Maak 14

Minwiinmunu Jézu ma we ble

(Mt 26:1–5; Lk 22:1–2; Jn 11:45–53)

1Taboyi valé buru lé lévɛn ’ka a va lo, wolé fɛti yi vo fié. Balebanmunu segelenu valé sɛbɛgifemunu a kwa kulina léé, ’wo Jézu kun dabli nya yé wa gyɛ. 2Naa, wo léé: Té wa kɛlɛ fɛti yi nya lo, dé fla bɔ é da gyɛ.

Mari lasikɔrɔ zén Jézu nwiin

(Mt 26:6–13; Jn 12:1–8)

3Bléyian va lé Jézu a Bétani, pantɛngyɛzan Simɔn lé kɔn gi, lezan do wɔra, ’té wa fɛ blena. Gɔlɛfukuo a a lee, ’té lasikɔrɔ bozen lé a tɔ ke nari, é vlɛ nya blɛn, é a a gi. É gɔlɛfukuo ’léé bɔi, yé é lasikɔrɔ zén Jézu nwiin. 4Yé mi kenu bli fli yé wo lé ’wo ke lɛ léé: Mɛmalé é lasikɔrɔ sɛrɛ é plaa? 5Wo bɔa kɔɔn a danle lɛ dénié wuru do yɔ soru va, a vlɛ boen gié ’bɛ ta, yé wa mafɛ nɔ nyanégyɛmunu lɛ. Yé wo bli kɛlɛ lezan ’ko ma tɔntɔn. 6Yé Jézu léé: ’Ka a vo. Mɛmalé ka a lezan bli gi kyɛ dɔnaa? É wezin kɛlɛ an lɛ. 7Nyanégyɛmunu a ka va yifaama, dé é sɔ ka lɛ léé, ka wezin kɛlɛ wo lɛ bléyio?-?bléyian va, ka bɔalɛ. Naa, maa ’ka ka va yifaama lo. 8We lé é bɔa a kɛlɛle lɛ, yee lé é a kɛlɛ. An gale plaale we ma lé é a zén an ta bɛ. É a kɛlɛ an pale we ma a bléyi ’lɛ. 9Fɛfaana lé munu é dan Wenéné ’ko fe lɛ tɛrɛ faa la, we lé lezan ’ko a kɛlɛ, wo dan a zuo fe lɛ yé lezan ’ko sele é dan dɔ lɛ munu gi. Maa fe ka lɛ.

Judas a nyi si léé, ’é Jézu pa munu lee

(Mt 26:14–16; Lk 22:3–6)

10Kariɔtzan Judas a mi vu ta fié va mi do nya, yé é go Balebanmunu segelenu va Jézu liwole wo lɛ we ma. 11Wa dére ’ma aan wo, yé wo gi nana, yé wo lé a lɛ léé, ’wo dan gɔɔli nɔ lɛ i lɛ. Yé bléyian Judas é bɔalɛ léé, é Jézu pa wo lee, é a sin ’bɛ naginina.

Jézu valé é zuomunu Taboyi lé fɛti kɛlɛ

(Mt 26:17–25; Lk 22:7–14, 21–23; Jn 13:21–30)

12Buru lé lévɛn ’ka a va lo, alé yi vininzan nya, yian nya lé woo Taboyi lé ’blané gya, Jézu zuomunu lé é lɛ léé: É sɔ i lɛ léé, ko go Taboyi lé fɛti ma’lɛrɛ i lɛ fɛ kyɛnnaa? 13Yé é é zuomunu fié nwunvɔ, yé é lé wo lɛ léé: ’Ka go fla; ka dan kee lɛ gɔné do nya ’yibɔ nya é bɛ la; ’ka go a zuo. 14Dé é wɔra kɔn‐oo kɔn‐an gi, ’ka a fe kɔnzan lɛ léé: Mizan léma: Fɛ kyɛnna lé yee valé é zuomunu é dan Taboyi lé fɛ ble lɛɛ? 15Yé kɔn nwiin kɔn gi blɛn do lé tablénu valé blinnu ke a gi, é ma nya é ’lɛrɛle, é dan a gɔɔn lɛ ka lɛ. Ana lé ’ka Taboyi lé fɛti lé fɛnu ma’lɛrɛ kaa lɛ. 16A zuomunu go yé wo bɔ fla; yé wo bɔ fɛnu ma bélé fɛan zo lé é a fe wo lɛ, a zo. Yé wo Taboyi lé fɛti lé fɛnu ma’lɛrɛ.

17É nyanadi fɔfɔ, Jézu valé mi vu ta fié da. 18Wa tablé zi fɛ blena aan wo, Jézu léma: Maa lé ka lɛ webozen nya léé, ka va mi do lé é ke fɛ blena an va, é dan an pa lɛ munu lee. 19Wo bli kyɛ dɔ yé wo we laa a lee do do léé: Maa léé? 20É lé wo lɛ léé: Mi vu ta fié va mi do lé éé bɛ wɔraan an va pala gi, é a ’bɛzan nya. 21Maa blami Be a gona, fɛan zo lé wo anlé we gyɛ sɛbɛ gi, a zo. Mi lé é blami Be pa munu lee, a gale nyɔ. A fila vɔ kɔɔn léé, té wa yaa lo.

Jézu we dɛrɛ paa é zuomunu gi

(Mt 26:26–30; Lk 22:15–20; 1 Kor 11:23–26)

22Wa fɛ blena aan wo Jézu buru si, yé dé é Bale bɔ vɔ faa é a bɔi, yé é a nɔ wo lɛ a fele nya léé: Buru ’ko a an kɔlɛ nya. ’Ka a si. 23’Bɛ zuo é ’yiminikana do si, yé dé é Bale bɔ vɔ faa yé é a nɔ wo lɛ yé wo faa ’yi mini a gi. 24Yé é lé wo lɛ léma: Fɛ ’ko, an nyɛ lé. Gipawe dɔ plɛplɛ nyɛ lé é zana mi kiɛre lé we ma, yee lé. 25Maa lé ka lɛ webozen nya léé, maa ’ka dan dɔrɔyi mini lɛ é ziin monomono lo fɔɔ, ’té an bɔ é wo Kazambale lé fuatɛrɛ la, yé maa a dɛrɛ mini.

26Dé wo lɛrɛ vɔ faa, yé wo go Ɔlivi gɔ nwiin.

Jézu Piɛri lé sɔnvɔle ’é ma we fe

(Mt 26:31–35; Lk 22:31–34; Jn 13:36–38)

27Jézu lé wo lɛ léma: Anlé we é dan ka faa kele lɛ. Naa, wa gyɛ Kazambale lé sɛbɛ gi léé: An dan ’blatabinzan gyɛ lɛ, yé ’blanu é dan fwila lɛ. 28Naa, dé an nwa gale va faa maa dan go lɛ ka ’lɛ Galilé tɛrɛ la. 29Yé Piɛri lé a lɛ léma: Dé ilé we mi faa kele, maa do ’ko, é ’ka dan maa kele lɛ monomono lo. 30Jézu lé a lɛ léé: Kyɔ é béli ’ko, dé manegɔné ’ka tan we lɛ a gɔnɔ fiézan nya lo, i dan a fe lɛ gɔnɔ yaa léé, ’é ’ka an dɔɔa lo. Maa fe i lɛ. 31Yé Piɛri we fe é sɔbɛla nya léé: Dé é a gale i va nyaoo, maa ’ka dan a fe lɛ léé, an ’ka i dɔɔa lo lo. Yé wo faa yee we duo ɛ fe.

Jézu bazoro Jɛtsémané

(Mt 26:36–46; Lk 22:39–46)

32’Bɛ zuo Jézu valé é zuomunu go fɛ lé wana laama Jɛtsémané, ana. Yé Jézu lé é zuomunu lɛ léma: ’Ka nyana ’ko, yé an bazoro ma. 33Yé Piɛri koo, Jak koo, Jan koo, é wo si yé é go wo nya, yé a gi nyɛ kun kinile ma, ’té éé nyané blé kaii. 34Yé é lé wo lɛ léma: An bɔn‐in kyɛ dɔle ’ko, é vo sɛ é an gyɛ. ’Ka vo ’ko yé ’ka vo é yuɛma. 35Yé é bié é ’lɛ sɛ, yé ébo dia tɛrɛ va, yé é bazoro léé: Dé é bɔalɛ é kɛlɛ, bléyi ’ko ’é gié an ta. 36Yé é léma: Aba, an Ti, i bɔa we faa kɛlɛle lɛ. ’I ’yiminikana ’ko si an lee ma. Naa, té é kɛlɛ an sɔlɛwe nya lo, ’é kɛlɛ i sɔlɛwe nya ma. 37Yé é da é zuomunu va; é bɔ wo ma yigyɛna yé é lé Piɛri lɛ léma: Simɔn, i a yigyɛnaa? I ’ka bɔa vole lɛ é yuɛma lɛrɛ do nya loo? 38’Ka vo é yuɛma yé ’ka bazoro, té wo ka gi dan lo we ma; mi bli a nyi sié, naa, mi a tɔɔtɔɔ. 39Yé é si wo va é ziin, yé é yee bazoro dére duo fe. 40Yé é da é pa gi yé é bɔ wo ma yigyɛna é ziin. Naa, wo yuɛla bɛn a kaii. Wo ’ka we zi pa dére dɔɔa lo. 41Yé é da wo va a gɔnɔ yaazan nya, yé é lé wo lɛ léma: ’Ka yi gyɛ sin, yé ka flin. É nyaa. A bléyi bɔ. Wa gona maa blami Be pana wenyanékɛlɛmunu lee. 42’Ka nwa, kaa go. Ka ye, mi lé é ke an pana wo lee, yee lé é dan bɛ.

Wo Jézu kun

(Mt 26:47–56; Lk 22:47–53; Jn 18:2–11)

43É a tan wefena aan wo tɔɔn, Judas lé é ke mi vu ta fié va mi do nya, é bɔra mi gu nya é va, ’té gwɔunnu valé yilinu a wo lee. Balebanmunu segelenu koo, sɛbɛgifemunu koo, mi segelenu koo, wo ɛ wo nwunvɔ. 44Jézu liwozan tɔmase ’ko gɔɔn wo lɛ léé: Dé maa mian tuu gyɛ, ’té yee lé. ’Ka a kun yé ka goan tegeleee. 45Judas bɔ aan wo tɔɔn, é bié Jézu ma yé é léma: Anzan. Yé é a tuu gyɛ. 46Yé munu ’konu Jézu kun, yé é vo wo lee.

47Jézu zuomunu va mi do gwɔun so é kɔlɛ gi, yé é a vɔ Balebanmunu ’lɛzan wuozan ma yé é a tɔné bɔi.

48Jézu lé wo lɛ léé: Ka da an kun lɛ gwɔunnu valé yilinu nya ka lee bélé fɛan zo lé ka da kyeenwozan kun lɛ, a zo. 49Maa a yifaama ka va we paana munu gi Balebangikɔn gi, yé ka ’ka an kun lɛ lo. Naa, wo we ’ko kɛlɛ Kazambale lé sɛbɛ gi we lɛsɔɔle we ma.

50Yé Jézu zuomunu faa si é zi, yé wo fwila.

51Yé pɛniɛ do go Jézu zuo sɔ nya é zénle é ta. Yé munu a kun; 52naa, é daan élé sɔ ma yé é go vlan nya é porole.

Wo go Jézu nya webolikinimunu va

(Mt 26:57–68; Lk 22:54–55, 63–71; Jn 18:12–14, 19–24)

53Wo go Jézu nya Balebanmunu ’lɛzan va, fɛana lé Balebanmunu segelenu faa koo, mi segelenu koo, sɛbɛgifemunu koo, wa é zénle ékeva, ana. 54Piɛri vo dana a zuo baa, fɔɔ yé é bɔ Balebanmunu ’lɛzan lé gɔrɔ gi, yé é nyana sunyanu va kyɛ zi.

55Balebanmunu segelenu valé webolikinimunu faa, wa wenu naginina Jézu ma, ga dɔle a nwiin we ma, naa, wo ’ka a do kpen ye lɛ lo. 56Wenayemunu kiɛre viéwo a ma, naa, wo dére ’ka bɔ lɛ ékema lo. 57Wenayemi kenu nwa, yé wo viéwo a ma, yé wo léé: 58Wean é a fe, ko a ’ma; é léé, Balebangikɔn ’ko lé mi a dɔ, ’é dan a zana lɛ, yé ’é dan a bɛ dɔ lɛ a pa gi yi yaa, ’té munu ’ka ’bɛ dɔ lɛ lo. 59We ’ko ma é ziin, wo dére ’ka bɔ lɛ ékema lo. 60Yé Balebanmunu ’lɛzan nwa zén‐ékevamunu méléna, yé é we laa Jézu lee léé: I ’ka we zi do kpen paan loo? Mɛ we lé munu ’ko ke a dɔna i nwiin bɛɛ? 61Jézu vo é tadɔle yé é ’ka we zi do kpen pa lɛ lo. Balebanmunu ’lɛzan we laa a lee é ziin, yé é léé: Bii ɛ ke Krist nyaa? Kazambale lé wa drɔɔ voo, a Be lé i nyaa? 62Jézu a zi pa a lɛ léé: Iin, maa lé. Yé ka dan maa blami Be ye lɛ é nyanale Plɛplɛzan Bale bɛyilazia, yé ka dan an ye lɛ dana latinu ta. 63Yé Balebanmunu ’lɛzan élé sɔ fia, yé é léma: Ko mawe a é ziin wenayezan bɛnu gii? 64Ka sɔnɔ dére ’ma sin a ta. É dɔ ka gi kaa? Yé wo faa léé: ’Wa ’gyɛ, wa gyɛ, ’wa ’gyɛ! 65Mi kenu kun ’lélibɔlɛ vɔle ma a ma, yé wo sɔ vuru a yuɛ la, yé wo fɔlɛ duun a lɛ yé wo léé: ’I balelaye ma. Yé sunyanu a blin kyɛ si.

Piɛri sɔn vɔ Jézu ma

(Mt 26:69–75; Lk 22:56–62; Jn 18:15–18, 25–27)

66Bléyian va lé Piɛri a béera gɔrɔ gi, Balebanmunu ’lɛzan wuole do da. 67É Piɛri ye aan wo é dɔle kyɛ zi, yé é a nagini, yé é lé a lɛ léé: Bii é ziin, bii a turu Nazarɛtzan Jézu va. 68Naa, é gba vɔ yé é léé: Bé fé nɔɔ? Maa a gi dɔɔa lo, maa a maan lo. Yé é nwa yé é yara dɔ gɔrɔ ’léé zia. Yé manegɔné we. 69Wuole a ye aan wo, yé é lé ana munu lɛ léé: Mi ’ko, é a munu ’ko va mi do nya. 70Yé é gba vɔ é ziin. ’Bɛ zuo sɛ, ana munu é ziin, ’bɛnu lé Piɛri lɛ léé: Naa, Galilé mi lé i nya; bii a munu ’ko va mi do nya webozen nya. 71Yé é kun bale pale ma, ’té éé bale ’nyɔɔn‐an léé: Mian ka alé we fé bɛ, dé maa a dɔɔ pe! Kazambale bozen ana. 72’Bɛna tɔɔn, yé manegɔné we a gɔnɔ fiézan nya. Yé dére lé Jézu a fe Piɛri lɛ, a sele dɔ a gi léé: Dé manegɔné ’ka tan we lɛ a gɔnɔ fiézan nya lo, i dan a fe lɛ gɔnɔ yaa léé, ’é ’ka an dɔɔa lo. É vo é gi bɔrɔna ’bɛ ma yé é wuvɔ.

Currently Selected:

Maak 14: GOURU

Highlight

Copy