Luk 13

’Ka bli nɔla

(Ézék 18:30–32; Rom 2:3–6)

1’Bɛ bléyi va Galilé munu lé, Pilat wo nyɛ vɔɔ ’wolé sarakabo wi nyɛ va bɛ, mi kenu wolé we zuo fe Jézu lɛ. 2É a zi pa wo lɛ léé: Wolé nyané blele ’ko zo lé we ma lé é dɔ ka gi léé, Galilé munu ’ko a wenyanékɛlɛmunu nya é mini Galilé mi pɔnénu faa taa? 3Maa lé ka lɛ léé, gba. Naa, dé ka ’ka ka bli nɔlaan lo, ka faa é dan zamaga wo lɛ é ziin. 4Naa, mi vu ta sɔraa lé Siloé kɔn torole dia wo ta yé é wo gyɛ, é dɔ ka gi léé, we a wo nwiin é mini Jérusalɛm munu pɔnénu faa taa? 5Maa lé ka lɛ léé, gba. Naa, dé ka ’ka bli nɔlaan lo, ka faa é dan zamaga wo lɛ é ziin.

Bɔrɔyili ma gɔné vɔle

(Éz 5:1–7; Mt 21:18–22)

6Jézu gɔné do vɔ é ziin yé é léé: Gɔné do bɔrɔyili suru élé féi. É go a poro nagini lɛ, yé é ’ka a do kpen ye lɛ lo. 7Yé é lé féinwiinzan lɛ léé: A lɛɛ yaa lo, ’té an dan bɔrɔyili ’ko poro gini lɛ, ’té maa ’ka a poro do kpen yé lo. Bé bɔi. Mɛmalé éé tɛrɛ fuu sié é ta é plaa? 8Féinwiinzan a zi pa a lɛ léé: Anzan, bé vo é ziin lɛɛ ’ko wuo; an dan a zi fuan lɛ yé an dan bli vɔnle zén lɛ a zi, 9naa, dé é dan é poro baa lɛ é voélaa? Dé é ’ka baa lɛ lo, yé bé bɔi.

Jézu kɔnɔgyɛ le béli flinyi nya

(LvS 146:8; Mt 12:9–13)

10Flinyi do nya, Jézu a we paana munu gi bazorokɔn do gi. 11’Té lezan do ana mi, yo kɔnɔgyɛ vɔ a ma a lɛɛ vu ta sɔraa bɔ; yé lezan vo é plinle ’té é ’ka bɔa drɔle lɛ monomono lo. 12Jézu a ye yé é lé a lɛ léé: Lezan, i so i gyɛgyɛ lee, 13yé Jézu é bɛ pla a ta. Tɔɔn, é drɔ yé é Kazambale tɔ bɔ. 14Flinyi nya lé Jézu le ’ko béli amalé bazorokɔn nwiinzan bli kɛlɛ a ma tɔntɔn yé é lé mi gu lɛ léé: Nyanama payi a suiɛdo; ’ka da ka bélile we gi ’bɛ yinu nya, té ka da flinyi nya lo. 15Mizan lé a lɛ léé: Bodrɔzannu. Ka faa do do, ka ’ka kalé dirinu valé kalé sokofalenu polu soo turu wolé gɔrɔ gi flinyi nya yé ka go wo nya ’yiminina loo? 16Yé lezan ’ko lé é ke Abraam gɔnɔla le nya, ’té Satan a yere a lɛɛ vu ta sɔraa lo, é ’ka lé wa fuo flinyi nya loo? 17É ’bɛ fe aan wo, yara a nyanézannu faa gyɛ, yé mi gu gi nana Kazambale tɔbɔwenu faa lé é ke a kɛlɛna, wolé we ma.

Sénévéwɔlɛ ma gɔnévɔle

(Mt 13:31–32; Mk 4:30–32)

18Jézu lé é ziin léé: Kazambale plale mi nwiin a bélé mɛ fɛ zoo? Maa a dan mɛ fɛ maa? 19É a bélé sénévéwɔlɛ do lé mi do a sié yé éé a vɔa élé zian féi, a zo; éé tin‐é, éé kinin‐é yili nya yé mianénu ’wo kɔn dɔa a bɛnu ta.

Lévɛn ma gɔné vɔle

(Mt 13:33)

20É ziin yé é léé: Maa Kazambale plale mi nwiin dan mɛ fɛ maa? 21É a bélé lévɛn lé lezan do a si yé é a zén suo nya yaa burupun va, a zo, yé lévɛn a yɔɔ faa nwa.

Zi ’léé kiéné

(Mt 7:13–14, 21–23)

22Jézu Jérusalɛm zi sia yé é gié kuru ’léénu valé ’wolé flanu ta, we paale nya munu gi.

23Mi do we laa a lee léé: Mizan, munu lé wo dan si lɛ we gi, wa dii? Jézu lé wo lɛ léé: 24’Ka kwa kuli é zima léé, ’ka wɔra zi ’léé kiéné na; naa, maa fe ka lɛ, mi kiɛre é dan wɔrale ana gi dan lɛ yé wo ’ka dan bɔ lɛ a lɛ lo. 25Dé kɔnzan nwa yé é kɔn lɛ tan, yé dé ’kaa béeramunu duoli gyɛ, a fele nya léé, ’wozan, ’wozan, ’i kɔn lɛ so ’wo lɛ, é dan a fe lɛ ka lɛ léé, ’é ’ka ka sina dɔɔa lo. 26Yé ka dan a fe lɛ léé, ’wo fɛ ble yé ’wo ’yi mini i yuɛ va yé i we paa munu gi ’wolé fla woro dii; 27yé é dan a fe lɛ ka lɛ léé, ’é lé ka lɛ léé, ’é ’ka ka sina dɔɔa lo. ’Kaa lé ka weple kɛla, ka faa ’é si ’é ma. 28Abraam koo, Izak koo, Jakɔb koo, balelayemunu faa koo, bléyian va lé ka dan wo ye lɛ Kazambale lé fuatɛrɛ la ’té wo ka vuli béera, ’bɛ bléyi va ka dan wuvɔ lɛ yé ka dan ka suiɛ la ble lɛ. 29Munu é dan si lɛ yirinwana koo, yirivɔna koo, yirinwana bɛbola koo, yirinwana bɛyila koo, wona zia; yé wo dan nyana lɛ fɛblele zi Kazambale lé fuatɛrɛ la. 30Ka ye, mi voélazan kenu é dan kɛlɛ lɛ mi vininzannu nya, yé mi vininzan kenu é dan kɛlɛ lɛ mi voélazannu nya.

Jézu wuvɔ Jérusalɛm lé we ma

(Mt 23:37–39; Lk 19:41–44)

31A yi duo nya Farizi mi kenu da a va yé wo léé: ’I si fɛkona, ’i go. Érɔd a a va léé, ’é i gya. 32Jézu lé wo lɛ léé: ’Ka go ’ka fe kobli ’ko lɛ léé: Maa yonu sié munu gi yé maa munu bélié kyɔ valé tɛlɛ, yé a yi yaazan nya anzé é dan nyaa lɛ. 33Naa, kyɔ koo, tɛlɛ koo, tɛlama koo, é a lé maa tawo; é ’ka lé balelayezan é zamaga wo Jérusalɛm zi flanu la lo.

34Jérusalɛm munuoo, Jérusalɛm munu! Ka lé ka balelayemunu gya, ’té munu lé maa wo paan ka lɛ zia ka wo gya gɔlɛ nya, gɔnɔ kiɛre nya maa a a va léé, maa ka wɔra an va bélé fɛan zo lé mane tina é élé nénu wɔraan é bɛa wuo, a zo, yé ka ’ka a nyi si lɛ lo. 35Ka ye, kalé kɔn é dan vo lɛ ka lɛ é koro nya; naa, maa lé ka lɛ léé, ka ’ka dan an ye lɛ é dɛrɛ lo, fɔɔ ’té ka fe é wo léé, mi lé é da Mizambale tɔ gi, a drɔɔ ’é vo ma.

Currently Selected:

Luk 13: GOURU

Highlight

Copy