Wepélisiananu 27

Izak Jakɔb drɔɔ vo

(WP 25:21–24; Ébr 11:20; 12:16–17)

1Izak kɛlɛ é kwa, yé a yuɛ fuu ’ka a ta lo yé é ’ka fɛna yé é dɛrɛ lo. Yé é ’é be vininzan Ézau laa yé é léé: An be. Yé ’bɛ léé: Maa lo. 2Izak léé: Bé ye do, maa a é kwa yé an ’ka an gayi dɔɔa lo. 3Amalé sin, ilé wigyɛfɛnu si ma, ilé sakɔlɛ koo, ilé sa koo, ’i wo si ma, ’i go bwii yé ’i bwiiwi gyɛ an lɛ ma. 4Zian lé é sɔ an lɛ, bé dɔne ma yé ’i da a nya an lɛ maa a ble, anlé i drɔɔ vole we gi an gale ’lɛ. 5We lé Izak ke a fena é be Ézau lɛ bɛ, Rébéka tɔné a é dɔle a lɛ. Yé Ézau go lu pa lɛ.

6A zuo Rébéka lé é be Jakɔb lɛ léé: Maa lé ma: bé ye do, maa we ’ma i ti ta, ’té éé we fé i bwe Ézau lɛ. 7É lé a lɛ léé, ’i go bwiiwi gyɛ ’é lɛ, yé i zian dɔne ’é lɛ yé ’é a ble yé ’é i drɔɔ vo Gakelebale yuɛ va ’é gale ’lɛ. 8Sin, an be, we lé maa dan a fe lɛ i lɛ, ’i tɔné dɔ an lɛ ma. 9’I go boliné zima fié si trubɛnu va yé ’i da a nya an lɛ yé maa i ti sɔlɛzian dɔne a nya; 10yé i dan go lɛ a nya i ti va yé é a ble yé é i drɔɔ vo ’é gale ’lɛ. 11Jakɔb lé é bu lɛ léé: An bwe Ézau a makyɛɛzan nya yé an makyɛɛ do kpen ’ka lo. 12Dé an ti é bɛ mane an ma nii? ’Té maa kɛla viézan nya a yuɛ gi yé é dan bale pa lɛ an ma; é ’ka dan an drɔɔ vo lɛ lo. 13A bu lé a lɛ léé: An be, bale pale ’ko, ’é dia maa ɛ ta ma. ’I tɔné dɔ an dére lɛ é pla, ’i go wo si é wo an lɛ. 14Jakɔb go wo si lɛ yé é da wo nya é bu lɛ, yé a bu a ti sɔlɛzian dɔne. 15A zuo Rébéka ’é be vininzan Ézau lé sɔnu si, alé sɔnu va sɔ zima baba lé é a ye kɔn gi, yee lé é a si yé é a nɔ é be voélazan Jakɔb lɛ, léé, ’bɛ a zén ’é ta. 16É bolikɔlɛ wo a bɛnu ma, é valé a bɔrɔ lé a makyɛɛ ’ka lo, a ma. 17Zian valé buru lé é a dɔne é a pa é be Jakɔb lee.

18Jakɔb go é ti va yé é léé: An ti. Yé Izak léé: Maa lo. An be, de ɛ ke i nyaa? 19Jakɔb lé é ti lɛ léé: Maa a i be vininzan Ézau nya; we lé bé fe an lɛ, maa a kɛlɛ. Ilé zanté, ’i nwa, ’i nyana ma, ’i anlé bwiiwi ble ma yé ’i an drɔɔ vo ma. 20Izak lé é be lɛ léé: I! An be, bé ye tɛkɛɛ? Jakɔb a zi pa léé: Gakelebale, ilé Bale, da a nya an lɛ. 21Izak lé Jakɔb lɛ léé: An be, ’i bié yé an bɛ mane i ma, dé bii a an be Ézau nya webozen nyaa? yé maa ye. 22Jakɔb bié é ti Izak ma yé ’bɛ é bɛ mane a ma yé ’bɛ léé: I dére a Jakɔb dére nya, naa, i bɛnu a Ézau bɛnu nya. 23A bɛ makyɛɛ a, bélé a bwe Ézau bɛ zo, amalé a ti ’ka a dɔɔ lɛ lo yé é a drɔɔ vo. 24É léé: Bii ɛ ke an be Ézau nyaa? Yé Jakɔb léé: Maa lé. 25Izak léé: Bé fɛ nɔ an lɛ, yé maa an be lé bwiiwi ble yé maa i drɔɔ vo. Jakɔb a nɔ a lɛ yé é a ble; é dɔrɔ nɔ a lɛ é ziin, yé é a mini.

26Yé Jakɔb ti Izak léé: An be, ’i bié yé i an tuu gyɛ. 27Jakɔb bié yé é a tuu gyɛ. Izak alé sɔnu gin si; a zuo é a drɔɔ vo yé é léé: An be gin a bélé féi lé Gakelebale a drɔɔ vo, a gin zo.

28Kazambale ’é lagi fli vɔ i ta ma;

Yé ’é tɛrɛ nyɔnɔ nɔ i lɛ ma;

’É ’sa valé dɔrɔ nɔ i lɛ kiɛre ma.

29Munu ’é pla i wuo ma,

Bɛnnu ’é dia ’wo bli la i ’lɛ ma,

’I kɛlɛ i bwenu nwiinzan nya ma,

I bu benu ’é dia ’wo bli la i ’lɛ ma.

Dé mian é bale pa i ma, ’wo bale pa ’bɛzan ma ma,

Yé dé mian é i drɔɔ vo, ’wo ’bɛzan drɔɔ vo ma.

30Izak nyaa Jakɔb drɔɔ vole nya yé Jakɔb si é ti Izak va tɔɔn, a bwe Ézau si lu pana. 31É zian dɔne é ziin yé é goan é ti lɛ; yé é lé é ti lɛ léé: An ti ’é nwa yé ’é be lé bwiiwi ble yé ’i an drɔɔ vo ma. 32A ti Izak lé a lɛ léé: De ɛ ke i nyaa? Yé é léé: Maa a i be vininzan Ézau nya. 33Yé Izak gi nyɛ blɛn kini yé é léé: Yé de ɛ da bwiiwi nya an lɛ lao ’koo? Maa a faa ble i dale ’lɛ yé maa azan drɔɔ vo. A drɔɔ é dan vo lɛ a zo weboen nya. 34Ézau é ti dére ’ma aan wo, é sia plɛplɛ wuvɔle nya yé é lé é ti lɛ léé: An ti, ’i maa drɔɔ vo é ziin. 35Izak léé: I zuané da gi kinile nya yé é ilé drɔɔ vole si. 36Ézau léé: A tɔ laale Jakɔb lé we ma lé é dɔ an pa gi gɔnɔ fiéé? É an dɔna si yé sin é da anlé drɔɔ vole si lɛɛ? Yé é lé é ziin léé: I ’ka drɔɔ vole do kpen tadɔ lɛ anzé nya loo? 37Izak lé Ézau lɛ léé: Bé ye, maa a dɔ izan nya, yé maa a bwenu faa kɛlɛ a wuomunu nya, yé maa ’sa valé dɔrɔ nɔ a lɛ. An be, maa mɛ fɛ ɛ kɛla i lɛɛ? 38Ézau léé: An ti, drɔɔ vole ’ko do kpen ɛ ke i lee? An tioo, an ti! ’I anzé drɔɔ vo é ziin! Yé Ézau é dére bié plɛplɛ yé é wuvɔ. 39A ti Izak lé a lɛ léé:

Bé ye, tɛrɛ nyɔnɔ ’ka dan kɛlɛ lɛ i nyanana lo,

Yé lagi fli ’ka dan vɔ lɛ ana lo.

40I dan ilé fɛ blele ye lɛ ilé gwɔun ma

Yé i dan kɛlɛ lɛ i zuané wuozan nya.

Naa, dé i vo kuunna fɔɔ yé i si alé se wuo,

Bale lé é a vɔ i bɔrɔ ma, i dan a kini lɛ.

41Jakɔb za Ézau bɔn fan a ti lé a drɔɔ vole we ma; yé Ézau lé é bli gi léé: Fɛan zo lé an ti gyɛboyinu a bɔna é pu, dé ’bɛ nyaa faa, maa dan an zuané Jakɔb gyɛ lɛ. 42We lé Rébéka be vininzan Ézau a fe, wa glewo Rébéka lɛ. Amalé é ’é be voélazan Jakɔb laa yé é lé a lɛ léé: I yua, i bwe Ézau é dan élé we lɛgi pa lɛ i ma i gyɛle nya. 43Sin, an be, ’i tɔné dɔ an dére lɛ. ’I nwa, ’i fwi ’ko, yé ’i go an bwe Laban va Karan; 44’i vo a va bléyi ke nya fɔɔ yé i bwe bli é dɔrala, 45yé a bli ’ka flian i ma é dɛrɛ lo yé we lé bé kɛlɛ a lɛ yé é san a gi. Yé maa we pa i lɛ zia léé, ’i da. Mɛmalé an vuruan ka fiénu gi yi do kpen nyaa?

46Rébéka lé Izak lɛ léé: Anlé tɛrɛla lɔrɔ nyaa an ma Et lunu lé we ma. Dé Jakɔb ’bɛ zo le si Et lunu va, tɛrɛ ’ko la blɛnnu va, ’té mɛmalé an voo é yuɛmaa?

Currently Selected:

Wepélisiananu 27: GOURU

Highlight

Copy