Matiə 25

Sokpaa khɛ biirə yʋɔrra kɛ na jɛnɩ kuun paˈ

1Ga bɔɔle, ƴũ fãgadaarɩ dɩ ga hʋrɛ khɛ biirə yʋɔrɩkɛ na jɛnɩ kuun paˈ, kɛ kɔɔ gbaannɩ awɩ lãphãsɔ a jal wɩ caan khɛrɩ ko.#Lu 12:35 2Yemɔɩ wɛrra dor də̃bələ, sɩ yemɔɩ do khɛ bi kpɛsɛsɔ. 3Də̃bələ gbaar awɩ lãphãsɔ sɩ wa kɔɔ gba niinəˈ, 4sɩ khɛ bi kpɛsɛsɔɔle gbaar awɩ lãphãsɔ a gbana niin na nĩ pɛdaa a fʋrɔ. 5Mɔ̃ khɛrɩ ko n pʋɔrnɩ pʋɔrra, dayuur fʋlɛ wɛr fɛʋ dɩ wa‐n daar.

6A dɩɩ nɩrɔ hulẽbire ther aa: Nɩ yɛ khɛrɩ ko, nɩ thɛ na caanɛɛ. 7Dɩ khɛ biirəəle fɛʋ pal ɩɩr a ma dɩ wa‐n gbɛbɩ awɩ lãphãsɔ. 8Dɩ khɛ bi də̃bələəle so khɛ bi kpɛsɛsɔra ayɩ: Nɩ pɛ sar anɩ ninə gbe, gɩdonɩ asɩ lãphãsɔ n khiire. 9Dɩ khɛ bi kpɛsɛsɔɔle birse wi: Ə̃ˈə̃, gɩdonɩ ga dã sɩ kha na nɛrɛaˈ, nɩ jala wɩrɛraakɛ n dolonenɩ a thɛ anɩda. 10Dɩ ɔbɔɔkɛ wɩ jalnɩ wɩ the, dɩɩ do khɛrɩ ko daan, dɩ khɛ bi wele kɔɔ gbɛbɩrɛnɩ pɩ, cʋrrɛ kha a lõ he fɛtɩ cʋgʋʋ, sɩ dɩ loo khaan. 11Ga too gbe dɩ wa khɛ bisɔɔle pɔ dakha wer dɩ wa‐n so: Kɔ̃tɩn, Kɔ̃tɩn, khɛra sɩ loo.#Lu 13:25 12Dɩ birse wi: Sobɔr mɩ so nar, ma jɩ naˈ.

13Gɛr gɩ a nɩ jɩ na‐n jʋrɛ, gɩdonɩ na jɩ wire dɩ bɔɔ ga.

War bɔrɔ sokpaa

(Lu 19:11–27)

14Ga hʋrɛ kũu bɩɛlɩkɛ kɔɔ ƴaalɛnɩ a kpaar, a we ɔɔ thɔ̃daarsɔ, a pɛ war ɔɔ lẽle thɩ̃sɔ wa‐n hɩnɛ.#Lu 19:11–27 #Mat 8:12; 22:13; Lu 13:28 15Dɩ a har bɩɛl war bɔrɔ yemɔɩ, a ha bɩɛl war bɔrɔ yenyɔ, sa ha balãtherdaar war bɔrɔ bɩɛl. A ha wɛr fɛʋ bɩɛlbɩɛl mɔ̃ awɩ puno hanɩ, sa gba jal kpaar paar. 16Dapaara ʋrɛɛkɛ kɔɔ ˈlɛnɩ war bɔrɔ yemɔɩ gbaar jalna da‐n ƴabɩna, a ˈlɛ yemɔɩ a dɛɛnɔ wo. 17Mɛ̃ ʋrɛɛkɛ kɔɔ ˈlɛnɩ war bɔrɔ yenyɔ ˈlɛ yenyɔ wo a dɛɛnɔ. 18Sɩ ʋrɛɛkɛ kɔɔ ˈlɛnɩ war bɔrɔ bɩɛl dɩbara, a jaal a kpe koru a puu le ɔɔ kɔ̃tɩ̃ɩ war faa. 19A gɩ ɩ̃ a pʋɔr thɔ̃daraalee kɔ̃tɩna bire ɩ̃, a we wɩ wɩ thera war ɩnɩ‐n hɩɩn. 20Dɩ ʋrɛɛkɛ kɔɔ ˈlɛnɩ war bɔrɔ yemɔɩɩle tɔr dã na dɛɛnɛ yemɔɩɩkɛ a ˈlɛnɩ a so: Kɔ̃tɩn, fɩ kɔɔ pɛ marɛ war bɔrɔ yemɔɩ. Yɛ yemɔɩ phaa mɩ birni ˈlɛ a dɛɛnɔ. 21Dɩ ɔɔ kɔ̃tɩ̃ sʋʋraa: Gɩ bɔrɛ kpɛ, thɔ̃daar bʋɔ ha fɩ na sobɔ cʋʋdaar. Fɩ kɔɔ dor sobɔ cʋʋdaar thɩ̃ fɩɩʋra, nɛnɛ̃ ma pɛ farɛ dɩ fa do hɩɩndaar thɩ̃ jɔjʋɔra. Lona daʋraakɛ dɔnɩ afɩ kɔ̃tɩ̃ɩda. 22Dɩ ʋrɛɛkɛ kɔɔ ˈlɛnɩ war bɔrɔ yenyɔ tɔ dã a so: Kɔ̃tɩn fɩ kɔɔ pɛ marɛ war bɔrɔ yenyɔ, yɛ kɛ yenyɔ phaa mɩ birni ˈlɛ a dɛɛnɔ wo. 23Dɩ ɔɔ kɔ̃tɩ̃ sʋʋraa: Gɩ bɔrɛ kpɛ, thɔ̃daar bʋɔ ha fɩ na sobɔ cʋʋdaar. Fɩ kɔɔ dor sobɔ cʋʋdaar thɩ̃ fɩɩʋra, nɛnɛ̃ ma pɛ farɛ dɩ fa do hɩɩndaar thɩ̃ jɔjʋɔra. Lona daʋraakɛ dɔnɩ afɩ kɔ̃tɩ̃ɩda. 24Dɩ ʋrɛɛkɛ kɔɔ ˈlɛnɩ war bɔrɔ bɩɛl dɩbara tɔr dã dakha a so: Kɔ̃tɩn, mɩ jɩrɛ fɛr dɔ tibilikɛ afɩda khɩɩrnɩ, dɩ fa‐n kha jɔ kãkɛ fa diirnəˈ, dɩ fa‐n kha kãkɛ fa kɔɔ jalnɩ woaˈ. 25Gɛr gɩ maar kɔɔ fʋ mɩ dɩ ɩ̃ gba afɩ bɔrɔ bɩɛlla a puu thɩɩra. Gɩkɛ gba, gɛr dɔ afɩda. 26Dɩ ɔɔ kɔ̃tɩ̃ birsee ayɩ: Fɛr thɔ̃daar puu na khãkhal, fɩ kɔɔ jɩrɛ dɩ mɛr dɔ ʋrɛ n khanɩ kãkɛ ma kɔɔ diirnəˈ, dɩ ma‐n kha dakha kãkɛ ma kɔɔ jalnɩ thɩ̃aˈ, 27dɩ gɩ kɔɔ teenanɛna wɩ yɛ fɩ gbaar ɩ̃ war a ˈlaa kãkɛ ma ˈlɛrɔnɩ khor. A mɩ kɛrrɛ bir ɩ̃, ɩ̃ gba ɩ̃da na khor. 28Dɩ gɛr gɩ, nɩ taaraa bɔrɔ bɩɛlɩle a hananɩ, a hana ʋrɛ hananɩ bɔrɔ yʋɔrɩle. 29Gɩdonɩ tibil wo tibilikɛ hananɩ thɩ̃ɛ, wa bire na haa na dɛbɩrɔ wo, dɩ na hana gɩ dɩ ga jɩɩ jɔr. Sɩ tibil wo tibilikɛ na hananɩ thɩ̃aˈ, wa tiirəərerakɛ phubi gɩrɛ a hananɩ.#Mat 13:12; Mar 4:25; Lu 8:18 30Sɩ olela na dɔnɩ bɔ taa thɔ̃daaraˈ, nɩ dɔnaa jɩɛra dabirə paar faa, kãkɛ wa bɩnɩ wa‐n yɩrna nyɩma.

Kɩɩlɛɛkɛ Jeju na kɩɩlnanɩ tibil caar fɛʋ

31Ɔbɔɔkɛ mɛr tibili Bikuun na‐n ɩnɩ na ɩ̃ i dʋbɩ nakha ɩ̃ thɔ̃thɔ̃daar thusɔ fɛʋ, ma toore ɩ̃ i dʋbɩ fãga too para.#Mat 8:12; 22:13; Lu 13:28 32Dɩ le wa kpa tibil caar fɛʋ na jɛ ɩ̃ ƴɛ thɩ̃thɩɩn, dɩ ma leere wɛ na wɛ, mɔ̃kɛ bana khedaar n leenɩ banaa na bɔ. 33Dɩ ma pɛr banaa ɩ̃ nyɔ̃bɔra, sɩ ɩ̃ pɛ bɔ ɩ̃ nyɔ̃bɩlana. 34Le mɛr fãgadaar na so wɩrɛraakɛ hanɩ ɩ̃ nyɔ̃bɔra ɩ̃ yɩ: Nɩ ɩna nɛrkɛ ɩ̃ Thɩ bɔnanɩ, a gba fãgadaar dɩɩkɛ wɩ kɔɔ maanɩ gbɛbɩ nar kɛkɛkɛ thɩɩkɛ ti bɔɔ a hɩna. 35Gɩdonɩ kɔmɛr kɔɔ fʋ mɛr dɩ nɩ kɔɔ ha mɩ dɩkor; yɔlkhaa kɔɔ fʋ mɛr dɩ nɩ kɔɔ ha mɩ nyʋɔn; mɩ kɔɔ dor kpakpal dɩ nɩ kɔɔ tee mɩ; 36mɩ kɔɔ hananɛ sãɓɔlɔ̃ dɩ nɩ kɔɔ saa mɩ kɩ̃kɩɩn; gɩ‐n kɔɔ kho mer dɩ nɩ kɔɔ pɔ a yɩ mɩ; mɩ kɔɔ har khaɩra dɩ nɩ kɔɔ pɔ a yɩ mɩ.

37Le tɩɩ sarasɔ na birse mi nayɩ: Kɔ̃tɩn, ʋmɔ̃ bɔɔ sɩ kɔɔ yɩ fɩ na kɔmɛr a ha fɩ dɩkor, dɩ yɔlkhaa kɔɔ fʋ fɩ dɩ sɩ kɔɔ ha fɩ nyʋɔn? 38Ʋmɔ̃ bɔɔ sɩ kɔɔ yɩ fɩ dɩ fɩ kɔɔ do kpakpal dɩ sɩ kɔɔ tee fɩ, agɩbo na sãɓɔlɔ̃ dɩ sɩ kɔɔ ha fɩ kɩ̃kɩɩn? 39Ʋmɔ̃ bɔɔ sɩ kɔɔ yɩ fɩ dɩ ga‐n kho fɩ, agɩbo dɩ fɩ kɔɔ ha khaɩra dɩ sɩ kɔɔ pɔ a yɩ fɩ? 40Dɩ mɛr fãgadaar na birse wer nayɩ: Sobɔr mɩ so nar, gɩrɛ fɛʋʋkɛ nɩ kɔɔ cʋʋnɩ ɩ̃ omi bu fɩɩʋra, mɛrra nɩ kɔɔ cʋʋ. 41Agɩpɩ, ma sor wɩrɛraakɛ hanɩ ɩ̃ nyɔ̃bɩlana: Nɩ hala mɩ jala ƴɔɔ, nɛrkɛ so kɔ̃tɩ̃ɩ heennɩ, nɩ jala lona khorr dɔɔraakɛ wɩ gbɛbɩnɩ thɩɩn Satana, na ɔɔ thɔ̃thɔ̃daar thusɔra. 42Gɩdonɩ kɔmɛr kɔɔ fʋ mɛr sɩ na kɔɔ ha mɩ dɩkoraˈ; yɔlkhaa kɔɔ fʋ mɛr sɩ na kɔɔ ha mɩ nyʋɔnaˈ; 43mɩ kɔɔ dor kpakpal sɩ na kɔɔ tee maˈ; mɩ kɔɔ hananɛ sãɓɔlɔ̃ sɩ na kɔɔ ha mɩ kɩ̃kɩɩnaˈ; gɩ‐n kɔɔ kho mer dɩ mɩ kɔɔ har dakha khaɩra, sɩ na kɔɔ pɔ a yɩ maˈ.

44Dɩ le wa birse mi dakha nayɩ: Kɔ̃tɩn, ʋmɔ̃ bɔɔ sɩ kɔɔ yɩ fɩ na kɔmɛr na yɔlkhaa, agɩbo dɩ fɩ kɔɔ do kpakpal, agɩbo dɩ fɩ kɔɔ hana sãɓɔlɔ̃, dɩ ga‐n kho fɩ dakha, agɩbo wo dɩ fɩ ha khaɩra dɩ sa kɔɔ cʋʋ fɩ bɔaˈ. 45Dɩ le ma birse wi nayɩ: Sobɔr mɩ so nar, thɩ̃ɛ fɛʋʋkɛ na kɔɔ cʋʋnɩ ɩ̃ omi bu fɩɩʋra ga, mɛrra na kɔɔ cʋaˈ. 46Dɩ wɛr, wa jaal khorr so ˈlɛ paar, sɩ tɩɩ sara n ˈlɛ yire khorr.#Dan 12:2

Currently Selected:

Matiə 25: LOBIRI

Highlight

Copy