Matiə 26

Kɩɛr wɩ‐n ƴaal Jejuu yʋ

(Mar 14:1–2; Lu 22:1–2; Jã 11:45–53)

1Ɔbɔɔkɛ Jeju mɩɩnɩ thɩmɩaakɛ fɛʋ dɩɩ pɩ, a sor ɔɔ kpãkpãadarara ayɩ: 2Nɩ jɩrɛ wire yenyɔ sɛ sɩ Pakɩ n dã, dɩ wa fʋrɛ mɛr tibili Bikuun na kpa kʋkʋ thɩrʋra.#Thɩɩ 12:1–27 3Ɔbɔɔlera bonɩ jidaar kɔ̃tɩnasɔ na tɩbɩlaa kɔ̃tɩ̃sɔ kpa kha a jɛ Kaɩfɩ gbõdaarɩ gbayara, 4a gʋʋr kha mɔ̃ wa cʋʋnɩ sɩ na fʋ Jeju na fɩɩlɛ a na kʋ. 5Sɩ wɩ‐n sor aa, wa‐n do gɩ do bɔɔkɛ tɩbɩla hanɩ fɛtɩ cʋʋrɔ kĩkĩkə̃ˈ, a mɛ̃ gaa ga hor khʋ̃ɛ na har tɩbɩlaa thɩ̃thɩɩn.

Kɩɛr khɛr deer Jejura latɩkolo

(Mar 14:3–9; Jã 12:1–8)

6Mɔ̃ Jeju hanɩ Betanɩ Sɩmɔ̃ gbuuluu cɔ, 7khɛ bɩɛl pʋɔraarɛ le a fʋrɔ laaso ja bʋlabir, kɛ hananɩ latɩkolo niinikɛ khiinoni the nʋɔ ka. Dɩ ɔbɔɔkɛ Jeju hanɩ dɩko kho paar, khɛrɩle lʋʋn le a deer latɩkolookɛ Jejuu yʋra.#Lu 7:37–38 8Mɔ̃ kpãkpãadara yɩɛnɩ thale, nĩkhii fʋlɛ wɛr dɩ wɩ so ayɩ: Anyee thɩ̃ kʋɛ ca ha gɩrɛ thakɛ? 9Ga do wa kɔɔ dolonena latɩkolo niinile gɩ khɩɩr, wɩ gba warɩle wɩ ha bɔdara gaa? 10Dɩ Jeju jɩrɛ a so war: Mɔ̃gɩdo dɩ na‐n pɛ khɛrɩkɛ nɩwɛ? Thɔ̃ bʋɔ a cʋʋ mar waa gel. 11Sɩ ado bɔdara wɛ, wɩ har anɩ pa wire fɛʋ, sɩ ado mɛr gɩ, ga do wire fɛʋ na hana maˈ.#Dət 15:11 12Sɩ mɔ̃ a deernɩ latɩkolo niinikɛ ɩ̃ tomɩra, a gbɛbɩ mɛr mɔ̃ wa dʋ mɩnɩ. 13Dɩ sobɔr mɩ so nar, paar fɛʋʋkɛ wa‐n mɩɩnɩ Thãgbaa tutugo bʋɔɔ thɩmɩɩ thɩɩraakɛ fɛʋ, wa‐n mɩɩrɛ dakha gɩrɛɛkɛ khɛrɩkɛ kɔɔ cʋʋnɩ dɩ wa jɩnaa.

Mɔ̃ Judasɩ liirnanɩ Jeju

(Mar 14:10–11; Lu 22:3–6)

14Le kpãkpãadaar bɩɛl yʋɔr yenyɔra, kɛ wɩ‐n wenɩ Judasɩ, kɛ thɛnɩ Karɩyɔtɩ dɩɩra, jal bonɩ jidaar kɔ̃tɩnaa pa a so war ayɩ: 15Anye na tu na ha mɩ, ado mɩ liirna Jeju a ha nɩ? Dɩ wɩ haarɛ wire kpelẽ yʋɔr lɩmɩnɛɛ war.#Jak 11:12 16Dɩ a fʋna ɔbɔɔlera, a jɩɛ ma da‐n ƴaal hʋɛ waa mɔ̃ a na fʋnɩ sɩ a liirna Jeju a ha wɩ.

Kɔ̃tɩnɩ dɩko kho fʋ pa

(Mar 14:12–21; Lu 22:7–14, 21–23; Jã 13:21–30)

17 Buruukɛ na hananɩ tabɩɩraa caca fɛtɩ wi daan, dɩ kpãkpãadara kɔɔ pɔr Jejura a bulee ayɩ: Kana fɩ‐n ƴaal sɩ jala gbɛbɩrɛ Pakɩ dɩkor fɩ kho? 18Dɩ so war: Nɩ jala dɩɩra kũu bɩɛlɩ pa a sʋɔraa ayɛ: Dɩɩrdaar sɔ ayɩwɔɔ aa, ɩnɩ bɔ daan, dɩ afɩ pa ɩna cʋʋ Pakɩ nakha ɩnɩ kpãkpãadara. 19Dɩ kpãkpãadara cʋʋrɛ gɩrɛ Jeju kɔɔ so warnɩ a jal gbɛbɩ Pakɩ dɩkor.

20A dɩɩ dʋɔr, Jeju pɔr na ɔɔ kpãkpãadara yʋɔr yenyɔ, dɩ wɩ too dɩko kho paar. 21Dɩ ɔbɔɔkɛ wɩ hanɩ dɩko khoro, a so warɛ ayɩ: Sobɔr mɩ so nar, tibil bɩɛl nɛrɛra na liirna mɛr. 22Dɩ wɩ gbobire jɔɔ ka, sa ma fɛʋ bɩɛlbɩɛl dɩ wa‐n bule: Mɛr gɩ ya Kɔ̃tɩn? 23Dɩ birse wi: Ʋrɛɛkɛɛ nyɔ̃ n ˈlɔɔnɩ kha na mɛrɛ tasa bɩɛl, ɔr gɩɩkɛ na lirena mɩnɩ.#Khɩ 41:9 24Mɛr tibili Bikuun wer n jaal mɔ̃ gɩ khere marnɩ Thãgbaa sɛbɛra, sɩ ga puure tibil ʋrɛraakɛ na lirenanɩ mɛr tibili Bikuun. A wa kɔɔ kɔ̃ tibil ca olelakaˈ, gɩ ka baar. 25Dɩ Judasɩɩkɛ na lirenaanɩ bulee: Dɩ mɛr gɩ ya Dɩɩrdaar? Dɩ Jeju birsee: Gɛrra fɩ so gele.

Kɔ̃tɩnɩ dɩko

(Mar 14:22–26; Lu 22:15–20; 1 Kor 11:23–25)

26Ɔbɔɔkɛ wɩ hanɩ dɩko khoro Jeju gbaar buru, dɩ ɔbɔɔkɛ a bɩɛlnɩ Thãgba pɛr pɩ, a kuure a ha ɔɔ kpãkpãadara sa so war: Nɩ gba a khɔ, gɩrɛra dʋɔn ɩ̃ tomɩ. 27Agɩpɩ dɩ gba thɩ̃ yɔnanɛ, dɩ ɔbɔɔkɛ a fʋɔrnɩ Thãgba pɛr pɩ, a ha wɛr sa so war: Nɩ gba fɛʋ a yɔ. 28Gɩdonɩ gɛrra dɔ ɩ̃ tɔmɩ̃, Thãgbaa nɔ bɩɛl ʋlfɛ tɔmɩ̃ gɩɩkɛ deerenɩ gɩ faa tɩbɩla bərəəm sopugo.#Thɩɩ 24:8; Jer 31:31–34 29Mɩ so narɛ ma bir na yɔ dɩvɛ̃ɛkɛ bã, phaphapha gɩ dana wireekɛ ma birni na yɔ daphaa wo na nɛrɛ ɩ̃ Thɩɩ fãgadaar dɩra.

Jeju mɩɩrɛ mɔ̃ Pɩɛr na bananɩ nayɩ, ɩna jɩaˈ

(Mar 14:27–31; Lu 22:31–34; Jã 13:36–38)

30Ɔbɔɔkɛ wɩ kɔɔ khɩnɩ nɩɛ pɩ, wɩ ther jal gɔ̃gʋɔnaakɛ hananɩ olɩvɩ thɩra. 31Le Jeju so war ayɩ: Nĩ dɩtɩnɔɔkɛ ɩ̃da na dor nɔɔ dɩ nɛrɛ fɛʋ na kɛrna khiru, gɩdonɩ gɩ kherere Thãgbaa sɛbɛra ayɩ: “Mɛr Thãgba na bɩɩrɛ bana khedaar, dɩ banaasɔɔkɛ gbɛbanɩ kha na bɩ̃bɩlanɛ paar fɛʋ.”#Jak 13:7 32Sɩ ɔbɔɔkɛ mɛr Jeju na ɩɩrnɩ na the khirera na pɩ, ma kʋʋl nɛr ƴɩɛ na jal Galile.#Mat 28:16 33Dɩ Pɩɛr sʋʋraa: Ado afɩda na dor nɔɔ dɩ tɩbɩla fɛʋ na kɛrna khirurakɛ, sɩ me wer ma kɛrna khiru kpɩɩrakaˈ. 34Dɩ Jeju sʋʋraa: Sobɔr mɩ so far, fɛrɛ, nĩ dɩtɩnɔɔkɛra yɔl kʋʋ na ˈlɛ na khɩɩ paˈ, sɩ balãther fa bana nayɩ fa jɩ maˈ. 35Pɩɛr bir birsee: Adorakɛ wɩ yɩ foo sɩ khe kha, sɩ ma puno na bana nayɩ ma jɩ faa ga. Dɩ ɔmɛna kpãkpãadara fɛʋ so wer.

Jejuu Thãgba bɩɛl Jɛcɛmanɛ

(Mar 14:32–42; Lu 22:39–46)

36Dɩ Jeju kpar ɔɔ kpãkpãadara dɩ wɩ jal dã paarɩkɛ wɩ‐n wenɩ Jɛcɛmanɛ, dɩ a so warɛ ayɩ: Nɩ tɔɔ kɩɛr ɔbɔɔkɛ ma jalnɩ ma‐n bɩɛl Thãgba. 37Dɩ a kɔɔ kpar Pɩɛr na Jebedee bikona yenyɔ, sɩ a mar da‐n gbobi dɩ haar kʋɛsʋʋ. 38Dɩ a so warɛ: Ɩ̃ ha gbobire khikhi gbobire waa gel. Nɩ tɔɔ kɩɛr a na jʋrɛ na mɛrɛ. 39Sɩ agɩpɩ dɩ tɔ jal gbe, a ji thɩɩra a sumo, da‐n bɩɛl Thãgba thakɛ ayɩ: Ɩ̃ Thɩ, ado hʋɛ na hale, hʋnɔnɛna mɩ thɩ̃ yɔnanɛɛkɛ, sɩ ga‐n do mɔ̃kɛ mɩ‐n ƴaalnɩ ga, sɩ mɔ̃kɛ fɛrɛ n pɛrnɩ haar gɩ hana. 40Dɩ agɩpɩ dɩ ɩɩr a bir pɔ kpãkpãadaraa pa a yɩ wɩ dɩ wa‐n daar, dɩ so Pɩɛrra: Na kɔɔ puno toorakɛ gbe a jʋʋr hɩɩn na mɛrɛaa koe? 41Na‐n jʋrɛ a na bɩɛlna Thãgba, dɩ mɛ̃ na lõ fifiləlela ga. Tuur wer n har haarra gel, sɩ tibili tibil do pa fãga ˈlee. 42Dɩ a bire jal balanyɔ wo da‐n bɩɛl Thãgba thakɛ ayɩ: Ɩ̃ Thɩ, ado hʋɛ na hale, dɩ thɩ̃ yɔnanɛɛkɛ na hʋnɔna mɩ sɩɩ do ma yɔ ga, dɔ gɩ ha mɔ̃ fɩ tuni. 43Sɩ a bire pɔ wo a yɩ wɩ dɩ wa‐n daar wo, gɩdonɩ dayuur fʋ wɛr a kar. 44Dɩ a faa wɛr sa bir jal da‐n bɩɛl Thãgba gɩ do balãther; dɩ mɔna a‐n bɩɛlnɩ Thãgba, thɩmɩɩ nɔ bɩɛlɩlera a bir da‐n ˈloro. 45Agɩpɩ dɩ bir pɔ kpãkpãadaraa pa a so war: Nɩ daarɛ dɩphã a hɩrɛ. Nɛnɛ̃ dɩphã bɔɔ daan dɩ wa fʋ mɛr tibili Bikuun na ha sopugodara. 46Nɩ ɩrɛ sɩ jal, sɩ nɩ hɩnɛ ʋrɛra lirena mɩnɩ n ɩnɛ.

Jejuu fʋ

(Mar 14:43–50; Lu 22:47–53; Jã 18:3–12)

47Dɩ mɔna Jeju hanɩ mɩɩrɔ, Judasɩɩkɛra dɔnɩ bɩɛl kpãkpãadara yʋɔr yenyɔra daan, na tibil jɔjʋɔɔkɛ fɔrɔnɩ bajɩnasɔ, na gbolasɔ, kɛ bonɩ jidaar kɔ̃tɩnasɔ na tɩbɩlaa kɔ̃tɩ̃sɔ kɔɔ thɔnɩ. 48Sɩ lĩlir kɔɔ nɩ warɛ gɩrɛ a na cʋʋnɩ aa, ʋrɛɛkɛ ɩna palnɩ, ɔr gɩ, wɩ fʋɔnɛɛ. 49Dɩ dapaara a tɔr dã Jeju sa so: Dɩɩrdaar, gba fʋɔrɛ; sa palʋʋ. 50Dɩ Jeju sʋʋraa: Ɩ̃ kuun, gɩrɛ fɩ ɩnɩ fɩ cʋʋ, cʋɛ bɛɛ.

Le tɩbɩlaale kpa Jeju a fʋ. 51Dɩ bɩɛl wɩrɛraakɛ hananɩ kha Jeju hal ɔɔ bajɩna, a phe a cɩna gbõdaarɩ thɔ̃daar nũu a kur. 52Dɩ Jeju sʋʋraa: Birəna afɩ bajɩna tʋɔr khal kpara, gɩdonɩ wɩrɛ fɛʋʋkɛ na gbaannɩ bajɩna, bajɩnana wa gba na kʋʋrna wɩ. 53Fa jɩ dɩɩ do mɩ hananɛ hʋɛ na bɩɛl ɩ̃ Thɩra da thɔna mar dapaara ɔɔ thɔ̃thɔ̃daar thusɔ, dɩ wa ka gbɩlanɩ kpalãther yʋɔr yenyɔra gaa? 54Sɩ a mɩ cʋʋ mɛ̃, mɔ̃ gɩrɛ Thãgbaa sɛbɛ sonɩ ayɩ: Gɩ dana thakɛra, mɔ̃ ga fʋ sɩ na dã na ha oti? 55Ga bɔɔlera Jeju so tibil jɔraale: Nɩ ɩnanɛ bajɩna na gbolasɔ, nɩ fʋ mɩ mɔ̃ wɩ‐n fʋnɩ yu hɔ̃hʋɔldaar koe. Wire fɛʋ mɩ‐n kɔɔ toore Thãgba fʋɔr cɔ kɔ̃tɩɩna dɩ ma‐n dɩɩr thɩ̃ɛ, sɩ na kɔɔ fʋ maˈ.#Lu 19:47; 21:37 56Sɩ thɩ̃ɛsɔɔkɛ thakɛ fɛʋ daan, dɩ mɛ̃ gɩrɛɛkɛ Thãgbaa bobona kɔɔ kherenɩ na dã na ha oti.

Le ɔɔ kpãkpãadarasɔ fɛʋ fagʋʋ sa fuule.

Jeju so gʋʋrdaraa ƴɛra

(Mar 14:53–65; Lu 22:54–55, 63–71; Jã 18:13–14, 19–24)

57Dɩ wɩrɛ fʋɔnnɩ Jeju, wɩ kpaarɛ jalna Kaɩfɩ gbõdaarɩ pa, ka jɔfʋ dɩɩrdarasɔ na kɔ̃tɩnasɔ kpanɩ kha a jɛ. 58Sɩ Pɩɛr n kɔɔ kpar Jejura nɔ bɩɛl nɔ bɩɛl, a ba dana gbõdaarɩ gbaya, a lõ a too le na gardɛsɔ a hɩɩn mɔ̃ ga pɩnɩ. 59Dɩ bonɩ jidaar kɔ̃tɩna na so gʋʋrdara fɛʋ kɔɔ kpɛr sɔ dɩ wa‐n pɛ Jejura, wɩ yɩrɔ hʋɛ wɩ kʋʋ. 60Sɩ wa kɔɔ yɩ ga, sɩrakɛ tibil jɔ kɔɔ pɔr a kuur sɔ̃sɔ dɩ wa‐n pɛ Jejura. Pɩpɩɩ paar yenyɔ pɔr a so ayɩ: 61Kuunikɛ sor ayɩ, ɩna punone na wɩɛr Thãgba fʋɔr cɔ kɔ̃tɩ̃ɩ, sɩ ɩnɩ‐n bir ɩnɩ‐n mɩ wo wire balãther.#Jã 2:19 62Dɩ gbõdaar pal ɩɩr a bule Jeju: Fa hana nʋɔ na birsena gaa? Anyee so ha gɩrɛ tɩbɩlaakɛra n pɛ farnɩ thakɛ? 63Sɩ Jeju pɩr pɔbɩ, dɩ gbõdaar bir sʋʋraa: Na Thãgba yidaarɩ i, sɔ sar ado fɛr dʋɔn Kirisiti Thãgbaa Bikuun. 64Dɩ Jeju birsee: Gɛrra ha gele fɩ sonɩ, sɩ wo mɩ so narɛ, a fʋna nɛnɛ̃kɛ na yɩrɛ mɛr tibili Bikuun dɩphã dɩ ma too Thãgbaa nyɔ̃bɔra, dɩ ma ther dakha thãgbara ƴũ ma‐n ɩ̃ ndɔlɔ̃panana.#Dan 7:13 65Le gbõdaar ɓəər ɔɔ kẽkẽsɔ sa so: A kʋɛrɛ Thãgbaa i. Anye hale dɩ sa bir na ƴaal so jɩdara ˈlo? Mee nɩ nɩɛrɛ mɔ̃ a kʋɛnɩ Thãgbaa i, mɔ̃ nɩ‐n kpɩɛr?#Lev 24:16 66Dɩ wɩ birsee: Khir a teena. 67Sɩ agɩpɩ wɩ mar a cɩɩr nyɔ̃thɩ̃ɩ dɩ wa‐n pɩɛraa ƴɩɛra, sɩ dɩ wa‐n thʋʋrʋʋ na nyɔ̃ po, sɩ ɩkhasɔ na‐n ɓaalɛɛ sɩ dɩ wa‐n so:#Eja 50:6 68Kirisiti, jɛ ntɛsɔ n bɛ fɩnɩ sa sɔ sar.

Mɔ̃ Pɩɛr bananɩ ɩna jɩ ntɛ Jeju donaˈ

(Mar 14:66–72; Lu 22:56–62; Jã 18:15–18, 25–27)

69Sɩ Pɩɛr kɔɔ hale a too le phiilo gbayara. Dɩ thɔ̃daar khɛ bɩɛl tɔr pʋɔraa a sʋʋraa: Fɛrɛ dakha, mee fɩ kɔɔ har kha na Galile Jejuukɛra. 70Sɩ a bananɛ awɩ ƴɛra fɛʋ ayɩ: Ma jɩ gɩrɛ fɩ‐n ƴaalnɩ fɩ so tɔraˈ. 71Sɩ agɩpɩ a tɔr thɔɔ lõfonʋɔ, dɩ khɛ kpɩɩ yɩɩ a so wɩrɛraakɛ hanɩle ayɩ: Ʋrɛɛkɛ dakha, a‐n kɔɔ har kha na Najarɛtɩ Jejura. 72Sɩ a bire bana wo da‐n ʋlfɛna ɓoɓo ayɩ: Ma jɩ kuunile kpɩɩrakaˈ. 73Bɔɔ gbe dɩ wɩrɛɛkɛ hanɩle tɔr pɔ Pɩɛrra wo a bir sʋʋraa: Sobɔr gɩ gel, fɛrɛ dakha fɛr dɔ waa tibil ca bɩɛl, gɩdonɩ afɩ nɔ mɩɩ wɩ‐n jɩna fɩ. 74Le a ma dɩphã da‐n wɩɩr thɩ̃ɛsɔ da‐n ʋlfɛna ayɩ: Ma jɩ kuunile kpɩɩrakaˈ. Dɩ dapaara yɔl kʋʋ khɩɩ, 75dɩ Pɩɛr jɩnanɛ thɩmɩɩrɩkɛ Jeju kɔɔ sʋʋraanɩ: Yɔl kʋʋ na ˈlɛ na khɩɩ paˈ, sɩ fa bananɛ balãther nayɩ fa jɩ maˈ. Dɩ le a the khuirə da‐n bɩ sɔsɔsɔ.

Currently Selected:

Matiə 26: LOBIRI

Highlight

Copy