Matiə 24

Thãgba fʋɔr cɔ kɔ̃tɩ̃ wɩɛr thɩmɩɩr

(Mar 13:1–2; Lu 21:5–6)

1Mɔ̃kɛ Jeju thenɩ Thãgba fʋɔr cɔ kɔ̃tɩɩna da‐n gba hʋɛ, ɔɔ kpãkpãadara tɔr pʋɔraa a nɩɩraa mɔ̃ wɩ mɩnɩ Thãgba fʋɔr cɔ kɔ̃tɩ̃ɩle. 2Sɩ a birse wer ayɩ: Nɩ yɩrɛ gelesɔra fɛʋaa? Sobɔr mɩ so nar, na yɩ kɩɛr boka bɩɛl dɩ na bir na sɩ na dɛ̃ɛ ʋ̃ bokara ƴũ bã, fɛʋ na derre.

Nɩwɛɛkɛ na kɔɔ dananɩ sɩ thɩɩ pɩ bɔ n pɩɩrɔ

(Mar 13:3–13; Lu 21:7–19)

3Mɔ̃ Jeju toonɩ gɔ̃gʋɔnaakɛ hananɩ olɩvɩ thɩra, kpãkpãadara kɔɔ pɔr a bulee hɛllɩ: So sar bɔɔkɛ gelela na danɩ, na gɩrɛ na dɔnɩ afɩ bir ɩ̃ bɔ jẽ, na thɩɩkɛɛ pɩ bɔda. 4Dɩ Jeju birse wi: Na‐n jɩɛ dʋ bʋrɛ, na‐n do tibil n fɩɩl naˈ; 5gɩdonɩ tɩbɩla bərəəm na gbaar ɩ̃ i na ɩna wa‐n so wɩ yɩ, ɩnɛr dʋɔn Kirisitira; dɩ mɛ̃ wa fɩɩl tɩbɩla jɔɔ. 6Na nɩɛrɛ ko thɩmɩasɔ, na nɩɛrɛ wa‐n mɩɩ aa, kʋʋr na hale. A nɩ jɩ, na‐n do maar n fʋ naˈ, gɩdonɩ dɔ gele n kɔɔ dã, sɩ ga do gɛr na dʋɔn thɩ pɩ paar paˈ. 7Ʋ̃ ca na ɩɩrɛ a na‐n kena ʋ̃ ca, ʋ̃ fãgadaarɩ dɩ bɩɛl n ɩɩr a na‐n kena ʋ̃ fãgadaarɩ dɩ kpɩɩ. Dɩ kɔmɛ kɔ̃tɩnasɔ na thɩ jɩɩnsɔ na hale paar dɩɩdɩɩsɔ dakha. 8Sɩ gele fɛʋ bɔ gaarɛɛ fʋ pa gɩ dɩbara. 9Ɔbɔɔle tɩbɩla na fʋlɛ nɩ a na gaar nɩ bʋɔ dɩ wa kʋʋr nɛr, dɩ tibil caar fɛʋ na‐n laar nɛr, gɩ do ɩ̃ i dɔ nɔɔ.#Mat 10:22 10Dɩ mɛ̃ ga do nɛ baradaa tibil jɔjʋɔra, dɩ tɩbɩla na‐n liire khasɔ wa‐n laarna khasɔ dɩɩdɩɩ. 11Sõso bobonasɔ na ɩɩrɛ wa‐n fɩɩl tɩbɩla bərəəm. 12Dɩ gɩdonɩ puure na jɔrɛ ga‐n pɛr, ga dor nɔɔ dɩ tibil jɔjʋɔ na hana naʋ bã. 13Sɩ ʋrɛɛkɛ na yɩranɩ na dana khu paar, ɔr na ˈlɛ taarɛ.#Mat 10:22 14Sɩ dɔ wɩ mɩɩ ƴũ fãgadaar tutugo bɔ thɩmɩɩkɛ thɩɩraakɛ koo, gɩ mɩɩ ha pɛdaa tibil caarra fɛʋ. Liir dɩphã na dɔ thɩ pɩ paar mɛ̃.

Bɔ gaar kɔ̃tɩ̃daa

(Mar 13:14–23; Lu 21:20–24)

15Gɛr dɔ kɩrʋ ɔbɔɔkɛ na yɩnɩ thɩ̃ thuurnəəkɛ na kʋɛanɩ thɩ̃ɛ, kɛ Thãgbaa bobon Danɩɛl kɔɔ mɩɩnɩ dɩ ga ha pa phuurə (dɔ ʋrɛ n hɩnɛnɩ sɛbɛɛkɛ n dʋ gar bʋrɛ),#Dan 9:27; 11:31; 12:11 16le wɩrɛ hanɩ Jude n fuo ca jala gɔ̃gʋɔna, 17dɩ ʋrɛɛkɛ na hanɩ nãsʋrɔ a na‐n gbũ cʋɔrɔ a gba thɩ̃aˈ,#Lu 17:31 18dɩ ʋrɛɛkɛ dakha na hanɩ lɔɔ, a na‐n kɛr bir a gba ɔɔ kẽkẽ kɔ̃tɩ̃ bã. 19Ga wisɔɔle, ga puurore khɛ pɛmɛdarara na wɩrɛ n mamanɩ bibɔrɔsɔ. 20Na‐n bɩɛlnɛ Thãgba dɩ anɩ fuu bɔɔle na‐n do yʋʋrɔaˈ, agɩbo hɩɩr wirəˈ. 21Gɩdonɩ bɔ gaarɛɛle na kɔ̃tɩnɛ na ka, bɔ gaar caa thale na kɔɔ hale kpɩɩrakɛ a fʋna bɔɔkɛ Thãgba tini thɩ̃ɛ dɩɩ ba dana nɛnɛ̃kaˈ, dɩ ga bir na halerakɛ kpɩɩ bã.#Dan 12:1; Nɩr 7:14 22Ado wiresɔɔle na kɔɔ tɔ a gburoəˈ, tibil bɩɛllakɛ na mar na ta ga, sɩ wɩrɛ Thãgba phiirni dɔ kɩrʋ da tɔ wiresɔɔle dɩ ga gburo. 23Dɩ dabɔɔle ado tibil na so nar nayɩ: Nɩ hɩnɛ, Kirisiti har kɩɛr agɩbo a ha pal, na‐n pɛr haaraˈ. 24Gɩdonɩ wɩrɛ n sõsonenɩ dɩ wɩ yɩ, Kirisiti ha nɩ, agɩbo bobona ha nɩ, na ɩɩrɛ wa‐n nɩna tɩbɩla nɔ kpaa thɩ̃ kɔ̃tɩnasɔ na ma kʋ thɩ̃ɛsɔ, wa‐n fɩɩlnanakɛ tɩbɩlaakɛ Thãgba kɔɔ phiirni, adora hʋɛ hale. 25Dɩ gɛr gɩ dɩ ɩ̃ kɔɔ mãa dɩ ma‐n so nar gɩrɛ. 26Ado wɩ so nar ayɩ: Bəənnə a ha, na‐n jalaa dɛ, agɩbo: Du bɩnɔ a ha, na‐n pɛ gɩ haaraˈ.#Lu 17:23–24 27Gɩdonɩ mɔ̃kɛ thãgba n lenɩ dɔɔ wi phã paar dɩɩ carbara a ka a dã wi lõ paar, thale mɛr tibili Bikuuni bir ɩ̃ na ha. 28Kãkɛ thɩ̃ khire hanɩ, le dũusɔ na caan kha.#Lu 17:37

Tibili Bikuuni bir ɩ̃

(Mar 13:24–27; Lu 21:25–28)

29Ga bɔɔlera, a bɔ gaarɛ ka na pɩ, dapaara wire na birəre, por dakha na hɩrɛ bã, ƴepələ̃be na ther thãgbara ƴũ ga‐n jɛ thɩɩra, dɩ gɩrɛ dɔnɩ fãgaakɛ hanɩ thãgbara ƴũ ga gbugbuyore.#Eja 13:10; 34:4; Eje 32:7; Jow 2:10, 31; 3:15; Nɩr 6:12–13 30Liir dɩphã wa yɩ mɛr tibili Bikuuni jẽ dɩ ga yɩr thãgbara ƴũ, dɩ tibil caar fɛʋ thɩɩraakɛ na‐n bɩrɛ, gɩdonɩ wa yɩrɛ mɛr tibili Bikuun ma‐n ɩ̃ na ndɔlɔ̃pana na fãga, na carbararɛ jɔɔ.#Dan 7:13; Jak 12:10–14; Nɩr 1:7 31Dɩ ma thʋɔn ɩ̃ thɔ̃thɔ̃daar thusɔ wa‐n ʋ̃ tutuu kɔ̃tɩ̃ɩ, sɩ wɩ kpa wɩrɛ Thãgba phiirni, kɛ hanɩ kɩrrɔ, na gananɔ, na gɛla yenyɔra fɛʋ, wɩ jɛ pa bɩɛl gɩ fʋna ka thãgbara ƴũ khuni gɩ dana ʋ̃ khu pa.

Thɩ̃ dɩɩrɛ thɩrʋraakɛ dɔnɩ thɩr khonanɛ

(Mar 13:28–31; Lu 21:29–33)

32Sɩ nɩ dɔ sokpaa thɩr khonanɛdara n dɩɩr nɩ thɩ̃ɛ. Ɔbɔɔkɛ nɩ yɩnɩ ɔɔ jɛ̃sɔ dɩɩ ɓol a na thɔɔ fa ƴolo, nɩ jɩrɛ dɩ ubulo n wɩla. 33Mɛ̃ gɩ, nɛrɛ dakha, ado na yɩ thɩ̃ɛsɔɔle fɛʋ, nɩ jɛ dɩ mɛr tibili Bikuuni ɩ̃ bɔ n daan, dɩ mɩ har lõfonɔɔ. 34Sobɔr mɩ so nar, nĩdaraakɛ na khiir koo, sɩ thɩ̃ɛsɔɔkɛ fɛʋ n dã ga. 35Thãgbara ƴũ na thɩɩ na phor na ka, sɩ ɩ̃ thɩmɩɩsɔ na pho na ka kpɩɩrakaˈ.

Thãgba dɩbara jɩɛn pɩpɩɩ wire

(Mar 13:32–37; Lu 17:26–30, 34–36)

36Sɩ ado wi jɩɩrra gɩ, na bɔɔkɛ ga thɩ̃ɩkɛ na danɩ, tibil bɩɛllakɛ na jɩ ga, thɔ̃thɔ̃daar thusɔrakɛ le Thãgbaa dʋɔ wa jaˈ, Bikuunnakɛ na jaˈ, sɩ Thɩrɛ dɩbara jɩɛn gɩ. 37Mɔ̃kɛ thɩ̃ɛ kɔɔ hanɩ Noee bɔɔ, mɛna ga ha tibili Bikuuni ɩna.#Jən 6:5–8 38Gɩdonɩ wiresɔɔkɛ kɔɔ kanɩ, sɩ thɩ̃ kʋɛ nyʋɔnɩle na‐n kpaan, tɩbɩla n kɔɔ khor dɩkɔ, dɩ wa‐n yɔna, dɩ wa‐n hena kha, dɩ wa‐n ˈlaana awɩ bisɔ herra, phaphapha dɩɩ ba dana wireekɛ Noe kɔɔ lonɩ batora. 39Sɩrakɛ wa‐n kɔɔ dɛna dɩkha ga, foo dɩ nyʋɔn phã a gbʋma wɩ dɩ wɩ khiir fɛʋ. Ɔmɛna ga ha tibili Bikuuni ɩna.#Jən 7:6–24 40Ga wiile kona yenyɔɔkɛ na hanɩ lɛ bɩɛlla, Thãgba na gbaar bɩɛl sɩ na faa bɩɛl. 41Dɩ khɛra yenyɔɔkɛ na hanɩ kha jʋ nã paar, Thãgba na gbaar bɩɛl sɩ na faa bɩɛl. 42Gɛr gɩ a nɩ jɩ na‐n jʋrɛ, gɩdonɩ na jɩ wireekɛ anɩ Kɔ̃tɩ̃ na ɩnaˈ. 43Nɩ jɩɛ jɩ gɩrɛɛkɛ bɔɔbɔɔ, ado cɔdaar kuun jɩrɛ bɔ dɔɔkɛ yu na pɔnɩ ɔɔ cɔ dɩtɩnɔ, a na‐n bɛrɛ a na sɩɩraa a lʋʋn cʋɔrɔaˈ.#Lu 12:39–40 44Gɛr gɩ nɛrɛ dakha, nɩ gbɛbɩrɛ pɛ, gɩdonɩ mɛr tibili Bikuun na bire na ɩ̃ bɔɔkɛ na kpɩɛrna mɩnaˈ.

Thɔ̃daar bʋɔ na thɔ̃daar puu

(Lu 12:41–48)

45Ʋmɔ̃ dɔ sobɔ cʋʋ thɔ̃daar, kɛ kpɛsɛnɛnɩ, dɩ ɔɔ kɔ̃tɩ̃ na pɛr a na‐n hɩnɛ ɔɔ cɔdara a na hana wɩ dɩkɔ bɔɔkɛ gɩ teenɩ kha? 46Ga dar thɔ̃daar ca olela, ɔɔ kɔ̃tɩ̃ na‐n danɩ a yɩɩ a na‐n cʋʋ mɛ̃. 47Sobɔr mɩ so nar, ɔɔ kɔ̃tɩ̃ na jɩɛ cʋgʋʋ a do ɔɔ thɩ̃sɔ fɛʋʋ hɩɩndaar. 48Sɩ ado thɔ̃daar puu gɩ, a na sor ɔɔbarara nayɩ: Ɩ̃ kɔ̃tɩna n pʋɔrɛ ɩɩnna kpɛ; 49dɩ ado a mar da‐n bɩɩr ɔɔ ˈwalãkhasɔɔkɛ a‐n donanɩ kha thɔma, dɩ khona da‐n yɔna nakha ta ˈlaardara. 50Thɔ̃daar ca olee kɔ̃tɩ̃ na phurore, dawiikɛ aa‐n pɩɛrʋʋnaˈ, na bɔɔraakɛ aa kpɩɛrnanaˈ; 51dɩ a na cɩɩrɛ yɩra yɩra, sɩ na gbaa na pɛ wɩrɛraakɛ dɔnɩ bɩnɛ yenyɔdara, paarɩkɛra wa bɩnɩ wa‐n yɩrna nyɩma.

Currently Selected:

Matiə 24: LOBIRI

Highlight

Copy