Wepélisiananu 9
9
Kazambale é gi pa do Noé va
(WP 1:26–29; Fw 21:12–14, 20)
1Bale Noé valé a benu drɔɔ vo, yé é lé wo lɛ léé: ’Ka né yaa, ’ka kɛlɛ kiɛre, ’ka fan tɛrɛ la. 2Tɛrɛlawinu faa koo, lagi mianénu faa koo, fɛnu faa lé woo kɔɔan tɛrɛ la koo, wɛyi va pɔnu faa koo, wo dan kana lɛ ka lee, yé kalé we ma lé gligli é dan zén lɛ wo gi. An wo faa tere pa ka lee. 3Fɛ faa lé éé giéan é yuɛma, wo dan kɛlɛ lɛ kalé fɛblele nya. Maa a faa nɔ ka lɛ bélé lu drɔɔ zo. 4Naa, we do ana; té ka wi ble ’é vo é yuɛmafɛ nya lo, ’bɛ gi léé, a nyɛ. 5Maa dan ka faa nyɛ lɛgi pa lɛ; maa dan a lɛgi pa lɛ winu ma; maa dan a lɛgi pa lɛ munu ma; dé mi do mi gyɛ, maa dan a lɛgi pa lɛ ’bɛzan ma. 6Dé mi do mi nyɛ zana, munu é dan ’bɛzan nyɛ zana lɛ é ziin; Kazambale mi kɛlɛ é dɔbɛ gi, azama. 7Yé ’kaa, ’ka né yaa yé ’ka kɛlɛ kiɛre, yé ’ka nwɛɛn tɛrɛ la, yé ’ka fan a ta.
8Yé Kazambale we fe é ziin Noé valé é benu lɛ yé é léé: 9Ka ye, maa gi pa do ka va, ka valé ka kulunu va. 10Fɛ yuɛmalenu faa lé wo ke ka va, dé mianénu léoo, dé flawinu léoo, dé bwigiwinu léoo, ka faa lé ka si ’yitagoro gi, tɛrɛlawinu boen‐oo, maa gi pa do ka faa va. 11Maa gi pa do ka va, léé, lɛɛ blɛn ’ka dan mi faa gyɛ lɛ é dɛrɛ lo, yé lɛɛ blɛn ’ka dan tɛrɛ sɛrɛ lɛ é ziin lo. 12Yé Kazambale léé: Ka koo, wi yuɛmalenu lé wo ke ka va, wo valé wolé nénu nya koo, an gipale do ka va lɛɛfaama tɔmase lé ke ’ko: 13maa anlé bɔmlɛ pla lati wuo, yé é dan kɛlɛ lɛ maa valé tɛrɛ gi pale do tɔmase nya. 14Dé an lati zén ékeva tɛrɛ nwiin loru, ’té bɔmlɛ é dan bɔra lɛ lati wuo. 15Yé a sele é dan dɔ lɛ an gi léé, maa gi pa do ka valé fɛ yuɛmale gɔnɔ faa nya; yé lɛɛ blɛnblɛn ’ka dan da lɛ é dɛrɛ yé é fɛ faa sɛrɛ lo. 16Bɔmlɛ é dan bɔra lɛ lati wuo, yé maa dan a nagini lɛ yé a sele é dan dɔ lɛ an gi léé, maa, Kazambale, an gi pa do fɛ yuɛmale gɔnɔ faa va, yé gipale ’ko a lɛɛfaama we nya, a glɛ ’ka lo. 17Yé Kazambale lé Noé lɛ léé: Maa valé tɛrɛ la fɛnu faa gi pale do tɔmase lé ke bɛ.
18Noé benu lé wo bɔra ’yitagoro gi, wa Sɛm valé Sam valé Jafɛt nya. Sam a Kanaan ti nya. 19Noé benu yaa lé ke bɛ; tɛrɛ la munu faa a wo ɛ kulunu nya.
20Noé kun féi pale ma, yé é dɔrɔféi pa. 21Yé é dɔrɔ mini yé dɔrɔ a gyɛ yé é sɔ si ’é ta ’élé sɔkɔn wuo. 22Kanaan ti Sam ’é ti porole ye, yé é a fe é bwenu lɛ béera. 23Yé Sɛm valé Jafɛt sɔ blɛn si, yé wa dɔ ’wo lala yé wo vo tawona ’wo zuo zia, yé wo sɔ zén wo ti porole ta. Wo yara vo aan wo é nɔlale yé wo ’ka ’wo ti porole ye lɛ lo. 24Dɔrɔ si aan wo Noé ta, we lé a be voélazan a kɛlɛ a lɛ, é a ’ma. 25Yé é léé: An bale pa Kanaan ma. ’É kɛlɛ é bwenu lé luunu lé luu nya ma. 26Yé é lé é ziin léé: ’Wo Gakelebale, Sɛm lé Bale, drɔɔ vo. Yé Kanaan ’é kɛlɛ wolé luu nya ma. 27Jafɛt lé fɛna ’é kɛlɛ blɛn ma. ’É nyana Sɛm lé sɔkɔn wuo ma. Yé Kanaan ’é kɛlɛ wolé luu nya ma. 28Lɛɛ blɛn dale zuo Noé vo é yuɛma lɛɛ wuru do yɔ sɔrafié wɔlɛ vu.
29Noé yi faa kɛlɛ lɛɛ wuru ziɛn yɔ sɔrafié wɔlɛ vu, yé é ga.
Currently Selected:
Wepélisiananu 9: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
