Jã 10

Bana khedaar bʋɔɔkɛ n kʋlɛnɩ banaa ƴɩɛ

1Sobɔr mɩ so nar gel, ʋrɛɛkɛ na‐n lonanɩ bana cʋɔr na lõfonʋɔaˈ sɩ dɩ lona pa kpɩɩ, tibil ca ole dʋɔn yu na yu hɔ̃hʋɔldaar. 2Sɩ ʋrɛɛkɛ lonananɩ lõfonʋɔ, ɔr dʋɔn bana#10:2 Bana khedaar: Juifisɔɔ dʋɔ, nʋ̃ khedaar n kʋlɛ ƴɩɛ dɩ nʋma na‐n kpaan. khedaar. 3Lo hɩɩndaar na khɛrʋʋrɛ loo, dɩ banaa na nɩɛrɛ ɔɔ nɔ. Dɩ a na wer banaasɔɔkɛ dɔnɩ ɔɔda awɩ i bɩɛlbɩɛlbɩɛl a cʋʋ wɩ wɩ thɩɩr jɩɛra. 4Ɔbɔɔkɛ a na tini banaasɔ fɛʋʋkɛ dɔnɩ ɔɔda na pɩ, a na kʋʋl wɛr ƴɩɛ wa‐n kpaaraa, gɩdonɩ wɩ jɩrɛ ɔɔ nɔ. 5Wa kpa kpakpalla ga, wa fagʋʋrɛ sɩ na ca gɩdonɩ wa jɩ kpakpalaa nɔaˈ. 6Jeju so warɛ sokpaakɛ, sɩ wa jɩrakɛ gɩrɛɛkɛ a ƴaalnɩ a so waraˈ.

7Dɩ Jeju bir so war wo ayɩ: Sobɔr mɩ so nar gel, mɛr dʋɔn bana loo. 8Wɩrɛ fɛʋʋkɛ kɔɔ kʋlɛ mɩnɩ ƴɩɛ a ɩ̃ dʋɔn yo na yu hɔ̃hʋɔldara, sɩ banaa na kɔɔ pɛ wɩ nũəˈ. 9Mɛr dʋɔn lõfonʋɔ. Ntɛɛkɛ na lona marnɩ a na ˈlɛr taarɛ. A na lʋʋn a na the sɩ a na yɩrɛ dɩkor. 10Yu na ɩ̃ sɩɩ do aa yuəˈ, sɩɩ do aa kʋaˈ, sɩɩ do aa kʋɛaa ga. Sɩ mɛrɛ, mɩ ɩnɛ banaa n hanana yire dɩ wa hana gɛr dɩ ga jɩɩ jɔr.

11Mɛr dʋɔn bana khedaar bʋɔ. Dɩ bana khedaar bʋɔ n faarɛ ɔɔ yi banaa sora. 12Sɩ bana hɩɩndaarɩkɛ na dɔnɩ bana khedaaraˈ, dɩ ʋrɛ hɩnanɩ banaa ga, ado a yɩ kpe da pɔ a‐n faarɛ banaa sɩ dɩ ca; dɩ kpe n pɔ dɩ fʋlɛ wɩ sɩ dɩ bɩ̃bɩlã wɩ. 13A‐n car gɩdonɩ warra a‐n do ɔɔ thɔ̃, sɩ aa‐n therna banaa ga. 14Mɛr dʋɔn bana khedaar bʋɔ. Mɩ jɩrɛ ɩ̃ banasɔ dɩ ɩ̃ banasɔ jɩ mɛr dakha, 15mɔ̃kɛ Thɩrɛ jɩ mɩnɩ dɩ ɩ̃ jɩ Thɩrɛ. Dɩ mɩ faarɛ ɩ̃ yi banaa sora.#Mat 11:27; Lu 10:22 16Mɩ hananɛ bana kpɩɩsɔ wo, kɛ na‐n lonanɩ nakha ɩ̃ banaakɛ cɔ bɩɛllaˈ. Wɛr dakha mɩ teenanɛ ɩ̃ kpa wɩ a ɛna. Dɩ wa nɩɛrɛ ɩ̃ nɔ, dɩ mɛ̃ wa do bana ca bɩɛl wɩ hana bana khedaar bɩɛl dakha. 17Thɩrɛ n na mɛr gɩdonɩ mɩ faarɛ ɩ̃ yi sɩ ɩ̃ bir ɩ̃ gba. 18Tibil bɩɛl na tee mar ɩ̃ yiikaˈ, sɩ mɛrɛɛ thɛthɛ faa gɩ dɩbara. Mɩ hananɛ punone a na faana, dɩ mɩ hananɛ punone a na gbana gɩ. Gɛr dʋɔn hʋɛɛkɛ mɩ kɔɔ ˈlɛnɩ ɩ̃ Thɩra.

19Dɩ ga thɩmɩɩsɔɔlera ɩrɛna leere wo Juifisɔɔ thɩ̃thɩɩn. 20Dɩ tibil jɔjʋɔ awɩ thɩ̃thɩɩn na‐n so ayɩ: Kɔ̃tɛɛbuu hanaanɛ, dɩ yʋʋ kʋɛsʋʋ. Mɔ̃gɩdo dɩ na‐n pɛ ɔɔ thɩmɩɩ nũu? 21Sɩ ɩkhasɔ bor sa so war: Ga do kɔ̃tɛɛbuda thɩmɩa ha gɩraˈ. Kɔ̃tɛɛbuu na punone a na khɛr yarasɔ yinə ya?

Mɔ̃ Juifisɔ bonɩ Jeju

22Ɔbɔɔlera yʋʋrɔ Thãgba fʋɔr cɔ phʋɔl fɛtɩ ha Jerujalɛm. 23Dɩ Jeju na‐n kpaar Thãgba fʋɔr cɔ kɔ̃tɩɩna paarɩkɛ hɔnɩ jɛ̃bɛrɛ̃ɛkɛ wɩ‐n wenɩ Salomɔ̃ɔda. 24Dɩ Juifisɔ kpa jɛ a diirəə sa bulee: Ʋmɔ̃ bɔɔ ga thʋ̃ na dã sɩ dɩ fa ti si baalɛɛkɛ n ha sɩnɩ haarra wire wo wire? Ado fɛr dʋɔn Kirisiti, sɔ sar casɩ. 25Dɩ Jeju birse wi: Mɩ kɔɔ so narɛrakɛ sɩ na‐n pɛr haaraˈ. Thɔmaakɛ mɩ‐n gbanɩ ɩ̃ Thɩɩ i dɩ ma‐n cʋʋna, gɛr n nɛna sobɔ so jɩɩr mɛrɛra. 26Sɩ nɛrɛ, na‐n pɛr haaraˈ gɩdonɩ na do ɩ̃ banasɔaˈ. 27Ɩ̃ banasɔ n nɩrɛ ɩ̃ nɔ, dɩ mɩ jɩ wɛr dɩ wɩ‐n kpa marɛ; 28dɩ mɩ ha wɛr yire khorr, dɩ wa bu yuurakaˈ, dɩ tibil gɩ a və̃ wi a taa ɩ̃ nyɔ̃kɔaˈ. 29Ɩ̃ Thɩɩkɛ hana mɩnɩ a kəəre thɩ̃ɛ fɛʋra, dɩ tibil bɩɛl na hale a na puno na və̃ wi ɩ̃ Thɩɩ nyɔ̃kɔaˈ. 30Dɩ mɛrɛ na Thɩrɛ bɩɛl sɩ do.

31Dɩ gɛrra gɩ dɩ Juifisɔ bir uul bokana wo wɩ dʋʋrnaa. 32Dɩ Jeju bir so war wo ayɩ: Mer cʋʋ nɩnɩ dɩ nɩ jɩ thɔ̃ bɔ jɔjʋɔsɔɔkɛ thɛnɩ Thɩrɛra, gɩmɔna nɩ‐n dʋʋrna mɩ bokana? 33Dɩ Juifisɔ birsee: Sa‐n dʋʋrna fɩ bokana thɔ̃ bɔ cʋʋ thɩmɩɩra ga, sɩ Thãgbaa iikɛ fɩ‐n kʋɛnɩ gɩ. Gɩdonɩ fɛrkɛ dɔnɩ tibil fɩ‐n yɩ Thãgba ha fɩ.#Lev 24:16 34Dɩ Jeju birse wi: Sɩ ga khere mɛ̃ anɩ jɔfʋ sɛbɛra gaa ayɩ: “Mɛr Thãgba sɔ ayɩ: Nɛr dʋɔn thãgbasɔaa”?#Khɩ 82:6 35Sɩ jɩrɛ dɩɩ do gɩrɛɛkɛ kherenenɩ Thãgbaa sɛbɛra na puno na kʋɛaˈ, ado anɩ jɔfʋ sɛbɛ n wer thãgbasɔ wɩrɛɛkɛ Thãgbaa thɩmɩɩ kɔɔ mɩɩnanɩ, 36mɔ̃ gɩ fʋ sɩ dɩ nɩ so mɛrkɛra Thɩrɛ kɔɔ maanɩ leere kpɩɩ sa thɔ̃ mɩ thɩɩra dɩ nɩ yɩ, mɩ‐n kʋɛrɛ Thãgbaa i, gɩdonɩ mɩ kɔɔ so narɛ: Mɛr dʋɔn Thãgbaa Bikuun? 37Ado ma‐n cʋʋ ɩ̃ Thɩɩ thɔ̃aˈ, na‐n pɛ mɩ haaraˈ. 38Sɩ ado ma cʋʋ gɩrakɛ sɩ dɩ na‐n pɛ mɩ haarrakɛ kpɩɩaˈ, nɩ pɛ gɩrɛɛkɛ mɩ‐n cʋʋnɩ haar, dɩ mɛ̃ na puno na jɩɩ jɩ dɩ Thɩrɛ har ɩ̃ bɩnɔ dɩ ɩ̃ ha Thɩrɛɛ bɩnɔ. 39Dɩ wɩ kɔɔ ƴaalɛ hʋɛ wo wɩ fʋʋ, sɩ dɩ for awɩ nyɔ̃kɔɔ.

Jeju bire jal Jʋrdɛ̃ mɩɩr iiro

40Jeju bire jal wo Jʋrdɛ̃ mɩɩr iiro, a too kãkɛ Jã n kɔɔ kpɛɛnɩ tɩbɩla nyʋɔnɔ cacara.#Jã 1:28 41Le tɩbɩla bərəəm n pʋɔraa dɩ wa‐n so aa: Jã na kɔɔ cʋʋ nɔ kpaa thɩ̃ bɩɛlaˈ, sɩ thɩ̃ɛ fɛʋʋkɛ a kɔɔ mɩɩnɩ kuunnaakɛ sobɔr gɩ do. 42Dɩ tibil jɔjʋɔ pɛrɛ Jeju haar dapaalera.

Currently Selected:

Jã 10: LOBIRI

Highlight

Copy