Kelewenu 2

Léli Sauun dale

(Jo 2:28–32; Mt 3:11; Jn 14:16, 17, 26)

1Juifinu lé fɛti lé wa kɛla Taboyi zuo yi yɔ fié wɔlɛ vu, ’té wa laama Pantekot bɛ, a yi bɔ aan wo, ’té wa é zénle ékeva yee fɛ duona. 2Tɔɔn, wo vun do ’ma sina la gi bélé fu plɛplɛ giéle zo, yé kɔn lé wo ke é nyanale a gi, é a fan. 3Yé wo nɛnɛnu ye bélé kyɛnɛnɛ zo, yé wo kini ékema yé wo zun wo faa nwiin do do. 4Yé Léli Sauun vɔ wo faa la yé wo wefele pélisia dére bɛnu gi, fɛan zo lé Léli a pa wo ’léé, a zo.

5Juifinu lé wo ke Balebɔmunu nya, ’té wo si bɛntɛrɛ faa la, wa é zénle ékeva Jérusalɛm. 6We ’ko gun gyɛle nwɛɛn fla fɛfaana, yé mi kiɛre zén ékeva yé wo faa ’wobo dére vɔle ’ma wo ta, amalé di kini wo gi. 7Wo faa gi vuru yé kwakwa vɔ wo ta, yé wo léé: Ka ye, munu lé wo ke we fena bɛ, wo faa ’ka Galilé tɛrɛlamunu nya loo? 8É kɛlɛ kaa yé ko kobo dére vɔle maan wo taa? 9Paatɛnu a, Mɛdenu a, Élamnu a; mi kenu si Mézopotami tɛrɛ la, Judé tɛrɛ la, Kapadose tɛrɛ la, Pɔnt tɛrɛ la, Azi tɛrɛ la, 10Friji tɛrɛ la, Panfili tɛrɛ la, Éjipiti tɛrɛ la, Libi tɛrɛ lé é ke Sirɛne sɔnɔ, wo faa na; Juifinu valé munu lé wo ke wozé bazorona, wo si Rom, 11yé Krétenu valé Arabunu koo, é kɛlɛ kaa yé ko faa kobo dére vɔle maan wo ta Kazambale kɛlɛwe blɛnblɛnnu fenaa? 12Yé wo faa gi vuru, yé wo ’ka ’wo ’wuo gi bɔrɔ mawe dɔɔa lo, yé wo lé ’wo ke lɛ léé: We ’ko gi lé nɔɔ? 13Naa, mi kenu we nana wo ma yé wo léé: Wo kan dɔrɔ dɛrɛ nya.

Piɛri we fe wo lɛ

14Piɛri a é dɔle munu vu ta do va, yé é siaa yé é lé wo lɛ léé: ’Kaa Juifinu, ’kaa munu faa lé ka ke Jérusalɛm, ’ka tɔné dɔ an lɛ yé ka we ’ko gi ’ma. 15É dɔ ka gi fɛan zo bɛ, vié lé. Bladi yiri plɛplɛ bɔ é wo, amalé dɔrɔ ’ka munu ’ko gyɛna lo. 16We lé balelayezan Joɛl a fe, yee lé é bɔ ’ko; é léé:

17Kazambale léé: Yi voélazannu nya an Léli é dan mi faa kun lɛ;

Ka benu valé ka lunu é dan balelawe fe lɛ,

Yé kalé pɛniɛnu é dan fɛnu ye lɛ yuɛ zi gi,

Yé kalé mi kwanu é dan nyɛ gyɛ lɛ.

18Iin, ’bɛ yinu nya an Léli é dan an wuogɔnénu valé an wuolomu kun lɛ,

Yé wo dan balelawe fe lɛ.

19Yé maa dan we blɛnblɛnnu bɔra lɛ la gi loru, ’té maa gyɛzorowenu kɛla tɛrɛ la,

Nyɛ koo, kyɛ koo, kyɛgoi koo, woo lé.

20Gunu é dan dɔra lɛ yiri yara

Yé moné é dan kɛlɛ lɛ bélé nyɛ zo

Mizan dayi blɛn tɔbɔle ’lɛ.

21Yé dé miomian Mizan tɔ laa, é dan béli lɛ.

22’Kaa Izraɛl munu, ’ka dére ’konu ’ma ma. Kazambale Nazarɛtzan Jézu ma wenu fe ka yuɛ va, gyɛzorowenu koo, we blɛnblɛnnu koo, tɔmasenu koo, wo nya, ’té Bale a kɛlɛ Jézu nya ka méléna, ka a gi dɔɔ kaboan; 23we lé Bale a kɛlɛ é kyɛn, é valé ébo dɔɔwe yɛrama lé wo Jézu ’ko pa ka lee, yé ka a nɔ mi nyanénu lɛ léé, ’wa blin yili la. 24Gale ’ka bɔ lɛ Jézu lɛ lo, naa, Kazambale a nwa gale va, gabale fuole nya a ma. 25Naa, David a ma we fe léé:

Maa Mizan yé an ’lɛ yifaama,

É a an bɛyila léé, té an si an dɔna lo we gi.

26Bɛwemalé an gi éé nanaan, ’té an nɛnɛ la a néné,

Yé an kɔlɛ boen é dan flin lɛ, ’té an bli a we lɛ,

27Naa, i ’ka dan an boen vo lɛ gamunu nyanana lo,

Yé i ’ka dan dɔ lɛ a nyi wuo léé, ilé Mi Sauun é vɔn lo.

28I mibélizinu nagɔɔn an lɛ,

I dan an fan lɛ gi nanale nya i yara.

29An bwenu, ’ka zi nɔ an lɛ yé maa kaa tra David lé we fe ka lɛ ma. É ga yé wa pa, yé a vun a kaa va kyɔ. 30É ke aan wo balelayezan nya, é a gi dɔɔ léé, Kazambale a fe ébo kunle nya léé, é dan David kululazan do nyana lɛ David lé webleblin ta. 31Amalé dé é a fe léé, wo ’ka dan ’é vo lɛ gamunu nyanana lo, yé ’é wi ’ka dan vɔn lɛ lo, ’té Krist nwale gale va lé é a ye, amalé é ke a fena. 32Jézu ’ko lé Kazambale a nwa. Ko faa a anayezannu nya. 33Kazambale a nwa aan wo é bɛyi nya, yé Léli Sauun lé a Ti a nɔle lé we fe a lɛ é kyɛn, é a ye a va, yé é a zén ko ta, fɛan zo lé ka a ye yé ka a ’ma, a zo. 34David ’ka go lɛ la gi lo, naa, yeebozen léé:

Mizambale lé anzan lɛ léé:

’I nyana an bɛyila

35Fɔɔ yé maa i nyanézannu pla i wuo.

36Bɛwemalé, Izraɛl munu, é a lé ka faa a gi dɔɔ é zima léé, Jézu ’ko lé ka a gyɛ yili la, Kazambale a kɛlɛ Mizan valé Krist nya.

37Wo we ’ko ’ma aan wo, é zun wo bli ma yé wo lé Piɛri valé nwunvɔmunu bɛnu lɛ léé: Ko bwenu, ko kɛla kaa?

38Piɛri lé wo lɛ léé: ’Ka bli nɔla ma, yé ’wo ka faa batizéwo Jézu Krist tɔ nya, Bale lé ka ma we vole we gi, yé ka dan Léli Sauun ye lɛ blɛ nya. 39Blivolɛdére a ’kaa valé kalé nénu koo, munu lé wo ke baa koo, kazé nya. Munu ’lééan Mizan kozé Bale é dan wo laa lɛ, wo ’léé duo lé. 40É wo tunu dére kiɛre bɛnu nya yé é we pla wo lɛ plɛplɛ, a fele nya léé: ’Ka kan kini bléyi ’ko vamunu naané ma.

41Munu lé wa dére nyi si, wo wo batizéwo. A yi ’ko la Jézu zuomunu ’léé taa zén a ta, dé mi baa do wuru soru léé? a zo.

42Wo yara pa nwunvɔzannu lé we paale valé nanale ékeva koo, Taboyi lé buru blele valé bazorole koo, wo ta.

Blipaalɛmunu lé wekɛlɛbɛ

43Yé kana zén munu faa do do gi, yé nwunvɔzannu we blɛnblɛn kiɛre valé gyɛzorowenu kɛlɛ. 44Yé wo faa lé wo bli ke Jézu lɛ, wo vo fɛdona, yé wolé fɛnu kɛlɛ ékeva. 45Yé wo ’wolé tɛrɛnu valé ’wolé fɛnu dan yé wo a mafɛnu guli ’wo ke ma, mi do do mawe ke a gi fɛan zo, a zo. 46Wa yi faa do do ma é nanale ékeva Balebangikɔn gi, ’té woo Taboyi lé buru blé kɔnnu gi, ’té woo fɛ blé gi nanale valé bli do nya. 47Woo Kazambale tɔ zin fé, yé wolé we kɛlɛ é zima munu faa yuɛ gi. Yé munu lé wa sina we gi, Mizambale a léglizi gi munu taa pana wo nya yi faa do do ma.

Currently Selected:

Kelewenu 2: GOURU

Highlight

Copy