Matiyu 23

Isa ka Falisilu ni seliya kalanmɔɔlu jobaliya teme

Malɛkɛ 12.38-40; Luka 11.37-52; 20.45-47

1Wo kɔ, Isa vɛ kumala jama ni a kɔbiladennu yɛ, a vɛɛ: 2«Ka mɔɔlu kalan Nabi Musa ya Taulati la, baale wo kalifanin seliya kalanmɔɔlu ni Falisilu le la. 3Ai vɛ min min si fɔla ài yɛ, ài yi wo labato. Kɛɛ ai yi ko minu kɛla, àilu kà wo ɲɔɔzii kɛ dɛ! Kamasɔlɔn ai yi mɔɔlu kalanna min na, ai tɛ wo kɛla. 4Ai yi doni gbililu silila ka wolu sii mɔɔlu kun. Ai do tɛ diɲa hali k'ai bolokɔni kelen gbu tuu doni wo la. 5#Matiyu 6.1.Ai y'ai kɛkolu bɛ kɛla fɔsa mɔɔlu y'ai ye. Wo le y'a kɛla, ai yi Alatɔɔmasilininnu bilala ai kanna ka wolu labuɲa. Juluni minu silinin aiya faani dagbolo la, ai yi wolu jaanyala. 6Ai vɛ taala feetikɛya lɔ, niwotɛ Aladalibon na, ɲamɔɔ siiyalu le diyanin ai yɛ. 7Ai vɛ taala bala lɔ, a diyanin ai yɛ ko mɔɔlu y'ai fo buɲali boloma k'a fɔ ai ma ko: ‹Kalanmɔɔ.› 8Kɛɛ ài kà diɲa mɔɔlu y'a fɔ ài ma ko ‹Kalanmɔɔ›, kamasɔlɔn Kalanmɔɔ kelen ne ài bolo. Ài tɔ bɛ yi badenma le le. 9Ài kà a fɔ mɔɔ suu suu ma duukolo kɔkan ko ài Fa, kamasɔlɔn Fa kelen ne ài bolo, min taanin kɛla Ala le, min yi haijɛnɛ. 10Ài kà diɲa mɔɔlu y'a fɔ ài ma ko ‹Kuntii›, kamasɔlɔn Kuntii kelen ne ài bolo, min taanin kɛla Masa Tɔɔmasenin ne. 11#Matiyu 20.26, 27; Malɛkɛ 9.35; 10.43, 44; Luka 22.26.Mɔɔ min buɲanin ài bɛ lɔ, wo tii le ka kan ka kɛ àiya bɔiden ne. 12#Luka 14.11; 18.14.Mɔɔ min v'a fannɔbuɲala, wo tii ma yi jiile. Ni do mɔɔ mɔɔ v'a fanmajiila, wo tii kɔlɔ yi tale.»

Seliya kalanmɔɔlu ni Falisilu ya filangafoya

Malɛkɛ 12.40; Luka 11.39-42, 44, 52; 20.47

13«Gbalo yi ài yɛ, seliya kalanmɔɔlu ni Falisilu! Àilu filangafolu! Kamasɔlɔn ài yi haijɛnɛ masaya datuunna mɔɔlu ɲa. Àilu gbu tɛ donna haijɛnɛ masaya lɔ, ado mɔɔ minu a fɛ ka don a lɔ, ài yi wolu dansiila fɔsa ai kana don a lɔ.#23.13 Sɛvɛli kɔlɔ dɔlu ka haya min la a kɔkan: 23.14

15«Gbalo yi ài yɛ, seliya kalanmɔɔlu ni Falisilu! Àilu filangafolu! Kamasɔlɔn ài yi taala duukolo fan bɛ lɔ ka kɔɔji tɛɛ, fɔsa mɔɔ kelen yi tube ka don àiya diina lɔ. Kɛɛ ài v'a latubela, ài y'a kɛla jahanamaden ne le ka timin àilu gbu la.

16«Gbalo yi ài yɛ, àilu ɲagbɛlu minu y'ài jɛlɛ kɛla ɲabila le. Ài vɛɛ ko ni mɔɔ dɔ k'a kalin lɔhɔlɔmabonba la, ko kalinni bɛlɛbɛlɛ tɛ wo le. Kɛɛ ni mɔɔ dɔ k'a kalin lɔhɔlɔmabonba kɔnɔ sanu la, ài vɛɛ ko wo tii ka kan k'a kalinnikan mafa. 17Àilu ɲagbɛ kundannu! Mindɛ le fisayanin? Sanu le fisayanin, baa lɔhɔlɔmabonba gbu, wo min yi sanu kɛla lɔhɔlɔma fen ne? 18Ài vɛɛ fana ko ni mɔɔ k'a kalin salakagbalan na, ko kalinni bɛlɛbɛlɛ tɛ wo le. Kɛɛ salaka min yi salakagbalan kɔkan, ni mɔɔ k'a kalin wo la, wo le yi kalinni bɛlɛbɛlɛ le. 19Àilu ɲagbɛlu! Mindɛ le fisayanin? Salaka le fisayanin, baa salakagbalan, wo min yi salaka kɛla lɔhɔlɔma fen ne? 20Ni mɔɔ k'a kalin salakagbalan na, fen fen si y'a kan, wo tii v'a kalin wo bɛ la fana. 21Ni mɔɔ k'a kalin lɔhɔlɔmabonba la, wo tii v'a kalin a la, ani Ala min siinin je. 22#Matiyu 5.34.Ni mɔɔ k'a kalin haijɛnɛ la, wo tii v'a kalin Ala ya masayasiifen na, ani Ala min siinin a lɔ.

23«Gbalo yi ài yɛ, seliya kalanmɔɔlu ni Falisilu! Àilu filangafolu! Ài àiya nanai ni àiya gbelelɔfen mɛsɛnmɛsɛnnin tɔ bɛ jaa bɔla, ka Ala ya seliyako kulugbɛlɛnnu to je: telenmandeya ni henandeya ani kankelentiiya. Ài tɛɛ ka kan ka seliya wolu mafa kunfɔlɔ le, k'a tɔ la wolu kɔkan. 24Àilu ɲagbɛlu, ài y'ài jɛlɛ kɛla ɲabila le le. Ài àiya minji masɛnɛla ka limɔɔ mɛsɛnnilu bɔ a lɔ, k'a talan ài yi ɲɔɔmɛ gbunɛ lakununna!

25«Gbalo yi ài yɛ, seliya kalanmɔɔlu ni Falisilu! Àilu filangafolu! Ài yi jiyafɛ ni tasa kɔkala makola kobɛn. Kɛɛ wolu kɔnɔlɔ fanin fen minu la, ài na wolu sɔlɔnna tɔɲɔli ni natabaya le lɔ. 26Ile Falisi ɲagbɛ! I yi jiyafɛ ni tasa kɔnɔlɔla le sɛnɛya kunfɔlɔ le, wo vɛ kɛla, a kɔkala fana yi sɛnɛyale.

27 # Kɛkolu 23.3. «Gbalo yi ài yɛ, seliya kalanmɔɔlu ni Falisilu! Àilu filangafolu! Ài kɛyine iwo kabulu minu kɔkala gbɛnin keinya le, k'a talan ai kɔnɔlɔ fanin mɔɔ kolo ni fen kɔsɔnin suu bɛ dɔ la. 28Wo boloɲa kelen ma, ài kɛnin mɔɔlu ɲana iwo telenmandelu, k'a talan ài kɔnɔlɔ fanin filangafoya ni koyon na.

29«Gbalo yi ài yɛ, seliya kalanmɔɔlu ni Falisilu! Àilu filangafolu! Ài yi kelalu kabulu lɔla, ani Ala ya mɔɔ telennin minu sanin, ài yi wolu sudoonyalu masilila ka lakeinya. 30Ài do vɛɛ: ‹Ni mɔ tɛɛ kɛ je mɔ bemanu ya waate lɔ, mɔ tɛɛ tɛ mɔ fɛ bila ai la kelalu faako lɔ.› 31Àilu gbu le ài jɛlɛkanu masele le wo lɔ, k'a fɔ ko kela faabalu bɔzɔn ne ài le. 32Wo le y'a ma, ài bemanu na min daminala, ài yi wo dafa! 33#Matiyu 3.7; 12.34; Luka 3.7.Àilu sa kɛwonnu! Àilu fɔnfɔnnidennu! Jahanama kolatɔn polotɔle ài ma di wo lɔ? 34Wo le y'a kɛla, ǹ'i kelalu lataala ài ma, ani hangilimalu, ani seliya kalanmɔɔlu. Ài kɛtɔ a dɔlu gbaanna kɔlɔman ma k'ai faa, k'a dɔlu gbasi gbusan na àiya Aladalibonnu la, ani k'ai jangata so ni solu la. 35Wo lɔ saa, mɔɔ telennin minu jeli vɛ bɔn dunuɲa, wo bɛ hakɛ bilatɔ ài kɔ, ka ta telenmande Habila ma haan fɔɔ ka na sii Balakiya denkɛ Zakaliya la, ài na min faala lɔhɔlɔmabonba ni salakagbalan wotɛ. 36Ǹ'i tuɲa fɔ ài yɛ, mɔɔ wolu bɛ faako hakɛ bilatɔ bi mɔɔlu kɔ.»

Isa ka kasi Jelusalɛmu ya ko lɔ teme

Luka 13.34-35

37«Ɛɛ Jelusalɛmu! Jelusalɛmu! Ile min ya mɔɔlu yi kelalu faala ka Ala ya kelalasebalu bon kawa la. A lɔɔ tɛɛ ǹ na siɲa siyama le k'ài ladɛn iwo sisɛ y'a dennu ladɛnna teme, k'ai doon a kawa kɔlɔ, kɛɛ ài do ma diɲa a ma. 38Ài y'a ye! Àiya bon lakolon totɔ ài bolo. 39Ǹ'a fɔ ài yɛ, ài ɲa tɛnala lala ǹ kan butu haan fɔɔ ài v'a fɔla lon min na, ko:

‹Duwawu yi wo le yɛ min yi nala mɔ Tii tɔɔ lɔ!› »

Currently Selected:

Matiyu 23: MBT2023

Highlight

Copy