Jan 5

Jézu mi béli ’yiguru sɔnɔ

1’Bɛ zuo, Juifinu lé fɛti do bɔ, yé Jézu go ana Jérusalɛm. 2’Té ’yiguru do a Jérusalɛm, ’blanu bɔrana zi ’léé sɔnɔ, wa laama Ébru dére gi Bétɛsɛda. Ban soru a é dɔle a zi. 3Yé gyɛgyɛmunu koo, yuɛwiizannu koo, ganesuruzannu koo, furuagyɛzannu koo, wo kiɛre a é yiale yee bannu wuo. Wa ’yi nyɔɔnle lɛbɛnna. 4Yi ke nya lanje do é zunwo ’yiguru va yé ’yi é nyɔɔn. Dé ’yi nyɔɔn, mian éé vɔa a va é vinin, éé bélié. Dé gyɛogyɛan é ke a ma, éé sié a ma.

5Mi do ana mi, gyɛ a a ma, a lɛɛ yɔ do wɔlɛ vu ta sɔraa bɔ. 6Jézu a ye aan wo é yiale, é a gi dɔɔ léé, alé gyɛ namɔn yé é lé a lɛ léé: É sɔ i lɛ léé, i bélii? 7Gyɛkɛlɛzan lé a lɛ léé: Mizan, dé ’yi nyɔɔn, mi do kpen ’ka an lɛ yé ’bɛ an vɔ ’yi va lo; yé dé maa a gona bléyian va, mi bɛ éé vɔa a va an ’lɛ. 8Jézu lé a lɛ léé: ’I nwa, ’ilé yialafɛ sia, yé ’i tawo. 9Yé kele tɔɔn, mi ’ko béli, yé élé yialafɛ sia yé é tawo.

10Jézu mi ’ko béli flinyi nya. Amalé mi lé é béli bɛ, Juifinu lé a lɛ léé: Flinyi lé kyɔ, a se ’ka i lɛ léé, i go ilé yialafɛ nya lo. 11É lé wo lɛ léé: Mi lé é an béli, yee ɛ fe an lɛ léé: ’Ilé yialafɛ sia yé ’i tawo. 12Yé wa laa a lee léé: Mi kyɛn ɛ fe i lɛ léé, ilé yialafɛ sia yé i tawoo? 13Mi kiɛre ana, amalé Jézu ta san. Bɛwemalé mi lé é béli bɛ, é ’ka ’é bélizan dɔɔ lɛ lo. 14’Bɛ zuo, Jézu a ye Balebangikɔn gi yé é lé a lɛ léé: I a yé loo? I béli; té i wenyané kɛlɛ é dɛrɛ lo, we lé é ke tɔntɔn é mini a koɛ ta, dé ’bɛ é da bɔ i ma. 15Mi ’ko go yé é lé Juifinu lɛ léé: Mi lé é an béli, Jézu lé. 16Jézu we ’ko kɛlɛ flinyi nya, bɛwemalé Juifinu kun nyané pale ma Jézu ta.

17Naa, Jézu lé wo lɛ léé: An Ti a nyanama pana fɔɔ kyɔ; yé maa a anzé pana é ziin. 18Bɛwemalé Juifinu nwa a ma taawo plɛplɛ, léé, wa gyɛ, flinyi sɛrɛle saa lé we ma kaan lo, naa, ébo dan Kazambale ma ’bɛ laale nya ébozen ti, amalé.

A se a Bale Be lɛ

(Jn 9:1–17)

19Bɛwemalé Jézu kun wefele ma é ziin, yé é lé wo lɛ léé: Maa fe ka lɛ kyɔ webozen nya, maa Bale Be, an ’ka bɔa we do kpen kɛlɛle lɛ anbo ’wuo gi lo; we lé maa an Ti ye a kɛlɛna, yee saa lé maa a kɛla. Yé we faa lé an Ti ke a kɛlɛna, yee duo lé maa a Be ke a kɛlɛna é ziin. 20Naa, maa Bale Be, an sɔ an Ti lɛ, yé we faa lé an Ti ke a kɛlɛna, é wo gɔɔn an lɛ, yé koɛnu lé wo ke blɛn é mini a ’konu ta, é dan wo gɔɔn lɛ an lɛ, yé ’bɛ é dan ka ’léé ma lɛ ka ma. 21Naa, fɛan zo lé an Ti éé munu nwaan gamunu va ’té éé wo bélié, a zo duo lé mi lé é sɔ an lɛ léé, maa a béli, ’bɛzan lé maa a bélié. 22An Ti ’ka mi do kpen lé we blé lo, naa, maa lé an ke a Be nya, é weblele faa bɛ pa maa ɛ lee, 23léé, fɛan zo lé woo an Ti tɔ bɔa, wo maa, a Be, tɔ bɔ a zo. Mi lé é ’ka maa Bale Be tɔ bɔa lo, an Ti lé é an pa zia, é ’ka ’bɛ tɔ bɔa lo. 24Maa fe ka lɛ kyɔ webozen nya, mi lé éé an dére maan, yé éé bli voo mi lé é an pa zia, a lɛ, vole é yuɛma lé a glɛ ’ka lo, é a ’bɛzan gi, yé wo ’ka dan alé we ble lɛ monomono lo; naa, é so ga lee, yé é wɔra vole é yuɛma gi. 25Maa fe ka lɛ kyɔ webozen nya, a bléyi é dan bɔ lɛ yé é bɔ sin, ’bɛ bléyi va gamunu é dan maa Kazambale Be dére ’ma lɛ, yé woan wo dan a ’ma lɛ bɛ, wo dan béli lɛ. 26Fɛan zo lé an Ti bozen ke vole é yuɛma ’wuo nya, a zo duo lé é a se kɛlɛ maa é Be lɛ léé, an kɛlɛ vole é yuɛma ’wuo nya é ziin. 27Yé maa a blami Be nya; bɛwemalé é a se kɛlɛ an lɛ léé, an munu lé we ble. 28Té ka gi é vuru ’bɛ ma lo. A bléyi é dan bɔ lɛ yé yɛrɛgimunu faa é dan an dére ’ma lɛ, yé wo dan bɔra lɛ yɛrɛ gi; 29munu lé wo wezin kɛlɛ, wo dan nwa lɛ yé wo vo é yuɛma lɛɛfaama ’bɛ glɛ ’ka dɔa lo; naa, munu lé wo wenyané kɛlɛ, wo dan nwa lɛ wolé we blele we ma.

Jézu lé wenayezannu

(Lk 7:21–23; Kw 3:22–24)

30Maa ’ka bɔa we do kɛlɛle lɛ anbo ’wuo gi lo. We lé maa a maan, a yɛrama lé maa we blé; yé maa ’ka anbo lé blibɔmawe kɛlɛna lo; naa, mi lé é an pa zia, alé blibɔmawe lé maa ke a kɛlɛna, bɛwemalé an we blé tegele.

31Dé maa a anbozen lé wenayezan nya, ’té an dére ’ka webozen nya lo. 32Mi bɛ ɛ ke anlé wenayezan nya, yé maa a gi dɔɔ léé, an mawe lé é ke a fena, ’bɛ a webozen nya. 33Ka mi nwunvɔ Jan va, yé é webozen ma we fe. 34Dé é a anzé nya, an mawe ’ka a gi léé, mi an ma we zin fe lo, naa, maa a we ’ko fena ka sile we gi we ma. 35Jan ɛ ke kyɛbɔ lé é ke bina ’té éé blé, a nya, yé ka a a va léé, ’wo gi é nana a san va bléyi do nya. 36We lé ’bɛ an ma we fé, ’bɛ blɛn mini Jan lé an ma we fele ta; nyanamanu lé an Ti a nɔ an lɛ léé, maa wo pa, nyanama ’ko bozennu lé maa ke a pana, woo ɛ an ma we fé léé, an Ti ɛ an pa zia. 37Yé an Ti lé é an pa zia, yeebozen ɛ an ma we fe. Yé ka ’ka tan a dére ’ma lɛ monomono lo; yé ka ’ka tan a yara ye lɛ monomono lo, 38yé maa lé é an pa zia, ka ’ka ka bli vo lɛ an lɛ monomono lo, amalé a dére ’ka voo ka gi lo. 39É a ka gi léé, vole é yuɛma lé a glɛ ’ka lo, a ’wuo a Kazambale lé sɛbɛ nya, amalé ka ke a gi kulina. Kazambale lé sɛbɛ ’ko, ’bɛ ɛ an gɔɔn‐an ka lɛ. 40Yé é ’ka sɔ lɛ ka lɛ léé, ka da an va ka vole é yuɛma we gi lo.

41Maa ’ka an tɔbɔle naginina munu va lo. 42Naa, maa ka dɔɔ: maa a gi dɔɔ léé, Kazambale ’ka sɔ lɛ ka lɛ lo. 43Maa da an Ti tɔ gi, yé ka ’ka an si lɛ lo. Yé dé mi bɛ da ébo tɔ gi, ka ’bɛzan sié. 44Ka a ka ke tɔ bɔna, yé Kazambale lé ’bɛ ke Bale nya é do kpen, ka ’ka a va léé, ’bɛ é ’wo tɔ bɔ lo; ka bɔa ka bli vole lɛ an lɛ kaa? 45Té é dɔ ka gi léé, maa ɛ dan we dɔ lɛ ka nwiin an Ti va lo; mi lé é dan we dɔ lɛ ka nwiin, Moizi lé ka bli ke a lɛ bɛ, yee lé. 46Naa, Moizi anlé we gyɛ sɛbɛ gi, bɛwemalé dé ka a é pale Moizi ta weboen nya, ’té ka dan pa lɛ an dére ta é ziin. 47Naa, wenu lé é a gyɛ sɛbɛ gi, dé ka ’ka dɔ lɛ ’bɛ ta lo, ka dan dɔ lɛ an dérenu ta kaa?

Currently Selected:

Jan 5: GOURU

Highlight

Copy