Wepélisiananu 25

Abraam gale

(WP 49:29–33)

1Abrama le do si é ziin, wa laama Kétura. 2Zimiram koo, Jɔkisan koo, Médan koo, Madian koo, Jisibak koo, Suas koo, é wonu yaa a lɛ. 3Jɔkisan Séba valé Dédan yaa. Asisuunu koo, Létusinu koo, Léuminu koo, Dédan benu lé ke wo nya. 4Éfa koo, Éfɛɛ koo, Énɔk koo, Abida koo, Eldaa koo, wa Madian benu nya. Kétura benu faa lé ke bɛ.

5Abraam élé fɛnu faa nɔ Izak lɛ. 6É blɛ kɛlɛ é bwɛnu benu lɛ; bléyian va lé é a tan é yuɛma é wo pa zia é be Izak ma baa yirinwanazia tɛrɛnu la.

7Abraam lɛɛ lé ke ’ko: é lɛɛ kɛlɛ tɛrɛ la yɔ sɔraa wɔlɛ vu ta soru. 8Abraam ga é kwa ta gi nanale nya. É a kwa yé a lɛɛ kɛlɛ kiɛre yé é go élé munu va. 9A benu Izak valé Ismaɛl a pa Makipéla gɔmaguru gi, Et mi Sosaa be Éfrɔn lé féi, Mamré yara. 10Féi lé Abraam a lɔ Et benu lee, yee lé. Ana lé wo Abraam valé é na Sara pa.

11Abraam gale zuo, Bale a be Izak drɔɔ vo. É nyana Lakai‐roi ’yiguru sɔnɔ.

Ismaɛl kulunu

(WP 17:20; 1 MNzfs 1:28–32)

12Abraam be Ismaɛl lé, Sara wuole Éjipiti le Agaa a yaa Abraam lɛ, a kulu lé ke ’ko:

13Ismaɛl benu tɔnu lé ke ’ko, wo kulu la tɔnu lé ke ’ko: Ismaɛl né vininzan Nébajɔt koo, Kédaa koo, Adébéél koo, Mibisam koo, 14Misima koo, Duma koo, Masa koo, 15Adad koo, Téma koo, Jétuu koo, Nafis koo, Kédima koo, woo lé. 16Ismaɛl benu lé ke bɛ. A zo lé wo tɔnu ke wolé kɔn ma kɔn ma, é valé wo gɔnɔ ma gɔnɔ ma. Wo kɛlɛ ’wolé munu guniwuo vu ta fié nya.

17Ismaɛl lɛɛ kɛlɛ lɛɛ yɔ suiɛdo wɔlɛ vu ta sɔrafié. É ga, yé é go élé munu va. 18A benu nyanale glɛ si fɔɔ Avila yé é bɔ Sure, yee lé ke Éjipiti yara bɛ, ’té dé i a gona Asiri zia. É kɛlɛ mi nya é bwenu faa méléna.

Izak be fiénu

(Rom 9:10–13)

19Abraam be Izak kulu lé ke ’ko:

20Abraam Izak yaa. Izak Rébéka si aan wo é na nya, ’té a lɛɛ a yɔ fié; a na a Aramézan Bétuɛl lé é si Padan‐Aram, a lu nya; é a Aramézan Laban buru nya. 21Izak na a sɔn le nya, amalé Izak zanté vɔ Gakelebale lɛ alé we ma. Gakelebale a ’ma, yé Izak na Rébéka bɔn si. 22Nénu a guli danna a bɔn gi yé é léé: Dé é a a zo, mɛwemalé maa bɔn sii? Yé é go a gi laa lɛ Gakelebale lee. 23Gakelebale lé a lɛ léé: Bɛn fié a i bɔn gi; dé i wo yaa tɔɔn wo dan kini lɛ ékema migɔnɔ fié nya. Bɛn do é dan kɛlɛ lɛ plɛplɛ yé é mini é bɔluzan ta yé a segelezan é dan pla lɛ a kiénézan wuo. 24Alé né yaa yi bɔ aan wo yé bé ye, fiané a a bɔn gi. 25A vininzan bɔra é tɛn bélé wikyɛɛsɔ zo. Wa tɔ pa Ézau. 26A zuo a zuané bɔra, ’té a bɛ a é kunle Ézau ganetɛn ma. Wa tɔ pa Jakɔb. Bléyian va lé wo nénu ’ko yaa ’té Izak lɛɛ a yɔ yaa.

27Nénu ’ko tin; Ézau kɛlɛ lupazan zin nya, bwiizan nya. Jakɔb a mi drɔɔ nya, yé é vo sɔkɔnnu wuo. 28Bwiiwi blele sɔ Izak lɛ, amalé Ézau sɔ a lɛ; yé Jakɔb sɔ Rébéka lɛ.

29Yi do nya Jakɔb a fɛ dɔnena aan wo, Ézau si bwi gi, ’té a wɔlɛgi nyaa a ma é baba. 30Yé Ézau lé Jakɔb lɛ léé: Ilé zanté, an wɔlɛgi nyaa an ma. ’I fɛ sɔɔn ’ko nɔ an lɛ, maa ble; fɛ sɔɔn ’ko lé maa fe yé ’maa ble. Amalé wo Ézau tɔ do pa Édom. 31Jakɔb léé: ’I dɔna dan an lee kyɔ. 32Ézau léé: Bé ye, maa a gana; an dɔna é mɛ kɛla an lɛɛ? 33Jakɔb léé: ’I bale ’nyɔɔn faa ’lɛ. Yé é bale ’nyɔɔn a lɛ yé é ’é dɔna dan Jakɔb lee. 34Jakɔb buru valé zɔrɛ zian nɔ Ézau lɛ. É fɛ ble, yé é ’yi mini, ’bɛ zuo é nwa yé é go. ’Bɛ zo lé Ézau é dɔna ye fɛ pla nya.

Currently Selected:

Wepélisiananu 25: GOURU

Highlight

Copy