Wepélisiananu 12

Gakelebale Abram laa

(WP 11:31–32; Kw 7:2–5; Ébr 11:8–9)

1Gakelebale lé Abram lɛ léé: ’I si ilé tɛrɛ la, i lelenu va, ’i si i ti lé kɔn ’léé, yé ’i go tɛrɛ lé maa dan ana gɔɔn lɛ i lɛ, a ta. 2Maa dan i kɛlɛ lɛ bɛngɔnɔ blɛn nya, yé maa dan i drɔɔ vo lɛ, yé maa dan i tɔ kɛlɛ lɛ blɛn yé bii ɛ dan mi bɛnu drɔɔ vo lɛ. 3Munuan, wo dan i drɔɔ vo lɛ, maa dan wo drɔɔ vo lɛ. Munuan wo dan bale pa lɛ i ma, maa dan bale pa lɛ wo ma, yé i ma lé tɛrɛ la lelenu faa tere drɔɔ é dan vo lɛ.

4Abram go, bélé Gakelebale a fe a lɛ fɛan zo, a zo. Yé Lɔt go a zuo. Abram lɛɛ yɔ yaa wɔlɛ vu ta soruzan nya é si Karan. 5Abram é na Sarai si, é valé é bwe be Lɔt nya; fɛnu lé é ke wo lee, é valé munu lé wo wo ye Karan, wo go wo nya. Wo zi sia gole we gi Kanaan tɛrɛ la, yé wo bɔ Kanaan tɛrɛ la.

6Abram gié ana tɛrɛ la fɔɔ yé é bɔ fɛ lé wana tɔ laama Sisɛm, ana, fɔɔ fɛna dégélé lé wana tɔ laama Moré, ana. Kanaan munu ana ’bɛ bléyi va yee tɛrɛ ’ko la. 7Yé Gakelebale bɔra Abram va, yé é léé: Maa dan tɛrɛ ’ko nɔ lɛ i kulu é kulu lɛ. Yé Abram Gakelebale banna kɛlɛ, fɛana lé é bɔra a yuɛ va bɛ, ana. 8É si ’bɛna yé é go gɔ vazia, Bétɛl lé yirinwanazia, yé élé sɔkɔnnu dɔ ’bɛna, ’té Bétɛl a yirivɔnazia, yé Ai a yirinwanazia. Yé é Gakelebale banna do kɛlɛ é ziin yé é Gakelebale tɔ laa ’bɛna. 9Yé Abram yara dɔ é ’lɛ, yé é go yirinwana bɛyilazia.

Abram go Éjipiti tɛrɛ la

(WP 20:1–18; LvS 105:13–15)

10Lɔrɔ dɔ tɛrɛ la, yé Abram go nyana lɛ Éjipiti tɛrɛ la, naa, lɔrɔ blɛn dɔ azama. 11Wo bɔ aan wo Éjipiti tɛrɛ sɔnɔ, yé é lé é na Sarai lɛ léé: Maa lé ma, maa a gi dɔɔ léé, i a le lé a yara ke é nɔnɔmi, a nya. 12Dé Éjipiti munu i ye, wo dan a fe lɛ léé, a na lo. Yé wo dan an gyɛ lɛ yé wo bii vo é yuɛma. 13Ilé zanté, bé fe wo lɛ léé, bii a an buru nya, yé wo an pa é zima ilé we ma, yé an vo é yuɛma i pli zi. 14Abram bɔ aan wo Éjipiti tɛrɛ la, yé Éjipiti munu a ye léé, lezan a é nɔnɔmi é baba. 15Faraɔn lé mi blɛnblɛnnu a ye é ziin, yé wa nɔnɔmi ze vɔ Faraɔn va, yé wo go a nya Faraɔn lé kɔn gi. 16Sarai lé we ma lé wo vo Abram pana é zima, yé ’blanu koo, dirinu koo, sokofalenu koo, nyanamapagɔnénu valé nyanamapalomu koo, sokofaledanu valé nyɔgɔménu koo, wa nɔ a lɛ. 17Yé Gakelebale manɔn blɛnnu vɔ Faraɔn valé élé kɔngimunu ma, Abram na Sarai lé we ma. 18Yé Faraɔn Abram laa, yé é léé: Mɛ we lé bé kɛlɛ an lɛ bɛɛ? Mɛmalé i ’ka a fe lɛ an lɛ léé, ’é na lé, loo? 19Mɛmalé bé fe an lɛ léé, ’é buru léé? Yé maa a si an na nya. Sin, i na lo, bé si ’ka go. 20Yé Faraɔn lé élé munu lɛ léé, ’wa bin, yee valé é na, é valé fɛnu faa lé ke a lee, wo nya.

Currently Selected:

Wepélisiananu 12: GOURU

Highlight

Copy