Wepélisiananu 29

Jakɔb a Laban va

(WP 24:10–32)

1Jakɔb zén ta va yé é go yirinwana munu lé tɛrɛ la. 2É a nagini yé é ’yiguru do ye féi; yé ’bla trubɛ palu yaa a é yiale a bɛ do la, naa, ’yiguru ’ko gi lé woo ’yiminile no trubɛnu lɛ. ’Yiguru lɛtangɔlɛ a blɛn. 3Trubɛnu faa éé zén‐é ékeva ’bɛna; wo gɔlɛ sié ’yiguru’léé yé woo yiminile no trubɛnu lɛ; a zuo woo gɔlɛ plaan é pai ’yiguru’léé.

4Jakɔb lé ’blatabinmunu lɛ léé: An bwenu, ka si kyɛɛn? Wo léé: Ko si Karan. 5É lé wo lɛ léé: Ka Nakɔɔ be Laban dɔɔ? Wo léé: Ko dɔɔ. 6É lé wo lɛ léé: É a drɔɔ? Wo léé: lin, é a drɔɔ, a lu Rasɛl lé é dan trubɛnu nya bɛ. 7É léé: Yiri a tan blɛn, yé trubɛnu zén ékeva bléyi ’ka tan bɔ lɛ lo. ’Ka ’yi nɔ ’blanu lɛ, ’bɛ zuo ’ka go wo nya yé wo lu ble. 8Wo léé: Gba. Trubɛnu faa ’é zén ékeva faa ’lɛ; ’bɛ zuo yé wo gɔlɛ si ’yiguru ’léé yé wo ’yi nɔ ’blanu lɛ.

9É a tan wefena wo lɛ aan wo, Rasɛl da é ti lé trubɛ nya; naa, é a ’blatabin le nya. 10Jakɔb é bu bwe Laban lu Rasɛl valé a bu bwe Laban lé trubɛ ye aan wo é bié yé é gɔlɛ si ’yiguru’léé yé é ’yi nɔ é bu bwe Laban lé trubɛ lɛ. 11Yé Jakɔb Rasɛl tuu gyɛ yé é wuvɔ dére biéle nya. 12Jakɔb a fe Rasɛl lɛ léé, i ti lele lé ke ’é nya, Rébéka be lé ke ’é nya, yé é go vlan a fe lɛ é ti lɛ. 13Laban é buru be Jakɔb tɔ ’ma aan wo tɔɔn, é go a va vlan nya yé é a tuu gyɛ yé é pwɛpwɛ vɔ a ma yé é da a nya élé kɔn’léé. Jakɔb é zuo wenu faa fe Laban lɛ, 14yé Laban lé a lɛ léé: Wezen lé, bii a an wɔlɛ valé anbo wi nya.

Jakɔb le si

Jakɔb moné do kɛlɛ Laban va. 15A zuo Laban lé Jakɔb lɛ léé: Bii a an lele nya ’naan, ’bɛ ma lé i nyanama paan an va é plaa? Maa i gooli pa fɛ nɔɔ? Bé fe an lɛ. 16Naa, Laban lu a fié; wa vininzan laama Léa, yé wa voélazan laama Rasɛl. 17Léa yuɛ a é zima, naa, Rasɛl dɔ le dɔbɛ gi é zima yé a yara a é nɔnɔmi. 18Rasɛl sɔ Jakɔb lɛ yé é léé: Maa dan nyanama pa lɛ i va lɛɛ sɔrafié i lu voélazan Rasɛl lé we ma. 19Laban léé: A nɔle i lɛ sɔ an lɛ é mini a nɔle mi bɛ lɛ ta. ’I vo an va.

20Amalé Jakɔb nyanama pa lɛɛ sɔrafié Rasɛl we ma; wa a yuɛ gi bélé yi sɛ zo; lezan sɔ a lɛ, azama. 21A zuo Jakɔb lé Laban lɛ léé: Anlé bléyi lɛ sɔɔ; ’i an na nɔ an lɛ yé maa yi gyɛ a va. 22Laban ana munu faa zé ékeva yé é fɛti kɛlɛ. 23É béli, é lu Léa si yé é goan Jakɔb va yé ’bɛ yi gyɛ a va. 24Yé Laban é wuo le Zilpa nɔ é lu Léa lɛ a wuozan nya.

25Tu kini é bladi tɔɔn, é a ye Léa nya. Yé Jakɔb lé Laban lɛ léé: Mɛ lé bé kɛlɛ an lɛ bɛɛ? Maa ’ka nyanama pa lɛ i va Rasɛl lé we ɛ ma loo? Mɛmalé i dabli kɛlɛ an lɛɛ? 26Laban léé: Ko va na, wo ’ka né voélazan no bo lɛ é vininzan ’lɛ lo. 27’I flɛyi do lɛ sɔɔ a ’kozan va yé ko dan a koɛzan nɔ lɛ i lɛ é ziin, nyanama lé i dan a pa lɛ an va‐é ziin lɛɛ sɔrafié bɛ gi bɛ, a mafɛ nya. 28Jakɔb a kɛlɛ a zo, é flɛyi lɛ sɔɔ Léa va; a zuo Laban é lu Rasɛl nɔ a lɛ a na nya. 29Yé Laban é wuo le Bila nɔ é lu Rasɛl lɛ a wuozan nya. 30Jakɔb yi gyɛ Rasɛl va é ziin yé é sɔ a lɛ é mini Léa lɛ; yé Jakɔb nyanama pa Laban va é ziin lɛɛ sɔrafié.

Jakɔb lé nénu

(WP 49:1–28)

31Gakelebale a ye léé, Léa ’ka sɔ lɛ é zana lɛ lo; yé é a kɛlɛ néyaazan nya, naa, Rasɛl vo sɔnzan nya. 32Léa bɔn si yé é né yaa gɔné nya yé é a tɔ pa Rubɛn yé é léé: Gakelebale anlé kleblele ye, yé sin an dan sɔ lɛ an zana lɛ. 33É bɔn si é ziin yé é né yaa gɔné nya yé é léé: Gakelebale a ’ma léé, maa ’ka sɔ lɛ an zana lɛ lo, amalé é mi ’ko nɔ an lɛ. Yé é a tɔ pa Siméɔn. 34É bɔn si é ziin yé é né yaa gɔné nya, yé é léé: Maa né yaa a lɛ gɔné nya yaa, amalé sin, an zana é dan yere lɛ an ma. Amalé wa tɔ pa Lévi. 35É bɔn si é ziin yé é né yaa gɔné nya yé é léé: Sin, maa dan Gakelebale tɔ zin fe lɛ. Amalé é a tɔ pa Juda. Yé é daan né yaale ma.

Currently Selected:

Wepélisiananu 29: GOURU

Highlight

Copy