Maak 12

Dɔrɔféi ma gɔnévɔle

(Éz 5:1–7; Mt 21:33–46; Lk 20:9–19)

1’Bɛ zuo Jézu kun gɔnénu vɔle ma wo lɛ.

Gɔnézan do dɔrɔféi pa. É gɔrɔ bo a zi, yé é dɔrɔ borona kɛlɛ yé é dɔtafɛ kɛlɛ féi naginile we ma. A zuo é a bɛ pa féinwiinzannu lee, léé, ’wa guli wo nya, yé é si tɛrɛ ’ko la. 2Dé dɔrɔporo sobléyi pa, é ’é wuozan do pa zia féinwiinzannu va, léé, ’é go ’ézé si wo va. 3Yé wa kun, yé wa bla, yé wa bin é lee koro nya. 4Yé féizan é wuozan do pa é ziin zia, yé wo ’bɛ bla é ’wuo ma, yé wo ’bɛ sɔnɔ. 5Yé é mi yaazan pa zia yé wo ’bɛ gyɛ. ’Bɛ zuo yé é mi kiɛre pa zia é ziin, yé wa kenu bla yé wa kenu gyɛ. 6Abozen be do vo a lee é ziin; ’bɛ sɔ a lɛ é baba. É a nwunvɔ wo va é voéla yé é léé: Wo dan an be lɛdɔ lɛ a ma. 7Naa, féinwiinzannu lé ’wo ke lɛ léé: A zarablezan lé ke ’ko; ’ka da, kaa a gyɛ, yé a zara ’é vo kaazé nya. 8Yé wa kun yé wa gyɛ, yé wa gale vuli féi gini ma. 9Sin, féizan é dan a kɛlɛ lɛ kaa? É dan da lɛ féinwiinzannu gyɛ lɛ yé é dan dɔrɔféi bɛ pa lɛ mi bɛnu lee.

10Dére ’ko lé wa gyɛ Kazambale lé sɛbɛ gi, ka ’ka tan a ta fe lɛ loo? Wo léé:

Gɔlɛ lé kɔndɔmunu sɔn vɔ a ma,

É kɛlɛ kɔnsungɔlɛ nya.

11We ’ko si Mizambale va,

Yé é a givuruwe nya ko yuɛ gi.

12Munu lé Jézu we ’ko fe wo lɛ, wa ’ma léé, ’wo ma gɔné lé Jézu a vɔ, amalé wa kwa kulina léé, ’wa kun; naa, wo kana mi gu lee, amalé wo si a va, yé wo go.

Gɔɔli banwole Sézaa lɛ

(Mt 22:15–22; Lk 20:20–26)

13Yé mi segelenu Farizimi kenu valé Érɔd zuo mi kenu nwunvɔ Jézu va, léé, ’wo dia a zi yé abo dére a kun we nya. 14Yé wo da yé wo lé a lɛ léé: Kozan, ko a gi dɔɔ léé, i wezen fé, yé mi bɛnu lé we ’ka i yuɛ gi bɔa lo, yé i ’ka mi ginian é kɔlɛ ma lo, yé i Kazambale lé zi gɔɔn‐an munu lɛ webozen yɛrama. A se a munu lɛ léé, wo gɔɔli banwo Sézaa lɛ laa? té wa banwo loo? É a lé ko a banwo laa? té ko a banwo loo? 15Jézu wolé wobo drɔle dɔɔ, yé é lé wo lɛ léé: Mɛmalé ka an gi daan? ’Ka da dénié do nya maa a ye. 16Wo da a do nya a lɛ yé Jézu a laa wo lee léé: Foto ’ko valé sɛbɛgyɛle ’ko, de zé léé? Yé wa zi pa léé: Sézaa zé lé. 17Yé é lé wo lɛ léé: ’Ka Sézaa zé fɛ nɔ Sézaa lɛ, yé ’ka Kazambale zé fɛ nɔ Kazambale lɛ. Yé wo gi vuru alé we ma.

Wo mi nwale gale va lé we laa Jézu lee

(Mt 22:23–33; Lk 20:27–40)

18Sadusémunu léé: Mi ’ka nwaan gale va lo. Munu ’ko, wo bié Jézu va, yé wo we ’ko laa a lee léé: 19Kozan, we lé Moizi ko béli dɔ a nya, yee lé é ke ’ko: dé mi do bwe ga, yé a na vo yé alé né ’ka lo, é a lé a zuané a zarale si, é bwe kulu bɔrale we ma. 20Naa, mi do be a gɔné sɔrafié. A vininzan le si, yé é ga, yé a kulu ’ka vo lɛ a pa gi lo. 21A fiézan a zarale si, yé ’bɛ ga, yé ’bɛ kulu ’ka vo lɛ é pa gi lo. Yé a yaazan zé kɛlɛ yee duo zo. 22Yé woo mi sɔrafié kulu ’ka vo lɛ wo pa gi lo. Wo faa ga, yé lezan ga é voéla. 23Gamunu nwabléyi va, lezan é dan kɛlɛ lɛ a kyɛn ɛ na nyaa? Naa, woo sɔrafié faa na lé é ke a nya. 24Jézu a zi pa wo lɛ léé: Ka ’ka Kazambale lé sɛbɛnu dɔɔa lo, yé ka ’ka Kazambale lé plɛplɛ dɔɔa lo, ’té ka ’ka saan loo? 25Gamunu nwabléyi va gɔnénu ’ka dan le si lɛ lo; yé lomu ’ka dan bo si lɛ lo, naa, wo dan kɛlɛ lɛ bélé lanjenu lé wo ke la gi, wo zo. 26Dé é a gamunu nwale lé we nya, we lé Kazambale a fe Moizi lɛ yiliné kyɛblena, ka ’ka tan a ta fe lɛ Moizi lé sɛbɛ gi loo? É léé: Abraam koo, Izak koo, Jakɔb koo, maa a wolé Bale nya. 27Dé Kazambale a fe léé, ’é a mi do lé Bale nya, ’té azan a é yuɛma. Dé é gaoo, é a é yuɛma duowo. Ka saan é baba.

Bélidɔwe blɛnzan

(Mt 22:34–40; Rom 13:8–10)

28Za lé wo ke a vɔna, sɛbɛgifezan do a ’ma. É a gi dɔɔ léé, Jézu we zi pa Sadusémunu lɛ é zima, yé é bié a va. Yé é we laa a lee léé: Bélidɔwe faa va, a kyɛnzan ɛ ke bélidɔwe blɛn nyaa? 29Jézu a zi pa léé: A blɛnzan lé ke ’ko: Izraɛlmunu, ’ka tɔné dɔ. Mizan, Kazambale, yee do kpen ɛ ke Mizan nya. 30’I Mizan, izé Bale lɔrɔ pa i bli faa koo, i boen faa koo, i gibɔrɔle faa koo, ilé plɛplɛ faa koo, wo nya. 31Yé a fiézan lé ke ’ko: ’I bɔluzan lɔrɔ pa bélé biibozen zo. Bélidɔwe lé ke blɛn é mini a ’konu ta, é ’ka lo. 32Sɛbɛgifezan lé a lɛ léé: Anzan, i bɔ. Wezen nya lé bé fe léé, Kazambale a do kpen, yé Bale bɛ do kpen ’ka a zuo lo; 33yé a lɔrɔ pale i bli faa koo, ilé gibɔrɔle faa koo, i boen faa koo, ilé plɛplɛ faa koo, wo nya, é valé i bɔluzan lɔrɔ pale bélé biibozen zo, a fila vɔ é mini balebanwi lé wa kyɛ blé, ’bɛ valé saraka bole faa ta. 34Jézu a ye aan wo léé, mi ’ko a zi pa gi kinile nya, yé é lé a lɛ léé: Kazambale plale i nwiin ’ka vo lɛ baa lo. Yé é ’ka dɔ lɛ mi bɛ gi léé, ’é we laa a lee é dɛrɛ lo.

Jézu laale David be

(Mt 22:41–46; Lk 20:41–44)

35Jézu a we paana munu gi Balebangikɔn gi, yé é léé: Mɛmalé sɛbɛgifemunu léé, Krist a David be nyaa? 36David bozen a fe Léli Sauun nya léé:

Mizambale lé anzan lɛ léé:

’I nyana an bɛyila

Fɔɔ yé maa i nyanézannu pla i wuo.

37David bozen Krist laa ’ézan, ’naan, é kɛlɛ kaa yé Krist kɛlɛ David be nyaa? Yé mi kiɛre ’wo tɔné dɔ a lɛ gi nanale nya.

Jézu sɛbɛgifemunu gi bɔra

(Mt 23:1–36; Lk 11:37–54; 20:45–47)

38Bléyian va lé é a we paana wo gi, é lé wo lɛ léé: ’Ka yuɛ pa kabozen va sɛbɛgifemunu lé we ma. Dɔwole varɔ grɔgrɔ nya ’wo ta, é valé mi wele wo va gɔrɔ la sɔ wo lɛ. 39Wo bazorokɔn gi zi ’lɛ blinnu valé fɛti kɛlɛna blin zégéléénu naginian. 40Woo gyɛzaralomu lé kɔngifɛnu sié wo lee, ’té woo ba grɔgrɔnu zoroan munu lé wo yele we gi. We lé é mini gwɛn ta, wo dan a ye lɛ.

Gyɛzarale lé gɔɔli vɔle

(Lk 21:1–4; 2 Kor 8:1–12)

41Yé Jézu nyana Balebangikɔn lé gɔɔlizéngi kɛsu yara, yé fɛan zo lé munu wolé gɔɔli vɔa a gi, ’té éé a naginian. Fuablezannu kiɛre gɔɔli vɔ a gi di. 42Gyɛzarale lé ke nyanégyɛzan nya, é ’bɛ ye é ziin, ’té ’bɛ é su fié vɔa a gi. 43Jézu é zuomunu laa, yé é lé wo lɛ léé: Nyanégyɛ gyɛzarale ’ko, é a vɔ di é mini mi faa lé wo gɔɔli vɔ gɔɔlizéngi kɛsu gi bɛ, wo ta. Maa fe ka lɛ. 44Wo faa ’wozé si ’wolé gɔɔli tadɔle va, naa, lezan lé nyanégyɛgɔɔli lé ke alé fɛlɔfɛ nya, é a faa vɔ.

Currently Selected:

Maak 12: GOURU

Highlight

Copy