Luk 21

Gyɛzarale lé gɔɔli vɔle

(Mk 12:41–44)

1Jézu é yara nwa aan wo é fuablezannu ye gɔɔli vɔna gɔɔlizéngikɛsu gi. 2Yé gyɛzara le lé é ke nyanégyɛzan nya, é ’bɛ ye é ziin, ’té ’bɛ a su fié vɔna a gi. 3Yé é léé: Nyanégyɛ gyɛzara le ’ko gɔɔli vɔ di é mini mi pɔnénu ta, maa fe ka lɛ. 4Munu ’ko ’wozé si ’wolé gɔɔli tadɔle va yé wa vɔ gɔɔlizéngikɛsu gi, naa, lezan lé nyanégyɛ gɔɔli lé ke alé fɛlɔfɛ nya, é a faa vɔ.

Jézu Balebangikɔn guru zanale a gi fale vɔ

(Mt 24:1–2; Mk 13:1–2)

5Gɔlɛ zima valé blannu lé wo Balebangikɔn kɛlɛ nɔnɔmi wo nya, mi kenu ke aan wo wolé we fena, Jézu léé: 6A yi é dan bɔ lɛ yé kɔnnu lé ka wo yé, wolé gɔlɛ lé é dan vo lɛ é ke ta, ’té wo ’ka dan ’bɛ zana lɛ lo, ’bɛ gɔlɛ ’ka lo.

Tɔmasenu valé nyanéblelenu

(Mt 24:3–14; Mk 13:3–13)

7Wa laa a lee léé: Kozan, ’bɛ é dan bɔ lɛ mɛ yi laa? We ’konu pélisiale tɔmase a mɛ fɛ nyaa?

8Yé Jézu léé: ’Ka yuɛ pa kabozen va, té wo ka saan lo we gi. Naa, mi kiɛre é dan da lɛ an tɔ gi ’té wa fé léé, ’wo ɛ ke Krist nya; a bléyi bɔ. Té ka go ’bɛnu zuo lo. 9Dé ka gulidanle valé nwale mi ma we ’ma, té kana é zén ka gi lo; naa, é a lé we ’konu ’é bɔ é vinin, naa, ’bɛ ’ka a nyaabléyi nya lo. 10Yé é lé wo lɛ léé: Bɛn do é dan nwa lɛ bɛn do ma, yé bɛntɛrɛ do é dan nwa lɛ bɛntɛrɛ do ma; 11tɛrɛ ma é dan nyɔɔn lɛ blɛn, yé migyɛgyɛ é dan da lɛ yé lɔrɔ é dan dɔ lɛ fɛ kena; mi gi nyɛ kiniwe é dan kɛlɛ lɛ yé tɔmase blɛnnu é dan kɛlɛ lɛ la gi. 12Naa, ’bɛ faa ’lɛ, wo dan ka kun lɛ yé wo dan nyané pa lɛ ka ta; wo dan ka pa lɛ bazorokɔn gi munu lee, wo dan ka vɔ lɛ bokɔn gi, wo dan go lɛ ka nya minwiinmunu valé gbɔrɔnamanu ’lɛ, an tɔ lé we ma. 13’Bɛ é dan bɔ lɛ ka ma, wenu lé ka ana ye, kalé wo gi fele we ma. 14Bɛwemalé ka ’wuo gi bɔrɔle ’é nyaa ma; we lé ka dan a fe lɛ, é ’ka lé ka gi bɔrɔ a ma a febléyi ’lɛ lo, 15naa, dére valé wedɔɔle lé ka nyanézannu ’ka bɔa dɔle lɛ a ma plɛplɛ lo, yé wo ’ka bɔa a nɔlale lɛ lo, maa dan wo nɔ lɛ ka lɛ. 16Ka yaamunu koo, ka bwenu koo, ka gɔnɔlamunu koo, ka béénu koo, wo dan ka pa lɛ munu lee; yé wo dan ka va mi kiɛre gyɛ lɛ. 17An tɔ lé we ma lé munu faa é dan ka za pa lɛ. 18Naa, ka nwiin nwun gɔ do kpen ’ka dan san lɛ lo; 19ka dan ka boennu si lɛ we gi kalé yarapalale nya.

Jézu Jérusalɛm sɛrɛle fale vɔ

(Mt 24:15–18; Mk 13:14–23)

20Dé ka Jérusalɛm zi lɛ ye é sɔɔle sunyanu nya, ka gi dɔɔ léé, a sɛrɛle bɔ é pu. 21’Bɛ bléyi nya, munu lé wo ke Judé tɛrɛ la, ’wo fwi yé ’wo go gɔnu nwiin ma, yé munu lé wo ke Jérusalɛm, ’wo si ana ma, yé munu lé wo ke féi té wo go fla lo ma. 22Naa, ’bɛ yinu é dan kɛlɛ lɛ we lɛgi pa yinu nya, we faa lé wa gyɛ sɛbɛ gi, a lɛsɔɔle we ma. 23Bɔnlomu valé lomu lé wolé né ke nyɔ ma ’bɛ yinu nya, wo gale nyɔ. Nyanéblele blɛn é dan kɛlɛ lɛ tɛrɛ ’ko la, yé Bale bli é dan fli lɛ munu ’konu ma. 24Wo dan wo gyɛ lɛ gwɔun nya, wo dan wo si lɛ luunu nya yé wo go wo nya bɛnnu faa méléna, yé bɛnnu é dan Jérusalɛm zɔn lɛ ’wo gane nya fɔɔ yé bɛnnu lé bléyinu lɛ é sɔɔ.

Blami Be dale

(Mt 24:29–31; Mk 13:24–27)

25Tɔmasenu é dan kɛlɛ lɛ yiri koo, moné koo, monénénu koo, wo ma. Tɛrɛ la ’ko, bɛnnu é dan nyané ble lɛ kaii, yé wɛyi nwale valé é vun wele blɛn lé we ma, munu ’ka wo dɔnama yé wo lee lo. 26Lanu gi fɛ plɛplɛnu ma é dan nyɔɔn lɛ, amalé we lé é dan bɔ lɛ tɛrɛ la, munu kanale a lee lé we ma lé wo zuru va nyɛ kinile é dan wo gyɛ lɛ. 27’Bɛ zuo wo dan maa blami Be ye lɛ dana lati ta plɛplɛ valé fua blɛn tagɔɔnle nya. 28Dé we ’konu bɔle pélisia, ’ka drɔ yé ’ka yara nwa, naa, ka bélile bɔ é pu.

Ka we ’ma bɔrɔyili ma

(Mt 24:32–35; Mk 13:28–31)

29Yé é gɔné do vɔ wo lɛ yé é léé: ’Ka bɔrɔyili valé yili faa nagini. 30Dé ka ye léé, a tɔnnénu a dɔna, ka gi dɔɔ ka boan léé, lɛɛdabléyi bɔ é pu. 31A zo duo lé dé ka we ’konu ye bɔna, ka a gi dɔɔ léé, Kazambale plale mi nwiin bɔ é pu. 32Maa lé ka lɛ webozen nya léé, ’bɛ bléyi vamunu ’ka dan ga lɛ we ’konu faa bɔle ’lɛ lo. 33La valé tɛrɛ é dan gié lɛ, naa, an dérenu ’ka dan gié lɛ monomono lo.

Ka vo é yuɛma

(Mk 13:32–37)

34’Ka yuɛ pa kabozen va, dé ka zuru bɛn é da dɔ fɛblele kiɛre koo, nwɛ tanle koo, tɛrɛ la gibɔrɔlenu koo, wo nya, yé ’bɛ yi é bɔra ka ma fiaa bélé pɔgyɛséli zanale zo pɔnu ta; 35naa, é dan bɔra lɛ tɛrɛlamunu faa ma. 36Amalé ’ka vo é yuɛma yé ’ka bazoro yifaama, kalé plɛplɛ yele we ma, yé ka bɔ sile lɛ wenu faa lé wo dan bɔ lɛ bɛ, wo lee, yé ka bɔ dɔle lɛ loru, maa blami Be yara.

37Jézu éé we paan munu gi Balebangikɔn gi é yiéyi, yé é béli éé goo yii lɛ gɔ lé wa laama Ɔlivi gɔ, a nwiin. 38Bladi tutu munu faa éé dan a va Balebangikɔn gi, ’wo tɔné dɔle a lɛ we ma.

Currently Selected:

Luk 21: GOURU

Highlight

Copy