ hʋɛ Kɔ̃tɩnna,

na‐n wɛbɩrɛ ɔɔ hʋ bisɔ gɩ pɔlɔ.”#Eja 40:3

4Kɩ̃kɩɩnɩkɛ wɩ cʋʋnanɩ nyɔɔmɛɛ sũu Jana n kɔɔ to, dɩ khɩmɩna lo phɛrɛ pelela. Sɩ toosõo na thʋʋr n kɔɔ dɔ ɔɔ dɩko.#2 Fãg 1:8 5Dɩ Jerujalɛmdara na Judedara fɛʋ, na wɩrɛ fɛʋʋkɛ thɛnɩ Jʋrdɛ̃ mɩɩr khʋra, n kɔɔ pɔr ɔɔ pa, 6dɩ wɩ cã awɩ sopugosɔ, sɩ da‐n kpɛɛ wɩ nyʋɔnɔ Jʋrdɛ̃ mɩɩrra.

7Sɩ mɔ̃kɛ a yɩnɩ jɔfʋ bʋ dʋdara na wɩrɛ n yɛnɩ khi ɩɩrɛ na halaˈ, dɩ wa‐n pʋɔraa jɔɔjɔɔ a kpɛa wɩ nyʋɔnɔ, a so warɛ ayɩ: Nɛr sikori bisɔ, amɛ sɔ nar nɩ fuo Thãgbaa nɩ̃khirəəkɛ na ɩnanɩ?#Mat 12:34; 23:33 8Na‐n sɛ beekɛ n nɛnanɩ anɩ ha debi. 9Na‐n too na kpɩɛr anɩ hara waa ayɩ, Abɩraham dʋɔn anɩ mama thɩ kɔ̃tãˈ, gɩdonɩ mɩ so narɛ dɩ bokanaakɛrakɛ Thãgba punone a cʋʋ gɩ dɩ gɩ debi a do bɩsana Abɩrahamna.#Jã 8:33 10Dɩrakɛ kpãkpo ˈlire leere thɩr nɛ kuur leere, dɩ thɩrʋ wo thɩrʋʋkɛ na‐n sɛnɩ bi bʋɔaˈ, wa kurre na dʋna dɔɔ.#Mat 7:19 11Me wer nyʋɔnɔ mɩ‐n kpɛɛ nɩ dɩ na debi haar, sɩ ʋrɛɛkɛ na kpaanɛnɩ, a hananɛ fãga a jɔ mɩ, dɩ ma hɩɩrʋʋrakɛ a na julẽ ɔɔ nɛfaa ga. Ɔr, Thu Phuurə na dɔɔra a na kpɛɛ nɩ. 12Dɩ jʋ jɛ nyɔ̃kpʋʋn hale dɩ fʋrɔ ɔɔ nyɔ̃kɔɔ. A na jɛr jɔ a gba jʋ be a pɛ ɔɔ thʋ̃ bɩnɔ, sɩ a thii laagbee dɔɔraakɛ na dɔnɩ thɩ̃ khiirnənəˈ.

Mɔ̃ Jeju ˈlɛnɩ yɔ kpɛɛrɛ

(Mar 1:9–11; Lu 3:21–22)

13Ga bɔɔlera Jeju the Galile, a pɔ Jʋrdɛ̃ mɩɩrra Jãa pa a kpɛa nɩ nyʋɔnɔ. 14Sɩ Jã kɔɔ bor sa so ayɩ: Mɛr ka teena fɩ kpɛa mɩ nyʋɔnɔ, sɩ dɩ fɩ ka ɩ̃ marɩ? 15Dɩ Jeju birsee: Nɛnɛ̃ wer, sɛ gar gɩ ha mɛ̃. Gɩdonɩ gɩ teenanɛ dɩ sa cʋʋ thɩ̃ɛ fɛʋʋkɛ saranɩ. Dɩ Jã na kɔɔ banaa bã. 16Dɩ dapaara ɔbɔɔkɛ wɩ kpɛɛnɩ Jeju nyʋɔnɔ dɩ na the, hɩnɛ thãgbara ƴũ phubire dɩ yɩ Thãgbaa Thu da‐n gbũ a ho puusɩ̃ɛ a pɔ lʋʋnaa. 17Dɩ hɩnɛ, nʋɔ ther le thãgbara ƴunə a so ayɩ: Ʋrɛɛkɛ dʋɔn ɩ̃ Bikuunikɛ mɩ‐n nanɩ, a lõ mer haar kpɛ.#Jən 22:2; Khɩ 2:7; Eja 42:1; Mat 12:18; 17:5; Mar 1:11; Lu 9:35

Currently Selected:

Matiə 3: LOBIRI

Highlight

Copy