Jã 17

Jejuu pɩpɩɩ Thãgba bɩɛl

1Ɔbɔɔkɛ Jeju mɩɩnɩ thɩmɩaakɛ thale pɩ, a gbaar ƴɩɛ ƴũ sa so: Thɩrɛ, bɔɔra daan. Dʋba mɛrkɛ dɔnɩ afɩ Bikuun, dɩ mɛrkɛ dɔnɩ afɩ Bikuun n dʋbɩ afɩ i dakha, 2gɩ ha mɔna fɩ ha mɩnɩ punone tɩbɩlala fɛʋ, dɩ ma ha wɩrɛ fɛʋʋkɛ fɩ ha mɩnɩ yire khorr. 3Dɩ yire khorra dʋɔn wɔɔ, wɩ jɛ fɩ fɛrkɛ dɔnɩ Thãgba bɔ bɩɛl dɩbara ˈlẽˈlẽˈlẽ, na ʋrɛɛkɛra fɩ thɔnɩ kɛ dɔnɩ mɛr Jeju Kirisiti. 4Mɩ dʋbɩrɛ afɩ i kɛ thɩɩra, dɩ mɩ pɩrɛ thɔmaakɛra fɩ kɔɔ ha mɩnɩ ɩ̃ cʋɛ. 5Dɩ nɛnɛ̃ fɛr Thɩrɛ, cʋɛ mɩ ɩ̃ ˈlɛ i dʋbɩrɛ fɛrɛɛ thɛthɛɛ pa, kɛ dɔnɩ i dʋbɩrɛɛkɛra mɩ kɔɔ maanɩ hana afɩ pa sɩ dɩ thɩɩ na kɔɔ ti paˈ.

6Mɩ cʋʋrɛ tɩbɩlaakɛ fɩ kɔɔ phiirni tɩbɩlaa thɩ̃thɩɩn a ha mɩ dɩ wɩ jɩ afɩ i. Afɩda wɩ kɔɔ do dɩ fɩ ha mɩ, dɩ wɩ kɔɔ cʋʋrɛ afɩ so. 7Nɛnɛ̃ wɩ jɩrɛ dɩ thɩ̃ɛ fɛʋʋkɛ fɩ ha mɩnɩ, afɩ pa gɩ the. 8Gɩdonɩ mɩ mɩɩ wɛr thɩmɩaakɛ fɩ kɔɔ mɩɩ mɩnɩ dɩ wɩ kɔɔ ture, sa jɩ waa na sobɔr dɩɩ do afɩ pa mɩ the, dɩ wɩ pɛrɛ haar dakha dɩ fɛr kɔɔ thɔna mɩ. 9Wɛr dɩbara mɩ‐n bɩɛl fɩ gɩrɛ dɩ ma‐n pɛ. Ga do tɩbɩla fɛʋra mɩ‐n bɩɛl fɩ dɩ ma‐n paˈ, sɩ mɩ bɩɛl fɛr dɩ ma‐n pɛ wɩrɛra fɩ kɔɔ ha mɩnɩ, gɩdonɩ afɩda wɛ. 10Dɩ gɩrɛ fɛʋʋkɛ dɔnɩ ɩ̃da, afɩda gɩ. Dɩ gɩrɛ fɛʋʋkɛ dɔnɩ afɩda, ɩ̃da gɩ. Dɩ mɩ ˈlɛr i dʋbɩrɛ dakha dɩɩ do wɛr dɔ nɔɔ. 11Ma ha thɩɩraakɛ bã, sɩ wɛr wɩ har thɩɩra, sɩ dɩ ma‐n pɔ far gɩrɛ. Thɩ phuu, dɔ afɩ i n do nɔɔ fɩ bɛr wɩrɛɛkɛra fɩ kɔɔ ha mɩnɩ, dɩ mɛ̃ wa do bɩɛl asɩ kha. 12Ɔbɔɔkɛ mɩ kɔɔ hanɩ kha na wɛr, mɩ kɔɔ bɛrɛ afɩ irə wɩrɛɛkɛra fɩ kɔɔ ha mɩnɩ, dɩ bɩɛl wɛrra na buəˈ , bu paarɩ bikuun dɩbara gɩ, gɩ do nɔɔ gɩ ha mɔna gɩ kherenɩ Thãgbaa sɛbɛra.#Khɩ 41:9; Jã 13:18 13Sɩ nɛnɛ̃ mɩ‐n pɔ farɛ sɩ dɩ ma‐n mɩɩ thɩ̃ɛ thaa, gɩdonɩ mɩ har thɩɩra ˈlo, gɩ do nɔɔ ɩ̃ daʋ n thʋ̃ gɩ bɔ war gɩ ka. 14Mɩ kɔɔ mɩɩ wɛr afɩ so, sɩ tɩbɩla thɩɩra n laar wɛr gɩdonɩ wa do thɩɩkɛɛda ga, mɔ̃kɛ mɛrɛ ma donɩ thɩɩkɛɛda ga. 15Ma‐n bɩɛl fɩ fɩ te wɩ thɩɩraakaˈ, sɩ fa‐n bɛra wɩ puu cʋʋ hɩ̃daarra. 16Wa do thɩɩkɛɛda ga, mɔ̃kɛ mɛrɛ ma donɩ thɩɩkɛɛda ga. 17Gba sobɔr a leana wɩ kpɩɩ. Afɩ thɩmɩɩ dʋɔn sobɔr. 18Mɔ̃kɛ fɩ kɔɔ thɔ̃ mɩnɩ dɩ ɩ̃ ɩ̃ thɩɩra, mɛrɛ dakha mɩ‐n thɔ̃ wɛr ɔmɛ̃ dɩ wa jal tɩbɩlala fɛʋ thɩɩra. 19Dɩ mɛrɛɛ thɛthɛ mɩ faarɛ ɩ̃bara koo Thãgbara dɩɩ do awɩ so dɔ nɔɔ, dɩ mɛ̃ wɛr dakha na faa awɩbara koo Thãgbara gɩ do sobɔr dɔ nɔɔ.

20Ga do wɛr dɩbara mɩ bɩɛl fɩ gɩrɛ dɩ ma‐n paˈ, sɩ mɩ bɩɛl fɛr dakha dɩ ma‐n pɛ wɩrɛraakɛ awɩ thɩmɩɩ na donɩ nɔɔ wɩ pɛ mɩ haar, 21dɩ mɛ̃ wɛr fɛʋ na do bɩɛl, mɔ̃kɛ fɛr Thɩrɛ hanɩ gɩrɛ ɩ̃ bɩnɔ dɩ ɩ̃ ha afɩ bɩnɔ, wɛr dakha n ha asɩ bɩnɔ, dɩ mɛ̃ tɩbɩla fɛʋ thɩɩra na jɩ dɩ fɛr kɔɔ thɔna mɩ. 22Dɩ mɩ kɔɔ cʋʋ wɛr dɩ wɩ jɩ i dʋbɩrɛɛkɛ fɩ kɔɔ ha mɩnɩ, dɩ mɛ̃ wa do bɩɛl mɔ̃kɛ sɩ donɩ bɩɛl, 23mɛrɛ awɩ bɩnɔ, sɩ fɛrɛ ɩ̃ bɩnɔ, dɩ mɛ̃ wa jɩɩ do bɩɛl bɔɔbɔɔ koo, dɩ mɛ̃ tɩbɩla fɛʋ thɩɩra na jɩ dɩ fɛr thɔna mɩ dɩ fɩ na wɛr mɔ̃kɛ fɩ na mɩnɩ. 24Thɩrɛ wei, mɩ‐n ƴaalɛ dɩ ka mɩ hanɩ, wɩrɛ fɩ ha mɩnɩ n hanale dapa nakha mɛrɛ, dɩ mɛ̃ wa‐n hɩɩnna dabɔr ɩ̃ carbara, kɛ dɔnɩ gɩrɛ fɩ kɔɔ ha mɩnɩ gɩdonɩ fɩ kɔɔ na mɛr sɩ thɩɩkɛ na kɔɔ hɩɩr tir paˈ. 25Thɩ sarʋ, tɩbɩla thɩɩra na kɔɔ jɩ faˈ, sɩ mɛrɛ, mɩ kɔɔ jɩ fɛr dɩ wɩrɛ dakha jɩ gɩrɛ dɩ fɛr thɔna mɩ. 26Mɩ cʋʋ wɛr dɩ wɩ jɩ afɩ i, sɩ ma bire na cʋʋ wɩ dɩ wa jɩ gɩ wo, dɩ mɛ̃ ga cʋʋ naʋʋkɛ fɩ kɔɔ na mɩnɩ n ha awɩ bɩnɔ, mɛrɛ dakha n ha awɩ bɩnɔ.

Currently Selected:

Jã 17: LOBIRI

Highlight

Copy