Matiə 28

Jejuu khi ɩɩr

(Mar 16:1–10; Lu 24:1–12; Jã 20:1–10)

1Ɔbɔɔkɛ hɩɩr wire pɩnɩ, ga cʋɔ wi duuro phiphiphi, kɛ dɔnɩ wire makonyɔɔ caca wi, Marɩɩkɛ thɛnɩ Magɩdala, na Marɩ kpɩɩlera jaal wɩ hɩɩn kaa. 2Dɩ hɩnɛ, thɩ jẽ kɔ̃tɩ̃ɩ kɔɔ hale, gɩdonɩ Kɔ̃tɩnɩ thɔ̃thɔ̃daar thu bɩɛl kɔɔ ther Thãgbaa dʋɔ a gbũ, a kpuro bokaar faa sa tooro. 3Ɔɔ thɛthɛ n carbararɛ a ho mɔ̃ thãgba n lenɩ dɔɔ, dɩ ɔɔ kẽkẽ bulole phɩphɩphɩl a ho mɩlɛ. 4Dɩ maar kɔɔ fʋlɛlɛ gardɛsɔɔle dɩɩ ka, dɩ wɩ ma dɩ wa‐n jẽ a thʋ̃ debi a ho khe. 5Sɩ Thãgbaa thɔ̃thɔ̃daar thurə sor khɛraraale ayɩ: Ado ne wer gɩ, na‐n do maar n fʋ naˈ, gɩdonɩ mɩ jɩrɛ Jejuukɛ wɩ kɔɔ kpanɩ kʋkʋ thɩrʋra nɩ‐n yaal; 6aa hakaˈ, a ɩɩrɛ a the khirera mɔna a kɔɔ sonɩ. Nɩ ɩna hɩnɛ kãkɛ wɩ kɔɔ pɩɛnɩ, 7sa jala kɔrɔ a sɔ ɔɔ kpãkpãadarara ayɛ, a ɩɩrɛ a the khirera, dɩ a kʋʋl nɛr ƴɩɛ gɩrɛ da‐n jal Galile, le na yɩɩ. Nɩ hɩnɛ, gɛr mɩ jɩ a so nar. 8Dɩ dapaara wɩ faarɛ kaa sa gba wa‐n jal na jẽu na da kɔ̃tɩ̃ɩ, sɩ kpãkpãadara wɩ ca jal a mɩɩ thɩ̃ɛɛlera.

9Dɩ hɩnɛ, Jeju pɔr a caan wɩ a so: Mɩ fʋɔr nɛr. Dɩ khɛraale tɔr wɔrɔ̃ɔ a palʋʋ nɛɛ, dɩ wa‐n fʋɔrʋʋ. 10Dɩ Jeju so warɛ ayɩ: Na‐n do maar n fʋ naˈ, sɩ nɩ jala sɔ ɩ̃ omisɔra wa‐n jala Galile, le wa yɩ mɩ.

Mɔ̃ wɩ cʋʋnɩ gardɛsɔ dɩ wɩ fɩɩl tɩbɩla

11Dɩ ɔbɔɔkɛ khɛraale kɔɔ hanɩ hʋɛra wa‐n jal, wɩ̃ kũusɔɔkɛ dɔnɩ bɛbɛraale kɔɔ jaal dɩɩra a mɩɩ bonɩ jidaar kɔ̃tɩna thɩ̃ɛ fɛʋʋle kɔɔ dananɩ. 12Dɩ wɛr, ɔbɔɔkɛ wɩ kpanɩ kha na kɔ̃tɩnasɔ a gʋʋr pɩ, wɩ gbaar war jɔɔ a ha sɔrasɛɛle sa so war ayɩ: 13Nɩ sɔ ayɛwɔɔ: Ɔɔ kpãkpãadara kɔɔ pʋɔn dɩtɩnɔ, ɔbɔɔkɛ sɩ‐n daarnɩ, a yuu ti. 14Dɩ ado gobanɛr nɩɛ, sa dor bʋɔ na cʋgʋʋ da tu gɩ do nɔɔ na ˈlɛ soraˈ. 15Dɩ sɔrasɛsɔ gbaar warɩle, sa cʋʋ mɔna wɩ kɔɔ so warnɩ wɩ cʋɛ. Dɩ thɩmɩɩ ca gelera kpaarɛ Juifisɔɔ thɩ̃thɩɩn a dana nĩkɛ.

Mɔ̃ Jeju kɔɔ nɩnanɩ ɔɔbara kpãkpãadara

(Mar 16:14–18; Lu 24:36–49; Jã 20:19–23; Th t t 1:6–8)

16Dɩ kpãkpãadara yʋɔr bɩɛl jaal Galile, gɔ̃gʋɔnaakɛ Jeju kɔɔ yɩnɩ wɩ caanɛ nɩ.#Mat 26:32; Mar 14:28 17Dɩ ɔbɔɔkɛ wɩ yɩɩnɩ, wɩ gburõkure dɩ wa‐n fʋɔrʋʋ. Sɩ ɩkhasɔ wɛrra bor sɩ wa‐n baalɔ. 18Dɩ Jeju tɔr pɔ war sa so war thakɛ ayɩwɔɔ: Fãga fɛʋ, mɛr Thãgba ha, thãgbara yũ a gbana thɩɩra. 19Gɛr gɩ nɩ jala caarra fɛʋ a na cʋɛ tɩbɩla wɩ do kpãkpãadara. Nɩ gba Thɩrɛ, na Bikuun, na Thu Phuu i a na kpɛana wɩ nyʋɔnɔ;#Th t t 1:8 20dɩ na‐n dɩrɛ wɩ wa‐n cʋʋ thĩɛ fɛʋʋkɛ mɩ kɔɔ so narnɩ. Sɩ hɩnɛ, mɛrɛ ma‐n har kha na nɛrɛ wire wo wire fɛʋ, gɩ dana thɩɩkɛ pɩ wi.

Currently Selected:

Matiə 28: LOBIRI

Highlight

Copy