Wepélisiananu 18
18
Lanjenu da Abraam va
(Ébr 13:2)
1Gakelebale bɔra Abraam va Mamré sɛnéyilinu méléna, ’té é a é nyanale élé sɔkɔn ’léé é yiéyi, yiri plɛplɛ nya. 2Abraam é yara nwa yé é a nagini; i yua, mi yaa a é dɔle alé fɛna sɔnɔ. É wo ye aan wo, é nwa élé sɔkɔn ’léé yé é go wo si lɛ zia vlan nya, yé é dia é bli la wo gane wuo. 3Yé é léé: Anzan, dé i an ye mi zin nya, té i gié maa, i wuozan ma baa lo ma. 4’Wo da ’yi sɛ nya ma, ’ka gane ma zuru, yé ’ka flin yili ’ko wuo ma. 5Maa go buru kuru do si, ka fuu dɔle ka ta we ma; ’bɛ zuo yé ka kalé zi sia; naa, we ’ko ma lé ka giéan ka wuozan sɔnɔ. Wo lé a lɛ léé: We lé bé fe, bé kɛlɛ. 6Abraam go é nya do élé sɔkɔn gi Sara va yé é lé a lɛ léé: ’I burupun zima si suo nya yaa, bé yɔɔ dɔ. Bé kɛlɛ buru nya é kele. 7Abraam go vlan nya élé trubɛnu va yé diriné do lé a wi ke tɔɔtɔɔ é zima é a si yé é a nɔ é leegɔné do lɛ yé ’bɛ go a dɔne lɛ é kele. 8Diriné ma aan wo, é a dɔra wo ma yé é dirinyɔyi valé dirinyɔyinyɔnɔ nɔ wo lɛ é ziin. Yeebozen vo é dɔle wo sɔnɔ yili wuo. Yé wo fɛ ble. 9Yé wo lé a lɛ léé: I na Sara a kyɛɛn? É léé: É a sɔkɔn gi bɛ. 10Yé wo va mi do léé: Maa dan da lɛ i va é ziin bléyi ’ko bɛ nya; bé ye, i na Sara é dan négɔné yaa lɛ. ’Té Sara a gɔnézan zuo, sɔkɔn ’léé, ’té a tɔné a é dɔle. 11Abraam valé Sara a é kwa yé wo lɛɛ a kiɛre; Sara ’ka bɔa né yaale lɛ é dɛrɛ lo. 12Sara yéri si é bli gi yé é léé: Maa kɛlɛ é kwa ’naan, an bli a we ’ko lɛ é dɛrɛɛ? Anzan a é kwa é ziin. 13Gakelebale lé Abraam lɛ léé: Mɛmalé Sara yéri si, ’té é a fé léé, ’é kɛlɛ é kwa ’naan, ’é dan né yaa lɛ webozen nyaa? 14Gakelebale kelewe aa? Bléyi lé maa a dɔ, maa dan da lɛ ’bɛ bléyi nya i va, bléyi ’ko bɛ nya, lɛɛ bɛ gi, yé Sara é dan né yaa lɛ gɔné nya. 15Sara kana amalé é viéwo yé é léé: An ’ka yéri si lɛ lo. Naa, gɔnézan léé: Gba, i yéri si.
16Munu ’ko nwa yé wo yara dɔ Sɔdɔm zia. Abraam go wo dɔ lɛ zia.
17Yé Gakelebale léé: We lé maa dan a kɛlɛ lɛ, maa a yɔɔan Abraam maa? 18Weboen lé, Abraam é dan kɛlɛ lɛ bɛn blɛn plɛplɛ nya. A pli zi lé tɛrɛ la bɛnnu faa drɔɔ é dan vo lɛ. 19Naa, maa a si a va léé, ’é ’é benu valé élé kɔngimunu béli dɔ léé, ’wo tawo Gakelebale lé zi ta, ’té woo we drɔle valé we tegele kɛla; ’bɛ zo lé, we faa lé Gakelebale a fe Abraam lɛ blivolɛdére nya, é dan a kɛlɛ lɛ. 20Yé Gakelebale léé: Siaale Sɔdɔm valé Gɔmɔɔ ma gi a gyɛna yé wolé wenyané kɛlɛ blɛɛn. 21Bɛwemalé maa dan zun lɛ yé we lé maa ’ma an tɔné gi ’ko, dé wo kɛlɛwe a ’bɛ zo webozen nyaa? yé maa a ye; yé dé wo ’ka a kɛla ’bɛ zo loo? yé maa a gi dɔɔ.
22Munu si wo va yé wo go Sɔdɔm zia. Naa, Abraam vo é dɔle Gakelebale ’lɛ. 23Abraam bié yé é léé: I dan mi tegele gyɛ lɛ zamaga nya mi nyané vaa? 24Dé mi tegele yɔ fié wɔlɛ vu a fla nii? I dan wo gyɛ lɛ zamaga nya é ziin? I ’ka dan flamunu ma we vo lɛ mi tegele yɔ fié wɔlɛ vu lé ke fla bɛ, wolé we ma loo? 25Mi tegele gyɛle mi nyané va, ’té mi tegele valé mi nyané lé we bɔ ékema, ’bɛ zo we kɛlɛle a é sile i ma baa boenwo. Mian éé tɛrɛlamunu faa lé we blé, é ’ka dan we tegele kɛlɛ lɛ loo? 26Yé Gakelebale léé: Dé maa mi tegele yɔ fié wɔlɛ vu ye Sɔdɔm, maa dan flamunu faa ma we vo lɛ wolé we ma.
27Abraam we fe é ziin yé é léé: Maa lé ma, maa lé an ke fɛpun valé kyɛyee nya é pla, an bli tadɔ plɛplɛ yé an we fe Mizan lɛ. 28Dé é vo soru yé mi tegele yɔ fié wɔlɛ vu lɛ é sɔɔ nii? I dan fla ’wii lɛ mi soru lé we maa? Yé Gakelebale léé: Dé maa mi tegele ye yɔ fié wɔlɛ soru, maa ’ka dan fla ’wii lɛ lo.
29Abraam é yara pa wefele ta a lɛ yé é léé: Dé mi tegele yɔ fié ɛ ke ana nii? Yé Gakelebale léé: ’Bɛ mi yɔ fié lé we ma, maa ’ka dan we do kpen kɛlɛ lɛ lo.
30Abraam léé: Té Mizan bli é fli lo ma, yé maa dan we fe lɛ. Dé mi tegele yɔ do wɔlɛ vu ɛ ke ana nii? Yé Gakelebale léé: Dé maa mi tegele yɔ do wɔlɛ vu ye ana, maa ’ka dan we do kpen kɛlɛ lɛ lo.
31Abraam léé: Bé ye, an bli si anbo lɛ yé an we fe Mizan lɛ. Dé mi tegele yɔ do ɛ ke ana nii? Yé Gakelebale léé: ’Bɛ mi yɔ do lé we ma, maa ’ka dan fla ’wii lɛ pelo.
32Abraam léé: Té Mizan bli é fli lo ma, yé maa ’ka dan we bɛ laa lɛ a lee é dɛrɛ lo. Dé mi tegele vu ɛ ke ana nii? Yé Gakelebale léé: ’Bɛ mi tegele vu lé we ma, maa ’ka dan fla ’wii lɛ pelo.
33Gakelebale nyaa aan wo wefele nya Abraam lɛ, é go. Yé Abraam go élé kɔn ’léé.
Currently Selected:
Wepélisiananu 18: GOURU
Highlight
Share
Copy
Want to have your highlights saved across all your devices? Sign up or sign in
Alliance Biblique de Cote d'Ivoire 1979
