Luki 6:27-49

Sɩ mɩ so narɛ nɛrɛɛkɛ n pɛ mɩnɩ nũu: Na‐n na anɩ lãlaardara, na‐n cʋɛ wɩrɛ n laarɛ nɩnɩ bɔɔ. Na‐n bɔna wɩrɛɛkɛ n sɔna nɩnɩ, na‐n bɩɛlnɛ Thãgba a na pɛ wɩrɛraakɛ n hʋɔlɛ narnɩ. A tibil ɓa fɩ gbʋa bɩɛl, fe gbʋa kpɩɩ a hanaa dakha. Dɩ a tibil gbaan afɩ darã, sɩɛraa a gba afɩ kẽkẽ gburo dakha wo. Tibil wo tibilikɛ n bɩɛlnɛ farnɩ thɩ̃ɛ, hanaa, dɩ tibilikɛ gbaan fɩnɩ thɩ̃ɛ, fa‐n lʋʋraˈ. Gɩrɛɛkɛ nɩ‐n ƴaalnɩ tɩbɩla na‐n cʋɛ nar, na‐n cʋɛ ɔmɛ̃ wɛrra dakha. A na na wɩrɛɛkɛ n naan nɩnɩ, anye dɔ gɩrɛ teronɩ a ha kpɩɩ? Gɩdonɩ sopugodara dakha wɩ‐n nar wɩrɛɛkɛ n naan wɩnɩ. Dɩ a na cʋʋ bɔɔ wɛkɛra n cʋɛ nɩnɩ bɔɔ, anye dɔ gɩrɛ teronɩ a ha kpɩɩ? Gɩdonɩ sopugodara dakha thalera wɩ‐n cʋʋ. Dɩ a wɩrɛɛkɛ nɩ‐n pɛrnɩ haar wa yɩ gɛr na ha nɩ nɩ‐n pemi thɩ̃ɛ, anye dɔ gɩrɛ teronɩ a ha kpɩɩ? Gɩdonɩ sopugodara dakha wɩ‐n pemine kha awɩ ha, sɩ wa‐n kpɩɛrna mɔ̃ wa birni na ˈlɛ oti. Sɩ na‐n na anɩ lãlaardara, na‐n cʋɛ bɔɔ, na‐n pema tɩbɩla sɩ na‐n kpɩɛr nɩ birə ˈlɛrɔ dɩkha ga. Dɩ mɛ̃ na ˈlɛ khaarda kɔ̃tɩ̃ɩ, dɩ na dor dakha Kəkəədaarɩ bɩsãsɔ, gɩdonɩ a bɔrɛ tɩɩ kʋɛara na tɩɩ puusɔra. Gɛr gɩ nɩ dɔ bɔ jɩ tɩbɩla, mɔ̃ anɩ Thɩ donɩ bɔ jɩdaar. Na‐n fi do kɩɩldara ga, dɩ mɛ̃ Thãgba na do nar Kɩɩldaaraˈ. Na‐n heen tibil soraˈ, dɩ mɛ̃ na ˈlɛ so heene dakha ga. Na‐n faa tɩbɩlaa dɩ pa a na hana wɩ, dɩ mɛ̃ Thãgba na faa anɩ dɩ pa a na ha nɩ dakha. Na‐n ˈlaanɛ, dɩ mɛ̃ Thãgba na ˈlaa a na ha nɩ dakha. Ga dor mɩɛda bʋɔɔkɛ wa ɩɩnɩ a na yɛyɛɛ gɩ hi ga‐n jal wɩ ha nɩ. Gɩdonɩ mɩɛda ca ʋrɛɛkɛ nɩ‐n kɔɔ mɩɛnanɩ thɩ̃ɛ, ɔrra Thãgba na mɩɛna a na ha nɩ oti. Dɩ Jeju so warɛ sokpaa wo ayɩ: Yaarʋ na punone na thɔɔ yaarʋ ya? Mee wɛr yenyɔ fɛʋ na jiire kõkorro. Kpãkpãadaar na hale a na kɔ̃tɩ̃ na jɔ ʋrɛ n dɩrɛɛnaˈ, sɩ ɔbɔɔkɛ a na dɩɩrnɩ na pɩ, a na har mɔ̃kɛ ʋrɛ dɩrɛɛnɩ hanɩ. Mɔ̃gɩdo dɩ fɩ ka gar yire hɔ̃ phɩɩnaakɛ hanɩ afɩ omii yiro, sɩ fa‐n ka dɩ fɩ hɩɩn kparrɛɛkɛ hanɩ afɩ thɛthɛɛ yiroə? Dɩ mɔ̃ fa fʋ sɩ na so afɩ omina nayɩ: Ɩ̃ omi, jɩlɛ ɩ̃ ti hɔ̃ phɩ̃ɩkɛ ha fɩnɩ yiro, fɛrɛɛkɛ na yɛnɩ kparrɛɛkɛ hanɩ afɩ yiroə? Fɛr bɩnɛ yenyɔdaar, te kparrɛɛkɛ hanɩ afɩ yiro ɓo, le fa jɩɩ yɩ hɔ̃ phɩ̃ɩkɛ hanɩ afɩ omii yiro a na ti. Thɩr bʋɔ na puno na se bi puəˈ. Dɩ thɩrʋʋkɛ na bʋɔnɔnaˈ na puno na se bi bʋɔ dakha ga. Gɩdonɩ be wɩ‐n jɩna thɩra fɛʋ bɩɛlbɩɛl. Sobɔr gɩ, wa‐n yɛɛ bara usɩɛra ga, dɩ wa‐n khʋ̃ ɓãɓar be paabɩrʋra dakha ga. Tɩɩ bʋɔ n tire dabʋɔɔkɛ hanɩ ɔɔ hara dɩ thena, sɩ tɩɩ puu n tire dapuukɛ hanɩ ɔɔ hara dɩ thena. Gɩdonɩ gɩrɛ n henɩ haarra, gɛr n thɛ nɔɔ. Mɔ̃gɩdo dɩ na‐n we mɩ Kɔ̃tɩn, Kɔ̃tɩn, sɩ na‐n cʋʋ gɩrɛ mɩ‐n so narnaˈ. Tibil wo tibilikɛ ɩna marnɩ da‐n nɩɛ ɩ̃ thɩmɩɩ dɩ gbuuro yʋʋ da‐n cʋʋ, ma nɩ narɛ ntɛɛkɛ a honɩ. A hʋrɛ tibilikɛ n mɛnɩ cʋɔr, a kpe koru dɩɩ hulono dɩ kpɛɛrɔ go kʋʋ boka nã thɛrɛɛra. Dɩ ɔbɔɔkɛ nyʋɔn phanɩ, dɩ poo be dɩ a‐n cɩr cʋɔrɩle, sɩ ga puno cʋʋ thɩ̃aˈ, gɩdonɩ kuunile mɩɩrɛ dɩɩ bɔr. Sɩ ʋrɛɛkɛ n nɩɛnɛnɩ sɩ aa‐n cʋaˈ, a hʋrɛ tibilikɛ thɛnɩ cʋɔr thɩ bʋraara, sɩ aa kpe koru a kpɛɛrɔ go kʋaˈ. Dɩ ɔbɔɔkɛ poo benɩ dɩ a‐n cɩr cʋɔrɩle, dɩɩ do dapaara gɩ derre, dɩ cʋɔrɩle jire ji puure.