Matiyu 19

Kawanili ka bɛn fulusako ma

Malɛkɛ 10.1-12

1Isa wɔlinin wo fɔla, a ka bɔ Galile ka taa Jude fan dɔ lɔ min yi Julidɛn kɔɔ kɔma. 2Jama ba ka bila a kɔ, a do ka jangalotɔlu lakɛnɛya je.

3Falisi dɔlu ka na Isa ma a lɔsumanko lɔ, ai vɛɛ: «A ladaanyine kɛ́ y'a moso bila ko bɛ lɔ?»

4Isa k'ai javi, a vɛɛ: «Min sɛvɛnin kitabu kɔnɔ, ài ma wo kalan? A sɛvɛnin ko dunuɲa dan waate lɔ, Dannimasa ka kɛ́ ni moso dan, ka ban 5k'a fɔ, a vɛɛ: ‹Wo le y'a ma, kɛ́ bɔtɔle a fa ni a ba fɛ, ka ale ni a moso dɛn, fɔsa ai mɔɔ fila yi kɛ falikolo kelen ne.› 6Ai tɛ jatela mɔɔ fila le butu, mafɔ falikolo kelen. Wo ma, Ala na minu ladɛnna k'ai kɛ kelen ne, mɔɔ suu suu kà wolu falan i ɲɔɔ ma.»

7 # Matiyu 5.31. Falisilu vɛɛ Isa yɛ kɔtunun: «Ni wo le, Nabi Musa na jamali dila mindɛ lɔ ko kɛ́ yi fulusa sɛvɛ di a moso ma, jani a a bila?»

8Isa k'ai javi, a vɛɛ: «Nabi Musa na diɲala ko ài y'ài mosolu bila ka bɛn àiya josokunja le ma. Niwotɛ, a damina lɔ a tɛɛ tɛ ten. 9#Matiyu 5.32; 1 Kolɛntikalu 7.10, 11.Kɛɛ ǹ'a fɔ ài yɛ, ni mɔɔ min k'a moso bila ka moso gbɛlɛ ta, k'a talan a moso kunfɔlɔ wo tɛɛ ma jalonya kɛ, wo tii vɛ jalonya kɛ.»

10Wo fɔ Isa bolo, a kɔbiladennu vɛɛ a yɛ: «Ni a yi ten ne kɛ́ ni a moso wotɛ, fulubaliya fisayanin wo lɔ feu!»

11Isa k'ai javi, a vɛɛ: «Mɔɔ bɛ tɛ se diɲala kuma wo ma, mafɔ Ala na a see dila minu ma. 12Sabu siyama le yi mɔɔlu bilala fulubaliya lɔ: a dɔlu sɔlɔnnin ten ne, a dɔlu fana ta yi adamadennu nɔ le le, a dɔgbɛlɛlu tɛ fulu kɛla ka bɛn haijɛnɛ masaya ko le ma. Ni mɔɔ min yi se diɲala min ma, wo tii yi diɲa a ma.»

Isa ka duwawu kɛ dennilu yɛ teme

Malɛkɛ 10.13-16; Luka 18.15-17

13Wo kɔ, mɔɔ dɔlu vɛ nala dennilu le Isa fɛ, fɔsa a a bolo la ai kɔkan ka duwawu kɛ ai yɛ, kɛɛ a kɔbiladennu ka mɔɔ wolu makuma. 14Isa do vɛɛ ai yɛ: «Ài y'a to dennilu yi na m̀ ma. Ài kà ai dansii, kamasɔlɔn mɔɔ minu kɛnin iwo denni, wolu fɛ yi haijɛnɛ masaya la.» 15Wo fɔ, a k'a bolo la dennilu kɔkan, ka duwawu kɛ ai yɛ, ka ban ka bɔ je.

Kɛ́ nafolotii ya ko

Malɛkɛ 10.17-31; Luka 18.18-30

16Lon dɔ, kɛ́ dɔ ka na Isa ma k'a maɲininga, a vɛɛ: «Kalanmɔɔ, ǹ ka kan ka koɲuma mindɛ le kɛ fɔsa ǹ'i niimaya banbali sɔlɔn?»

17Isa vɛɛ a yɛ: «Mindɛ y'a kɛla vɛ i yi m̀ maɲiningala ka bɛn koɲuma ko ma? Ala kelenpesa le ɲumayanin. Ni i y'a fɛ ka niimaya banbali sɔlɔn, i yi Ala ya seliyalu labato.»

18Kɛ́ vɛɛ: «Seliya mindɛlu?»

Isa k'a javi, a vɛɛ: «I kà mɔɔ faa, i kà jalonya kɛ, i kà suɲali kɛ, i kà faɲafɔ seleya di, 19i i fa ni i ba buɲa, ani i i siiɲɔɔ kanu iwo ile gbu.»

20Kavelen do vɛɛ a yɛ: «M̀'ɛ seliya wolu bɛ labato. Kɛɛ ǹ dɛsɛnin mindɛ la bene?»

21Isa k'a javi, a vɛɛ: «Ni i y'a fɛ iya ko bɛ da yi fa, i yi taa i bolofennu fele k'a wɔli lɔtala bolokolonnu wotɛ. Wo vɛ kɛla, nafolo ba kɛtɔ i bolo haijɛnɛ. Wo kɔ, i yi na, i yi bila ǹ kɔ.»

22Kavelen ka kuma wo mɛn mingɛ, a k'i kɔsei niilafin boloma, kamasɔlɔn a bolofennu walanin tɛɛ bubale.

23Wo kɛnin, Isa vɛɛ a kɔbiladennu yɛ: «Ǹ'i tuɲa fɔ ài yɛ, nafolotii donko gbeleyayine haijɛnɛ masaya lɔ! 24Ǹ'a fɔ ài yɛ kɔtunun, ka ɲɔɔmɛ latimin sɛɛlan woo la, wo nɔyayine ka timin nafolotii donko la Ala ya masaya lɔ.»

25A kɔbiladennu ka wo mɛn mingɛ, ai ka kawakoya kosɛvɛ, ai vɛɛ: «Jene yi se kisila wo lɔ?»

26Wo lɔ, Isa k'i ɲa kaa ai lɔ, k'a fɔ ai yɛ, a vɛɛ: «Wo ko tɛ se kɛla adamadennu bolo, kɛɛ ko bɛ yi sene kɛla Ala bolo.»

27Wo fɔ Isa bolo, Piyɛli do vɛɛ a yɛ: «Ǹu do? Mɔ vɛ ko bɛ to je ka bila i kɔ. Mɔ kɛtɔ mindɛ sɔlɔnna wo lɔ?»

28 # Matiyu 25.31; Luka 22.30. Isa vɛɛ a yɛ: «Ǹ'i tuɲa fɔ i yɛ, dunuɲa vɛ kɛla a kula le, Mɔɔnivin Tanin siitɔ aa masayasiifen nɔɔlɔnin nɔ. Àilu minu bilanin ǹ kɔ, àilu fana siitɔ masayasiifen tan ni fila (12) lɔ ka Bani Isilankalu ya kabila tan ni fila (12) ya kiti tɛɛ. 29Ni mɔɔ min ka aa bon to a kɔ, niwotɛ a badenmalu, niwotɛ a fa, niwotɛ a ba, niwotɛ a dennu, ani aa sɛnɛlu ka bɛn ǹa ko ma, wo vɛ kɛla, wo tii kɛtɔ wo ɲɔɔzii kɛmɛ (100) sɔlɔnna, ka niimaya banbali fana sɔlɔn. 30#Matiyu 20.16; Luka 13.30.Kɛɛ ɲafɛmɔɔ siyama kɛtɔ kɔfɛmɔɔ le le, ani kɔfɛmɔɔ siyama kɛtɔ ɲafɛmɔɔ le le.»

Currently Selected:

Matiyu 19: MBT2023

Highlight

Copy