Luki 13

Ha debire agɩbo so heene

1Ga bɔraalera wɩ̃ tibilsɔ kɔɔ pɔr a mɩɩ Jeju gɩrɛɛkɛ kɔɔ dananɩ Galiledaraakɛ Pɩlatɩ kɔɔ kʋʋrnɩ, ɔbɔɔkɛ wɩ hanɩ bonɩ jiro. 2Dɩ Jeju birse wi: Nɩ‐n kpɩɛrɛ dɩ Galileda wele kɔɔ dʋɔn sopugodara a jɔ wɩ̃ Galiledarasɔ fɛʋ, gɩdonɩ wɩ kɔɔ gaarɛ bʋɔ thalaa bɛ? 3Ə̃ˈə̃ mɩ so narɛ, ga do mɛ̃ ga; nɛrɛ dakha ado na debi haaraˈ, mɛna na khiir fɛʋ. 4Dɩ agɩbo tɩbɩla yʋɔr makõtherɩkɛ cɔ gbãakɛ hanɩ Siloe kɔɔ jironi a kʋʋr, nɩ‐n kpɩɛrɛ dɩ wɛr kɔɔ dʋɔn sopugodara a jɔ Jerujalɛmdara fɛʋaa bɛ? 5Ə̃ˈə̃, mɩ so narɛ, ga do mɛ̃ ga; nɛrɛ dakha, ado na debi haaraˈ, mɛna na khiir fɛʋ.

Sokpaa thɩrʋraakɛ bɔnɩ bi sɩɩr

6Dɩ Jeju so warɛ sokpaakɛ ayɩ: Kũu bɩɛl gɩ, a kɔɔ hana thɩrʋ ɔɔ lɔɔ. Ɔbɔɔkɛ se bɔɔ danɩ, a pɔr a khʋ̃, aa yɩɩraa thɩ̃aˈ. 7Dɩ a sor ɔɔ lɛ hɩɩndaarra: Hɩnɛ, yɛna yẽther ha gɩrɛ mɩ ɩnɩ kɛ a ƴaal ɩ̃ khʋ̃ be, sɩ ma yɩ thɩ̃aˈ. Kuro kpɛa. Anye a na harɔ kɛ a na‐n kʋɛ thɩɩ mɔlɔ? 8Dɩ ɔɔ lɛ hɩɩndaar birsee: Kɔ̃tɩn, sɩɛraa dɛʋʋkɛ wo, ɩ̃ cɩɩn ɩ̃ finə sɩ ɩ̃ pɛr beethɩn; 9agakpaana a na ser na yɩɛrɩkɛ na ɩnanɩ, sɩ ado aa saˈ, fɩ kur dɩphã fɩ kpɛɛ.

Khɛ bɩɛlɩkɛ Jeju kpɛɛnɩ hɩɩr wire

10Hɩɩr wi bɩɛl, Jeju kɔɔ hale Juifisɔɔ Thãgba fʋɔr cɔ bɩɛlla da‐n dɩɩr tɩbɩla. 11Dɩ hɩnɛ, khɛ bɩɛl gɩ, a halera dɩ kɔ̃tɛɛbuu hanaa a pɩɛraa taan kɛkɛkɛ, dɩ cʋʋna yɛna yʋɔr makõther. A khar, aa kɔɔ puno na ˈlamɩsɛ kpɩɩ bã. 12Dɩ ɔbɔɔkɛ Jeju yɩɩnɩ, a wɩɩrɛ dɩ pɔ dɩ sʋʋraa ayɩ: Khɛr, fɩ ˈlɛr taarɛ afɩ tanaakɛra fɩ hananɩ. 13Agɩpɩ Jeju dɛɛnaa nyɛ̃ɛ; dɩ dapaara dɩ ˈlamɩsɛ, da‐n dʋbɩ Thãgbaa i. 14Sɩ nɩ̃khii kɔɔ fʋrɛ ʋrɛ dɔnɩ kɔ̃tɩn Juifisɔɔ Thãgba fʋɔr cɔra, gɩrɛraakɛ Jeju kpɛɛnɩ khɛrɩle hɩɩr wire. Dɩ a sor tibil jɔraale: Wire maadõ hale kɛ dʋɔnnɩ thɔ̃ do wire, gɛr gɩ nɩ ɩna wa‐n kpɛɛ nɩ khoo ga wisɔraale. Sɩ na‐n do ga‐n do hɩɩr wirəˈ.#Thɩɩ 20:9–10; Dət 5:13–14 15Dɩ Kɔ̃tɩn birsee: Nɛr bɩnɛ yenyɔdara, nɛrɛ fɛʋ bɩɛlbɩɛl na‐n khɛr anɩ nake, agɩbo anɩ kũkə̃ hɩɩr wire na barana a jalna dɩ yɔ nyʋɔnaa? 16Sɩ khɛrɩkɛ dʋɔnnɩ Abɩrahamɩ bikhɛrɩkɛ Satã kɔɔ lini ɩɩrɔ kɛkɛkɛ dɩ cʋʋna yɛna yʋɔr makõther, ga teena gɩ do hɩɩr wire mɩ thʋbʋʋ lirikɛra gaa? 17Mɔna a‐n mɩɩnɩ gele, yicuru fʋrɛ ɔɔ sodarasɔ fɛʋ, sɩ dɩ tibil jɔɔle wer na‐n kãka nɔ kpaa thɩ̃ɛsɔraakɛ fɛʋ a‐n cʋʋnɩ.

Seneve thɩr bi sokpaa

(Mat 13:31–32; Mar 4:30–32)

18Jeju bire so war wo: Anye Thãgbaa fãgadaar do hona, dɩ anye ma gba a na mɩɛna ya fɛ? 19Gɩ hʋrɛ seneve bireekɛ n hanɩ fɩɩʋ, kɛ kuun kɔɔ gbanɩ a jal ɔɔ nãkʋɔrra, dɩɩ phu a ɩɩr a do thɩrʋ, dɩ ˈlominə na‐n tɛl ɔɔ jɛ̃sɔra.

Tabɩ sokpaa

(Mat 13:33)

20A bire so war wo: Anye ma gba na mɩɛna mɔ̃ Thãgbaa fãgadaar do hanɩ ya fɛ? 21Gɩ hʋrɛ tabɩɩrɩkɛ khɛr kɔɔ gbanɩ a mʋʋ buru mɩ̃ nyɔ̃kpõ khaa yẽtherra, phaphapha dɩ buru mɩ̃ boloola fɛʋ bʋ̃.

Lõfonɔ ˈluruu

(Mat 7:13–14, 21–23)

22Dɩ Jeju kɔɔ kpaarɛ dɩ kɔ̃tɩnana na dɩ biisɔra a dɩɩr tɩbɩla da‐n jalna Jerujalɛm. 23Dɩ tibil bɩɛl bulee: Kɔ̃tɩn, sɩɩ do tɩbɩla gbe ˈlɛr taarɛ bɛ? Dɩ Jeju birse wi: 24Nɩ yɩra lonana lõfonʋɔɔkɛ ˈluruneni, gɩdonɩ mɩ so narɛ, tɩbɩla jɔɔ na ƴaalɛ wɩ lõ sɩ wa punoəˈ. 25Gɩdonɩ ɔbɔɔkɛ cɔdaar kuun na ɩɩrnɩ na khaan loo na pɩ, sɩ dɩ na pɔ na jɩɩl phiilo, le na ma na‐n be loo na‐n sona: Kɔ̃tɩn, khɛra sɩ loo. Dɩ a na birse ner: Ma jɩ kãkɛ nɩ thenaˈ. 26Dɩ mɛ̃ na ma na‐n so: Sɩ kɔɔ khor dɩ sa‐n yɔna afɩ ƴɛ thɩ̃thɩɩn, dɩ fɩ kɔɔ dɩɩr sɛr dakha asɩ dʋɔ. 27Sɩ a na birse ner nayɩ: Ma jɩ kãkɛ nɩ thenaˈ. “Nɩ tɔ jala mɩ ƴɔɔ, nɛrɛ fɛʋʋkɛ n cʋɛnɩ gɩrɛ na‐n saranaˈ.”#Khɩ 6:8 28Dɩ le na bɩ na‐n yɩrna nyɩma ɔbɔɔkɛ na yɩnɩ Abɩraham, na Ɩjakɩ, na Jakɔbɩ, na Thãgbaa bobonasɔ fɛʋ Thãgba fãgadaarɩ dɩra, sɩ dɩ wa faa ne wer phiilo.#Mat 22:13; 25:30#Mat 8:11–12 29Tɩbɩla na ther wi phã paar, na wi lõ paar, na gɛlʋ yenyɔra fɛʋ, a na too dɩko kho paar Thãgba fãgadaarɩ dɩra. 30Sɩ nɩ hɩnɛ sɩka pɩra, wɛr na fien na do ƴɛ kʋla, sɩ ƴɛ kʋla n fi wɩ do sɩka pɩra.#Mat 19:30; 20:16; Mar 10:31

Jejuu jalɩkɛ a jalnɩ Jerujalɛm

(Mat 23:37–39)

31Ga bɔɔlera ɩkhaa jɔfʋ bʋ dʋdarasɔ pɔ a so Jejura: Ɩrɛ thɛ kɩɛrra, gɩdonɩ Ɛrɔɔdɩ n ƴaalɛ a kʋ fɩ. 32Dɩ birse wi: Nɩ jala sɔ fɩfɩllaalera ayɛ: Hɩnɛ, nĩ na cʋɔ ma weere kɔ̃tɛɛbiisɔ a na kpɛɛna khodarasɔ, sɩ ɩ̃ thɔ̃ na pɩrɛ balãther wire. 33Sɩ nĩ na cʋɔ na gɩbɩ̃ɩ, gɩ teenanɛ ɩ̃ gba ɩ̃ hʋ ma‐n jal, gɩdonɩ Thãgbaa bobon na teena a khe a hʋnɔna Jerujalɛm dɩaˈ. 34Jerujalɛm, Jerujalɛm, fɛrkɛ n kʋrɛnɩ Thãgbaa bobona, dɩ fa‐n dʋʋrna wɩrɛɛkɛ Thãgba kɔɔ thɔ̃ farnɩ bokana, balamɔ̃ balamɔ̃ mɩ kɔɔ ƴaal ɩ̃ gbɛbɩra afɩ too mɔ̃kɛ yɔl nɩɩ n gbɛbɩnɩ ɔɔ bisɔ dɩ thiro gbɛla, sɩ na kɔɔ tuəˈ. 35Nɩ hɩnɛ, wa faa narɛ anɩ cɔra dɩ ga do cɔ kpoloo. Sɩ mɩ so narɛ ayɩ, na yɩ mɩ bã phaphapha gɩ dana bɔɔkɛ na sonɩ nayɩ: “Ʋrɛ n ɩnanɩ na Kɔ̃tɩnɩ i hɩna khɩɩrɛ.”#Khɩ 118:26; Jer 22:5

Currently Selected:

Luki 13: LOBIRI

Highlight

Copy