Jan 21
21
Jézu bɔra é zuomunu sɔrafié va
(Éz 26:12; Lk 5:1–11)
1’Bɛ zuo, Jézu ébo nagɔɔn é ziin é zuomunu lɛ Tibériad wɛyi gɔ la. Yé ébo nagɔɔn fɛan zo, yee lé é ke ’ko.
2Simɔn Piɛri koo, Tɔmas lé wo wo yaa fiané nya koo, Galilé tɛrɛ la Kanazan Natanaɛl koo, Zébédé benu koo, Jézu zuomunu va mi bɛ fié koo, wo ana ékeva. 3Simɔn Piɛri lé wo lɛ léé: An go pɔ gyɛ lɛ. Wo lé a lɛ léé: Ko é ziin, ’ko go i zuo. Wo bɔra yé wo vɔ ’yitagoro kiéné gi, yé ’bɛ yi duo nya é béli wo ’ka fɛ do kpen ye lɛ lo. 4Bladi pa aan wo, ’té Jézu a é dɔle wɛyi gɔ la. Naa, a zuomunu ’ka a gi dɔɔ lɛ léé, Jézu lé, lo. 5Jézu lé wo lɛ léé: Anlé nénu, fɛ do kpen ’ka ka lee blefɛ nya loo? Yé wo lé a lɛ léé: Iin. 6Yé é lé wo lɛ léé: ’Ka pɔgyɛséli nwɛɛn ’yitagoro bɛyilazia, yé ka dan pɔ gyɛ lɛ. Yé wa nwɛɛn yé séli gi pɔ kiɛre lé we ma lé wo ’ka bɔalɛ léé, wo séli gana lo. 7Yé Jézu zuozan lé é sɔ Jézu lɛ, é lé Piɛri lɛ léé: Mizan lé. Simɔn Piɛri a ’ma aan wo léé, Mizan lé, ’té é a é porole, tɔɔn yé é sɔ vɔ é tɛrɛ la yé é vɔ ’yi va. 8Zuomunu pɔnénu da ’yitagoro gi, yé pɔgyɛséli lé é ke é fanle pɔnu nya, wa gana. Wo ’ka é sile gɔɔn ma baa lo, dé mɛtrɛ yɔ soru léé? a zo.
9Wo bɔra aan wo gɔ la yé wo tɛɛn kyɛ ye, ’té pɔ a kyɛ ma, yé buru ana. 10Jézu lé wo lɛ léé: Pɔnu lé ka wo gyɛ lao bɛ, ’ka da a ke nya. 11Simɔn Piɛri vɔ ’yitagoro gi yé pɔgyɛséli lé é ke é fanle pɔ blɛnblɛn yɔ sɔrafié wɔlɛ vu ta yaa nya, é a gana gɔ la. Pɔ a dioo, pɔgyɛséli ’ka fia lɛ wo ma duowo lo. 12Jézu lé wo lɛ léé: ’Ka da fɛ ble. A zuomunu a gi dɔɔ léé, Mizan lé, bɛwemalé é ’ka dɔ lɛ wo va mi do gi léé, é we laa a lee léé: De ɛ ke i nyaa? lo. 13Jézu bié, yé é buru si, yé é a nɔ wo lɛ, yé é pɔ nɔ wo lɛ é ziin.
14É sia Jézu nwale ma gamunu va, abo nagɔɔnle é zuomunu lɛ gɔnɔ yaazan lé ke bɛ.
Jézu léé: ’I fɛblele nɔ anlé ’blanu lɛ
(1 Pi 5:1–4)
15Wolé fɛblele zuo, Jézu lé Simɔn Piɛri lɛ léé: Jonas be Simɔn, an sɔ i lɛ é mini an sɔ i bɔlunu ’konu lɛ fɛan zo, a taa? É lé a lɛ léé: Iin, Mizan, bé gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanénu lɛ. 16É lé a lɛ a gɔnɔ fiézan nya léé: Jonas be Simɔn, an sɔ i lɛɛ? Piɛri lé a lɛ léé: Iin, Mizan, bé gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanu lɛ. 17É lé a lɛ a gɔnɔ yaazan nya léé: Jonas be Simɔn, an sɔ i lɛɛ? É a fe aan wo Piɛri lɛ a gɔnɔ yaazan nya léé: An sɔ i lɛɛ? yé Piɛri bli kyɛ dɔ. Yé é lé a lɛ léé: Mizan, i we faa gi dɔɔ. Bii a gi dɔɔ léé, i sɔ an lɛ. Jézu lé a lɛ léé: ’I fɛblele nɔ anlé ’blanu lɛ. 18Maa fe i lɛ kyɔ webozen nya, dé i a mi boroné nya, biibozen ɛ ilé kyɛsidi dɔa i gyɛn, yé fɛ lé ana sɔ i lɛ yé i go ana. Naa, dé i kɛlɛ segele, i dan i bɛ nwa lɛ, yé mi bɛ é dan ilé kyɛsidi dɔ lɛ, yé fɛana ’ka sɔ lɛ i lɛ lo, yé é go i nya ’bɛna. 19É we ’ko fe, Piɛri é dan ga lɛ fɛan zo Kazambale tɔ kɛlɛle blɛn we gi, a gɔɔnle we ma. É we fe aan wo ’ko zo, yé é lé a lɛ léé: ’I da an zuo.
Jézu zuozan lé é sɔ Jézu lɛ
(2 Pi 1:13–14)
20Piɛri nɔla, yé zuozan lé é sɔ Jézu lɛ, é a ye dana ’wo zuo, mi lé é tɛn Jézu ma ’té wa fɛ blena yi la bɛ yé é léé: Mizan, de ɛ dan i pa lɛ munu lee? yee lé. 21Piɛri a ye aan wo, é lé Jézu lɛ léé: Mizan, mi ’ko, mɛ we ɛ dan bɔ lɛ ’bɛ maa? 22Jézu lé a lɛ léé: Dé é sɔ an lɛ léé, ’é vo ana fɔɔ yé an da, ’bɛ mɛ ɛ kɛla i lɛɛ? Bii, ’i da an zuo. 23’Bɛ zuo, we ’ko gun gyɛle sɔɔla bwenu méléna léé, Jézu zuozan ’ko, é ’ka dan ga lɛ lo, dɔlé té Jézu ’ka a fe lɛ Piɛri lɛ léé, é ’ka dan ga lɛ lo lo; naa, é léé, dé é sɔ an lɛ léé, ’é vo ana fɔɔ yé an da, ’bɛ mɛ ɛ kɛla i lɛɛ?
24Jézu zuozan ’ko ɛ ke we ’konu nayezan nya, yé é wo gyɛ sɛbɛ gi. Yé ko a gi dɔɔ léé, a dére a webozen nya.
25Jézu we bɛnu kiɛre kɛlɛ é ziin. É dɔ an gi léé, dé wa faa gyɛ sɛbɛnu gi do do, ’té sɛbɛnu ’ka dan sɔ lɛ tɛrɛ bozen ta lo.
Currently Selected:
Jan 21: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
