Matiə 12

Jeju na hɩɩr wi thɩmɩɩr

(Mar 2:23–28; Lu 6:1–5)

1Ga bɔɔlera Jeju n kɔɔ ka a lõ jʋ lɩɛra hɩɩr wire. Dɩ kɔmɛr kɔɔ fʋrɛ ɔɔ kpãkpãadara, dɩ wɩ mar a ˈlaa kha jɔ dɩ wa‐n kho.#Dət 23:25 2Dɩ mɔ̃ jɔfʋ bʋ dʋdarasɔ yɩ gɩnɩ, wɩ sʋʋraarɛ ayɩ: Hɩnɛ, afɩ kpãkpãadara n cʋʋrɛ gɩrɛ jɔfʋ yɩnɩ gɩ‐n sãsɩrɛ hɩɩr wire. 3Dɩ Jeju birse wi: Na kɔɔ yɩɛ Thãgbaa sɛbɛra gɩrɛɛkɛ Davɩdɩ kɔɔ cʋʋnɩ, ɔbɔɔkɛ kɔmɛr kɔɔ fʋʋnɩ ɔr na wɩrɛɛkɛ a kɔɔ hananɩ kha gaa?#12:3–4; 1 Sam 21:1–6 #Lev 24:9 4Mee a kɔɔ lʋʋn Thãgba fʋɔr cʋɔrɔ a gba buruukɛ wɩ‐n hanɩ Thãgba dɩ wɩ kho, sɩrakɛ ɔɔ thɛthɛ na tɩbɩlaale a kɔɔ hananɩ kha na kɔɔ hana hʋɛ a na kho ga, Thãgbaa gbõdara dɩbaraada gɩ. 5Dɩ na ba yɩ gɩ jɔfʋ sɛbɛra wo, mɔ̃kɛ Thãgbaa gbõdara n cʋʋnɩ Thãgba fʋɔr cʋɔrɔ gɩrɛ dɩ wa‐n kʋɛ hɩɩr wire, sɩ wa‐n ˈlɛ soraa gaa?#Ther 28:9–10 6Dɩ mɩ ka so narɛ ʋkhaakɛ kɔ̃tɩnanɩ a jɔ Thãgba fʋɔr cʋɔr hakɛ. 7Ado nɩ kɔɔ jɩrɛ thɩmɩɩrɩkɛɛ kɩr, kɛ sɔnɩ Thãgbaa sɛbɛra ayɩ: “Bɔ donanɛ mɛr Thãgba n ƴaal, ga do bonɩ jir ga” na kɔɔ heen wɩrɛ na hananɩ dɩa soraˈ.#Mat 9:13; Oje 6:6 8Gɩdonɩ mɛr tibili Bikuun dʋɔn Kɔ̃tɩn hɩɩr wirerarakɛ.

Kuunikɛ nyɔ̃ɔ khini

(Mar 3:1–6; Lu 6:6–11)

9Sɩ Jeju ther le a gba jal lõ awɩ Thãgba fʋɔr cɔra. 10Dɩ le a yɩ kũu bɩɛlɩkɛ nyɔ̃ɔ khini. Sɩ gɩdonɩ wɩ‐n ƴaalɛ hʋɛ wɩ pɛr Jeju sor, wɩ buleele ayɩ: Hɩɩr wire teenanɛ kho kpɛɛrɛ ya? 11Dɩ a birse wer: Ʋmɔ̃ɔ tibil nɛrɛra, ado a hana bana bɩɛl ˈlẽˈlẽˈlẽ dɩ ji kõkorro hɩɩr wire, a na halʋʋ na təə?#Lu 14:5 12Dɩ tibil na khɩɩr the nʋɔ a jɔ banaa fiiəə? Dɩ gɛr gɩ hɩɩr wire teena bɔ cʋʋrɛ. 13Dɩ le a so kuunnaale ayɩ: ˈLaanɛ afɩ nyɔ̃, dɩ ˈlaa dɩɩ do gɩ kpɛɛrɛ a ha mɔ̃ ʋ̃ nyɔ̃ hanɩ. 14Dɩ jɔfʋ bʋ dʋdarasɔ ther dɩ wa‐n gʋʋr kha mɔ̃ wa fʋnɩ sɩ na kʋ Jeju.

Jeju Thãgbaa thɔ̃daar

15Dɩ Jeju nɩɛrɛ gele a faa paarɩle sa the. Dɩ tibil jɔjʋɔ kɔɔ kpaaraarɛ, dɩ a kpɛɛrɛ khodara fɛʋ; 16sɩ a‐n kpãkpãa warɛ dɩɩ khɩɩr ka ayɩ, wa‐n so ntɛ ɩnɩ donaˈ. 17Gɩ do mɛ̃ thɩmɩɩrɩkɛ Ejaɩ kɔɔ mɩɩnɩ dã oti:

18“Hɩnɛ, ɔr dʋɔn thɔ̃daarɩkɛ mɛr Thãgba phiirni,

ʋrɛ mɩ‐n nanɩ gɩ, a lõ mer haar kpɛ.

Ma pɩɛraarɛ ɩ̃ Thu,

dɩ a na mɩɩrɛ fɩl sarʋ tibil caar fɛʋra.#Eja 42:1–4

19A na bana thɩ̃ banaa ga, a na hulə̃ˈ,

dɩ tibil bɩɛl na nɩ ɔɔ nɔ dɩ bɩnɔ dakha ga.

20A na kha jʋmũukɛ hanɩ kpɛlɛ kpɛlɛ na fa ga.

A na khiir dakha lãphã pɔ̃ɔkɛ n dɔnɩnakɛ isi haaraˈ,

phaphapha a cʋʋ fɩl sarʋ gɩ kəə.

21Dɩ ɔr tibil caar fɛʋ na‐n pɛ nũu.”

Mɔ̃ jɔfʋ bʋ dʋdara yɩnɩ Bɛljɛbul hana Jeju fãga

(Mar 3:22–30; Lu 11:14–23)

22Le wɩ kpa kuunikɛ kɔ̃tɛɛbuu cʋʋnɩ dɩ do nɔ madaar a yaarna a pɔna Jejura, dɩ wee kɔ̃tɛɛbuu a faa, dɩ nɔ madaarɩle mɩɩrɛ nʋɔ da‐n yɩna dɩphã. 23Dɩ nʋɔ kpaarɛ tibil jɔɔle fɛʋ dɩ wa‐n so: Dɩ ɔr ba dɔ Davɩdɩɩ Bikuunna yaa? 24Dɩ ɔbɔɔkɛ jɔfʋ bʋ dʋdara nɩɛnɩ gele, wɩ sor ayɩ: Kuunikɛ na‐n wee kɔ̃tɛɛbiisɔ saagado na Bɛljɛbulikɛ dɔnɩ yʋʋ kɔ̃tɛɛbiisɔraa fãga gaaga.#Mat 9:34; 10:25 25Mɔ̃ Jeju jɩnɩ awɩ kpɩɛr, a so warɛ: Fãgadaar dɩ wo fãgadaar dɩɩkɛ n tɩnɛnɛnɩ a bir da‐n kena dɩbara, a na wɩɛlɛ; dɩ dɩɩ wo dɩɩkɛ agɩbo, cʋɔr wo cʋɔrɩkɛ tɩnɛnɛnɩ a bir da‐n kena dɩbara, ga puno na jɩɩlaˈ. 26Dɩ ado Satã na wee Satã, a tɩnɛ a bir da‐n kena dɩbara, mɔ̃ ɔɔ fãgadaar dɩ na fʋ sɩ na jɩɩl? 27Dɩ ado mɛrɛ Bɛljɛbuli fãga mɩ‐n gba dɩ ma‐n weena kɔ̃tɛɛbiisɔ, sɩ anɩ bɩsãsɔ amɛɛ i wɩ‐n gba dɩ wa‐n weena wɩ? Dɩ gɛr gɩ anɩ thɛthɛɛ bɩsãsɔra na dʋɔn anɩ so kɩɩldara. 28Dɩ ado mɛrɛ, Thãgbaa Thu mɩ‐n gba dɩ ma‐n weena kɔ̃tɛɛbiisɔ, ga dor Thãgbaa fãgadaar do dã nɛr mɛ̃ dɩphã. 29Mɔ̃ tibil na fʋ sɩ na lõ na fãga kũu khɩɩ cɔ na taaraa thɩ̃ɛsɔ, saagado kũu khɩɩlera a kɔɔ fʋ ɓo a lə? Ado a punoo ɓo dɩphã, gɛr a na taaraa thɩ̃ɛ fɛʋ cʋɔrɔ. 30Ʋrɛ na‐n hanɩ kha na mɛrɛaˈ, ɩ̃da a‐n bo, dɩ wo ʋrɛ na‐n bulo mini sɩ kpa ga, ɔr n bɩ̃bɩlanɛ gɩ.#Mar 9:40

Sopugo cʋʋrɛ Thu Phuurə

31Gɛr gɩ dɩ ɩ̃ so nar ayɩwɔɔ: Thãgba na faarɛ sopugo caar dɩɩdɩɩ fɛʋ na i kʋɛ caar dɩɩdɩɩ fɛʋʋkɛ tɩbɩla n cʋʋnɩ a na‐n ha wɩ, sɩ ʋrɛ na kʋɛanɩ Thu Phuu i, Thãgba na faa ga sopugo caale kpɩɩrakaˈ. 32Dɩ tibil wo tibilikɛ na mɩanɩ thɩmɩɩ puu na pɛ mɛr tibili Bikuunna, Thãgba na faarɛ ga sopugo caale na haa, sɩ tibil wo tibilikɛ na mɩanɩ thɩmɩɩ puu na pɛ Thu Phuurə, Thãgba na faa ga sopugo caale kpɩɩrakɛ na haa, dɩ nɛnɛ̃ bɔɔkɛ gɩ, dɩ bɔɔraakɛ na ɩnanɩ ga.#Lu 12:10

Haarra thɩmɩa fɛʋ n the

(Lu 6:43–45)

33A nɩ‐n kpɩɛrɛ thɩrʋ bɔrɛ, oti ɔɔ bi n bɔr. A nɩ‐n kpɩɛrɛ thɩrʋ puurore, oti ɔɔ bi n puuro. Gɩdonɩ be wɩ‐n jɩna thɩrʋ.#Mat 7:20; Lu 6:44 34Nɛr sikori bisɔ, mɔ̃ ner na kɔɔ punona na mɩɩ thɩmɩɩ bʋɔ, puu ca ʋrɛ nɩ thʋnɩ puuro? Gɩdonɩ gɩrɛ henɩ bɩnɔ, gɛr nʋɔ n mɩɩ.#Mat 3:7; 23:33; 15:18; Lu 3:7; 6:45 35Tɩɩ bʋɔ n tire dabʋɔ ɔɔ thɩ̃ bɔra. Dɩ tɩɩ puu n tire dapuu ɔɔ thɩ̃ puurə. 36Mɩ so narɛ, wireekɛ Thãgba na kɩɩlnanɩ tɩbɩla, thɩmɩɩ mɔlɔsɔɔkɛ tɩbɩla kɔɔ mɩɩnɩ wa ther ger fɛʋ na ha wɩ. 37Gɩdonɩ afɩ thɩmɩɩ na cʋɛ sor dɩ ga hɛl far, dɩ afɩ thɩmɩɩ na cʋɛ wo dɩ sor na heen fɩ.

Kɩɛr jɔfʋ bʋ dʋdara n ƴaal nɔ kpaa thɩ̃ɛ Jejura

(Mar 8:11–12; Lu 11:29–32)

38Le ɩkhaa jɔfʋ dɩɩrdara na jɔfʋ bʋ dʋdarasɔ hana thɩmɩɩr a so Jejura ayɩwɔɔ: Dɩɩrdaar, sɩ‐n ƴaalɛ fɩ cʋɛ nɔ kpaa thɩ̃ bɩɛl sɩ yɩ gɩ.#Mat 16:1; Mar 8:11; Lu 11:16 39Dɩ birse wi: Nĩdaraakɛ puuroni thakɛ, kɛ faanɩ awɩ Thãgba, n ƴaalɛlakɛ nɔ kpaa thɩ̃ɛ, sɩ nɔ kpaa thɩ̃ kpɩɩ na bir na yɩ saagado Jonasɩ Thãgbaa bobonɩda gaaga.#Mat 16:4; Mar 8:12 40Gɩdonɩ mɔ̃ Jonasɩ kɔɔ cʋʋnɩ wire yẽther na dɩtɩnɛ yẽther thʋ̃ kɔ̃tɩ̃ bɩnɔ, ɔmɛ̃ mɛr tibili Bikuun na cʋʋ wire yẽther na dɩtɩnɛ yẽther thɩɩkɛɛ bɩnɔ.#Jon 2:1 41Wireekɛ Thãgba na kɩɩlnanɩ tɩbɩla, Nɩnɩvɩdara na ɩɩrɛ na the khirera nakha nĩdaraakɛ, dɩ wɛr na heene wɩ sor, gɩdonɩ wɩ kɔɔ debire haar ɔbɔɔkɛ Jonasɩ kɔɔ mɩɩ wɩnɩ Thãgbaa thɩmɩɩ. Sɩ nɩ ka hɩnɛ ʋkhaakɛ kɔ̃tɩnanɩ a jɔ Jonasɩ hakɛ.#Jon 3:5 42Wireekɛ Thãgba na kɩɩlnanɩ tɩbɩla, khɛr fãgadaarɩkɛ kɔɔ hanɩ wi phã paar nyɔ̃bɩlana na ɩɩrɛ na the khirera nakha nĩdaraakɛ, dɩ ɔr na heene wɩ sor. Gɩdonɩ ɔr, thɩ khu paar a kɔɔ the a pɔ a pɛ Salomɔ̃ɔ kpɛsɛ nũu. Sɩ nɩ ka hɩnɛ ʋkhaakɛ kɔ̃tɩnanɩ a jɔ Salomɔ̃ hakɛ.#1 Fãg 10:1–10; 2 Kur 9:1–12

Kɔ̃tɛɛbu hɔ̃hɔlɩkɛ n ƴaalɛnɩ a kɛr a bir

(Lu 11:24–26)

43Ɔbɔɔkɛ kɔ̃tɛɛbu hɔ̃hɔl n thenɩ tibillə, a‐n jaal da‐n kpaar bə̃ kparaara, da‐n ƴaal kãkɛ a na toonɩ na hɩɩr, sɩ aa‐n yɩ gɩ kpɩɩaˈ. 44Agɩpɩ a‐n sor dɩ yɩ: Ma kɛrrɛ na bir ɩ̃ cɔ kãkɛ mɩ kɔɔ thenɩ. Ado a pɔ dã a yɩ cʋɔrɩle dɩɩ do dakhɩɩ, dɩ wɩ kpabɩ sa gbɛbɩ thɩ̃ɛ fɛʋ bɔɔbɔɔ, 45le a‐n jal dɩphã mɛ̃ dɩ kpa kɔ̃tɛɛbi kpɩɩsɔ wo makonyɔɔkɛ n hʋɔlɛnɩ dɩ wɩ jʋɔ, dɩ wɩ pɔ a lõ a too le. Dɩ mɔ̃ ga hanɩ tibilləəle pɩpɩɩ paar, ga ka na puurore na jɔ caca fʋ paar. Mɛ̃ ga ha gɩrɛ na nĩda puu ca ƴɩrɛ.

Jejuu õkũu bɩnɔsɔ pɔr na ɔɔ nɩ

(Mar 3:31–35; Lu 8:19–21)

46Mɔ̃ Jeju hanɩ da‐n mɩɩna tibil jɔɔle, ɔɔ nɩ na ɔɔ õkũu bɩnɔsɔ pɔr a jɩɩl phiilo, dɩ wa‐n ƴaal wɩ mɩɩnaa. 47Dɩ ʋkha sʋʋraa: Hɩnɛ, afɩ nɩ na afɩ õkũu bɩnɔsɔ hale phiilo a ƴaal wɩ mɩɩna fɩ. 48Dɩ Jeju birsee ayɩ: Amɛ n dʋɔn ɩ̃ nɩ, na ɩ̃ õkona, na ɩ̃ õkhɛrsɔ? 49Agɩpɩ dɩ ˈlaa nyɔ̃ɔ ɔɔ kpãkpãadarasɔra sa so: Nɩ yɛ kɛ ɩ̃ nɩ na ɩ̃ õkona. 50Gɩdonɩ tibil wo tibilikɛ n cʋɛnɩ ɩ̃ Thɩɩkɛ hanɩle ƴũu tuur, ɔr dʋɔn ɩ̃ õkuun, na ɩ̃ õkhɛr, na ɩ̃ nɩ.

Currently Selected:

Matiə 12: LOBIRI

Highlight

Copy